Muʼ bʌ i yʌl Apocalipsis tiʼ tojlel jiñi i contrajob Dios

 1. Cheʼ bajcheʼ miʼ yʌl jiñi libro chaʼan Apocalipsis, ¿chuqui miʼ tumben i wiñicob Dios jiñi Satanás?

JIÑI libro chaʼan Apocalipsis miʼ pʌs chaʼan wolix (choncolix) ti yumʌntel ti panchan jiñi i Yumʌntel Dios yicʼot chaʼan Satanás tsaʼ chojqui jubel ti Lum (Apoc. 12:1-9). Ili tsiʼ yʌqʼueyob i tijicñʌyel jiñi chumuloʼ bʌ ti panchan, pero joñonla tsaʼ jach i ñumen chʼʌmbeyonla tilel wocol. ¿Chucoch? Come Satanás woli (yʌquel) i locʼsan i michʼajel tiʼ tojlel jiñi i wiñicob Jehová chumuloʼ bʌ ila ti Lum (Apoc. 12:12, 15, 17).

 2. ¿Chuqui mi caj i coltañonla chaʼan chʌn xucʼul mi la cajñel?

² ¿Chuqui miʼ mejlel lac mel (chaʼlen) chaʼan chʌn xucʼul mi la cajñel anquese Satanás miʼ ticʼlañonla? (Apoc. 13:10). Muʼ bʌ caj i coltañonla jin cheʼ mi lac ñaʼtan chuqui mi caj i yujtel ti talto bʌ qʼuin. Jumpʼejl ejemplo, jiñi apóstol Juan tsiʼ taja ti tʼan ti Apocalipsis chaʼpʼej uxpʼejl bendición muʼ bʌ caj lac taj. Junchajp jiñʌch cheʼ mi caj i jisʌntel jiñi i contrajob Dios. Laʼ laj qʼuel chuqui miʼ yʌl Apocalipsis tiʼ tojlelob yicʼot chuqui mi caj i chaʼleñob.

 3. ¿Baqui tac bʌ lajiya miʼ cʼʌjñel ti Apocalipsis?

³ Jiñi ñaxam bʌ versículo chaʼan Apocalipsis tsiquil miʼ pʌs chaʼan miʼ cʼʌn lajiya tac cheʼ bʌ an chuqui miʼ yʌl (Apoc. 1:1). Jiñi i contrajob Dios miʼ lajintelob bajcheʼ jontol (maña) bʌ bʌteʼel tac. Jumpʼejl ejemplo, miʼ taj ti tʼan «juncojt jontol bʌ bʌteʼel woli bʌ i loqʼuel tilel ti mar» i «an 10 i xulub yicʼot 7 i jol» (Apoc. 13:1). Cheʼ jiñi miʼ pʌs i bʌ «yambʌ jontol bʌ bʌteʼel woli bʌ i loqʼuel tilel ti lum». Miʼ chaʼlen tʼan bajcheʼ dragón i «muʼto i yʌcʼ ti jubel tilel cʼajc yaʼ ti panchan» (Apoc. 13:11-13). Cheʼ jiñi miʼ tajtʌl ti tʼan «juncojt jontol bʌ bʌteʼel wen chʌchʌc bʌ» baqui buchul juntiquil xʼixic muʼ bʌ i chon i bʌ. Ili uxcojt jontol bʌ bʌteʼel jiñobʌch jiñi i contrajob Dios wajalix bʌ caji i tsʼaʼleñob yicʼot jiñi i Yumʌntel. Jin chaʼan, ñuc i cʼʌjñibal cheʼ mi lac ñaʼtan majquiyob (Apoc. 17:1, 3).

4, 5. ¿Bajcheʼ miʼ coltañonla Daniel 7:15-17 chaʼan mi lac chʼʌmben i sujm muʼ tac bʌ i yʌjlel ti Apocalipsis?

⁴ Chaʼan mi lac ñaʼtan majquiyob ili i contrajob Dios, yom mi lac chʼʌmben i sujm jujunchajp muʼ bʌ i yʌjlel. Chaʼan mi lac chʼʌmben i sujm, ñumen wen cheʼ mi la cʌcʼ chaʼan jiñi Biblia miʼ tsictesan. Cabʌl muʼ bʌ i yʌjlel ti Apocalipsis ajlemix ti yan tac bʌ libro am bʌ ti Biblia. Jumpʼejl ejemplo, jiñi xʼaltʼan Daniel tsiʼ chaʼle ñajal baqui tsiʼ qʼuele «chʌncojt wen ñuc bʌ bʌteʼel tsaʼ loqʼui tilel ti jaʼ» (Dn. 7:1-3). I Daniel tiʼ tsictesa chaʼan ili colem bʌteʼel tac jiñobʌch chʌntiquil «yumʌlob» o reyob (pejcan Daniel 7:15-17). Ili miʼ coltañonla lac ñaʼtan chaʼan jiñi jontol bʌ bʌteʼel tac muʼ bʌ i yʌjlel ti Apocalipsis woliʼ taj ti tʼan jaʼel jiñi yumʌlob.

⁵ Laʼ lac ñumen cʌn jiñi muʼ tac bʌ i yʌjlel yaʼ ti libro chaʼan Apocalipsis. Ti ili estudio, jiñi Biblia mi caj i coltañonla lac ñaʼtan chuqui tac i sujmlel jiñi. Mi caj lac tech chaʼan bʌ jiñi jontol bʌ bʌteʼel tac. Mi caj lac ñaxan qʼuel majquiyob. Cheʼ jiñi, mi caj la cʌl chuqui mi caj i chaʼlen jiñi bʌteʼel tac. I ti wiʼil, mi caj laj qʼuel chuqui tac miʼ mejlel laj cʌn.

 6. ¿Chuqui yom i yʌl jiñi jontol bʌ bʌteʼel am bʌ 7 i jol muʼ bʌ i yʌjlel ti Apocalipsis 13:1-4?

⁶ ¿Chuqui yom i yʌl jiñi jontol bʌ bʌteʼel am bʌ 7 i jol? (Pejcan Apocalipsis 13:1-4). Jiñi Biblia miʼ yʌl chaʼan ili bʌteʼel lajal bajcheʼ juncojt leopardo, pero jiñi i yoc cheʼ yilal bajcheʼ i chaʼan juncojt oso i jiñi i yej cheʼ bajcheʼ i chaʼan león, yicʼot an 10 i xulub. Jiñi chʌncojt bʌteʼel muʼ bʌ i yʌjlel ti Daniel capítulo 7 cheʼ yilal jaʼel bajcheʼ iliyi, pero jujuncojt miʼ tajtʌl ti tʼan. Pero Apocalipsis miʼ yʌl chaʼan juncojt jach bʌteʼel luʼ an i chaʼan iliyi. Ili jontol bʌ bʌteʼel mach yomic jach i yʌl juntiquil yumʌl o jumpʼejl yumʌntel. Cheʼ jaʼel, Apocalipsis miʼ yʌl chaʼan an «i yeʼtel tiʼ tojlel pejtelel pʼolbalʌl, alʌ tejclum tac, tʼan tac yicʼot ñuqui tejclum tac». Jin chaʼan, ñumen ñucto i pʼʌtʌlel, mach cheʼ jach bajcheʼ juntiquil yumʌl ti jumpʼejl país (Apoc. 13:7). Jin chaʼan, ili bʌteʼel jiñobʌch jiñi yumʌlob ñumen añoʼ bʌ i pʼʌtʌlel tiʼ tojlel lac piʼʌlob cʼʌlʌl ti wajali (Ec. 8:9).b

 7. ¿Chuqui yom i yʌl jiñi 7 i jol jiñi jontol bʌ bʌteʼel?

⁷ ¿Chuqui yom i yʌl jiñi 7 jolʌl? Apocalipsis capítulo 17 miʼ coltañonla lac ñaʼtan, yaʼi miʼ tsictesʌntel chaʼan bʌ jiñi jontol bʌ bʌteʼel muʼ bʌ i yʌjlel ti capítulo 13. Apocalipsis 17:10 miʼ yʌl: «An 7 reyob: Joʼtiquil tsaʼix yajliyob, juntiquil wolito i mel i yeʼtel i jiñi yambʌ maxto juli, pero cheʼ bʌ miʼ julel tsʼitaʼ jach ora yom miʼ yajñel». Tiʼ pejtelel jiñi yumʌl am bʌ i cʼʌñʌ Satanás, an 7 muʼ bʌ i mejlel ti lajintel bajcheʼ jiñi jolʌl tac come cabʌl chuqui tsiʼ mele. Jiñʌch ñuqui yumʌlob am bʌ chuqui tsiʼ melbe jiñi i tejclum Dios. Tiʼ qʼuiñilel jiñi apóstol Juan, tsaʼix i mele i yeʼtel joʼtiquil yumʌlob yicʼot tsaʼix jisʌntiyob: Egipto, Asiria, Babilonia, Medopersia yicʼot Grecia. Jiñi i seislel jiñʌch Roma, woli bʌ ti yumʌl cheʼ bʌ Juan tsaʼ pʌsbenti pejtelel iliyi. ¿Majqui jiñi i sietejlel yumʌl o jolʌl?

 8. ¿Majqui jiñi i sietejlel bʌ i jol jiñi jontol bʌ bʌteʼel?

⁸ Cheʼ bajcheʼ mi laj qʼuel, jiñi profecía tac am bʌ yaʼ ti libro chaʼan Daniel miʼ coltañonla lac ñaʼtan majqui jiñi i sietejlel bʌ i jol jiñi jontol bʌ bʌteʼel. ¿Baqui bʌ yumʌntel woliʼ mel i yeʼtel ti ili cojix bʌ qʼuin, «tiʼ qʼuiñilel lac Yum»? (Apoc. 1:10). Jiñʌch jiñi yumʌntel chaʼan bʌ Reino Unido yicʼot Estados Unidos. Jin chaʼan, miʼ mejlel la cʌl chaʼan ili jiñʌch jiñi i sietejlel bʌ i jol jiñi jontol bʌ bʌteʼel muʼ bʌ i yʌjlel ti Apocalipsis 13:1-4.

 9. ¿Majqui jiñi jontol bʌ bʌteʼel am bʌ «chaʼpʼejl i xulub bajcheʼ i chaʼan i tat tiñʌmeʼ»?

⁹ Wʌle Apocalipsis capítulo 13 miʼ yʌl chuqui mi’ mel ili yumʌntel muʼ bʌ i lajintel bajcheʼ jiñi i sietejlel bʌ i jol jiñi jontol bʌ bʌteʼel, yom i yʌl, jiñi Reino Unido yicʼot Estados Unidos. Miʼ taj ti tʼan bajcheʼ yambʌ jontol bʌ bʌteʼel i miʼ yʌl: «An chaʼpʼejl i xulub bajcheʼ i chaʼan i tat tiñʌmeʼ, pero tsaʼ caji ti tʼan bajcheʼ juncojt dragón». Ili jontol bʌ bʌteʼel «cabʌl chuqui ñuc tac bʌ miʼ mel, muʼto i yʌcʼ ti jubel tilel cʼajc yaʼ ti panchan tiʼ tojel i wut jiñi lac piʼʌlob» (Apoc. 13:11-15). I jiñi Apocalipsis capítulo 16 yicʼot 19 miʼ taj ti tʼan iliyi bajcheʼ «jiñi xlot bʌ xʼaltʼan» (Apoc. 16:13; 19:20). Lʌcʼʌ lajal chuqui tsiʼ yʌlʌ Daniel chaʼan bʌ jiñi yumʌntel baqui ochem jiñi Reino Unido yicʼot Estados Unidos, come tsiʼ yʌlʌ: «Miʼ chaʼlen jisaya» (Dn. 8:19, 23, 24). I jiñʌch tsaʼ bʌ ujti ti jiñi Segunda Guerra Mundial. Jiñi chaʼpʼejl bomba atómica tsaʼ bʌ chojqui ti jimbʌ ora jin tsiʼ comol mele jiñi científicojob chaʼan jiñi Reino Unido yicʼot Estados Unidos. Cheʼ bajcheʼ jiñi, jiñi yumʌntel chaʼan bʌ Reino Unido yicʼot Estados Unidos tsiʼ yʌcʼʌ «ti jubel tilel cʼajc yaʼ ti panchan».

10. ¿Chuqui yom i yʌl jiñi «i yejtal jiñi jontol bʌ bʌteʼel»? (Apocalipsis 13:14, 15; 17:3, 8, 11).

¹⁰ Wʌle laʼ laj qʼuel chaʼan yambʌ bʌteʼel. Ili wen lajal bajcheʼ jiñi am bʌ 7 i jol, pero wen chʌchʌc. Apocalipsis miʼ suben bajcheʼ «i yejtal jiñi jontol bʌ bʌteʼel» i miʼ yʌl chaʼan jiñʌch jiñi i yochojlel bʌ rey (pejcan Apocalipsis 13:14, 15; 17:3, 8, 11).c Miʼ yʌjlel chaʼan ili «rey» tsiʼ pʌsʌ i bʌ, cheʼ jiñi tsaʼ jili i ti wiʼil tsiʼ chaʼ pʌsʌ i bʌ. Ili mucʼʌch i wen taj i bʌ yicʼot jiñi ujtem bʌ tiʼ tojlel jiñi Organización de las Naciones Unidas, muʼ bʌ i wen qʼuel chaʼan bʌ política tiʼ petol Pañimil. Ti ñaxan tsaʼ cʌjñi bajcheʼ Sociedad de Naciones. Cheʼ jiñi tsaʼ jili cheʼ ti Segunda Guerra Mundial. Pero ti wiʼil, tsaʼ chaʼ mejli cheʼ bajcheʼ cʌmbil lac chaʼan ili ora.

11. ¿Chuqui mi caj i melob jiñi yumʌlob lajaloʼ bʌ bajcheʼ jiñi jontol bʌ bʌteʼel, i chucoch mach yomic mi lac bʌcʼñañob?

¹¹ Pejtelel muʼ bʌ caj i melob jiñi yumʌlob lajaloʼ bʌ bajcheʼ jiñi jontol bʌ bʌteʼel, mi caj i ñijcʌben i pusicʼal jiñi lac piʼʌlob chaʼan miʼ yʌcʼob i bʌ tiʼ contra Jehová yicʼot i tejclum. Miʼ mejlel la cʌl chaʼan cheʼ bajcheʼ jiñi mi caj i tempañob «jiñi reyob tiʼ petol pañimil» chaʼan jiñi Armagedón, «jiñi guerra chaʼan bʌ jiñi ñuc bʌ i qʼuiñilel Dios, jiñi Mach bʌ añic i pʼisol i pʼʌtʌlel» (Apoc. 16:13, 14, 16). Pero mach yomic mi lac wis chaʼlen bʌqʼuen. Jehová, jiñi ñuc bʌ lac Dios, an chuqui mi caj i mel ti ora chaʼan miʼ coltan jiñi muʼ bʌ i coltʌbeñob i yumʌntel (Ez. 38:21-23).

12. ¿Chuqui mi caj i chaʼlen pejtelel jiñi bʌteʼel tac?

¹² ¿Chuqui mi caj i chaʼlen pejtelel jiñi bʌteʼel? Apocalipsis 19:20 miʼ yʌqʼueñonla i jacʼbal: «Tsaʼ chujqui jiñi jontol bʌ bʌteʼel temel yicʼot jiñi xlot bʌ xʼaltʼan tsaʼ bʌ i mele chuqui ñuc tac bʌ tiʼ tojel chaʼan miʼ lotin jiñi tsaʼ bʌ aqʼuentiyob i marcajlel jiñi jontol bʌ bʌteʼel yicʼot jiñi tsaʼ bʌ i chʼujutesʌbeyob jiñi i yejtal. Cheʼ bʌ cuxulobto, tiʼ chaʼticlelob tsaʼ chojquiyob ochel yaʼ ti lemlemña bʌ cʼajc yicʼot azufre». Jin chaʼan, jiñi políticojob i contrajoʼ bʌ Dios mi caj i junyajl jisʌntelob cheʼ bʌ woliyobto ti yumʌntel.

13. ¿Chuqui ti wocol mi lac ñusan jiñi xñoptʼañonbʌla tiʼ caj jiñi yumʌlob?

¹³ Muʼ bʌ laj cʌn. Jiñi xñoptʼañonbʌla yom xucʼul mi la cajñel tiʼ tojlel Dios yicʼot i Yumʌntel (Juan 18:36). Chaʼan miʼ mejlel lac mel jiñi, mach yomic mi la cotsan lac bʌ ti política yicʼot tiʼ chaʼan tac bʌ ili pañimil (mulawil). Pero tajol wocol mi la cubin jiñi come jiñi yumʌlob yomob chaʼan mi laj coltañob ti lac tʼan yicʼot ti chuqui mi lac mel. Jiñi muʼ bʌ i jacʼob i mel jiñi, miʼ yʌqʼuentelob jiñi marca chaʼan bʌ jiñi jontol bʌ bʌteʼel (Apoc. 13:16, 17). I jiñi añoʼ bʌ i chaʼan ili marca mach utsʼatix miʼ qʼuejlelob ti Jehová yicʼot maʼañix mi caj i chumtʌlob tiʼ pejtelel ora (Apoc. 14:9, 10; 20:4). Jin chaʼan, wen ñuc i cʼʌjñibal cheʼ maʼañic mi la cotsan lac bʌ tiʼ chaʼan tac bʌ pañimil, mach yʌlʌyic bajcheʼ cʼamel miʼ xicʼonla jiñi yumʌlob chaʼan mi laj coltañob.

14. ¿Chuqui tsiʼ qʼuele jiñi apóstol Juan tsaʼ bʌ i yʌcʼʌ ti toj sajtel i pusicʼal? (Apocalipsis 17:3-5).

¹⁴ Jiñi apóstol Juan miʼ yʌl chaʼan an chuqui yambʌ tsiʼ qʼuele tsaʼ bʌ i yʌcʼʌ ti toj sajtel i pusicʼal. ¿Chuquiyes? Jiñʌch juntiquil xʼixic buchul bʌ ti juncojt jontol bʌ bʌteʼel (Apoc. 17:1, 2, 6). Miʼ lajintel bajcheʼ juntiquil «xʼixic muʼ bʌ i chon i bʌ», i jiñi i cʼabaʼ jiñʌch «jiñi Ñuc bʌ Babilonia». Ili xʼixic miʼ chaʼlen «tsʼiʼlel» yicʼotob «jiñi reyob ti pañimil» (pejcan Apocalipsis 17:3-5).

15, 16. ¿Chuqui «jiñi Ñuc bʌ Babilonia», i bajcheʼ la cujil?

¹⁵ ¿Chuqui «jiñi Ñuc bʌ Babilonia»? Ili xʼixic mach jiñic jiñi organización chaʼan bʌ política come Apocalipsis miʼ yʌl chaʼan miʼ chaʼlen tsʼiʼlel yicʼot jiñi yumʌlob añoʼ bʌ ila ti Lum (Apoc. 18:9). Cheʼ buchul ti juncojt jontol bʌ bʌteʼel miʼ pʌs chaʼan ili xʼixic yom chaʼan miʼ yajñelob tiʼ pʼʌtʌlel. Cheʼ jaʼel, mach jiñic jiñi organización tac chaʼan bʌ choñoñel tac ila tiʼ pañimil Satanás, come Apocalipsis muʼto i wiʼil taj ti tʼan «jiñi xchoñoñelob ti pañimil» (Apoc. 18:11, 15, 16).

¹⁶ Ti Biblia, jiñi tʼan xʼixic muʼ bʌ i chon i bʌ o xtsʼiʼlel bʌ xʼixic miʼ mejlel i yʌcʼ ti ñaʼtʌntel juntiquil muʼ bʌ i chʼujutesan melbil (pʌtbil) tac jach bʌ Dios o muʼ bʌ i sujtel tiʼ yamigo ili pañimil (Ez. 16:1, 2, 35, 36; Sant. 4:4). Pero cheʼ bʌ miʼ taj ti tʼan jiñi xucʼul bʌ i wiñic Dios, miʼ cʼʌn jiñi tʼan sʌc bʌ xchʼoc (2 Cor. 11:2; Apoc. 14:4). Yaʼ ti Babilonia am bʌ ti wajali wen cabʌl jiñi mach bʌ i sujmic ñopbalʌl. Jin chaʼan, jiñi Ñuc bʌ Babilonia jiñʌch pejtelel jiñi mach bʌ i sujmic chʼujutesaya. Jiñʌch jiñi mach bʌ i sujmic ñopbalʌl tac am bʌ ti pañimil (Apoc. 17:5, 18; qʼuele jiñi apéndice «¿Chuqui jiñi ‹ÑUC BɅ BABILONIA›?», am bʌ yaʼ ti libro ¿Chuqui miʼ cʌntesañonla tiʼ sujmlel jiñi Biblia?, página 251 yicʼot 252).

17. ¿Chuqui mi caj i chaʼlen jiñi Ñuc bʌ Babilonia?

¹⁷ ¿Chuqui mi caj i chaʼlen jiñi Ñuc bʌ Babilonia? Apocalipsis 17:16, 17 miʼ yʌl: «Jiñi 10 xulub tsaʼ bʌ a qʼuele yicʼot jiñi jontol bʌ bʌteʼel mi caj i tsʼaʼleñob jiñi xʼixic muʼ bʌ i chon i bʌ, mi caj i junyajl jisañob i chacal mi caj i cʌyob. Mi caj i cʼuxbeñob i bʌcʼtal yicʼot mi caj i junyajl pulob ti cʼajc. Come Dios tsiʼ yʌqʼueyob tiʼ pusicʼal i melob jiñi ñaʼtʌbil bʌ i chaʼan». Cheʼʌchi, Jehová mi caj i yʌcʼ chaʼan jiñi tejclum tac miʼ cʼʌn jiñi jontol bʌ bʌteʼel wen chʌchʌc bʌ, ili jiñʌch jiñi Naciones Unidas, chaʼan miʼ contrajin jiñi mach bʌ i sujmic ñopbalʌl ti pañimil yicʼot miʼ junyajl jisan (Apoc. 18:21-24).

18. ¿Chuqui yom mi lac mel chaʼan maʼañic mi la cotsan lac bʌ tiʼ chaʼan bʌ jiñi Ñuc bʌ Babilonia?

¹⁸ Muʼ bʌ laj cʌn. Ñuc i cʼʌjñibal cheʼ tsʌts mi lac chuc lac bʌ ti «jiñi sʌc bʌ chʼujutesaya yicʼot mach bʌ añic i bibiʼlel» tiʼ wut Dios (Sant. 1:27). Mach la cʌcʼ chaʼan jiñi Ñuc bʌ Babilonia miʼ bibʼesañonla ti jiñi mach bʌ i sujmic i cʌntesa tac, ti jiñi qʼuiñijel tac, ti jiñi mach bʌ weñic i melbal (chaʼlibal) yicʼot tiʼ chaʼan tac bʌ espiritismo. I laʼ lac bej suben jiñi lac piʼʌlob: «Loqʼuenla yaʼi». Mi mucʼʌch i loqʼuelob, Dios maʼañic mi caj i qʼuelob bajcheʼ i piʼʌlob ti mulil jiñi Ñuc bʌ Babilonia (Apoc. 18:4).

19. ¿Majqui jiñi «colem dragón cheʼ bʌ i colorlel bajcheʼ cʼajc»?

¹⁹ Jiñi libro chaʼan Apocalipsis miʼ taj ti tʼan jaʼel «juncojt colem dragón cheʼ bʌ i colorlel bajcheʼ cʼajc» (Apoc. 12:3). Ili dragón miʼ chaʼlen guerra yicʼot Jesús i jiñi i yángelob (Apoc. 12:7-9). Cheʼ jaʼel, miʼ ticʼlan jiñi i tejclum Dios i miʼ yʌqʼuen i pʼʌtʌlel jiñi yumʌlob lajaloʼ bʌ bajcheʼ jontol bʌ bʌteʼel (Apoc. 12:17; 13:4). ¿Majqui ili dragón? Jiñʌch «jiñi wajalix bʌ lucum, ili jiñʌch jiñi Diablo yicʼot Satanás» (Apoc. 12:9; 20:2). I jiñʌch jiñi am bʌ tiʼ cʼʌb pejtelel jiñi yambʌ i contrajob Jehová.

20. ¿Chuqui mi caj i chaʼlen jiñi dragón?

²⁰ ¿Chuqui mi caj i chaʼlen jiñi dragón? Apocalipsis 20:1-3 miʼ yʌl chaʼan juntiquil ángel mi caj i choc ochel Satanás ti jumpʼejl abismo, ili lajalʌch bajcheʼ jumpʼejl cárcel tiʼ tojlel Satanás. Mil jab mi caj i ñujpʼel i maʼañix mi caj i chaʼ lotin jiñi tejclum tac jinto miʼ jilel jiñi Mil jab. I ti wiʼil, Satanás yicʼot jiñi i xibajob mi caj i chojquelob ochel «yaʼ ti cʼajc yicʼot bʌ azufre». Ili yom i yʌl chaʼan mi caj i junyajl jisʌntelob (Apoc. 20:10). Ñaʼtancu bajcheʼ yilal mi caj lac chumtʌl cheʼ bʌ tsaʼix jisʌnti Satanás yicʼot i xibajob. ¡Wen utsʼatax miʼ cajel!

21. ¿Chucoch miʼ yʌqʼueñonla lac tijicñʌyel jiñi tsaʼ bʌ lac pejca yaʼ ti libro chaʼan Apocalipsis?

²¹ ¿Mach ba muqʼuic i yʌqʼueñonla lac tijicñʌyel cheʼ mi lac ñaʼtan chuqui yom i yʌl jiñi lajiya tac am bʌ yaʼ ti libro chaʼan Apocalipsis? Mach tsaʼ jach laj qʼuele majquiyob jiñi i contrajob Jehová, yicʼotʌch chuqui mi caj i chaʼleñob. Cheʼʌchi, «tijicña jiñi muʼ bʌ i pejcan ti cʼam bʌ tʼan jiñi tʼan tac chaʼan bʌ ili profecía i tijicñayob jiñi muʼ bʌ i yubiñob […] chuqui tac tsʼijbubil yaʼi» (Apoc. 1:3). Pero, ¿chuqui ti bendición tac mi caj i tajob jiñi xucʼul bʌ miʼ yajñelob cheʼ bʌ tsaʼix jisʌntiyob jiñi i contrajob Dios? Ili mi caj laj qʼuel ti jiñi yambʌ estudio.