Xcolel, chʌn chaʼlen wersa cheʼ bʌ tsaʼix a chʼʌmʌ jaʼ

 1. ¿Chuqui an i meleyob yonlel xcolelob cʼʌlʌl ili ora?

TI JUJUMPʼEJL jab yonlel xcolelob miʼ chʼʌmob jaʼ. ¿Yaʼ ba ochemet jaʼel? Mi yaʼʌchi, jiñi a wermañujob yicʼot Jehová wen tijicña miʼ yubiñob (Pr. 27:11). Ñaʼtancu pejtelel chuqui melbil a chaʼan cʼʌlʌl ili ora. Jumpʼejl ejemplo, tajol cabʌlix jab cajel a pejcan jiñi Biblia, i jiñi tsiʼ coltayet a ñop chaʼan i Tʼañʌch Dios. Pero jiñi ñumen ñuc bʌ i cʼʌjñibal jiñʌch cheʼ tsiʼ coltayet a cʌn yicʼot a cʼuxbin jiñi tsaʼ bʌ i yʌcʼʌ ti tsʼijbuntel. Tsaʼ wʌcʼʌ a bʌ ti Jehová yicʼot tsaʼ chʼʌmʌ jaʼ come maʼ wen cʼuxbin. ¡Weñʌch jiñi tsaʼ bʌ a mele (chaʼle)!

 2. ¿Chuqui mi caj laj qʼuel ti ili estudio?

² Miʼ mejlel la cʌl chaʼan cheʼ bʌ muʼto caj a chʼʌmjaʼ añʌch chuqui tac tsaʼ ñusa tsaʼ bʌ i yʌcʼʌ ti wocol jiñi muʼ bʌ a ñop. I muʼto caj i bej tilel yambʌ. Satanás mi caj i ñop i yʌqʼueñet a cʌy a cʼuxbin Jehová yicʼot chaʼan maʼ ñajtʼesan a bʌ tiʼ tojlel (Efes. 4:14). Mach a wʌqʼuen i mʌlbeñet. ¿Chuqui mi caj i coltañet chaʼan xucʼul maʼ wajñel ti Jehová yicʼot chaʼan maʼ tsʼʌctesan a tʼan cheʼ bʌ tsaʼ wʌcʼʌ a bʌ tiʼ tojlel? Yom maʼ bej chaʼlen wersa chaʼan maʼ ñumen taj majlel a ñaʼtʌbal (Heb. 6:1). Ti ili estudio mi caj laj qʼuel chuqui miʼ mejlel a mel.

 3. ¿Chuqui yom miʼ melob pejtelel jiñi xñoptʼañob cheʼ bʌ tsaʼix i chʼʌmʌyob jaʼ?

³ Juntiquil muʼ bʌ i chʼʌmjaʼ yom miʼ jacʼ jiñi ticʼojel tsaʼ bʌ i sube Pablo jiñi xñoptʼañob añoʼ bʌ ti Éfeso. Tiʼ subeyob chaʼan yom miʼ tajob i colel bajcheʼ juntiquil wen añix bʌ i ñaʼtʌbal (Efes. 4:13). Lajal bajcheʼ woli (choncol) i subeñob: «Yomʌch mi laʼ bej chaʼlen wersa». Pablo tsiʼ laji iliyi cheʼ bajcheʼ miʼ colel juntiquil alʌl. Juntiquil alʌl miʼ yʌqʼuen i yubin i tijicñʌyel i papá yicʼot i mamá, pero yomʌch miʼ colel majlel. Yom miʼ cʌy «jiñi i chaʼan tac bʌ alʌl» (1 Cor. 13:11). Cheʼʌch miʼ yujtel jaʼel tiʼ tojlel jiñi xñoptʼañob: Yomʌch miʼ bej colelob majlel o miʼ bej chaʼleñob wersa cheʼ bʌ tsaʼix i chʼʌmʌyob jaʼ. Laʼ laj qʼuel chuqui tac mi caj i coltañob.

 4. ¿Chuqui mi caj i coltañet chaʼan maʼ bej colel majlel o maʼ bej chaʼlen wersa, i chucoch? (Filipenses 1:9).

⁴ Chʌn pʼʌtʼesan a cʼuxbiya ti Jehová. Tsiquil chaʼan mucʼʌch a cʼuxbin Jehová, pero muʼto i mejlel a ñumen cʼuxbin. Jiñi apóstol Pablo tsiʼ yʌlʌ junchajp muʼ bʌ i mejlel lac mel, miʼ lac taj ti Filipenses 1:9 (pejcan). Pablo tsiʼ cʼajtibe Jehová chaʼan «miʼ ñumen pʼojlel majlel» i cʼuxbiya jiñi añoʼ bʌ ti Filipos. Ili miʼ pʌs chaʼan mucʼʌch i mejlel ti ñumen pʼʌtʼan jiñi laj cʼuxbiya. Pero yom mi lac taj jiñi tsʼʌcʌl bʌ lac ñaʼtʌbal yicʼot mi lac wen chʼʌmben i sujm. Cheʼ bʌ mi lac ñumen cʌn Jehová mi lac ñumen cʼuxbin, mi lac ñumen mulan jiñi i melbal yicʼot bajcheʼ yilal miʼ mel i yeʼtel (troñel). La com lac ñumen aqʼuen i tijicñʌyel i mach la comic la cʌqʼuen i chʼijyemlel. Mi lac chaʼlen wersa laj qʼuel chuqui jiñi muʼ bʌ i pijtan ti lac tojlel yicʼot chaʼan mi lac tsʼʌctesan.

5, 6. ¿Bajcheʼ yambʌ miʼ mejlel lac ñumen pʼʌtʼesan laj cʼuxbiya ti Jehová?

⁵ Yambʌ bajcheʼ miʼ mejlel lac ñumen cʼuxbin Jehová jiñʌch cheʼ bʌ mi laj cʌn Jesús, muʼ bʌ i pʌs ti wen bajcheʼ yilal i melbal (chaʼlibal) Jehová (Heb. 1:3). Junchajp bajcheʼ miʼ mejlel laj cʌn Jesús jiñʌch cheʼ bʌ mi lac chaʼlen ti estudiar jiñi Evangelio tac. ¿Ñʌmʌlet ba a pejcan jiñi Biblia ti jujumpʼejl qʼuin? Mi maxto añic, techex a mel. Cheʼ bʌ maʼ pejcan tsaʼ bʌ i mele yicʼot tsaʼ bʌ i yʌlʌ Jesús, wen qʼuele bajcheʼ yilal bʌ wiñic. Majqui jach tsaʼ mejli i lʌcʼtesan i bʌ tiʼ tojlel i maʼañic tsiʼ ñajtʼesa i bʌ tiʼ tojlel lac piʼʌlob, tsaʼto i ñochtayob jaʼel jiñi alʌlob (Mar. 10:13-16). Jiñi xcʌntʼañob i chaʼan tijicña tsiʼ yubiyob cheʼ bʌ yaʼañob yicʼot Jesús, jin chaʼan maʼañic tsiʼ bʌcʼñayob i yʌl chuqui miʼ ñaʼtañob (Mat. 16:22). Jesús cheʼ yilal bajcheʼ jiñi come cheʼʌch yilal jaʼel jiñi i Tat. Miʼ mulan i ñʌchʼtañonla i jin chaʼan miʼ mejlel lac pejcan ti oración i mi lac suben chuqui an ti lac pusicʼal. I maʼañic mi caj lac bʌcʼñan chaʼan lecoj chuqui mi caj i ñaʼtan ti lac tojlel. Miʼ cʼuxbiñonla yicʼot i wentajoñʌchla (1 Ped. 5:7).

⁶ Jesús tsiʼ pʼunta jiñi lac piʼʌlob. Jiñi apóstol Mateo tsiʼ yʌlʌ: «Cheʼ bʌ miʼ qʼuel jiñi lac piʼʌlob, miʼ wen pʼuntañob come ticʼlʌbilob yicʼot cʌybilob cheʼ bajcheʼ tiñʌmeʼ maʼañic bʌ majqui miʼ cʌntañob» (Mat. 9:36). ¿I bajcheʼ yilal jiñi lac piʼʌlob tiʼ wut Jehová? Jesús tsiʼ yʌlʌ tiʼ tojlel i Tat: «Maʼañic miʼ mulan cheʼ miʼ sajtel mi juntiquilic ili chutoʼ bʌ» (Mat. 18:14). ¡Wen tijicña mi la cubin cheʼ miʼ wen cʼuxbiñonla Jehová! Cheʼ bʌ mi lac ñumen cʌn Jesús, mi lac ñumen cʼuxbin Jehová.

 7. ¿Chucoch weñʌch cheʼ maʼ sujtel tiʼ yamigo jiñi hermanojob wen añobix bʌ i ñaʼtʌbal?

⁷ Añʌch chuqui yambʌ miʼ mejlel a mel chaʼan maʼ ñumen cʼuxbin Jehová i maʼ ñumen chaʼlen wersa. ¿Chuquiyes? Jiñʌch cheʼ maʼ sujtel tiʼ yamigo jiñi hermanojob wen añobix bʌ i ñaʼtʌbal ti a congregación. Ili hermanojob tijicñayob tiʼ pejtelel ora. Maʼañic miʼ chaʼ ñaʼtañob i bʌ chaʼan woli (yʌquel) i melbeñob i yeʼtel Jehová. Subeñob chaʼan miʼ subeñetob jiñi experiencia tac tajbiloʼ bʌ i chaʼan. Cheʼ bʌ an chuqui ñuc bʌ i cʼʌjñibal mi caj a mel, cʼajtibeñob ticʼojel tac. Jin chaʼan, jiñi Biblia miʼ yʌl: «An laj coltʌntel cheʼ cabʌl la caj tojʼesayajob» (Pr. 11:14).

 8. ¿Chuqui miʼ mejlel a mel mi an a duda chaʼan muʼ bʌ i yʌl jiñi Biblia?

⁸ Mach yomic an a duda. Cheʼ bajcheʼ tsaʼ laj qʼuele ti párrafo 2, Satanás mi caj i ñop i mʌctañet chaʼan maʼañic maʼ bej chaʼlen wersa. I junchajp muʼ bʌ i cʼʌn jiñʌch jiñi duda tac. Yom chaʼan maʼ cʌy a ñop muʼ bʌ i pʌs jiñi Biblia. Jumpʼejl ejemplo, ti jumpʼejl bʌ qʼuin mi caj a wubin ti ajlel chaʼan bʌ jiñi evolución, iliyi miʼ bibʼesʌben i cʼabaʼ Jehová. Tajol ti ñaxan maʼañic maʼ wen ñaʼtan chaʼan bʌ ili tema. Pero wʌle muqʼuix a pʌsbentel yaʼ ti escuela, tajol añʌch i sujmlel maʼ wubin. Pero yom maʼ ñaʼtan chaʼan maʼañic baʼ i qʼueleyob chaʼan añʌch juntiquil tsaʼ bʌ i mele (pʌtʌ) chuqui tac an. Cʼajtesan muʼ bʌ i yʌl Proverbios 18:17: «Toj miʼ lon qʼuejlel jini ñaxan to bʌ miʼ sub i bʌ tiʼ tojlel am bʌ i yeʼtel. Ti wiʼil tal i contra i tsictesan». ¿Chuqui mi laj cʌn ti ili versículo? Chaʼan mach yomic ti ora maʼ luʼ ñop chuqui maʼ subentel yaʼ ti escuela. Wen qʼuele chuqui miʼ yʌl jiñi Biblia. Pejcan jiñi yambʌ lac jun tac. Chaʼlen tʼan a wicʼotob jiñi hermanojob tsaʼ bʌ i ñopoyob ti ñaxan jaʼel ti jiñi evolución i cʼajtibeñob chuqui tsiʼ coltayob i ñop chaʼan añʌch majqui tsiʼ mele pejtelel chuqui an.b Iliyi mi caj i coltañet a ñaʼtan chuqui tac miʼ pʌs chaʼan añʌch majqui tsiʼ mele chuqui tac an.

 9. ¿Chuqui maʼ cʌn tiʼ tojlel Melissa?

⁹ Tsaʼ bʌ i colta juntiquil hermana i cʼabaʼ Melissa jiñʌch cheʼ tsiʼ chaʼle ti investigar majqui tsiʼ mele chuqui tac an.c Miʼ yʌl: «Jiñi maestrojob miʼ pʌsbeñetob jiñi evolución bajcheʼ junchajp i sujmʌch bʌ. Ti ñaxan tsaʼ c bʌcʼña c locʼsan jiñi c duda, come tsaʼ c ñaʼta chaʼan mi tsaʼ c mele jiñi investigación miʼ mejlel j cʌy c ñop Dios. Pero cheʼ jiñi tsaʼ caji c ñaʼtan chaʼan Jehová mach yomic cheʼ cheʼ jach mi lac lolom melben i yeʼtel. Jin chaʼan, tsaʼ caji c pejcan jiñi libro ¿Existe un Creador que se interese por nosotros?, jiñi folleto ¿Es la vida obra de un Creador?, yicʼot El origen de la vida. Cinco cuestiones dignas de análisis. Jiñi jiñʌch i cʼʌjñibal bʌ c chaʼan. ¡Chucochca maʼañic tsaʼ c sebe mele!».

10, 11. ¿Chuqui mi caj i coltañet chaʼan maʼañic maʼ mel jiñi mach bʌ wentaquic? (1 Tesalonicenses 4:3, 4).

¹⁰ Chaʼlen wersa chaʼan maʼ mʌlben jiñi mach tac bʌ weñic. Cheʼ bʌ colelto wolet, tajol mi caj a ñumen mulan jiñi piʼleya i tajol an muʼ bʌ caj i xiqʼuetob. I Satanás yom chaʼan maʼ mel chuqui yom jiñi a bʌcʼtal. ¿Chuqui mi caj i coltañet chaʼan maʼañic maʼ mel jiñi? (Pejcan 1 Tesalonicenses 4:3, 4). Cheʼ bʌ maʼ pejcan Jehová ti oración suben bajcheʼ yubil maʼ wubin yicʼot cʼajtiben a pʼʌtʌlel (Mat. 6:13). Cʼajtesan chaʼan yom i coltañet, mach yomic i lecoj ñaʼtan ti a tojlel (Sal. 103:13, 14). Jiñi Biblia miʼ mejlel i coltañet jaʼel. Melissa, tsaʼ bʌ ajli ti yambʌ párrafo, tsiʼ chaʼle wersa jaʼel chaʼan miʼ locʼsan tiʼ ñaʼtʌbal jiñi chaʼan tac bʌ tsʼiʼlel. Miʼ yʌl: «Tsaʼ bʌ i coltayon chaʼan mic chʌn chaʼlen wersa jiñʌch cheʼ mic pejcan jiñi Biblia ti jujumpʼejl qʼuin. Jiñi miʼ cʼajtesʌbeñon chaʼan i chaʼañon Jehová yicʼot chaʼan com lʌcʼʌl miʼ yajñel tic tojlel» (Sal. 119:9).

¹¹ Mach a bajñelic yom maʼ ñusan jiñi a wocol. Suben a papá o a mamá chuqui woli a ñusan. I sujmʌch chaʼan an chuqui wocol tac bʌ mi la cubin chaʼan mi lac sub, pero yomʌch mi lac mel. Melissa miʼ yʌl: «Tsaʼ j cʼajtibe Jehová chaʼan miʼ yʌqʼueñon c chʼejlel i tsaʼ c sube c papá chuqui woli c ñusan. Tsaʼ cubi c tijicñʌyel i cujil chaʼan Jehová tijicña yicʼoton».

12. ¿Chuqui mi caj i coltañet chaʼan weñʌch chuqui maʼ yajcan a mel?

¹² Acʼʌ chaʼan miʼ coltañet jiñi principio tac am bʌ ti Biblia. Cheʼ bʌ maʼ colel majlel muqʼuix caj a mejlel a ñumen yajcan chuqui a wom a mel. Pero cʼajtesan chaʼan cabʌlto chuqui maxto bʌ a wujilic. ¿Chuqui mi caj i coltañet chaʼan maʼañic maʼ mel muʼ bʌ i mejlel i ñajtʼesañet ti Jehová? (Pr. 22:3). Juntiquil hermana i cʼabaʼ Kari miʼ yʌl chuqui tsiʼ mele chaʼan miʼ yajcan i mel chuqui wem bʌ. Tsiʼ qʼuele chaʼan jiñi xñoptʼañob añobix bʌ i ñaʼtʌbal mach cʼʌñʌlic i chaʼañob jumpʼejl mandar muʼ bʌ i subeñob jujunchajp yom bʌ miʼ melob. Kari miʼ yʌl: «Mach cheʼ jach yom mic jacʼ jiñi mandar tac, yomʌch mic chʼʌmben i sujm chuqui miʼ ñaʼtan Jehová». Cheʼ bʌ maʼ pejcan jiñi Biblia, cʼajtiben a bʌ: «¿Chuqui miʼ pʌsbeñon ili relato chaʼan jiñi muʼ bʌ i ñaʼtan Jehová? ¿Am ba jumpʼejl principio muʼ bʌ i coltañon c yajcan chuqui wem bʌ? ¿Chuqui ti wenlel mi caj c taj mi mucʼʌch c jacʼ ili principio?» (Sal. 19:7; Is. 48:17, 18). Mi mucʼʌch a pejcan jiñi Biblia ti jujumpʼejl qʼuin i maʼ wen ñaʼtan jiñi principio tac muʼ bʌ i tilel, mach wen wocolic mi caj a wubin chaʼan maʼ yajcan a mel muʼ bʌ i mulan Jehová. Mi caj a qʼuel chaʼan mach cʼʌñʌlic a chaʼan jumpʼejl mandar chaʼan jujunchajp muʼ bʌ a mel, come muqʼuix caj a ñumen chʼʌmben i sujm chuqui miʼ ñaʼtan. Jiñi mi caj i pʌs chaʼan wolix a ñumen taj majlel a ñaʼtʌbal.

13. ¿Bajcheʼ miʼ mejlel i coltañetob jiñi wem bʌ a wamigojob? (Proverbios 13:20).

¹³ Sʌclan a wamigojob muʼ bʌ i cʼuxbiñob Jehová. Cheʼ bajcheʼ tsaʼ laj qʼuele ti párrafo 7, jiñi a wamigojob miʼ wen coltañetob chaʼan maʼ ñumen taj a ñaʼtʌbal (pejcan Proverbios 13:20). Qʼuele tsaʼ bʌ ujti tiʼ tojlel juntiquil hermana i cʼabaʼ Sara. Tsaʼ caji i sʌt i tijicñʌyel tiʼ melbentel i yeʼtel Jehová, pero añʌch chuqui tsiʼ colta. Sara miʼ yʌl: «Tsaʼ c taja wem bʌ camigojob cheʼ bʌ cʼʌjñibal c chaʼan. Tsaʼ c tempa c bʌ quicʼot juntiquil camiga ti jujumpʼejl semana chaʼan mic chaʼlen lon ti estudiar jiñi Lac Tsictesʌbentel, i yambʌ camiga tsiʼ coltayon chaʼan mi cʌcʼ j comentario ti tempa bʌ. Jiñi camigojob tsiʼ coltayoñob chaʼan mic ñumen chʼʌm ti ñuc jiñi estudio yicʼot jiñi oración. Cʼunteʼ cʼunteʼ tsaʼ c ñumen lʌcʼtesa c bʌ ti Jehová i tsaʼ c chaʼ taja jiñi c tijicñʌyel».

14. ¿Bajcheʼ tsiʼ taja wem bʌ i yamigojob Julien?

¹⁴ ¿Chuqui miʼ mejlel a mel chaʼan maʼ taj wem bʌ a wamigojob? Juntiquil hermano i cʼabaʼ Julien, ancianojix bʌ ili ora miʼ yʌl: «Cheʼ bʌ ñumen chʼitoñonto tsaʼ c taja wem bʌ camigojob ti subtʼan. Wen tijicñayob i tsiʼ coltayoñob chaʼan mic ñusan c bʌ ti subtʼan. Tsaʼ caji c ñaʼtan c ñumen melben i yeʼtel Jehová. Cheʼ jaʼel, tsaʼ j qʼuele chaʼan anto yom camigojob muʼ bʌ i ñumen coltañoñob, come jin jach tsaʼ c yajcayob bajcheʼ camigojob jiñi lajaloʼ bʌ i jabilel quicʼot. I cheʼ bʌ tsaʼ ochiyon ti Betel tsaʼ c ñumen taja wem bʌ camigojob. Tsiʼ coltayoñob c yajcan wem bʌ ñusaqʼuin tac, i jiñi tsiʼ ñumen lʌcʼtesayon ti Jehová».

15. ¿Chuqui ti ticʼojel tsaʼ aqʼuenti Timoteo? (2 Timoteo 2:20-22).

¹⁵ ¿Chuqui yom maʼ mel mi tsaʼ qʼuele chaʼan yaʼ ti congregación an juntiquil mach bʌ weñic i melbal? Jiñi apóstol Pablo yujil chaʼan yaʼ ti congregación cheʼ ti ñaxam bʌ siglo an mach bʌ ñoj weñic añob. Jin chaʼan tiʼ sube Timoteo chaʼan maʼañic miʼ ñochtañob (pejcan 2 Timoteo 2:20-22). Cheʼ i yamigojonla Jehová jiñʌch jiñi ñumen ñuc bʌ i cʼʌjñibal i tsaʼ lac chaʼle wersa chaʼan mi lac sujtel tiʼ yamigo. Jin chaʼan, mach la comic chaʼan an majqui miʼ ñajtʼesañonla tiʼ tojlel (Sal. 26:4).

16. ¿Chuqui ti meta tac maʼ mejlel a wʌqʼuen a bʌ?

¹⁶ Aqʼuen a bʌ wem bʌ meta tac. ¿Baqui tac bʌ? Jiñʌch jiñi muʼ bʌ i coltañet a ñumen ñop Dios yicʼot miʼ coltañet sujtel ti ñumen wem bʌ xñoptʼan (Efes. 3:16). Jumpʼejl ejemplo, maʼ mejlel a ñumen weñʼesan bajcheʼ maʼ chaʼlen estudio yicʼot bajcheʼ maʼ pejcan jiñi Biblia (Sal. 1:2, 3). O maʼ mejlel a ñumen chaʼlen oración yicʼot a chaʼlen wersa chaʼan loqʼuemʌch ti a pusicʼal chuqui maʼ wʌl. Tajol yom maʼ ñumen cʌntan jiñi a ñusaqʼuin yicʼot maʼ cʼʌn ti wen jiñi a tiempo (Efes. 5:15, 16). Jehová wen tijicña miʼ yubin cheʼ miʼ qʼuel chaʼan wolʌch a wen chaʼlen wersa.

17. ¿Chucoch mucʼʌch caj i coltañet cheʼ bʌ maʼ coltan yañoʼ bʌ?

¹⁷ Cheʼ bʌ maʼ coltan yañoʼ bʌ, maʼ sujtel ti ñumen wem bʌ xñoptʼan. Jesús tsiʼ yʌlʌ: «Ñumen an tijicñʌyel cheʼ mi la cʌcʼ i mach jiñic cheʼ mi lac chʼʌm» (Hech. 20:35). Mi mucʼʌch a cʼʌn jiñi a tiempo yicʼot a pʼʌtʌlel chaʼan maʼ coltan yañoʼ bʌ, cabʌl chuqui mi caj a taj. ¿Bajcheʼ tac miʼ mejlel a coltan yañoʼ bʌ? Jumpʼejl ejemplo, miʼ mejlel a coltañob tiʼ yeʼtel o chaʼan miʼ cʌñob i cʼʌn i celular o i tableta jiñi hermanojob cʼamoʼ bʌ o ñoxobix bʌ. Mi chʼʌmʌlix a chaʼan jaʼ, miʼ mejlel a wʌqʼuen a bʌ jiñi meta chaʼan maʼ sujtel ti siervo ministerial chaʼan maʼ coltan a wermañujob (Filip. 2:4). Cheʼ jaʼel, miʼ mejlel a subeñob wen tʼan jiñi maxto bʌ xñoptʼañobic, cheʼ bajcheʼ jiñi maʼ pʌsbeñob a cʼuxbiya (Mat. 9:36, 37). I mi mucʼʌch i mejlel, aqʼuen a bʌ jiñi meta chaʼan maʼ ñumen melben i yeʼtel Jehová.

18. ¿Bajcheʼ miʼ coltañet cheʼ maʼ ñumen melben i yeʼtel Jehová?

¹⁸ Cheʼ maʼ ñumen melben i yeʼtel Jehová miʼ coltañet chaʼan maʼ bej colel majlel. Mi tsaʼ sujtiyet ti precursor maʼ mejlel ti majlel ti jiñi Escuela chaʼan evangelizadores, ti Betel o chaʼan maʼ chaʼlen coltaya ti construcción. Juntiquil precursora i cʼabaʼ Kaitlyn miʼ yʌl: «Tsaʼ bʌ i wen coltayon cheʼ bʌ tsaʼix c chʼʌmʌ jaʼ jiñʌch cheʼ tsaʼ c chaʼle subtʼan quicʼot hermanajob yicʼot hermanojob ñumen añobix bʌ i ñaʼtʌbal. Tsiʼ coltayoñob chaʼan mic ñumen chaʼlen estudio yicʼot chaʼan mic sujtel ti ñumen wem bʌ xcʌntesa».

19. ¿Chuqui ti bendición tac mi caj a taj mi mucʼʌch a chʌn chaʼlen wersa?

¹⁹ Jehová mi caj i yʌqʼueñet cabʌl bendición mi mucʼʌch a bej chaʼlen wersa. Maʼañic mi caj a toʼol mel mach bʌ añic i cʼʌjñibal cheʼ bʌ chʼitoñetto (1 Juan 2:17). Maʼañic mi caj a taj wocol tac come maʼañic mi caj a mel chuqui mach bʌ weñic. Cheʼ jaʼel, wen mi caj a wajñel (Pr. 16:3). Jiñi wem bʌ a melbal mi caj i coltan pejtelel jiñi añoʼ bʌ ti congregación (1 Tim. 4:12). I jiñi ñumen ñuc bʌ i cʼʌjñibal jiñʌch cheʼ mi caj a taj a ñʌchʼtʌlel yicʼot a tijicñʌyel cheʼ a wujil chaʼan utsʼat miʼ qʼuelet Jehová yicʼot chaʼan a wamigo (Pr. 23:15, 16).