¿Muʼ ba lac chʼʌmben isujm chaʼan yom mi laj colel majlel tiʼ chaʼan bʌ Dios?

1, 2. a) ¿Bajcheʼ tsʼʌctiyem Isaías 60:22 ti ili cojix bʌ qʼuin? b) ¿Chuqui yom ti jiñi jumpʼejl parte i yorganización Dios am bʌ wʌʼ ti Pañimil?

«JINI mach bʌ ñuquic mi caj i pʼojlel ti jumpʼejl mil. Jini jumpʼejl alʌ colonia mi caj i colel ti colem tejclum» (Isaías 60:22). Ili profecía woli (choncol) i tsʼʌctiyel ti ili cojix bʌ qʼuin. Jumpʼejl ejemplo, cheʼ ti jabil 2015 añix 8 millón 220 mil 105 i testigojob Jehová woliyoʼ bʌ ti subtʼan tiʼ petol pañimil (mulawil). Jehová tsiʼ yʌlʌ bajcheʼ mi caj i colel i tejclum: «Joñon laʼ Yumon. Mi caj c tsʼʌctesan cheʼ i yorajlelix». Ili yom i yʌl chaʼan ñumento mi caj lac taj la queʼtel (lac troñel). ¿Wolix (yʌquelix) ba lac ñumen acʼ lac bʌ tiʼ subol jiñi wen tʼan chaʼan Yumʌntel? Cabʌl hermanojob ochemob bajcheʼ precursor regular o auxiliar. An tsaʼix bʌ majliyob ti chumtʌl ti yambʌ parte chaʼan miʼ chaʼleñob coltaya ti subtʼan. Yañoʼ bʌ woliyob ti tsʌts bʌ eʼtel tiʼ melol i Yotlel Tempa bʌ tac.

² Ti jujumpʼejl jab miʼ tejchel cheʼ bʌ 2,000 congregación. Yom an ancianojob yicʼot siervo ministerial ti jiñi congregación tac. Jin chaʼan, ti jujumpʼejl jab yom cabʌl siervo ministerial i jiñi siervo ministerial miʼ sujtelob ti anciano. Wen tsiquil chaʼan ti lac pejtelel yom ‹mi lac chaʼliben i yeʼtel lac Yum›, mach yʌlʌlic mi hermanojonla o hermanajonla (1 Corintios 15:58).

3, 4. ¿Chuqui miʼ mejlel lac ñaʼtan tiʼ tajol tiʼ chaʼan bʌ Dios?

³ (Pejcan 1 Timoteo 3:1). Jiñi apóstol Pablo tsiʼ yʌqʼue i tijicñʌyel jiñi hermanojob woli bʌ i ñopob i taj i yeʼtel ti congregación. Tsaʼ bʌ i yʌlʌ Pablo miʼ yʌqʼueñonla lac ñaʼtan juntiquil muʼ bʌ ti wersa o muʼto bʌ i sʌtsʼ i cʼʌb cheʼ an chuqui yom i taj. Laʼ lac ñaʼtan chaʼan juntiquil hermano yom ochel bajcheʼ siervo ministerial. Tajol miʼ cʌn i bʌ chaʼan yom to miʼ chaʼlen wersa i taj wen tac bʌ i melbal bajcheʼ xñoptʼan. Cheʼ bʌ tsaʼix waʼchoconti bajcheʼ siervo ministerial, mi caj i bej chaʼlen wersa i tsʼʌctesan muʼ bʌ i cʼajtintel chaʼan majqui yom ochel ti anciano.

⁴ An hermanojob woli bʌ i qʼuextañob i melbal chaʼan miʼ ñumen melbeñob i yeʼtel Jehová. Jumpʼejl ejemplo, tajol yomob ochel bajcheʼ precursor, majlel ti eʼtel ti Betel o tiʼ melol i Yotlel Tempa bʌ tac. Laʼ laj qʼuel bajcheʼ miʼ mejlel i coltañonla jiñi Biblia chaʼan mi lac bej cʼʌjquel tiʼ chaʼan bʌ Dios.

 5. ¿Bajcheʼ miʼ mejlel i cʼʌñob i cʼocʼlel yicʼot i pʼʌtʌlel jiñi xcolelob chaʼan miʼ coltañob jiñi Yumʌntel?

⁵ Jiñi xcolelob añob i cʼocʼlel yicʼot i pʼʌtʌlel, jin chaʼan cabʌl chuqui miʼ mejlel i melob tiʼ yeʼtel Jehová (pejcan Proverbios 20:29). An xcolelob añoʼ bʌ ti Betel muʼ bʌ i chaʼleñob ti imprimir yicʼot miʼ melob libro tac. Cabʌlob jaʼel miʼ chaʼleñob coltaya tiʼ melol o miʼ tojʼesañob i Yotlel Tempa bʌ tac. Yañoʼ bʌ miʼ coltañob jiñi wiñicob xʼixicob (quixtañujob) tsaʼ bʌ i ñusayob icʼ jaʼal o yan tac bʌ wocol. I an precursorob muʼ bʌ i cʌñob yambʌ tʼan o miʼ majlelob ti subtʼan ti yan tac bʌ tejclum.

6-8. a) ¿Chuqui tsiʼ colta juntiquil xcolel chaʼan utsʼat miʼ qʼuel i yeʼtel ti Dios, i chuqui tsiʼ taja? b) ¿Bajcheʼ miʼ mejlel lac ñaʼtan chaʼan Jehová weñʌch?

⁶ Anquese mi laj cʼuxbin Jehová i la com la cʌqʼuen chuqui wen, tajol lajal mi la cubin lac bʌ bajcheʼ juntiquil hermano i cʼabaʼ Aarón. Lon yom i taj i tijicñʌyel tiʼ melol i yeʼtel Jehová, pero maʼañic miʼ mejlel. Cʼʌlʌl cheʼ saj alob to miʼ yajñel ti tempa bʌ tac yicʼot ti subtʼan, pero maʼañic miʼ mulan. ¿Chuqui tsiʼ mele?

⁷ Tsiʼ chaʼle wersa i pejcan jiñi Biblia ti jujumpʼejl qʼuin, i chajpan i bʌ chaʼan jiñi tempa bʌ tac yicʼot i yʌcʼ i comentario. Tsaʼ caji i ñumen mel oración jaʼel. Jin tacʌch tsaʼ bʌ i colta chaʼan miʼ colel tiʼ chaʼan bʌ Dios. Tsiʼ ñumen cʌñʌ Jehová i tsaʼ caji i ñumen cʼuxbin. Cheʼʌch tsiʼ wen ubi i tijicñʌyel. Tsaʼ ochi bajcheʼ precursor, tsiʼ chaʼle coltaya baqui tsaʼ tajle ti wocol hermanojob tiʼ caj icʼ jaʼal i tsaʼ majli ti subtʼan ti yambʌ país. Waʼli añix bajcheʼ anciano yicʼot an ti Betel. ¿Bajcheʼ yubil miʼ yubin i bʌ? Qʼuelbil i chaʼan miʼ yʌl chaʼan «utsʼat lac Yum». Cheʼ jaʼel, miʼ yʌl chaʼan an i bet tiʼ tojlel Jehová i yom i ñumen melben i yeʼtel. Yujil chaʼan jiñʌch muʼ bʌ i ñumen aqʼuen bendición.

⁸ Juntiquil tsaʼ bʌ i tsʼijbu jumpʼejl salmo tsiʼ yʌlʌ: «Ñopola utsʼat lac Yum». I tsiʼ yʌlʌ: «Jini muʼ bʌ i sajcan lac Yum, mi caj i taj pejtel chuqui tac wen» (pejcan Salmo 34:8-10). Tijicñayonla cheʼ mi lac ñumen acʼ lac bʌ tiʼ melol i yeʼtel Jehová come jiñʌch muʼ bʌ i mulan. I mucʼʌch caj i cʌntañonla.

9, 10. ¿Chucoch i cʼʌjñibalʌch cheʼ la cujil pijt?

⁹ Tajol la com lac ñumen melben i yeʼtel Jehová. Pero ¿ixcu mi añix ora woli lac pijtan chaʼan mi la cʌqʼuentel jumpʼejl eʼtel yaʼ ti congregación o miʼ qʼuextʌyel bajcheʼ añonla? Mi cheʼ mi la cujtel, yom la cujil pijt (Miqueas 7:7). Tajol Jehová miʼ yʌcʼ chaʼan cheʼʌch miʼ yujtel. Pero yom mi lac ñop chaʼan tiʼ pejtelel ora mi caj i coltañonla. Laʼ lac ñaʼtan tiʼ tojlel Abraham. Jehová tsiʼ yʌqʼue i tʼan chaʼan mi caj i taj i yalobil, pero cabʌl to jab tsaʼ ñumi chaʼan miʼ yilan pañimil (chʼocʼan) Isaac. Abraham tsiʼ pʌsʌ chaʼan yujil pijt yicʼot maʼañic tsiʼ sʌtʌ i ñopoñel (chʼujbiya) ti Jehová (Génesis 15:3, 4; 21:5; Hebreos 6:12-15).

¹⁰ Tiʼ sujm, wocolʌch cheʼ an chuqui mi lac pijtan (Proverbios 13:12). Pero mi tsaʼ caji laj cʌlʌx ñaʼtan jiñi, mi caj lac lujbʼan. Mi an i yorajlel lac chaʼan, yom mi laj cʼʌn chaʼan mi lac taj wen tac bʌ lac melbal chaʼan wen mi lac mel la queʼtel yaʼ ti congregación. Laʼ laj qʼuel uxchajp chuqui miʼ mejlel lac mel.

11. a) ¿Baqui tac bʌ lac melbal miʼ mejlel lac taj? b) ¿Chucoch i cʼʌjñibalʌch cheʼ mi lac taj?

¹¹ Laʼ lac taj wen tac bʌ lac melbal. Cheʼ mi lac pejcan jiñi Biblia yicʼot mi lac ñaʼtan chuqui miʼ yʌl, mi caj lac taj lac ñaʼtʌbal, wen tsiquil chuqui mi caj lac ñaʼtan yicʼot wen chuqui mi caj lac mel. Ñuc i cʼʌjñibal cheʼ jiñi hermanojob miʼ pʌsob ili wen tac bʌ melbalʌl chaʼan miʼ cʌntañob jiñi congregación (Proverbios 1:1-4; Tito 1:7-9). Cheʼ mi lac pejcan jiñi Biblia, mi caj lac taj laj qʼuel chuqui miʼ ñaʼtan Jehová chaʼan cabʌl temaj. I jiñi muʼ bʌ laj cʌn, miʼ mejlel laj cʼʌn ti jujumpʼejl qʼuin chaʼan mi lac ñaʼtan chuqui utsʼat tiʼ wut. Jumpʼejl ejemplo, mi caj lac ñaʼtan bajcheʼ yom mi laj qʼuel yañoʼ bʌ, i cʼʌñol taqʼuin, bajcheʼ yom lac pislel yicʼot jiñi ñusaqʼuin tac.

12. ¿Bajcheʼ miʼ mejlelob i pʌs jiñi añoʼ bʌ ti congregación chaʼan mucʼʌch i mejlelob ti aqʼuentel jumpʼejl eʼtel?

¹² Yom mi lac chaʼlen wersa chaʼan wen mi lac mel jiñi eʼtel muʼ bʌ la cʌqʼuentel. Cheʼ bʌ jiñi i tejclum Dios woliʼ chaʼ melob jiñi templo, Nehemías tsiʼ sʌcla wiñicob chaʼan miʼ coltañob i mel cabʌl eʼtel. ¿Majqui tsiʼ yajcayob? Jiñʌch jiñi wem bʌ miʼ qʼuejlelob. Nehemías yujil chaʼan mucʼʌch i cʼuxbiñob Dios yicʼot chaʼan wen mi caj i melob jiñi eʼtel muʼ bʌ i yʌqʼuentelob (Nehemías 7:2; 13:12, 13). Cheʼʌch miʼ yujtel ili ora. Cheʼ bʌ xucʼul juntiquil hermano yicʼot tsʌts miʼ chaʼlen eʼtel, wen mi caj i qʼuejlel. Cheʼ jiñi, tajol ñumento mi caj i yʌqʼuentel i yeʼtel (1 Corintios 4:2). Yom mi lac tsʼʌctesan ti wen jiñi eʼtel muʼ bʌ la cʌqʼuentel, mach yʌlʌlic mi wiñiconla o xʼixiconla (pejcan 1 Timoteo 5:25).

13. ¿Bajcheʼ miʼ mejlel lac lajin José cheʼ bʌ an majqui miʼ mel mach bʌ weñic ti lac tojlel?

¹³ Laʼ lac sʌclan laj coltʌntel ti Jehová. Mi an majqui miʼ mel ti lac tojlel mach bʌ utsʼatic, ¿chuqui miʼ mejlel lac mel? Miʼ mejlel lac suben bajcheʼ yubil mi la cubin lac bʌ. Pero mi tsʌtsonla i mi lac wersa al chaʼ jin mach weñic tsaʼ bʌ i mele, tajol ñumento miʼ tejchel wocol. Laʼ lac ñaʼtan tiʼ tojlel José. Mach weñic chuqui tsaʼ melbenti tiʼ yerañob, ti wiʼil tsaʼ jopʼbenti i mul yicʼot tsaʼ otsʌnti ti cárcel. Pero tsiʼ sʌcla i coltʌntel ti Jehová. Tsiʼ ñaʼta jiñi wʌn albil bʌ i chaʼan Dios yicʼot xucʼul tsaʼ ajñi (Salmo 105:19). Cheʼ tsiʼ ñusa tsʌts bʌ wocol tac, tsiʼ taja wen tac bʌ i melbal tsaʼ bʌ i colta cheʼ tsiʼ taja ñuc bʌ i yeʼtel (Génesis 41:37-44; 45:4-8). Yom mi laj cʼajtiben lac ñaʼtʌbal Jehová cheʼ an majqui miʼ mel mach bʌ weñic ti lac tojlel. Mi caj i coltañonla chaʼan ñʌchʼʌl mi la cajñel yicʼot mi lac pʌs la cutslel cheʼ mi lac pejcan jiñi quixtañu (pejcan 1 Pedro 5:10).

14, 15. a) ¿Chucoch yom mi lac chʌcʌ qʼuel bajcheʼ mucʼonla ti subtʼan? b) ¿Chuqui miʼ mejlel a mel chaʼan miʼ mejlel a pejcan jiñi mach bʌ añic maʼ tajob? (Qʼuele jiñi foto tac am bʌ tiʼ tejchibal yicʼot jiñi recuadro «¿Muʼ ba mejlel lac ñop yambʌ bajcheʼ yom?»).

¹⁴ Pablo tsiʼ sube Timoteo chaʼan yom miʼ chʌn weñʼesan bajcheʼ miʼ tsictesan i Tʼan Dios. Cheʼ jaʼel tsiʼ sube: «Cʌntan a bʌ. Chʌn chaʼlen cʌntesa ti toj» (1 Timoteo 4:13, 16). Timoteo añix cabʌl jab i cajel ti subtʼan. ¿Chucoch yom to miʼ ñumen weñʼan? Come jiñi lac piʼʌlob miʼ qʼuextʌyelob majlel yicʼot cheʼ bajcheʼ yilal miʼ ñusañob. Mi yom chaʼan miʼ chʌn ñʌchʼtʌntel jiñi Timoteo, yom miʼ chʌn weñʼan yicʼot miʼ qʼuextʌyel majlel i subtʼan. Cheʼʌch yom mi lac mel jaʼel ti lac subtʼan.

¹⁵ An i tajol mach tiʼ pejtelelic lac piʼʌlob mi lac tajob tiʼ yotot cheʼ mi lac majlel ti subtʼan. An baqui tajol yaʼʌch añob tiʼ yotot, pero maʼañic mi lac mejlel ti ochel yaʼ baqui chumulob. Mi cheʼ mi la cujtel, tajol miʼ mejlel lac sʌclan yambʌ bajcheʼ miʼ mejlel lac pejcañob.

16. ¿Bajcheʼ miʼ mejlel lac tech tʼan yaʼ baqui miʼ ñumel cabʌl quixtañu?

¹⁶ Yonlel hermanojob miʼ mulañob subtʼan yaʼ baqui miʼ cottʌl tren yicʼot autobús, ti mercado yicʼot ti parque tac. ¿Bajcheʼ miʼ techob tʼan? An muʼ bʌ i yʌlob jumpʼejl noticia tsaʼ jaxto bʌ ñumi. Yambʌlob miʼ subeñob chuqui wem bʌ tiʼ tojlel i yalobilob o miʼ melbeñob cʼajtiya chaʼan i yeʼtel. Mi tsaʼʌch i mulaj tʼan jiñi quixtañu, miʼ tsictesʌbeñob chuqui miʼ yʌl jiñi Biblia i mi cʼajtibeñob chuqui miʼ ñaʼtan. Cheʼʌch miʼ techob tʼan chaʼan jiñi Biblia.

17, 18. a) ¿Chuqui mi caj i coltañonla lac taj lac chʼejlel ti subtʼan baqui an cabʌl quixtañu? b) ¿Chucoch miʼ mejlel i coltañet ti subtʼan maʼ wʌl mi lajalʌch maʼ wubin cheʼ bajcheʼ tsiʼ yubi David tiʼ tojlel Jehová?

¹⁷ Tajol wocolʌch chaʼan mi lac pejcan ti calle juntiquil mach bʌ laj cʌñʌyic. Cheʼʌch tsiʼ ñusa Eddie, juntiquil precursor yaʼ ti Nueva York. ¿Chuqui an i colta chaʼan miʼ taj i chʼejlel? Miʼ yʌl chaʼan yaʼ tiʼ chʼujutesaya ti familia miʼ sʌclan bajcheʼ yom miʼ yʌl yicʼot i yijñam cheʼ mach weñic miʼ jacʼbentelob o cheʼ yambʌ chuqui miʼ ñaʼtan jiñi quixtañu. Cheʼ jaʼel miʼ cʼajtiben i coltaya yambʌ Testigojob. Ili ora Eddie muqʼuix i wen mulan subtʼan baqui an cabʌl quixtañu.

¹⁸ Jiñi yañoʼ bʌ mi caj i qʼuelob chaʼan wolʌch lac weñʼan majlel mi tijicñayoñʌchla yicʼot wolʌch i qʼuextʌyel majlel lac subtʼan (pejcan 1 Timoteo 4:15). Tajol an majqui miʼ mejlel laj coltan chaʼan miʼ sujtel tiʼ testigo Jehová. David tsiʼ yʌlʌ: «Mi caj c chʼujutesan lac Yum tiʼ pejtelel ora. Mi caj c chʌn sub i ñuclel c Yum. Mi caj i ñucʼan c pusicʼal chaʼan c Yum. Tijicña mi caj i yubiñob jini utsoʼ bʌ» (Salmo 34:1, 2).

19. ¿Chucoch miʼ mejlel i yubin i tijicñʌyel juntiquil i wiñic Dios anquese mach cabʌlic miʼ mejlel i mel tiʼ caj chuqui woliʼ ñusan?

¹⁹ David tsiʼ yʌlʌ jaʼel: «C Yum, pejtelel a melbal mi caj i tsictesan a ñuclel. Pejtel jini chʼujuloʼ bʌ a chaʼan mi caj i chʼujutesañet. Mi caj i subob wen ñuc a yumʌntel, cabʌl a pʼʌtʌlel. Mi caj i subeñob i yalobilob jini ñuc bʌ a melbal, yicʼot i tʼojlʌwel a yumʌntel yaʼ baʼ buchulet ti ñuc bʌ a weʼtel» (Salmo 145:10-12). Jiñi muʼ bʌ i cʼuxbiñob Jehová yicʼot xucʼulob, yomob i tsictesan i chaʼan bʌ Jehová ti jumpʼejlob i pusicʼal. Pero mi añix lac jabilel o cʼamonla, tajol maʼañix mi lac wen mejlel ti subtʼan ti jujumpʼejl otot bajcheʼ la com. ¿Chuqui miʼ mejlel lac mel? Yom mi laj cʼajtesan chaʼan cheʼ mi lac subeñob i chaʼan bʌ Jehová jiñi añoʼ bʌ ti lac tʼejl, bajcheʼ jiñi doctorob o enfermerajob, mi la cʌqʼuen i ñuclel. ¿Ixcu mi añonla ti cárcel tiʼ caj lac ñopbal? Tajol mucʼʌch i mejlel lac subeñob yañoʼ bʌ i chaʼan bʌ Jehová. Ili miʼ yʌqʼuen i tijicñʌyel (Proverbios 27:11). Jehová miʼ taj i tijicñʌyel jaʼel cheʼ mi lac melben i yeʼtel anquese mach cheʼic miʼ mel lac familia (1 Pedro 3:1-4). Miʼ mejlel lac chʼujutesan Jehová, mi lac sujtel ti wem bʌ i yamigo yicʼot mi lac taj laj colel anquese mi lac taj tsʌts bʌ wocol.

20, 21. ¿Bajcheʼ mi caj i coltan yambʌlob cheʼ mi lac taj laj colel tiʼ chaʼan bʌ Dios?

²⁰ Tiʼ sujm, Jehová mi caj i yʌqʼueñonla i bendición mi chʌn la camigojʌch yicʼot mi wen mi lac melben i yeʼtel. Cheʼ mi lac tʼoxben i yorajlel yicʼot mi laj qʼuextan bajcheʼ chumulonla, mi caj lac mejlel lac ñumen coltan yambʌlob chaʼan miʼ cʌñob chuqui mi caj i mel Dios. Tajol miʼ mejlel lac ñumen coltan la quermañojob. Cheʼ bʌ miʼ qʼuelob chaʼan wolʌch lac chaʼlen wersa eʼtel ti congregación, mi caj i ñumen cʼuxbiñoñobla.

²¹ Mach yʌlʌlic jaypʼejl jab i cajel lac melben i yeʼtel Jehová, ti lac pejtelel mi lac mejlel ti sujtel ti ñumen wem bʌ i yamigo yicʼot mi lac taj laj colel. Ti yambʌ temaj mi caj laj qʼuel bajcheʼ miʼ mejlel laj coltan yambʌlob chaʼan miʼ tajob i colel.