¿Chuqui miʼ mejlel a mel chaʼan tijicña miʼ yajñel a familia? (parte 1)

Jiñi tsijib ñujpuñemoʼ bʌ yomob chaʼan tiʼ pejtelel ora miʼ yubiñob jiñi tijicñʌyel tsaʼ bʌ i yubiyob cheʼ bʌ tsaʼ ñujpuñiyob, i mucʼʌch i mejlel. Cheʼʌch an i qʼueleyob jiñi lac piʼʌlob añix bʌ ora tsaʼ ñujpuñiyob i an i chaʼleyob wersa chaʼan miʼ jacʼob jiñi ticʼojel tac am bʌ ti Biblia.

1. ¿Chuqui ti ticʼojel miʼ yʌcʼ jiñi Biblia tiʼ tojlel jiñi ñoxiʼalob?

Jehová tsiʼ waʼchoco jiñi wiñic bajcheʼ i jol jiñi i familia (pejcan Efesios 5:23). Yom chaʼan jiñi muʼ bʌ i mel miʼ coltan jiñi i familia. Jiñi Biblia miʼ yʌcʼ ili ticʼojel tiʼ tojlelob: «Chʌn cʼuxbinla laʼ wijñam» (Efesios 5:25). ¿Chuqui yom i yʌl iliyi? Jiñi wiñic muʼ bʌ i cʼuxbin i yijñam wen jach bajcheʼ yilal miʼ mel tiʼ tojlel, cheʼ i bajñelob jach yicʼot cheʼ yaʼañob yicʼot yambʌlob. Miʼ cʌntan, miʼ qʼuel chuqui yom miʼ mel chaʼan tijicña miʼ yajñel yicʼot chaʼan miʼ yʌqʼuen chuqui i cʼʌjñibal i chaʼan (1 Timoteo 5:8). I ñumen ñuc bʌ i cʼʌjñibal, miʼ coltan chaʼan wen lʌcʼʌl miʼ yajñel yicʼot Jehová (Mateo 4:4). Jumpʼejl ejemplo, miʼ mejlel i mel oración yicʼot i yijñam yicʼot i tem pejcañob i Biblia. Mi jiñi wiñic miʼ cʌntan i yijñam yicʼot cʼuxbiya, lʌcʼʌl mi caj i chʌn ajñel yicʼot Jehová (pejcan 1 Pedro 3:7).

2. ¿Chuqui ti ticʼojel miʼ yʌcʼ jiñi Biblia tiʼ tojlel jiñi ijñamʌl?

Jiñi i Tʼan Dios miʼ suben jiñi ijñamʌl chaʼan «yom miʼ wen qʼuel ti ñuc i ñoxiʼal» (Efesios 5:33). ¿Bajcheʼ miʼ mejlel i mel? Miʼ mejlel i ñaʼtan jiñi wen tac bʌ i melbal (chaʼlibal) i ñoxiʼal yicʼot cheʼ miʼ chaʼlen wersa chaʼan miʼ cʌntan yicʼot jiñi i yalobilob. Cheʼ jaʼel, yom miʼ qʼuel ti ñuc chuqui miʼ ñaʼtan i mel jiñi i ñoxiʼal, wen jach bajcheʼ yom miʼ pejcan yicʼot chuqui miʼ yʌl tiʼ tojlel, i cheʼʌch yom miʼ mel anquese tajol mach lajalic chuqui miʼ ñopob.

3. ¿Bajcheʼ miʼ mejlel i pʼʌtʼesañob i ñujpuñel jiñi wiñic yicʼot xʼixic?

Jiñi Biblia miʼ yʌl tiʼ tojlel jiñi ñujpuñemoʼ bʌ: «Jiñi chaʼtiquilob mi caj i sujtelob ti juntiquil» (Mateo 19:5). Ili yom i yʌl chaʼan yom miʼ chaʼleñob wersa chaʼan maʼañic chuqui miʼ mejlel i ñajtʼesañob. Jin chaʼan, miʼ tem ñusañob qʼuin, miʼ subeñob i bʌ chuqui miʼ ñaʼtañob yicʼot bajcheʼ miʼ yubiñob i bʌ i wen jach bajcheʼ miʼ yʌlob. Cheʼ jaʼel, maʼañic chuqui yambʌ ñumen ñuc bʌ i cʼʌjñibal miʼ qʼuelob, cojach jiñi i ñujpuñelob yicʼot jiñi i chʼujutesʌntel Jehová. Cheʼ jaʼel, miʼ wen cʌntañob i bʌ chaʼan maʼañic yambʌ muʼ bʌ i mulañob.

LAʼ LAC ÑUMEN ÑAʼTAN

4. Ñoxiʼalob, cʼuxbinla yicʼot cʌntanla laʼ wijñam

VIDEO: Ñoxiʼalob, cʼuxbin laʼ wijñam cheʼ bajcheʼ mi laʼ bajñel cʼuxbin laʼ bʌ (9:53)

• ¿Bajcheʼ tac miʼ mejlel i pʌs jiñi ñoxiʼalob chaʼan miʼ cʼuxbiñob i yijñam yicʼot miʼ chʼʌmob ti ñuc?

Pejcanla Colosenses 3:12 i tem alʌla iliyi:

• ¿Bajcheʼ miʼ mejlel i pʌsob ili melbal tac jiñi wiñicob tiʼ tojlel i yijñamob?

5. Ijñamʌlob, cʼuxbinla yicʼot qʼuelela ti ñuc jiñi laʼ ñoxiʼal

Jiñi Biblia miʼ suben jiñi ijñamʌlob chaʼan yom miʼ qʼuelob ti ñuc jiñi i ñoxiʼalob mach yʌlʌyic mi mucʼʌch i melben i yeʼtel (troñel) Jehová o maʼañic. Pejcanla 1 Pedro 3:1, 2 i tem alʌla iliyi:

• Mi jiñi a ñoxiʼal maʼañic miʼ chʼujutesan Jehová, a womʌch chaʼan miʼ mel. ¿Chuqui mi caj i coltañet, jimba cheʼ maʼ suben tiʼ pejtelel ora i chaʼan bʌ Biblia o cheʼ maʼ pʌsben wem bʌ a melbal yicʼot chaʼan maʼ qʼuel ti ñuc? ¿Chucoch cheʼ maʼ ñaʼtan?

Jiñi ñoxiʼal yicʼot ijñamʌl miʼ mejlel i lajal yajcañob i mel chuqui wem bʌ. Anquese jiñi ijñamʌl mach tiʼ pejtelelic ora cheʼ mi caj i ñaʼtan bajcheʼ i ñoxiʼal, mucʼʌch i mejlel i yʌl chuqui miʼ ñaʼtan i wen jach bajcheʼ yom miʼ mel. Pero yom miʼ cʼajtesan chaʼan Jehová tsiʼ yʌqʼue tiʼ wenta jiñi i ñoxiʼal chaʼan miʼ ñaʼtan chuqui ñumen wen chaʼan jiñi i familia. I yom miʼ chaʼlen wersa chaʼan miʼ coltan i mel jiñi tsaʼ bʌ i ñaʼta. Cheʼ bajcheʼ iliyi, mi caj i coltan i familia chaʼan tijicña miʼ yajñel. Pejcanla 1 Pedro 3:3-5 i tem alʌla iliyi:

• ¿Bajcheʼ yubil miʼ yubin i bʌ Jehová cheʼ bʌ miʼ qʼuel chaʼan jiñi ijñamʌl mucʼʌch i qʼuel ti ñuc jiñi i ñoxiʼal?

6. Mucʼʌch i mejlel lac mʌlben jiñi lac wocol tac ti lac ñujpuñel

VIDEO: ¿Bajcheʼ yom mi lac pʼʌtʼesan lac ñujpuñel? (5:44)

• Cheʼ bajcheʼ tsaʼ qʼuele ti ili video, ¿chuqui tsaʼ caji i pʌs chaʼan ili xñujpuñel wolix i ñajtʼesañob i bʌ?

• ¿Chuqui tsiʼ meleyob chaʼan miʼ pʼʌtʼesañob i ñujpuñel?

Pejcanla 1 Corintios 10:24 yicʼot Colosenses 3:13. Cheʼ tsaʼix ujti laʼ pejcan jujumpʼejl versículo, tem alʌla iliyi:

• ¿Chucoch miʼ pʼʌtʼan lac ñujpuñel cheʼ mi lac jacʼ ili ticʼojel?

Jiñi Biblia miʼ yʌl chaʼan yom mi laj qʼuel lac bʌ ti ñuc. Yaʼ ochem jaʼel chaʼan jiñi ñujpuñemoʼ bʌ yom wen jach bajcheʼ miʼ pejcañob i bʌ yicʼot miʼ qʼuelob i bʌ ti ñuc. Pejcanla Romanos 12:10 i tem alʌla iliyi:

• ¿Yom ba miʼ pijtan jiñi wiñic o xʼixic chaʼan jin yom miʼ ñaxan pʌs jiñi i piʼʌl chaʼan miʼ qʼuel ti ñuc? ¿Chucoch cheʼ maʼ ñaʼtan bajcheʼ jiñi?

TSAʼ BɅ LAJ CɅÑɅ

Jiñi ñujpuñemoʼ bʌ tijicña miʼ mejlelob ti chumtʌl mi mucʼʌch i cʼuxbiñob i bʌ, miʼ qʼuelob i bʌ ti ñuc yicʼot miʼ jacʼob jiñi principio tac am bʌ ti Biblia.

¿Chuqui tsaʼ cʌñʌ?

• ¿Chuqui miʼ mejlel i mel jiñi ñoxiʼal chaʼan ñumen tijicña miʼ yajñel tiʼ ñujpuñel?

• ¿Chuqui miʼ mejlel i mel jiñi ijñamʌl chaʼan ñumen tijicña miʼ yajñel tiʼ ñujpuñel?

• Mi jatet ñujpuñemet, ¿chuqui ti principio miʼ mejlel i coltañet chaʼan maʼ pʼʌtʼesan a ñujpuñel?

CɅÑɅ YAN TAC BɅ

Qʼuele jiñi ticʼojel tac muʼ bʌ i mejlel i coltañet chaʼan tijicña maʼ chumtʌl a wicʼot a familia.

Tijicña miʼ mejlel ti chumtʌl a familia (Folleto)

Qʼuele jiñi video yicʼot bʌ música muʼ bʌ i pʌs chuqui ti bendición miʼ tajob jiñi ñujpuñemoʼ bʌ cheʼ miʼ jacʼob jiñi i ticʼojel Jehová.

Mij cʼuxbiñet (4:26)

Qʼuele chuqui yom i yʌl cheʼ bʌ jiñi ijñamʌl miʼ qʼuel ti ñuc jiñi i ñoxiʼal bajcheʼ i jol i familia.

«¿Chucoch jiñi xʼixic yom miʼ qʼuel ti ñuc jiñi i ñoxiʼal?» (Lac Tsictesʌbentel, 15 i chaʼan mayo, 2010)

Qʼuele bajcheʼ tsiʼ tojʼesa i wocol jumpʼejl xñujpuñel tsaʼ bʌ i chaʼle i bʌ ti divorciar.

Tiʼ coltaya Jehová tsaʼ chaʼ tojʼa lon c ñujpuñel (5:14)