¿Bajcheʼ miʼ coltañonla cheʼ mi lac tempan lac bʌ yicʼot lac quermañojob?

Cheʼ jaʼel, anquese mic chaʼlen lojon xʌmbal ti mateʼel o mʌcʌcña pañimil, cheʼʌch mic majlel lojon ti tempa bʌ. Anquese an wocol tic tojlel lojon o lujbeñon lojon chaʼan eʼtel, pero, ¿chucoch maʼanic mij cʌy c tempan lojon c bʌ yicʼot jini quermañojob lojon?

Miʼ coltañonla chaʼan tijicña mi laj cajñel. Pablo tsiʼ tsʼijbu, «laʼ laj coltan lac bʌ ti pejtelel chuqui wen», cheʼ tsiʼ chaʼle tʼan chaʼan jini tsaʼ bʌ i tempayob i bʌ yicʼot tiʼ congregación (Hebreos 10:24). Iliyi miʼ yʌqʼueñonla lac ñaʼtan chaʼan yom mi laj cʌn lac bʌ ti jujuntiquil. Tsaʼ bʌ i yʌlʌ jini apóstol miʼ yʌcʼ ti ñaʼtʌntel chaʼan yom mi laj qʼuel ti ñuc yañoʼ bʌ. Cheʼ mi laj cʌn yan tac bʌ familia lajal bʌ lac ñopbal yicʼotob, miʼ cʼotel laj cʌn bajcheʼ tsiʼ meleyob chaʼan miʼ lʌtʼob wocol tac lajal bʌ bajcheʼ lac chaʼan, jini miʼ caj i coltañonla jaʼel.

Miʼ coltañonla chaʼan mi lac taj isujm bʌ laj camigojob. Yaʼ ti tempa bʌ mic tempan lojon c bʌ yicʼot camigojob lojon, mach jinic jach j cʌñʌyoʼ bʌ lojon. An i tajol mic c mel lojon chuqui tac muʼ bʌ yʌqʼueñon lojon c tijicñʌyel. ¿Chuqui bʌ wenlel mi lac taj cheʼ mi lac mel iliyi? Miʼ coltañon lojon chaʼan mij qʼuel lojon c bʌ ti ñuc ti jujuntiquil yicʼot miʼ ñumen pʼʌtʼan j cʼuxbiya lojon. Cheʼ bʌ añob ti wocol jini quermañojob lojon mij coltan lojon, come wen camigo lojon c bʌ (Proverbios 17:17). Cheʼ mic tempan lojon c bʌ yaʼ ti congregación, woliyʌch c pʌs lojon chaʼan ‹mic tem cʌntan lojon c bʌ› (1 Corintios 12:25, 26).

Mic subeñet lojon chaʼan yom maʼ yajcan ti a wamigojob muʼ bʌ i melbeñob i yeʼtel Dios. Mi caʼ taj a wamigojob baʼan i testigojob Jehová. A wocolic, mach a wʌcʼ chaʼan chuqui jach miʼ mʌctañet chaʼan maʼ tempan a bʌ yicʼoton lojon.

• ¿Chucoch wen cheʼ mi lac tempan lac bʌ yicʼot lac quermañojob?

• ¿Jala a wom a tempan a bʌ yicʼot i testigojob Jehová ti Yotlel Tempa bʌ?