Yom bʌ i subeñet Apocalipsis chaʼan jiñi talto bʌ qʼuin

 1. ¿Chuqui yom miʼ melob pejtelel lac piʼʌlob?

TI ILI ora pejtelel jiñi lac piʼʌlob an chuqui yom miʼ melob (chaʼleñob): ¿Muʼ ba caj i coltañob Jehová jiñi ñumen ñuc bʌ yumʌl, o mi caj i coltañob Satanás, jiñi ñuc bʌ i contra Dios? Wersa yomʌch miʼ yajcañob junchajp. Jiñi laj cuxtʌlel maʼañic bʌ i jilibal yaʼ cʌyʌl ti chuqui mi lac yajcan lac mel (Mat. 25:31-33, 46). Cheʼ tiʼ yorajlel «jiñi cabʌl wocol», jiñi i wiñicob Jehová xucʼul bʌ miʼ yajñelob mi caj i yʌqʼuentelob i marca chaʼan cuxul miʼ yajñelob (Apoc. 7:14; Ez. 9:4, 6). I jiñi añoʼ bʌ i chaʼan i marcajlel jiñi jontol bʌ bʌteʼel mi caj i jisʌntelob (Apoc. 14:9-11).

 2. a) ¿Chuqui miʼ subeñonla lac mel Hebreos 10:35-39? b) ¿Bajcheʼ miʼ coltañonla jiñi libro chaʼan Apocalipsis?

² (Pejcan Hebreos 10:35-39). Mi jatet wolix (choncolix) a coltan jiñi i yumʌntel Jehová, weñʌch jiñi woli (yʌquel) bʌ a mel. Mi lon cʌl chaʼan a womʌch a coltan yañoʼ bʌ chaʼan cheʼʌch miʼ melob jaʼel. Jin chaʼan, jiñi libro chaʼan Apocalipsis miʼ mejlel i coltañet. Miʼ subeñonla chuqui mi caj i chaʼleñob jiñi muʼ bʌ i tsʼaʼleñob Jehová. I miʼ subeñonla jiñi bendición tac muʼ bʌ caj i tajob jiñi muʼ bʌ i coltʌbeñob i yumʌntel. Weñʌch cheʼ mi lac wen qʼuel ili cʌntesa tac wen ñuc bʌ i cʼʌjñibal come miʼ coltañonla chaʼan mi lac ñumen mulan lac melben i yeʼtel (troñel) Jehová. Cheʼ jaʼel, Miʼ mejlel laj cʼʌn jiñi cʌmbil bʌ lac chaʼan chaʼan mi laj coltan yañoʼ bʌ chaʼan wen chuqui miʼ yajcañob i mel yicʼot chaʼan maʼañic miʼ chaʼ chocob majlel i bʌ tiʼ pat.

 3. ¿Chuqui ti cʼajtiya tac mi caj lac jacʼ ti ili estudio?

³ Ti ili estudio, mi caj lac jacʼ ili cʼajtiya tac: ¿Chuqui mi caj i tajob jiñi muʼ bʌ coltʌbeñob i Yumʌntel Dios?, i ¿chuqui mi caj i chaʼleñob jiñi muʼ bʌ i coltañob jiñi jontol bʌ bʌteʼel wen chʌchʌc bʌ muʼ bʌ i yʌjlel ti jiñi libro chaʼan Apocalipsis.

 4. ¿Majquiyob tsiʼ taja i qʼuel jiñi apóstol Juan chaʼan yaʼañob yicʼot Jesús yaʼ ti panchan?

⁴ Jiñi apóstol Juan tsaʼ pʌsbenti chaʼmojt muʼ bʌ i coltʌbeñob i yumʌntel Jehová i miʼ tajob jiñi cuxtʌlel mach bʌ añic miʼ jilel yicʼot yan tac bʌ bendición. Ti jiñi ñaxam bʌ junmojt yaʼañob jiñi 144 mil (Apoc. 7:4). Miʼ loqʼuelob ti jiñi Pañimil, i miʼ majlelob ti panchan chaʼan miʼ chaʼleñob yumʌntel yicʼot Jesús. Juntemel miʼ yumañob jiñi Pañimil (Apoc. 5:9, 10; 14:3, 4). Juan miʼ qʼuel chaʼan yaʼ waʼalob yicʼot Jesús ti jiñi wits Sión am bʌ ti panchan (Apoc. 14:1).

 5. ¿Chuqui mi caj i yujtel ti lʌcʼʌl tiʼ tojlelob jiñi xñoptʼañob yajcʌbiloʼ bʌ cʌylemobto bʌ ila ti Pañimil?

⁵ Tiʼ yorajlel jiñi apóstolob cʼʌlʌl ili ora, an yajcʌnti cabʌl lac piʼʌlob chaʼan miʼ yochelob ti jiñi 144 mil (Luc. 12:32; Rom. 8:17). Pero Juan miʼ subentel chaʼan ti jiñi cojix tac bʌ qʼuin maʼañix jaytiquil cuxuloʼ bʌ mi caj i yajñelob ila ti Pañimil. Cheʼ bʌ muʼto caj i tejchel jiñi cabʌl wocol, ili xñoptʼañob yajcʌbiloʼ bʌ, «cʌylemto bʌ», mi caj i yʌqʼuentelob jiñi «sello», yom i yʌl, chaʼan Jehová mi caj i yotsañob ti jiñi yumʌntel (Apoc. 7:2, 3; 12:17). Cheʼ jiñi, cheʼ bʌ woli jiñi cabʌl wocol, ili cʌylemobto bʌ mi caj i pʌjyelob majlel ti panchan chaʼan miʼ yajñelob yicʼotob jiñi yambʌlob ochemoʼ bʌ ti jiñi 144 mil xucʼul bʌ tsaʼ chʌmiyob i yaʼix bʌ añob ti panchan. Mi caj i chaʼleñob yumʌntel yicʼot Jesús tiʼ Yumʌntel Dios (Mat. 24:31; Apoc. 5:9, 10).

6, 7. a) ¿Baqui bʌ yambʌ junmojt miʼ taj i qʼuel Juan, i chuqui la cujil tiʼ tojlelob? b) ¿Chucoch jiñi i colobal jiñi yambʌ xñoptʼañob yajcʌbiloʼ bʌ yicʼot jiñi «yonlel lac piʼʌlob» yom miʼ mulañob i cʌn Apocalipsis capítulo 7?

⁶ Cheʼ bʌ Juan tsaʼix i qʼuele jiñi junmojt añoʼ bʌ ti panchan, miʼ qʼuel «yonlel lac piʼʌlob». Ili yambʌ junmojt maʼañic miʼ mejlel ti tsijquel bajcheʼ jiñi 144 mil (Apoc. 7:9, 10). ¿Chuqui la cujil tiʼ tojlelob? Juan tsaʼ subenti: «Jiñʌch muʼ bʌ i loqʼuelob ti jiñi cabʌl wocol, tsaʼix i wutsʼuyob jiñi pʌl bʌ i pislelob yicʼot tsaʼix i sʌqʼuesayob tiʼ chʼichʼel jiñi Tiñʌmeʼ» (Apoc. 7:14). Cheʼ bʌ ujtemix jiñi cabʌl wocol, ili «yonlel lac piʼʌlob» mi caj i chumtʌlob ila ti Lum i mi caj i tajob cabʌl bendición (Sal. 37:9-11, 27-29; Pr. 2:21, 22; Apoc. 7:16, 17).

⁷ Mach yʌlʌyic mi yajcʌbilonla chaʼan mi lac majlel ti panchan o chaʼan mi laj cʌytʌl ti chumtʌl ila ti Lum, ti lac pejtelel yom mi laj qʼuel lac bʌ ti jiñi «foto» muʼ bʌ i yʌjlel ti Apocalipsis capítulo 7, ¿mach ba cheʼi? ¡Wen utsʼatax chuqui mi caj i tajob ili chaʼmojt i wiñicob Dios! Wen tijicña mi caj la cubin lac bʌ cheʼ bʌ tsaʼʌch laj coltʌbe i yumʌntel Jehová. ¿Chuqui yambʌ miʼ subeñonla jiñi libro chaʼan Apocalipsis chaʼan jiñi i yorajlel cabʌl wocol? (Mat. 24:21).

 8. ¿Bajcheʼ mi caj i tejchel jiñi cabʌl wocol, i chuqui mi caj i melob yonlel lac piʼʌlob?

⁸ Cheʼ bajcheʼ tsaʼ laj qʼuele ti jiñi yambʌ estudio, jiñi organización tac chaʼan bʌ política mi caj i jisañob jiñi Ñuc bʌ Babilonia, pejtelel jiñi mach bʌ i sujmic ñopbalʌl ila ti Pañimil (Apoc. 17:16, 17). Cheʼ bajcheʼ jiñi mi caj i tejchel jiñi cabʌl wocol. ¿Muʼ ba caj i yʌcʼ jiñi chaʼan cabʌl lac piʼʌlob miʼ chʼujutesañob Jehová? Maʼañic. Apocalipsis capítulo 6 miʼ yʌl chaʼan ti jimbʌ ora jiñi maʼañic bʌ miʼ chʼujutesañob Jehová mi caj i sʌclañob i coltʌntel ti jiñi organización tac chaʼan bʌ política yicʼot chaʼan bʌ choñoñel muʼ bʌ i lajin jiñi Biblia bajcheʼ wits tac. Jehová mi caj i qʼuelob bajcheʼ i contrajob come maʼañic mi caj i coltʌbeñob i yumʌntel (Luc. 11:23; Apoc. 6:15-17).

 9. ¿Chucoch jiñi lac piʼʌlob mi caj i wen acʼob i wut ti jiñi i tejclum Jehová tiʼ yorajlel jiñi cabʌl wocol, i chuqui mi caj i yujtel?

⁹ Jiñi lac piʼʌlob mi caj i wen acʼob i wut tiʼ wiñicob Jehová tiʼ yorajlel jiñi cabʌl wocol. Come jin jach muʼ bʌ caj i chʌn melbeñob i yeʼtel Jehová ila ti Pañimil i maʼañic bʌ mi caj i coltañob «jiñi jontol bʌ bʌteʼel» (Apoc. 13:14-17). Jiñi muʼ bʌ i tsʼaʼleñob Jehová mi caj i wen michʼañob cheʼ bʌ mi caj i qʼuelob chaʼan xucʼul añob. Jin chaʼan, junmojt tejclum mi caj i contrajin i tejclum Dios am bʌ tiʼ pejtelel Pañimil. Jiñi Biblia miʼ suben iliyi bajcheʼ ticʼlʌntel tilem bʌ ti Gog de Magog (Ez. 38:14-16).

10. Cheʼ bajcheʼ miʼ yʌl Apocalipsis 19:19-21, ¿chuqui mi caj i mel Jehová cheʼ bʌ miʼ ticʼlʌntel jiñi i tejclum?

¹⁰ ¿Chuqui mi caj i mel Jehová cheʼ bʌ miʼ ticʼlʌntel jiñi i tejclum? Jehová miʼ subeñonla: «Mi caj i tejchel [...] cabʌl c michʼlel» (Ez. 38:18, 21-23). Apocalipsis capítulo 19 miʼ tsictesan chuqui mi caj i bej yujtel. Jehová mi caj i choc tilel jiñi i Yalobil chaʼan miʼ coltan jiñi i tejclum yicʼot miʼ jisan jiñi i contrajob. Pero mach i bajñelic jach mi caj i yajñel Jesús, yicʼotob «jiñi soldadojob ti panchan», yom i yʌl, jiñi xucʼul bʌ ángelob yicʼot jiñi 144 mil (Apoc. 17:14; 19:11-15). ¿Chuqui mi caj i yujtel ti ili guerra? Mi caj i junyaj jisʌntelob pejtelel jiñi lac piʼʌlob yicʼot organización tac muʼ bʌ i tsʼaʼleñob Jehová (pejcan Apocalipsis 19:19-21).

11. ¿Chuqui jiñi ñumen utsʼatax bʌ muʼ bʌ i taj ti tʼan jiñi libro chaʼan Apocalipsis?

¹¹ ¿Bajcheʼ yubil mi caj i yubiñob i bʌ jiñi xñoptʼañob cuxulobto bʌ miʼ cʌyleyob cheʼ bʌ miʼ jisʌntel jiñi i contrajob Dios? ¡Wen tijicña mi caj i yubiñob! I, anquese yaʼ ti panchan mi caj i yubintel oñel chaʼan bʌ tijicñʌyel cheʼ bʌ tsaʼix jisʌnti jiñi Ñuc bʌ Babilonia, anto chuqui mi caj i ñumen acʼ tijicñʌyel (Apoc. 19:1-3). Jiñʌch jiñi ñumen utsʼatax bʌ muʼ bʌ i taj ti tʼan jiñi libro chaʼan Apocalipsis: I «ñujpuñel jiñi Tiñʌmeʼ» (Apoc. 19:6-9).

12. ¿Jala mi caj i ñujpuñel jiñi Tiñʌmeʼ? (Apocalipsis 21:1, 2).

¹² ¿Jalaqui miʼ cajel jiñi ñujpuñel? Anquese pejtelel jiñi 144 mil yaʼix añob ti panchan cheʼ bʌ miʼ tejchel Armagedón, maxto añic mi caj i ñujpuñel jiñi Tiñʌmeʼ (pejcan Apocalipsis 21:1, 2). Jiñi ñujpuñel miʼ cajel cheʼ bʌ tsaʼix ujti Armagedón, cheʼ bʌ tsaʼix luʼ jisʌntiyob pejtelel jiñi i contrajob Dios (Sal. 45:3, 4, 13-17).

13. ¿Chucoch wen ñuc i cʼʌjñibal i ñujpuñel jiñi Tiñʌmeʼ tiʼ tojlel jiñi muʼ bʌ i ñujpuñelob?

¹³ ¿Chucoch wen ñuc i cʼʌjñibal i ñujpuñel jiñi Tiñʌmeʼ tiʼ tojlel jiñi muʼ bʌ i ñujpuñelob? Ti jumpʼejl ñujpuñel miʼ temob i bʌ juntiquil wiñic yicʼot xʼixic. Ti ili ñujpuñel jiñi Rey, Jesucristo, miʼ tem i bʌ yicʼot i «novia», jiñi 144 mil. Cheʼ bʌ miʼ yujtel iliyi, Jesús yicʼot jiñi 144 mil mi caj i techob i yumʌntel tiʼ tojlel jiñi Pañimil (Apoc. 20:6).

14, 15. ¿Bajcheʼ miʼ lajintel jiñi 144 mil ti Apocalipsis 21? (Qʼuele jiñi dibujo am bʌ tiʼ tejchibal).

¹⁴ Cheʼ jiñi, Apocalipsis ti capítulo 21 miʼ lajin jiñi 144 mil bajcheʼ jumpʼejl utsʼatax bʌ tejclum i cʼabaʼ «jiñi Tsijiʼ bʌ Jerusalén» (Apoc. 21:2, 9). «I cʼʌclib [...] jiñi tejclum jiñʌch 12 xajlel», «i yaʼ tsʼijbubilob i cʼabaʼ jiñi 12 i yapóstolob jiñi Tiñʌmeʼ». Miʼ mejlel la cʌl chaʼan iliyi tsiʼ yʌcʼʌ ti toj sajtel i pusicʼal Juan. ¿Chucoch? Come tsiʼ qʼuele i cʼabaʼ ti jumpʼejl xajlel. ¡Wen ñuc bʌ majtañʌl! (Apoc. 21:10-14; Efes. 2:20).

¹⁵ Jiñi tejclum mach lajalic bajcheʼ yambʌ tejclum. Jiñi colem bʌ bij melbil (pʌtbil) ti toʼol oro, jiñi 12 puerta melbil ti 12 perla, jiñi i murojlel yicʼot jiñi i cʼʌclib chʼʌlbil ti utsʼatax bʌ xajlel tac, i colemlel jiñi tejclum luʼ wen jach (Apoc. 21:15-21). Pero Juan miʼ qʼuel chaʼan anto chuqui yom. ¿Chuqui? Miʼ yʌl: «Maʼañic tsaʼ j qʼuele mi jumpʼejlic templo yaʼ ti tejclum, come Jehová Dios, jiñi Mach bʌ añic i pʼisol i pʼʌtʌlel, jiñʌch jiñi i templo, cheʼ bajcheʼ jiñi Tiñʌmeʼ. Yaʼ ti tejclum mach cʼʌñʌlic miʼ tsʼʌjyel jiñi qʼuin o jiñi uw, come jiñi i ñuclel Dios jiñʌch muʼ bʌ i tsʼʌycʼʌcʼan i jiñi i lámpara jiñʌch jiñi Tiñʌmeʼ» (Apoc. 21:22, 23). Jiñi ochemoʼ bʌ ti jiñi Tsijiʼ bʌ Jerusalén mi caj i mejlelob ti ochel baʼan Jehová (Heb. 7:27; Apoc. 22:3, 4). Jin chaʼan, miʼ yʌjlel chaʼan Jehová yicʼot Jesús jiñobʌch i templojlel jiñi tejclum.

16. ¿Chuqui ti bendición tac mi caj lac taj ti jiñi mil jab i Yumʌntel Dios?

¹⁶ Jiñi xñoptʼañob yajcʌbiloʼ bʌ chaʼan miʼ majlelob ti panchan miʼ wen ubiñob i tijicñʌyel cheʼ bʌ miʼ ñaʼtañob ili tejclum. Pero jiñi muʼ bʌ caj i chumtʌlob tiʼ pejtelel ora ila ti Pañimil yomʌch miʼ cʌñob jaʼel. Cheʼ bʌ wolix i mel i yeʼtel mil jab jiñi i Yumʌntel Dios, jiñi tsijiʼ bʌ Jerusalén mi caj i yʌcʼ cabʌl bendición tac ila ti Lum. Juan miʼ qʼuel chaʼan jiñi bendición tac miʼ tilel bajcheʼ «jumpʼejl colem jaʼ chaʼan bʌ cuxtʌlel» yicʼot chaʼan tiʼ chaʼwejlel jiñi colem jaʼ an «teʼ tac chaʼan bʌ cuxtʌlel» muʼ bʌ i yʌcʼ i yopol tac «chaʼan miʼ tsʼʌcʌntel jiñi tejclum tac» (Apoc. 22:1, 2). Pejtelel jiñi chumuloʼ bʌ ti jimbʌ ora mi caj i mejlel i tajob ili majtañʌl tac. I jiñi mucʼʌch bʌ i jacʼob tʼan cʼunteʼ cʼunteʼ mi caj i sujtelob ti toj. Maʼañix miʼ cajel cʼamʌjel, cʼuxyajiyel yicʼot uqʼuel chaʼan lac chʼijyemlel (Apoc. 21:3-5).

17. ¿Majquiyob jiñi muʼ bʌ caj i tajob bendición tac ti jiñi mil jab? (Apocalipsis 20:11-13).

¹⁷ ¿Majquiyob mi caj i tajob ili utsʼatax bʌ majtañʌl tac? Jiñi yonlel lac piʼʌlob cuxul bʌ mi caj i ñumelob ti Armagedón yicʼot jiñi alʌlob muʼ bʌ caj i yilañob pañimil (chʼocʼañob) ti jiñi tsijiʼ bʌ pañimil (mulawil). Pero mach jiñob jach. Apocalipsis capítulo 20 miʼ yʌl chaʼan jiñi tsaʼix bʌ chʌmiyob mi caj i chaʼ cuxtʌyelob (pejcan Apocalipsis 20:11-13). ¿I majquiyob jiñi muʼ bʌ caj i chaʼ cuxtʌyelob ila ti Lum? Jiñʌch jiñi «tojoʼ bʌ», yom i yʌl, jiñi xucʼul bʌ i wiñicob Jehová tsaʼ bʌ chʌmiyob ti wajali, yicʼot jiñi «mach bʌ tojobic», yom i yʌl, jiñi maʼañic bʌ tsaʼ mejli i cʌñob Jehová (Hech. 24:15, Juan 5:28, 29). ¿Yom ba i yʌl iliyi chaʼan mi caj i chaʼ cuxtʌyel pejtelel lac piʼʌlob ti jiñi mil jab? Maʼañic. Jiñi maʼañic bʌ tsiʼ jacʼʌyob i melbeñob i yeʼtel Jehová cheʼ bʌ cuxulobto maʼañix mi caj i chaʼ cuxtʌyelob. Tsiʼ pʌsʌyob chaʼan mach yomic miʼ chumtʌlob yaʼ ti Paraíso (Mat. 25:46; 2 Tes. 1:9; Apoc. 17:8; 20:15)

18. ¿Bajcheʼ yilal mi caj i yajñelob jiñi lac piʼʌlob tiʼ yujtibal jiñi mil jab?

¹⁸ Tiʼ yujtibal jiñi mil jab, tojobix pejtelel jiñi chumuloʼ bʌ ila ti Pañimil. Maʼañix majqui mi caj i ñusan wocol tiʼ caj jiñi mulil tsaʼ bʌ i yotsa Adán (Rom. 5:12). Maʼañix chuqui mi caj i wis cʌytʌl chaʼan i mul jiñi Adán. Miʼ mejlel la cʌl chaʼan tiʼ yujtibal jiñi mil jab jiñi chumuloʼ bʌ ila ti Pañimil cuxul mi caj i yajñelob come tojobix (Apoc. 20:5).

19. ¿Chucoch cʼʌñʌlʌch miʼ chaʼ jumucʼ cojlel Satanás?

¹⁹ La cujil chaʼan Jesús, juntiquil toj bʌ wiñic, chʌn xucʼul tsaʼ ajñi ti Dios anquese cabʌl chuqui tsiʼ mele Satanás chaʼan miʼ yʌcʼ ti mulil. Pero ¿cheʼ ba mi caj i melob jaʼel pejtelel jiñi lac piʼʌlob tojoʼ bʌ cheʼ bʌ Satanás miʼ yʌcʼob ti wocol? Jujuntiquil mi caj i pʌsob i jacʼbal ili cʼajtiya cheʼ bʌ miʼ yujtel jiñi mil jab i cheʼ bʌ Satanás miʼ cojlel loqʼuel yaʼ ti abismo (Apoc. 20:7). Jiñi xucʼul bʌ miʼ yajñelob cheʼ bʌ miʼ cojlel Satanás mi caj i yʌqʼuentelob jiñi cuxtʌlel maʼañic bʌ i jilibal i librejobix tiʼ sujm (Rom. 8:21). Pero jiñi muʼ bʌ i chañʼesañob i bʌ mi caj i junyajl jisʌntelob, cheʼ bajcheʼ jiñi Diablo yicʼot i xibajob (Apoc. 20:8-10).

20. ¿Bajcheʼ yubil maʼ wubin a bʌ cheʼ bʌ tsaʼix laj qʼuele jiñi utsʼatax bʌ profecía tac am bʌ ti Apocalipsis?

²⁰ ¿Bajcheʼ yubil maʼ wubin a bʌ cheʼ bʌ tsaʼix lac tsʼitaʼ qʼuele chuqui miʼ yʌl jiñi libro chaʼan Apocalipsis? ¿Muʼ bʌ i yʌqʼueñet a tijicñʌyel cheʼ bʌ maʼ qʼuel a bʌ ti jiñi «foto», cheʼ woli a qʼuel ti tsʼʌctiyel ili utsʼatax bʌ profecía tac? ¿A wom ba a pʌy yañoʼ bʌ chaʼan mi laj comol chʼujutesan Dios ti wen? (Apoc. 22:17). Cheʼ bʌ tsaʼix laj qʼuele chuqui tac mi caj i yujtel ti talto bʌ qʼuin, miʼ mejlel la cʌl chaʼan wen tijicñayonla i la com la cʌl jiñi tsaʼ bʌ i yʌlʌ jiñi apóstol Juan: «¡Amén! Laʼ c Yum Jesús» (Apoc. 22:20).