¿Bajcheʼ miʼ cʌntañonla Jehová?

 1. ¿Chucoch Jesús tsiʼ cʼajtibe Jehová chaʼan miʼ cʌntʌben jiñi xcʌntʼañob i chaʼan?

TI JIÑI cojix bʌ acʼʌlel cheʼ bʌ Jesús wʌʼan ti Pañimil, tsaʼʌch i ñaʼta jiñi wocol muʼ bʌ caj i ñusañob jiñi xcʌntʼañob i chaʼan. Jesús miʼ wen cʼuxbin jiñi xcʌntʼañob i chaʼan, jin chaʼan tsiʼ cʼajtibe i Tat chaʼan miʼ cʌntañob tiʼ tojlel Satanás (Jn. 17:14, 15). Jesús yujil chaʼan cheʼ ba ora miʼ letsel ti panchan, Satanás maʼañic mi caj i ñʌjchʼel i ticʼlan jiñi muʼ bʌ i melbeñob i yeʼtel (troñel) Jehová. Ili miʼ yʌqʼueñonla lac ñaʼtan chaʼan jiñi i tejclum Jehová wersa yomʌch miʼ cʌntʌntel.

 2. ¿Chucoch la cujilʌch chaʼan Jehová mucʼʌch caj i jacʼ jiñi la coración?

² Jehová mucʼʌch i wen cʼuxbin i Yalobil, jin chaʼan tsaʼʌch i jacʼbe jiñi i yoración. Mi joñonla mi lac chaʼlen wersa lac mel muʼ bʌ i mulan Jehová, mucʼʌch caj i cʼuxbiñonla jaʼel i mi caj i jacʼbeñonla cheʼ bʌ mi laj cʼajtin chaʼan miʼ coltañonla yicʼot miʼ cʌntañonla. Jehová jiñʌch juntiquil lac Tat wen am bʌ i cʼuxbiya, jin chaʼan mucʼʌch i wen cʌntan jiñi i yalobilob. Cheʼ machic miʼ cʌntan, maʼañic miʼ yʌcʼ ti ñuc jiñi i cʼabaʼ.

 3. ¿Chucoch ñuc i cʼʌjñibal lac chaʼan cheʼ bʌ Jehová miʼ cʌntañonla?

³ Ili ora la com chaʼan Jehová miʼ wen cʌntañonla come Satanás tsaʼ chojqui jubel ila ti Pañimil i wen «cabʌl i michʼajel» (Ap. 12:12). Satanás an i yʌqʼueyob i ñop jiñi wiñicob xʼixicob (quixtañujob) chaʼan «utsʼat woliʼ melbeñob i yeʼtel Dios» cheʼ bʌ miʼ contrajiñoñobla (Jn. 16:2). Yambʌlob maʼañic miʼ ñopob Dios, i miʼ tsʼaʼleñoñobla come maʼañic mi lac mel cheʼ bajcheʼ miʼ mel ili pañimil (mulawil). Pero maʼañic mi lac bʌcʼñan come jiñi Biblia miʼ subeñonla: «Xucʼul lac Yum muʼ bʌ caj i xucʼchocoñetla. Mi caj i cʌntañetla baʼ ora miʼ yilʌbeñet laʼ pusicʼal jini xiba» (2 Ts. 3:3). Laʼ laj qʼuel chaʼchajp bajcheʼ Jehová miʼ cʌntañonla.

 4. Cheʼ bajcheʼ miʼ yʌl Efesios 6:13-17, ¿chuqui miʼ yʌqʼueñonla Jehová chaʼan mi laj cʌntan lac bʌ?

⁴ Jehová an i yʌqʼueyonla lac mʌctʌjib chaʼan mi laj cʌntan lac bʌ tiʼ tojlel Satanás (pejcan Efesios 6:13-17). Ili mʌctʌjib wen pʼʌtʌlʌch yicʼot mucʼʌch i wen cʌntañonla. Anquese cheʼʌchi, maʼañic i cʼʌjñibal mi maʼañic mi lac xoj jujunchajp am bʌ i chaʼan jiñi mʌctʌjib. Mi caj laj qʼuel chuqui i sujmlel jujunchajp am bʌ i chaʼan jiñi mʌctʌjib.

 5. ¿Chuqui yom i yʌl jiñi laj cʌjchi ñʌcʼ, i chucoch ñuc i cʼʌjñibal cheʼ bʌ mi lac xoj?

⁵ Jiñi laj cʌjchi ñʌcʼ jiñʌch i sujmlel am bʌ yaʼ ti Biblia. ¿Chucoch yomʌch xojol lac chaʼan? Come «yaʼ chʼoyol ti xiba pejtelel lot» (Jn. 8:44). Añix cabʌl jabil cajel i lotiñob «pejtel winicob ti pañimil», i añʌch mejli i lotiñob (Ap. 12:9). Pero jiñi i sujmlel am bʌ ti Biblia mucʼʌch i coltañonla chaʼan maʼañic mi lac yajlel tiʼ lot Satanás. ¿Bajcheʼ mi lac xoj jiñi laj cʌjchi ñʌcʼ? Jiñʌch cheʼ bʌ mi laj cʌn jiñi i sujmlel tiʼ tojlel Jehová, jiñʌch cheʼ mi lac chʼujutesan «ti espíritu ti isujm» yicʼot cheʼ wen chuqui tac mi lac mel (Jn. 4:24; Ef. 4:25; He. 13:18).

 6. ¿Chuqui jiñi i mʌctʌjib lac tajn, i chucoch ñuc i cʼʌjñibal mi lac xoj?

⁶ Jiñi lac bujc o jiñi i mʌctʌjib lac tajn jiñʌch jiñi mandar tac muʼ bʌ i yʌqʼueñonla Jehová. ¿Chucoch yom mi lac xoj iliyi? Juntiquil soldado wen ñuc i cʼʌjñibal i chaʼan jiñi i mʌctʌjib i tajn come mucʼʌch i wen coltan. Joñonla jaʼel, wen ñuc i cʼʌjñibal lac chaʼan jaʼel jiñi i mʌctʌjib lac tajn come miʼ coltañonla chaʼan jiñi mach tac bʌ weñic an ila ti pañimil maʼañic miʼ tʌcʼlan jiñi lac pusicʼal (Pr. 4:23). Jehová miʼ subeñonla chaʼan yom mi laj cʼuxbin yicʼot mi lac melben i yeʼtel tiʼ pejtelel lac pusicʼal (Mt. 22:36, 37). Jin chaʼan, Satanás miʼ ñop i yotsan ti lac pusicʼal jiñi i chaʼan tac bʌ pañimil, pero pejtelel iliyi Jehová miʼ tsʼaʼlen (Stg. 4:4; 1 Jn. 2:15, 16). I mi Satanás miʼ qʼuel chaʼan maʼañic woli (choncol) lac jacʼ yajlel ti mulil, mi caj i wersa xicʼonla.

 7. ¿Bajcheʼ mi lac xoj jiñi i mʌctʌjib lac tajn?

⁷ ¿Bajcheʼ mi lac xoj jiñi i mʌctʌjib lac tajn? Jiñʌch cheʼ mi lac chumtʌl cheʼ bajcheʼ miʼ subeñonla Jehová (Sal. 97:10). Tajol an muʼ bʌ i ñaʼtañob chaʼan jiñi i mandar tac Jehová maʼañic miʼ yʌcʼonla ti libre. Pero mi tsaʼ laj cʌyʌ lac jacʼ jiñi principio tac, lajalonla bajcheʼ juntiquil soldado muʼ bʌ i joch jiñi i mʌctʌjib i tajn come miʼ ñaʼtan chaʼan wen al. Ili maʼañic miʼ cajel lac mel come jiñi muʼ bʌ laj cʼuxbin Jehová mi laj qʼuel chaʼan jiñi i mandar mucʼʌch i coltañonla i mach wocolic mi la cubin (1 Jn. 5:3).

 8. ¿Chucoch yom chajpʌbil la coc chaʼan mi lac sub jiñi wen tʼan?

⁸ Pablo miʼ yʌl jaʼel chaʼan yom chajpʌbil la coc chaʼan mi lac sub jiñi wen tʼan. Jin chaʼan, tiʼ pejtelel ora yom chajpʌbilonla chaʼan mi lac chaʼlen subtʼan come miʼ pʼʌtʼesan lac ñopoñel cheʼ bʌ mi lac subeñob jiñi yambʌlob chaʼan bʌ jiñi Biblia. Miʼ wen tijicñesañonla cheʼ bʌ jiñi i testigojob Jehová añoʼ bʌ tiʼ pejtelel pañimil woli (yʌquel) i chaʼleñob wersa i chaʼleñob subtʼan. Jumpʼejl ejemplo, miʼ chaʼleñob subtʼan yaʼ tiʼ yeʼtel, ti escuela, ti choñoñibʌl tac, ti otot tac, cheʼ bʌ miʼ majlelob ti mʌñoñel, cheʼ bʌ miʼ julaʼtañob jiñi i familiajob mach bʌ testigojobic o cheʼ bʌ miʼ pejcañob mach bʌ i cʌñʌyobic, i cheʼ jaʼel miʼ sʌclañob bajcheʼ miʼ mejlelob ti subtʼan cheʼ bʌ maʼañic miʼ mejlelob ti loqʼuel tiʼ yotot. Mi juntiquil soldado miʼ joch i warach cheʼ bʌ an ti guerra, ora miʼ cajel i lojwel, maʼañic mi caj i mejlel i cʌntan i bʌ yicʼot maʼañic mi caj i mejlel i jacʼben i tʼan jiñi i yum. Jin chaʼan, mi joñonla mi laj cʌy subtʼan tiʼ caj lac bʌqʼuen, mach weñic chuqui mi caj i yujtel ti lac tojlel.

 9. ¿Chucoch yom an lac chaʼan jiñi lac mʌctʌjib ti laj cʼʌb?

⁹ Jiñi lac mʌctʌjib am bʌ ti laj cʼʌb jiñʌch lac ñopoñel ti Jehová come mi lac ñop chaʼan mi caj i mel pejtelel am bʌ i subeyonla. Yom mi lac chuc lac mʌctʌjib chaʼan mi laj cʌntan lac bʌ ti jiñi «i jalʌjb xiba woli bʌ ti lejmel i ñiʼ». Cheʼ bajcheʼ i cʌntesa tac jiñi apóstatajob, cheʼ bʌ mi lac wajlentel, cheʼ bʌ miʼ yʌlob mach bʌ weñic ti lac tojlel muʼ bʌ mejlel i cʼuñʼesañonla. Mi maʼañic lac ñopoñel, maʼañic mi caj lac jacʼben i tʼan Jehová cheʼ bʌ jiñi yambʌlob miʼ subeñoñobla lac mel mach bʌ weñic. Pero cheʼ bʌ mi laj coltan jiñi ñopol bʌ lac chaʼan yaʼ ti la queʼtel o ti escuela, jiñi lac mʌctʌjib chucul bʌ lac chaʼan ti laj cʼʌb woliʼ coltañonla (1 P. 3:15). Cheʼ bʌ maʼañic mi lac jacʼ jumpʼejl eʼtel baqui wen lets mi caj lac tojtʌl come mi caj i mʌctañonla lac melben i yeʼtel Jehová, jiñi lac mʌctʌjib chucul bʌ lac chaʼan ti laj cʼʌb woliʼ coltañonla (He. 13:5, 6). I cheʼ bʌ xucʼul mi la cajñel cheʼ bʌ woli laj contrajintel, jiñi lac mʌctʌjib chucul bʌ lac chaʼan ti laj cʼʌb woliʼ coltañonla (1 Ts. 2:2).

10. ¿Chuqui jiñi mʌctʌjib am bʌ ti lac jol, i chucoch ñuc i cʼʌjñibal cheʼ bʌ mi lac xoj?

¹⁰ Jiñi i mʌctʌjib lac jol jiñʌch lac pijtaya muʼ bʌ i yʌqʼueñonla Jehová. Jehová miʼ yʌqʼueñonla lac pijtaya chaʼan mi caj i coltañonla tiʼ pʼʌtʌlel jiñi chʌmel (sajtel) yicʼot chaʼan mi caj i yʌqʼueñonla cabʌl bendición mi mucʼʌch lac melben i yeʼtel (1 Ts. 5:8, TNM; 1 Ti. 4:10; Tit. 1:1, 2). Lajal bajcheʼ jiñi casco miʼ mʌctʌben i jol juntiquil soldado, jiñi lac pijtaya chaʼan bʌ laj coltʌntel miʼ cʌntan chuqui mi lac ñaʼtan. ¿Bajcheʼ? Jiñʌch cheʼ bʌ miʼ coltañonla lac xucʼchocon lac pensar ti jiñi wʌn albil bʌ i chaʼan Dios yicʼot chaʼan wen jach mi laj qʼuel jiñi wocol muʼ bʌ lac ñusan. ¿Bajcheʼ mi lac xoj jiñi i mʌctʌjib lac jol? Jiñʌch cheʼ bʌ mi lac lajiben i pensar Jehová. Jumpʼejl ejemplo, mi la cʌcʼ lac pijtaya ti Dios i mach yaʼic ti jiñi ‹chubʌʼañʌl yujil bʌ jilel› (Sal. 26:2; 104:34; 1 Ti. 6:17).

11. ¿Chuqui jiñi espada, i chucoch ñuc i cʼʌjñibal cheʼ bʌ mi laj cʼʌn?

¹¹ Jiñi espada jiñʌch jiñi Biblia am bʌ i pʼʌtʌlel chaʼan miʼ jamben i wut juntiquil quixtañu cheʼ bʌ an lotintel, chaʼan maʼañix miʼ jacʼ jiñi mach bʌ i sujmic cʌntesa tac yicʼot chaʼan miʼ cʌy jiñi mach bʌ weñic (2 Co. 10:4, 5; 2 Ti. 3:16, 17; He. 4:12). ¿Bajcheʼ mi laj cʌn laj cʼʌn ti wen jiñi Biblia? Jiñʌch cheʼ mi lac bajñel chaʼlen estudio yicʼot cheʼ bʌ miʼ cʌntesañonla jiñi i yorganización Jehová (2 Ti. 2:15). Pero an yambʌ muʼ bʌ i yʌqʼueñonla Jehová chaʼan mi laj cʌntan lac bʌ. Laʼ laj qʼuel.

12. ¿Chucoch ñuc i cʼʌjñibal lac chaʼan i coltaya jiñi hermanojob?

¹² Cheʼ bajcheʼ juntiquil soldado wersa yom i coltaya jiñi i piʼʌlob chaʼan miʼ mejlel i mʌlben (jotben) yonlel soldadojob, joñonla jaʼel wersa la com i coltaya jiñi la quermañujob chaʼan miʼ mejlel lac mʌlben Satanás yicʼot jiñi i chaʼañoʼ bʌ. Jehová an i yʌqʼueyonla cabʌl hermanojob chaʼan miʼ coltañonla (1 P. 2:17).

13. Cheʼ bajcheʼ miʼ yʌl Hebreos 10:24, 25, ¿bajcheʼ miʼ coltañonla jiñi tempa bʌ tac?

¹³ Junchajp bajcheʼ miʼ coltañoñobla jiñi hermanojob jiñʌch cheʼ bʌ mi la cajñel ti tempa bʌ (pejcan Hebreos 10:24, 25). Ti lac pejtelel miʼ mejlel i cʼotel la cubin laj cʼunlel, pero cheʼ bʌ mi la cajñel ti tempa bʌ mi lac taj lac pʼʌtʌlel. Jiñi comentario tac, jiñi demostración tac yicʼot jiñi discurso tac muʼ bʌ i ñusʌntel, miʼ ñuqʼuesan lac pusicʼal chaʼan mi lac chʌn melben i yeʼtel Jehová. Cheʼ jaʼel, miʼ chaʼ pʼʌtʼesañonla cheʼ bʌ mi lac chaʼlen tʼan la quicʼot jiñi la quermañujob yaʼ ti tempa bʌ tac (1 Ts. 5:14). I miʼ mejlel la cubin lac tijicñʌyel jaʼel cheʼ bʌ mi laj coltan jiñi la quermañujob (Hch. 20:35; Ro. 1:11, 12). Cheʼ jaʼel, yaʼ ti lac tempa bʌ tac mi laj cʌntesʌntel bajcheʼ miʼ mejlel lac ñumen weñʼesan lac subtʼan yicʼot jiñi laj cʌntesa. Jumpʼejl ejemplo, mi laj cʌntesʌntel bajcheʼ miʼ mejlel laj cʼʌn ti wen jiñi lac jun tac yicʼot jiñi video tac am bʌ yaʼ ti la queʼtijib chaʼan bʌ cʌntesa. Jin chaʼan, la lac wen chajpan lac bʌ ti jiñi tempa bʌ tac, la lac wen ñʌchʼtan muʼ bʌ i yʌjlel yaʼi yicʼot laʼ lac mel cheʼ bajcheʼ mi lac subentel. Mi cheʼʌch mi lac mel, chajpʌbilonla mi caj la cajñel yicʼot mi caj lac sujtel ti «xucʼul bʌ soldado i chaʼan Jesucristo» (2 Ti. 2:3).

14. ¿Baqui bʌ yambʌ coltaya an i yʌqʼueyonla Jehová?

¹⁴ Cheʼ jaʼel, an lac chaʼan i coltaya yonlel ángelob wen pʼʌtʌloʼ bʌ. ¿Cʼajal ba lac chaʼan jaytiquil soldadojob tsiʼ jisa juntiquil ángel? Mi cheʼʌchi, ¿muʼ ba mejlel lac ñaʼtan bajcheʼ cʼamel i pʼʌtʌlelob cheʼ bʌ miʼ tempañob i bʌ jiñi ángelob? (Is. 37:36). Maʼañic majqui miʼ mejlel i lajiben jiñi i pʼʌtʌlel jiñi i yángelob Jehová. La cujil chaʼan Jehová maʼañic i pʼisol i pʼʌtʌlel, jin chaʼan anquese yonlel jiñi laj contrajob maʼañic mi caj i mʌlbeñoñobla come an la quicʼot Jehová (Jue. 6:16). Iliyi yom wen cʼajal lac chaʼan cheʼ bʌ cʼun mi la cubin lac bʌ tiʼ caj juntiquil lac piʼʌl ti eʼtel, ti escuela o juntiquil lac familia mach bʌ testigojic miʼ subeñonla o miʼ melbeñonla mach bʌ weñic. Laʼ laj cʼajtesan chaʼan an la quicʼot Jehová i chaʼan mach lac bajñelic.

15. Cheʼ bajcheʼ miʼ yʌl Isaías 54:15, 17, ¿chucoch maʼañic majqui miʼ mejlel i mʌctan chaʼan jiñi i wiñicob Dios miʼ chaʼleñob subtʼan?

¹⁵ ¿Chucoch jiñi i pañimil Satanás miʼ wen tsʼaʼleñonla? Come maʼañic mi la cotsan lac bʌ ti política yicʼot maʼañic mi lac majlel ti guerra. Mi la cʌcʼ ti cʌñol i cʼabaʼ Dios, mi lac jacʼben jiñi i mandar tac yicʼot mi lac sub ñumel chaʼan cojach jiñi i Yumʌntel Dios muʼ bʌ caj i chʼʌm tilel jiñi ñʌchʼtʌlel. I chaʼan jiñi i pañimil Satanás lʌcʼʌlix chaʼan mi caj i jisʌntel. Cheʼ jaʼel, mi lac sub chaʼan Satanás jiñʌch juntiquil xlot yicʼot juntiquil jontol bʌ xtsʌnsa (Jn. 8:44). Satanás yicʼot jiñi i wiñicob maʼañic baqui ora mi caj i mejlel i mʌctañoñobla. Mi caj lac chʌn chaʼlen wersa la cʌqʼuen i ñuclel Jehová. Anquese Satanás wen an i pʼʌtʌlel, maʼañic an mejlem i mʌctan chaʼan jiñi wen tʼan miʼ yubintel tiʼ pejtelel pañimil come Jehová woliʼ cʌntañonla (pejcan Isaías 54:15, 17).

16. ¿Chuqui mi caj i mel Jehová chaʼan miʼ coltan jiñi i wiñicob ti jiñi ñuc bʌ wocol?

¹⁶ Ti jiñi ñuc bʌ wocol, wen utsʼatax bajcheʼ mi caj i coltañonla Jehová. Ñaxam bʌ, jiñʌch cheʼ bʌ mi caj i cʼʌn «jini reyob ti pañimil» chaʼan miʼ jisan pejtelel jiñi mach bʌ i sujmic ñopbalʌl (Ap. 17:16-18; 18:2, 4). I chaʼpʼejlel jiñʌch cheʼ bʌ mi caj i jisan pejtelel jiñi muʼ bʌ i coltañob Satanás ti jiñi Armagedón (Ap. 7:9, 10; 16:14, 16).

17. ¿Chucoch yom lʌcʼʌl mi la cajñel tiʼ tojlel Jehová?

¹⁷ Mi lʌcʼʌl mi la cajñel tiʼ tojlel Jehová, Satanás mach mejlic i yʌqʼueñonla wocol muʼ bʌ mejlel i jalijel tiʼ pejtelel ora. La cujil chaʼan jiñʌch Satanás muʼ bʌ caj i junyajlel jisʌntel (Ro. 16:20). Jin chaʼan, laʼ lac xoj jiñi lac mʌctʌjib i mach lac wis joch. Mach lac bajñel chaʼlen guerra la quicʼot Satanás yicʼot ili i pañimil. Laʼ laj coltan jiñi la quermañujob yicʼot laʼ lac mel muʼ bʌ i subeñonla Jehová. Mi cheʼʌch mi lac mel, jiñi lac Tat am bʌ ti panchan mi caj i pʼʌtʼesañonla yicʼot mi caj i cʌntañonla (Is. 41:10).