¿Majqui «jiñi xucʼul bʌ xyaj eʼtel wen am bʌ i ñaʼtʌbal» i chuqui miʼ mel?

Jesús «i jolʌch jiñi congregación» (Efesios 5:23). Ti ili ora, woli (choncol) i cʼʌn «jiñi xucʼul bʌ xyaj eʼtel wen am bʌ i ñaʼtʌbal» chaʼan miʼ cʌntañob jiñi xcʌntʼañob i chaʼan añoʼ bʌ ila ti Pañimil (pejcan Mateo 24:45). Jesús jiñʌch tsaʼ bʌ i waʼchoco «jiñi xucʼul bʌ xyaj eʼtel», jin chaʼan an i yeʼtel pero pʼisbil jach. I cheʼ jaʼel, miʼ bej jacʼben i tʼan Cristo yicʼot miʼ coltan jiñi i yermañujob. ¿Majqui jiñi xyaj eʼtel? ¿Bajcheʼ miʼ cʌntañonla?

1. ¿Majqui «jiñi xucʼul bʌ xyaj eʼtel wen am bʌ i ñaʼtʌbal»?

Jehová tiʼ pejtelel ora an i cʼʌñʌ juntiquil wiñic o junmojt wiñicob chaʼan miʼ cʌntan i tejclum (Malaquías 2:7; Hebreos 1:1). Jumpʼejl ejemplo, cheʼ bʌ tsaʼix chʌmi Jesús, jiñʌch jiñi apóstolob yicʼot jiñi ancianojob yaʼ ti Jerusalén tsaʼ bʌ i cʌntayob jiñi congregación (Hechos 15:2). Cheʼ bajcheʼ tsaʼ mejli ti jimbʌ ora, ti ili ora, junmojt ancianojob, cʌmbiloʼ bʌ bajcheʼ Junmojt muʼ bʌ i pʌsob bij chaʼan i testigojob Jehová, miʼ yʌqʼueñoñobla jiñi chʼujul bʌ bʌlñʌcʼʌl yicʼot miʼ qʼuelob jiñi subtʼan. Ili Junmojt jiñobʌch «jiñi xucʼul bʌ xyaj eʼtel wen am bʌ i ñaʼtʌbal tsaʼ bʌ waʼchoconti tiʼ yum [Jesús] chaʼan miʼ chʼʌm tiʼ wenta» jiñi eʼtel (troñel) tac (Mateo 24:45a). Pejtelel jiñi ochemoʼ bʌ ti jiñi Junmojt muʼ bʌ i pʌsob bij xñoptʼañob yajcʌbiloʼ bʌ ti chʼujul bʌ espíritu i woli (yʌquel) i pijtañob chaʼan miʼ chaʼleñob yumʌntel yicʼot Cristo yaʼ ti panchan, cheʼ bʌ tsaʼix chʌmiyob ila ti Lum.

2. ¿Chuqui ti chʼujul bʌ bʌlñʌcʼʌl miʼ yʌcʼ jiñi xucʼul bʌ i xyaj eʼtel?

Jesús tsiʼ yʌlʌ chaʼan jiñi xucʼul bʌ xyaj eʼtel mi caj i chʼʌm tiʼ wenta chaʼan «miʼ yʌqʼueñob [jiñi yambʌ xñoptʼañob] i bʌl i ñʌcʼ tiʼ yorajlel» (Mateo 24:45b). Cheʼ bajcheʼ lac waj lac saʼ miʼ pʼʌtʼesañonla, cheʼ jaʼel jiñi chʼujul bʌ bʌlñʌcʼʌl loqʼuem bʌ tiʼ Tʼan Dios miʼ yʌqʼueñonla lac pʼʌtʌlel chaʼan xucʼulonla ti Jehová yicʼot chaʼan mi lac tsʼʌctesan jiñi eʼtel tsaʼ bʌ i yʌqʼueyonla Jesús (1 Timoteo 4:6). Ili chʼujul bʌ bʌlñʌcʼʌl mi lac taj ti tempa bʌ tac, ti colem tempa bʌ tac, ti lac jun tac yicʼot ti video tac loqʼuem bʌ ti Biblia. Pejtelel iliyi miʼ coltañonla lac chʼʌmben i sujm chuqui yom Jehová yicʼot chaʼan ñumen pʼʌtʌl mi la cajñel tiʼ tojlel.

LAʼ LAC ÑUMEN ÑAʼTAN

3. Yom chajpʌbil an jiñi i tejclum Jehová

Jesús miʼ cʼʌn jiñi Junmojt muʼ bʌ i pʌsob bij chaʼan miʼ qʼuelob jiñi eʼtel tac muʼ bʌ i melob jiñi i testigojob Jehová. Cheʼʌch tsaʼ mejli jaʼel ti jiñi congregación ti ñaxam bʌ siglo. Qʼuelela jiñi VIDEO.

VIDEO: Jehová miʼ chajpan bajcheʼ an i tejclum (6:18)

Pejcanla 1 Corintios 14:33, 40 i tem alʌla iliyi:

• Cheʼ bajcheʼ miʼ yʌl ili versículo tac, ¿yom ba Jehová chaʼan chajpʌbil bajcheʼ miʼ yajñel jiñi i Testigojob? ¿Chucoch cheʼ maʼ ñaʼtan bajcheʼ jiñi?

4. Jiñi xucʼul bʌ xyaj eʼtel miʼ chajpan jiñi lac subtʼan

Jiñi ñaxam bʌ xñoptʼañob tsiʼ wen qʼueleyob ti ñuc jiñi subtʼan. Pejcanla Hechos 8:14, 25 i tem alʌla iliyi:

• Cheʼ ti ñaxam bʌ siglo, ¿majquiyob tsiʼ chʼʌmʌyob tiʼ wenta i qʼuelob jiñi subtʼan?

• ¿Chuqui tsiʼ mele Pedro yicʼot Juan chaʼan jiñi tsaʼ bʌ subentiyob ti yambʌ apóstolob?

Jiñi subtʼan jiñʌch jiñi ñumen ñuc bʌ eʼtel muʼ bʌ i chajpañob jiñi Junmojt muʼ bʌ i pʌsob bij. Qʼuelela jiñi VIDEO.

VIDEO: Mi lon c chaʼlen wersa chaʼan mi lon c chaʼlen subtʼan (1:24)

Jesús tsiʼ yʌlʌ chaʼan wen ñuc i cʼʌjñibal jiñi subtʼan. Pejcanla Marcos 13:10 i tem alʌla iliyi:

• ¿Chucoch jiñi Junmojt muʼ bʌ i pʌsob bij wen ñuc i cʼʌjñibal miʼ qʼuelob jiñi subtʼan?

• ¿Chucoch ñuc i cʼʌjñibal lac chaʼan chaʼan «jiñi xucʼul bʌ xyaj eʼtel wen am bʌ i ñaʼtʌbal» miʼ chajpan jiñi subtʼan tiʼ pejtelel pañimil?

5. Jiñi xucʼul bʌ xyaj eʼtel miʼ tojʼesañonla

Jiñi Junmojt muʼ bʌ i pʌsob bij miʼ tojʼesañob jiñi xñoptʼañob añoʼ bʌ tiʼ pejtelel pañimil (mulawil). ¿Bajcheʼ miʼ ñaʼtan chuqui yom miʼ mejlel? Qʼuele bajcheʼ tsiʼ mele jiñi Junmojt muʼ bʌ i pʌsob bij cheʼ ti ñaxam bʌ siglo. Pejcanla Hechos 15:1, 2 i tem alʌla iliyi:

• ¿Chuqui ti wocol tsaʼ ujti tiʼ tojlelob jiñi xñoptʼañob ti ñaxam bʌ siglo?

• ¿Chuqui tsiʼ meleyob Pablo, Bernabé yicʼot yambʌ xñoptʼañob chaʼan miʼ tojʼesañob ili wocol?

Pejcanla Hechos 15:12-18 yicʼot 23-29, i tem alʌla iliyi:

• Cheʼ bʌ jiñi Junmojt muʼ bʌ i pʌsob bij ti ñaxam bʌ siglo wolito i ñaʼtañob chuqui mi caj i melob chaʼan miʼ tojʼesañob ili wocol, ¿chuqui tsiʼ meleyob chaʼan Dios miʼ coltañob? (Qʼuelela jiñi versículo 12, 15 yicʼot 28).

Pejcanla Hechos 15:30, 31 yicʼot 16:4, 5, i tem alʌla iliyi:

• ¿Chuqui tsiʼ meleyob jiñi ñaxam bʌ xñoptʼañob cheʼ bʌ tsiʼ yubiyob chuqui tsiʼ yʌlʌyob jiñi Junmojt muʼ bʌ i pʌsob bij?

• ¿Bajcheʼ la cujil chaʼan Jehová tsiʼ yʌqʼueyob i bendición cheʼ bʌ tsiʼ jacʼʌyob tʼan?

Pejcanla 2 Timoteo 3:16 yicʼot Santiago 1:5, i tem alʌla iliyi:

• Cheʼ bʌ jiñi Junmojt muʼ bʌ i pʌsob bij ti ili ora yom i ñaʼtan chuqui yom miʼ mejlel, ¿chuqui miʼ mel chaʼan miʼ taj i coltʌntel?

TSAʼ BɅ LAJ CɅÑɅ

Jiñi Junmojt muʼ bʌ i pʌsob bij jiñʌch «jiñi xucʼul bʌ xyaj eʼtel wen am bʌ i ñaʼtʌbal» tsaʼ bʌ i yajca Cristo. Ili xyaj eʼtel miʼ suben chuqui yom miʼ melob jiñi i testigojob Jehová i miʼ yʌqʼuen jiñi chʼujul bʌ bʌlñʌcʼʌl.

¿Chuqui tsaʼ cʌñʌ?

• ¿Majqui tsiʼ yajca «jiñi xucʼul bʌ xyaj eʼtel wen am bʌ i ñaʼtʌbal»?

• ¿Bajcheʼ miʼ cʌntañonla jiñi Junmojt muʼ bʌ i pʌsob bij?

• ¿Muʼ baʼ ñop chaʼan jiñi Junmojt muʼ bʌ i pʌsob bij jiñʌch «jiñi xucʼul bʌ xyaj eʼtel»?

CɅÑɅ YAN TAC BɅ

Qʼuele muʼ bʌ i melob jiñi Junmojt muʼ bʌ i pʌsob bij chaʼan miʼ tsʼʌctesañob i yeʼtel.

«¿Chuqui jiñi Junmojt muʼ bʌ i pʌsob bij i chaʼan i Testigojob Jehová?» (Tema am bʌ ti jw.org)

Qʼuele chuqui miʼ mel jiñi Junmojt muʼ bʌ i pʌsob bij chaʼan miʼ ñaʼtan mi weñʌch jiñi chʼujul bʌ bʌlñʌcʼʌl muʼ bʌ caj la cʌqʼuentel.

Jiñi lac jun tac tojʌch chuqui miʼ yʌl (17:18)

¿Bajcheʼ yilal miʼ qʼuel jiñi Junmojt muʼ bʌ i pʌsob bij jiñi eʼtel tsaʼ bʌ i yʌqʼueyob Jesús tiʼ wenta?

Mi lon c wen qʼuel ti ñuc (7:04)

¿Bajcheʼ miʼ pʌs jiñi lac tempa bʌ tac yicʼot laj colem tempa bʌ tac chaʼan Jehová jiñʌch woliʼ tojʼesan jiñi Junmojt muʼ bʌ i pʌsob bij?

Jehová miʼ cʌntesan i tejclum (9:39)