Acʼʌ a pijtaya ti Jehová

 1. a) ¿Baqui bʌ pijtaya an i yʌqʼueyonla Jehová? b) ¿Chuqui yom i yʌl cheʼ mi la cʌcʼ lac pijtaya tiʼ tojlel Jehová? (Qʼuele jiñi nota).

JEHOVÁ an i yʌqʼueyonla jumpʼejl utsʼatax bʌ lac pijtaya ti lac pejtelel muʼ bʌ laj cʼuxbin. Tsʼitaʼ jax yom chaʼan miʼ jisan cʼamʌjel, jiñi chʼijyemlel yicʼot jiñi chʌmel (sajtel) (Apoc. 21:3, 4). Mi caj i coltan jiñi utsoʼ bʌ muʼ bʌ i yʌcʼob i pijtaya tiʼ tojlel chaʼan miʼ sujtesañob ili pañimil ti jumpʼejl paraíso (Sal. 37:9-11). Cheʼ jaʼel, mi caj i coltañonla chaʼan ñumen lʌcʼʌl mi la cajñel tiʼ tojlel. ¡Jumpʼejl utsʼatax bʌ lac pijtaya! Pero ¿bajcheʼ la cujil chaʼan Dios mucʼʌch caj i tsʼʌctesan jiñi wʌn albil bʌ i chaʼan? Tiʼ pejtelel ora miʼ tsʼʌctesan i tʼan. Añʌch chucoch miʼ mejlel la cʌcʼ lac pijtaya tiʼ tojlel Jehová (Sal. 27:14).b ¿I bajcheʼ mi lac pʌs chaʼan mucʼʌch la cʌcʼ lac pijtaya tiʼ tojlel? Jiñʌch cheʼ yicʼot lac pijt i yicʼot lac tijicñʌyel mi lac pijtan chaʼan miʼ tsʼʌctesan jiñi wʌn albil bʌ i chaʼan (Is. 55:10, 11).

 2. ¿Chuqui añix i mele Jehová?

² Jehová tsaʼix i pʌsʌ chaʼan mucʼʌch i tsʼʌctesan i tʼan. Laʼ laj qʼuel jumpʼejl ejemplo. Yaʼ ti libro chaʼan Apocalipsis tsiʼ yʌlʌ chaʼan ti ili ora woli (choncol) i tempan junmojt lac piʼʌlob loqʼuemoʼ bʌ ti ñuqui tejclum tac, pʼolbalʌl tac yicʼot tʼan tac chaʼan juntemel miʼ chʼujutesañob. Ili junmojt cʌmbilob bajcheʼ «yonlel lac piʼʌlob» (Apoc. 7:9, 10). Ti ili yonlel lac piʼʌlob ochemob wiñicob, xʼixicob yicʼot alobob yʌñʌloʼ bʌ i colorlel i pʌchʌlel, i tʼan yicʼot baqui tilemob, pero miʼ qʼuelob i bʌ bajcheʼ jumpʼejl familia baqui an ñʌchʼtʌlel (Sal. 133:1; Juan 10:16). Cheʼ jaʼel, yicʼotob i tijicñʌyel miʼ chaʼleñob subtʼan, chajpʌbilob chaʼan miʼ subeñob majqui jach chaʼan bʌ jiñi i pijtaya chaʼan jiñi tsijiʼ bʌ pañimil (Mat. 28:19, 20; Apoc. 14:6, 7; 22:17). Mi ochemet ti jiñi yonlel lac piʼʌlob, miʼ mejlel la cʌl chaʼan maʼ wen qʼuel ti ñuc jiñi utsʼatax bʌ a pijtaya.

 3. ¿Chuqui jiñi yom bʌ Satanás?

³ Jiñi Diablo yom i chilbeñonla jiñi lac pijtaya. Yom i yʌqʼueñonla lac ñaʼtan chaʼan Jehová mach i wentajonla yicʼot chaʼan maʼañic mi caj i tsʼʌctesan i tʼan. Mi Satanás miʼ chilbeñonla lac pijtaya, mi caj lac sʌt lac chʼejlel i tajol muʼto laj cʌy lac melben i yeʼtel (troñel) Jehová. Cheʼ bajcheʼ mi caj laj qʼuel, jiñi Diablo tsiʼ ñopo i chilben i pijtaya Job chaʼan maʼañic miʼ bej chʼujutesan Jehová.

 4. ¿Chuqui mi caj laj qʼuel ti ili estudio? (Job 1:9-12).

⁴ Ti ili estudio mi caj laj qʼuel chuqui tac tsiʼ cʼʌñʌ Satanás chaʼan Job mach chʌn xucʼulic miʼ yajñel (pejcan Job 1:9-12). Mi caj laj qʼuel jaʼel chuqui miʼ mejlel laj cʌn tiʼ tojlel Job yicʼot chucoch ñuc i cʼʌjñibal mi laj cʼajtesan chaʼan Dios mucʼʌch i cʼuxbiñonla i mi caj i tsʼʌctesan i tʼan.

5, 6. ¿Bajcheʼ tsaʼ qʼuextʌyi ti ora jiñi i cuxtʌlel Job?

⁵ Job wen bajcheʼ chumul, wem bʌ i yamigo Jehová, an jumpʼejl colem bʌ i familia yicʼot temel añob. Cheʼ jaʼel juntiquil wiñic wen am bʌ i chubʌʼan (Job 1:1-5). Pero ti jumpʼejl jach qʼuin tiʼ sʌtʌ lʌcʼʌ tiʼ pejtelel (Job 1:13-17). Cheʼ jiñi tsaʼ laj chʌmi i yalobilob muʼ bʌ i wen cʼuxbiñob. Laʼcu lac ñaʼtan bajcheʼ yubil tsiʼ yubi Job. Jiñi tatʌ ñaʼʌlob wen cʼux miʼ yubiñob cheʼ bʌ miʼ chʌmel juntiquil i yalobil, jin chaʼan laʼcu lac ñaʼtan jiñi cʼuxel yicʼot chʼijyemlel tsaʼ bʌ i yubi Job yicʼot i yijñam cheʼ bʌ tsiʼ yubiyob chaʼan tsaʼ chʌmi jiñi 10 i yalobilob. ¡Jin chaʼan Job tiʼ tsili i bujc, tsaʼ yajli ti lum tiʼ caj i chʼijyemlel! (Job 1:18-20).

⁶ Cheʼ jiñi, Satanás tsiʼ yʌqʼue jumpʼejl tsʌts bʌ cʼamʌjel yicʼot tsiʼ yʌcʼʌ ti quisin (Job 2:6-8; 7:5). Ti ñaxan jiñi lac piʼʌlob miʼ qʼuelob ti ñuc Job yicʼot miʼ cʼajtibeñob ticʼojel tac (Job 31:18). Pero wʌle mach yomobix i qʼuelob. Jiñi i yerañob, jiñi i yamigojob yicʼot i yaj eʼtelob maʼañix miʼ qʼuelob ti ñuc (Job 19:13, 14, 16).

 7. a) ¿Baqui tilem i wocol Job tsiʼ ñaʼta, i chuqui maʼañic bʌ tsiʼ mele? b) Cheʼ bajcheʼ tsiʼ ñusa Job, ¿chuqui ti wocol tac miʼ mejlel i ñusan juntiquil xñoptʼan? (Qʼuele jiñi dibujo chaʼan bʌ jiñi párrafo 7).

⁷ Satanás yom i yʌqʼuen i ñaʼtan Job chaʼan woli (yʌquel) i ñusan wocol tiʼ caj mach utsʼatix miʼ qʼuejlel ti Jehová. Jin chaʼan, tsiʼ cʼʌñʌ jiñi tsʌts bʌ icʼ chaʼan miʼ jem jiñi otot baqui woliyob ti qʼuiñijel jiñi 10 i yalobilob (Job 1:18, 19). Cheʼ jaʼel, tsiʼ yʌcʼʌ jubel cʼajc yaʼ ti panchan tsaʼ bʌ i tsʌnsʌbe jiñi i yʌlacʼ yicʼot jiñi wiñicob woli bʌ i cʌntañob (Job 1:16). Tsiquil chaʼan jiñi icʼ yicʼot jiñi cʼajc mach cheʼ jach tsaʼ bajñel tili. Jin chaʼan Job tsaʼ cʼoti i ñaʼtan chaʼan Jehová tsiʼ choco tilel yicʼot chaʼan an chuqui tsiʼ mele (chaʼle) tsaʼ bʌ i yʌcʼʌ ti michʼan. Pero Job maʼañic tsiʼ yʌlʌ chuqui mach bʌ weñic tiʼ tojlel jiñi i Tat am bʌ ti panchan. Tsaʼ cʼoti i qʼuel chaʼan Jehová añʌch chuqui tac wem bʌ an i yʌqʼue, i cheʼ bajcheʼ tsiʼ chʼʌmʌ chuqui tac wem bʌ yom miʼ chʼʌm jaʼel chuqui mach tac bʌ weñic. Jin chaʼan tsiʼ yʌlʌ: «Chʼujul i cʼabaʼ [Jehová, TNM]» (Job 1:20, 21; 2:10). Job xucʼul tsaʼ ajñi tiʼ tojlel anquese tiʼ sʌtʌ pejtelel chuqui an i chaʼan, tsiʼ yubi i chʼijyemlel yicʼot tsiʼ taja i cʼamʌjel. Pero Satanás añʌch chuqui yambʌ tsiʼ mele.

 8. ¿Chuqui yambʌ tsiʼ cʼʌñʌ Satanás chaʼan miʼ ticʼlan Job?

⁸ Satanás anto chuqui yambʌ tsiʼ cʼʌñʌ chaʼan miʼ ticʼlan Job. Tsiʼ cʼʌñʌ uxtiquil poj i yamigojoʼ bʌ tsaʼ bʌ i yʌqʼueyob i ñaʼtan chaʼan maʼañix i cʼʌjñibal. Tsiʼ yʌlʌyob chaʼan woliʼ ñusan wocol tiʼ caj an chuqui mach bʌ weñic tsiʼ mele (Job 22:5-9). Cheʼ jaʼel, tsiʼ chaʼleyob wersa chaʼan miʼ yʌqʼueñob i ñaʼtan Job chaʼan anquese wen toj jiñi i melbal (chaʼlibal), maʼañic baʼ ora utsʼat mi caj i qʼuejlel ti Dios (Job 4:18; 22:2, 3; 25:4). Yomoʼ bʌ jiñʌch chaʼan Job miʼ ñaʼtan chaʼan Dios maʼañic miʼ cʼuxbin, maʼañic mi caj i cʌntan yicʼot chaʼan mach yomic miʼ melben i yeʼtel. Tsaʼ bʌ i yʌlʌyob tsiʼ yʌqʼueyob i ñaʼtan Job chaʼan maʼañix mi caj i tojʼan bajcheʼ an.

 9. ¿Chucoch Job maʼañic tiʼ sʌtʌ i pʼʌtʌlel yicʼot i chʼejlel?

⁹ Laʼcu lac ñaʼtan woli bʌ ti ujtel. Job yaʼ buchul tiʼ tʌñil cʼajc, cuchul i chaʼan i chʼijyemlel yicʼot i cʼuxel i bʌcʼtal (Job 2:8). Jiñi i yamigojob cabʌl chuqui miʼ subeñob, miʼ chaʼleñob wersa chaʼan maʼañix i cʼʌjñibal miʼ yubin i bʌ. Maʼañix chuqui miʼ mejlel i mel miʼ yubin come cabʌl jax wocol woliʼ ñusan, cheʼ jaʼel wen cʼux miʼ yubin cheʼ tsaʼ chʌmi jiñi i yalobilob. Pero maʼañic chuqui miʼ yʌl (Job 2:13–3:1). Jiñi i yamigojob tajol woliʼ ñaʼtañob chaʼan Job mach xucʼulic mi caj i yajñel come ñʌchʼʌl tsaʼ cʌyle, pero mach cheʼiqui. Cheʼ jiñi, tajol Job miʼ qʼuel jiñi i yamigojob i miʼ subeñob: «Cʼʌlʌl to mic chʌmel mux c sub maʼanic c mul [o xucʼul mi caj cajñel]» (Job 27:5). Job chʌn pʼʌtʌl tsaʼ ajñi yicʼot maʼañic tsiʼ sʌtʌ i chʼejlel anquese wen wocol woliʼ ñusan. ¿Chucoch? Come maʼañic tiʼ sʌtʌ i pijtaya chaʼan Dios mi caj i coltan. Yujil chaʼan mi tsaʼ chʌmi, Jehová miʼ mejlel i chaʼ aqʼuen i cuxtʌlel (Job 14:13-15).

10. ¿Chuqui miʼ pʌsbeñonla jiñi relato chaʼan Job?

¹⁰ Jiñi relato chaʼan Job miʼ pʌsbeñonla chaʼan Satanás maʼañic miʼ mejlel i xicʼonla laj cʌy Jehová yicʼot chaʼan Jehová miʼ qʼuel pejtelel chuqui mi lac ñusan. An chuqui tac yambʌ mi laj cʌn ti jiñi tsaʼ bʌ i ñusa Job. Laʼ laj qʼuel chaʼpʼej uxpʼejl.

11. ¿Chuqui mi caj i mejlel lac mel mi mucʼʌch lac ñop Jehová tiʼ pejtelel ora? (Santiago 4:7).

¹¹ Job tsiʼ pʌsʌ chaʼan mucʼʌch i mejlel lac lʌtʼ baqui jach bʌ wocol yicʼot chaʼan mi caj la cʌcʼ lac bʌ tiʼ contra Satanás mi mucʼʌch lac ñop Jehová tiʼ pejtelel ora. ¿I chuqui mi caj lac taj? Jiñi Biblia miʼ yʌl chaʼan jiñi Diablo mi caj i putsʼtañonla (pejcan Santiago 4:7).

12. ¿Bajcheʼ tsiʼ colta Job jiñi pijtaya chaʼan bʌ chaʼ chʼojyel?

¹² Yom tsʌts mi lac chuc lac bʌ ti jiñi pijtaya chaʼan bʌ chaʼ chʼojyel. Cheʼ bajcheʼ tsaʼ laj qʼuele ti jiñi yambʌ estudio, Satanás miʼ wen cʼʌn jiñi bʌqʼuen chaʼan mi lac chʌmel, i miʼ mel chaʼan mach xucʼulic mi la cajñel. Laʼcu lac ñaʼtan tiʼ tojlel Job, Satanás tsiʼ yʌlʌ chaʼan mi caj i mel chuqui jach chaʼan maʼañic miʼ chʌmel, i tajol muʼto i cʌy i melben i yeʼtel Jehová. ¡Pero jiñi mach i sujmic! Anquese wen wocolʌch woliʼ ñusan i tsaʼto i ñaʼta chaʼan miʼ mejlel ti chʌmel maʼañic tsiʼ cʌyʌ Dios. ¿I bajcheʼ tsaʼ mejli i lʌtʼ? Tsiʼ ñopo chaʼan Jehová utsʼatʌch yicʼot tsiʼ pijta chaʼan mucʼʌch caj i tojʼesan pejtelel woli bʌ i ñusan. Tsiʼ ñopo chaʼan, mi Dios maʼañic miʼ coltan cheʼ bʌ cuxulto, mucʼʌch caj i coltan ti talto bʌ qʼuin yicʼot mi caj i chaʼ aqʼuen i cuxtʌlel. Job tsaʼʌch i ñopo chaʼan jiñi chaʼ chʼojyel mucʼʌch caj i yujtel. Mi cheʼʌch mi laj qʼuel jaʼel, xucʼul mi caj la cajñel anquese mi lac subentel chaʼan mi caj lac tsʌnsʌntel.

13. ¿Chucoch yomʌch mi lac wen qʼuel tsaʼ bʌ i cʼʌñʌ Satanás tiʼ tojlel Job?

¹³ Weñʌch cheʼ mi lac wen qʼuel chuqui tac tsiʼ cʼʌñʌ Satanás tiʼ tojlel Job come lʌcʼʌl lajal muʼ bʌ i cʼʌn ili ora. Laʼ laj qʼuel chuqui tsiʼ yʌlʌ tiʼ tojlel pejtelel lac piʼʌlob i mach tiʼ tojlelic jach Job. Tsiʼ yʌlʌ: «Junlajal winicob, miʼ bajñel cʼuxbiñob i bʌ» (Job 2:4, 5). Satanás tsiʼ yʌlʌ chaʼan mach i sujmic jiñi laj cʼuxbiya tiʼ tojlel Jehová yicʼot chaʼan mi caj laj cʌy mi an ti wocol jiñi laj cuxtʌlel. Tsiʼ yʌlʌ jaʼel chaʼan Jehová maʼañic miʼ cʼuxbiñonla yicʼot chaʼan maʼañic baʼ ora mi caj i qʼuel ti ñuc muʼ bʌ lac mel tiʼ tojlel. Joñonla muʼ bʌ la cʌcʼ lac pijtaya ti Jehová, maʼañix miʼ lotiñonla Satanás come laj cʌñʌyix chuqui tac miʼ cʼʌn.

14. ¿Chuqui miʼ mejlel lac taj laj qʼuel cheʼ bʌ mi lac ñusan jumpʼejl wocol, i chuqui ti ejemplo miʼ coltañonla lac chʼʌmben i sujm jiñi?

¹⁴ Yom mi laj qʼuel jiñi wocol tac bajcheʼ junchajp muʼ bʌ i coltañonla lac ñumen cʌn lac bʌ. Jiñi wocol tac tsaʼ bʌ i ñusa Job tsiʼ colta chaʼan miʼ qʼuel chaʼan an chuqui yom miʼ weñʼesan tiʼ tojlel. Jumpʼejl ejemplo, tsiʼ qʼuele chaʼan yom miʼ ñumen pʌs i pecʼlel (Job 42:3). Joñonla jaʼel cabʌl chuqui miʼ mejlel laj cʌn ti lac tojlel cheʼ bʌ mi lac ñusan jumpʼejl wocol. Jiñʌch tsaʼ bʌ ujti tiʼ tojlel Nikolái,c tsaʼ bʌ otsʌnti ti cárcel anquese wen cʼam. Miʼ yʌl: «Cheʼ bʌ mi la cotsʌntel ti cárcel lajal bajcheʼ mi lac melbentel jumpʼejl radiografía: Miʼ coltañonla laj qʼuel melbalʌl tac am bʌ i chaʼan juntiquil xñoptʼan». Cheʼ bʌ mi laj cʌn jiñi laj cʼunlel tac añʌch chuqui miʼ mejlel lac mel chaʼan mi lac tojʼesan.

15. ¿Majqui yom mi lac ñʌchʼtʌben i tʼan i chucoch?

¹⁵ Yom mi lac ñʌchʼtan chuqui miʼ subeñonla Jehová, i mach jiñic jiñi laj contrajob. Job tsiʼ wen ñʌchʼta cheʼ bʌ Jehová tsiʼ pejca. Chaʼan miʼ coltan i chʼʌmben i sujm, lajal bajcheʼ tiʼ sube: «¿Am baʼ qʼuele jiñi c pʼʌtʌlel ti chuqui tac melbil (pʌtbil) c chaʼan? Joñon mic taj j qʼuel pejtelel chuqui woli a ñusan. ¿Maʼañic ba miʼ mejlel j cʌntañet maʼ wʌl?». Job tsiʼ pʌsʌ i pecʼlel yicʼot tsiʼ wen qʼuele ti ñuc jiñi i yutslel Jehová, jin chaʼan tiʼ sube: «Ti yambʌ ora tsaʼ jach j cʌñʌyet chaʼan i tʼan yañoʼ bʌ, pero wʌle mij qʼuelet. Mij cʌñet» (Job 42:5). Cheʼ bʌ Job tsiʼ yʌlʌ iliyi, tajol buchulto tiʼ tʌñil cʼajc, cʼam yicʼot woliʼ yucʼtan jiñi i yalobilob. Anquese cheʼ woliʼ ñusan bajcheʼ jiñi, Jehová tiʼ sube chaʼan miʼ cʼuxbin yicʼot tiʼ sube chaʼan utsʼat miʼ qʼuel (Job 42:7, 8).

16. Cheʼ bajcheʼ miʼ yʌl Isaías 49:15, 16, ¿chuqui yom bʌ mi laj cʼajtesan cheʼ bʌ mi lac ñusan wocol tac?

¹⁶ Ili ora, tajol jiñi lac piʼʌlob miʼ pʼajoñobla (ñiqʼuisubeñoñobla) o maʼañic laj cʼʌjñibal miʼ qʼueloñobla. Tajol miʼ yʌlob mach bʌ weñic ti lac tojlel o tiʼ tojlel jiñi organización i miʼ yʌlob baqui jach bʌ lot ti lac tojlel (Mat. 5:11). Jiñi relato chaʼan Job miʼ pʌsbeñonla chaʼan Jehová miʼ ñop chaʼan xucʼul mi lac mejlel ti ajñel cheʼ bʌ mi lac ñusan wocol tac. Jehová miʼ cʼuxbiñonla i maʼañic miʼ ñajʌtesan jiñi muʼ bʌ i yʌcʼob i pijtaya tiʼ tojlel (pejcan Isaías 49:15, 16). Mach lac ñʌchʼtan chuqui tac miʼ yʌlob jiñi i contrajob Dios. Laʼ laj qʼuel chuqui tsiʼ yʌlʌ James, juntiquil hermano chumul bʌ ti Turquía am bʌ i ñusa tsʌts tac bʌ wocol yicʼot i familia. Miʼ yʌl: «Tsaʼ lon j qʼuele chaʼan, mi tsaʼ lon c ñʌchʼta jiñi lot tac muʼ bʌ i yʌjlel tiʼ tojlel i tejclum Dios, mi caj c sʌt lon c chʼejlel. Jin chaʼan, tsaʼ caji lon c ñumen ñaʼtan jiñi i Yumʌntel Dios yicʼot tsaʼ c chʌn melbe lon i yeʼtel Jehová, jiñi tsiʼ coltayon lojon chaʼan chʌn tijicñayon lon». Laʼ lac lajin Job i laʼ lac wen ñʌchʼtʌben i tʼan Jehová. ¡Mach la cʌcʼ chaʼan jiñi lot tac muʼ bʌ i yʌl jiñi laj contrajob miʼ yʌqʼueñonla lac sʌt jiñi lac pijtaya!

17. ¿Chuqui mi laj cʌn tiʼ tojlel jiñi wiñicob yicʼot xʼixicob xucʼuloʼ bʌ muʼ bʌ i yʌjlelob ti Hebreos capítulo 11?

¹⁷ Job mach jiñic jach jiñi i wiñic Jehová tsaʼ bʌ i pʌsʌ i chʼejlel yicʼot i pʼʌtʌlel cheʼ bʌ tsiʼ ñusa wocol tac. Ti jiñi carta tsaʼ bʌ i tsʼijbu jiñi apóstol Pablo tiʼ tojlel jiñi xñoptʼañob hebreojoʼ bʌ tsiʼ taja ti tʼan yonlel i wiñicob Dios i tsiʼ yʌlʌ chaʼan «testigojob cheʼ bajcheʼ yonlel tocal» (Heb. 12:1). Tsaʼʌch i ñusayob tsʌts tac bʌ wocol, pero tiʼ pejtelelob xucʼul tsaʼ ajñiyob tiʼ tojlel Jehová (Heb. 11:36-40). ¿Am ba chuqui tsiʼ tajayob cheʼ tsiʼ chaʼleyob wersa i lʌtʼob wocol tac? Añʌch. Maʼañic tsiʼ qʼueleyob bajcheʼ tsaʼ tsʼʌctiyi tsaʼ bʌ i yʌlʌ Jehová, pero tsiʼ chʌn acʼʌyob i pijtaya tiʼ tojlel. Tsiʼ ñopoyob chaʼan mucʼʌch caj i qʼuelob bajcheʼ mi caj i tsʼʌctiyel come yujilob chaʼan utsʼatʌch tsaʼ qʼuejliyob ti Jehová (Heb. 11:4, 5). Cheʼ mi lac ñaʼtan tiʼ tojlelob, miʼ yʌqʼueñonla lac pʼʌtʌlel chaʼan tiʼ pejtelel ora mi la cʌcʼ lac pijtaya tiʼ tojlel Jehová.

18. Mach yʌlʌyic chuqui mi lac ñusan, ¿chuqui yom mi lac mel? (Hebreos 11:6).

¹⁸ Jiñi pañimil (mulawil) woliʼ yʌsiyel majlel (2 Tim. 3:13). I Satanás woliʼ bej qʼuelbeñob i pusicʼal jiñi i wiñicob Dios. Mach yʌlʌyic chuqui mi lac ñusan ti talto bʌ qʼuin, laʼ lac chʌn melben i yeʼtel Jehová ti jumpʼejl lac pusicʼal come mi lac ñop chaʼan «tsaʼ la cʌcʼʌ lac pijtaya tiʼ tojlel juntiquil cuxul bʌ Dios» (1 Tim. 4:10). Laʼ laj cʼajtesan chaʼan tsaʼ bʌ ujti ti wiʼil tiʼ tojlel Job miʼ pʌs chaʼan «Jehová wen yujil cʼuxbiya yicʼot pʼuntaya» (Sant. 5:11). Cheʼ bajcheʼ Job, yom xucʼul mi la cajñel tiʼ tojlel Jehová, i laʼ lac ñop chaʼan mi caj i yʌqʼuen i bendición jiñi «muʼ bʌ i wen sʌclañob» (pejcan Hebreos 11:6).