Ñajal tac muʼ bʌ i pʌs majqui añob ti panchan

«Jumpʼejl buchlibʌl acʼbil bʌ ti panchan yicʼot jini yaʼ bʌ buchul tiʼ yumʌntel. Lajal yilal jini buchul bʌ bajcheʼ jaspe xajlel yicʼot sardio xajlel. An tʼoxjaʼ tiʼ joytʌlel i buchlib Dios lajal yilal bajcheʼ esmeralda xajlel» (Apocalipsis [Revelación] 4:2, 3).

«Ti yebal i cajchiñʌcʼ cheʼ yilal bajcheʼ cʼajc, chʌcxowan bʌ i cʼʌcʼal, cheʼ bajcheʼ tʼoxjaʼ muʼ bʌ i pʌs i bʌ cheʼ ñumenix jaʼal. Cheʼʌch yilal i sʌclel am bʌ tiʼ joytʌlel. Cheʼʌch yilal i ñuclel lac Yum» (Ezequiel 1:27, 28).

Tsaʼ bʌ i qʼuele jiñi apóstol Juan yicʼot jiñi xʼaltʼan Ezequiel miʼ pʌs bajcheʼ yilal i ñuclel Jehová, jiñi Cʼax ñuc bʌ Dios. Tsiʼ tajayob ti tʼan laj cʌñʌ tac bʌ: Utsʼatax bʌ xajlel (tun) tac, jumpʼejl tʼoxjaʼ (xojoʼ) yicʼot wen utsʼatax bʌ buchlibʌl. Jehová wen an i yutsʼatlel yicʼot miʼ yʌcʼ ñʌchʼtʌlel jiñi i ñuclel.

Ili tsaʼ bʌ ajli tiʼ tojlel Dios lajalʌch bajcheʼ tsiʼ yʌlʌ jiñi salmista: «Come ñucʌch lac Yum. Laʼ wen sujbic i ñuclel. Yom mi lac bʌcʼñan Dios tiʼ pejtelel lac pusicʼal. Jini jach yom bʌcʼñʌñtel tiʼ tojlel jini diosob. Come diosteʼ jach pejtelel i diosob winicob xʼixicob mach bʌ i cʌñʌyobic Dios. Pero lac Yum tsiʼ mele jini panchan. Cabʌlʌch i cʼuxbintel yicʼot i ñuclel jini [am bʌ] tiʼ tojel i wut. I tʼojol jax jini chʼujul bʌ i yajñib baʼ miʼ pʌs i pʼʌtʌlel» (Salmo 96:4-6).

Jehová jiñʌch jiñi Cʼax ñuc bʌ, pero miʼ subeñonla chaʼan mi lac lʌcʼtesan lac bʌ tiʼ tojlel yicʼot mi lac pejcan, i miʼ yʌl chaʼan mucʼʌch caj i ñʌchʼtañonla (Salmo 65:2). Dios miʼ cʼuxbiñonla yicʼot miʼ chʼʌmonla ti ñuc, jin chaʼan jiñi apóstol Juan tiʼ tsʼijbu chaʼan «cʼuxbiyajʌch Dios» (1 Juan 4:8).

«Butʼul Esteban ti Chʼujul bʌ Espíritu. Tsiʼ letsa i wut ti panchan. Tsiʼ qʼuele i ñuclel Dios. Tsiʼ qʼuele Jesús yaʼ waʼal tiʼ ñoj Dios. Tsiʼ yʌlʌ: Awilan, wolij qʼuel calal jini panchan. Yaʼ waʼal i Yalobil Winic tiʼ ñoj Dios» (Hechos 7:55, 56).

Cheʼ bʌ Esteban maxto i qʼuele ili ñajal, jiñi ñucoʼ bʌ i yeʼtel judíojoʼ bʌ tsiʼ chaʼleyob xicʼoñel chaʼan miʼ tsʌnsʌntel Jesús. Tsaʼ bʌ i qʼuele Esteban, miʼ pʌs chaʼan Jesús cuxulʌch, chaʼan tsaʼʌch chaʼ tejchi yicʼot tsaʼ aqʼuenti i ñuclel. Jin chaʼan, jiñi apóstol Pablo tsiʼ yʌlʌ chaʼan Jehová tsiʼ «tech[e] chʼojyel Cristo baʼan chʌmeñoʼ bʌ, cheʼ bʌ tsiʼ buchchoco tiʼ ñoj yaʼ ti panchan. Ñumen ñuc Cristo bajcheʼ pejtel i yumʌntel tac pañimil yicʼot ñucoʼ bʌ i yeʼtel añoʼ bʌ i pʼʌtʌlel yicʼot i yumʌntel. Ñumen ñuc i yeʼtel bajcheʼ pejtelel waʼchocobiloʼ bʌ, mach cojic jach ti ili ora pero ti tal to bʌ ora jaʼel» (Efesios 1:20, 21).

Jiñi Tsʼijbujel miʼ yʌl chaʼan Jesús, lajal bajcheʼ Jehová, miʼ wen cʼuxbiñonla i mach cojach miʼ taj ti tʼan jiñi eʼtel am bʌ i chaʼan. Tiʼ tsʼʌca cʼamoʼ bʌ yicʼot tsiʼ chaʼ cuxtesa chʌmeñoʼ bʌ cheʼ bʌ wʌʼto an ti Pañimil. Tsiʼ pʌsʌ chaʼan miʼ wen cʼuxbin Dios yicʼot wiñicob xʼixicob cheʼ bʌ tsiʼ yʌcʼʌ i bʌ ti chʌmel (Efesios 2:4, 5). Ili ora, añix tiʼ ñoj Dios, i lʌcʼʌlix mi caj i cʼʌn i yeʼtel aqʼuebil bʌ chaʼan miʼ yʌqʼuen i wenlel tiʼ pejtelel jiñi xjacʼtʼañob.

Jiñi xʼaltʼan Daniel tiʼ tsʼijbu: «Tsac chʌn qʼuele jinto tsaʼ caji i cʼʌcchocontel i buchlib yumʌlob. Tsaʼ caji ti buchtʌl jini Am bʌ Cabʌl i Jabilel. [...] An i yaj eʼtelob ti mil ti mil yicʼot bajcʼʌl winicob xʼixicob waʼaloʼ bʌ tiʼ tojlel» (Daniel 7:9, 10).

Daniel tsiʼ taja i qʼuel cabʌl ángelob tiʼ ñajal, i mach juntiquil jach. ¡Wen utsʼatax tsaʼ bʌ i qʼuele! Jiñi ángelob espíritujobʌch wen añoʼ bʌ i ñaʼtʌbal yicʼot i pʼʌtʌlel. Aqʼuebilob jujunchajp i yeʼtel, bajcheʼ serafiñob yicʼot querubiñob. Yaʼ ti Biblia, ñumen ti 250 miʼ tajtʌl ti tʼan jiñi ángelob.

Jiñi ángelob maʼañic tsaʼ ñaxan chumleyob bajcheʼ quixtañu wʌʼ ti Pañimil. Ñaxan tsaʼ mejliyob ti Dios cheʼ cabʌl to ora yom miʼ mejlel jiñi wiñicob xʼixicob. Jiñi ángelob tsiʼ wen qʼueleyob yicʼot tsiʼ jatsʼʌyob i cʼʌb cheʼ bʌ tsaʼ mejli ili Lum (Job 38:4-7).

Junchajp bajcheʼ miʼ melbeñob i yeʼtel Dios jiñi ángelob jiñʌch cheʼ miʼ chaʼleñob coltaya chaʼan miʼ mejlel jiñi troñel ñumen ñuc bʌ i cʼʌjñibal: I subol jiñi wen tʼan chaʼan i Yumʌntel Dios (Mateo 24:14). Jiñi ñajal tsaʼ bʌ i qʼuele jiñi apóstol Juan, miʼ yʌqʼueñonla lac ñaʼtan iliyi, tiʼ tsʼijbu: «Tsaj qʼuele yambʌ ángel woli bʌ ti wejlel ti ojlil panchan, chʼʌmʌl i chaʼan jini wen tʼan am bʌ tiʼ pejtelel ora chaʼan miʼ subeñob jini chumuloʼ bʌ ti pañimil yicʼot jini añoʼ bʌ tiʼ pejtelel tejclum tac yicʼot pejtelel winicob xʼixicob yujiloʼ bʌ tʼan ti chajp ti chajp» (Apocalipsis 14:6). Jiñi ángelob maʼañix miʼ pejcañoñobla bajcheʼ tsiʼ meleyob wajali, pero mucʼʌch i coltan jiñi mucʼoʼ bʌ ti subtʼan chaʼan miʼ tajob jiñi cʼuñoʼ bʌ i pusicʼal.

«Tsaʼ caji guerra ti panchan. Miguel [Jesucristo] yicʼot i yángelob tsiʼ chaʼleyob guerra tiʼ contra jini ajin yicʼot i yángelob jini ajin. Tsaʼ mʌjli i chaʼan Miguel. Maʼanix tsaʼ chʌn tajle ti panchan i yajñib jini ajin yicʼot i yángelob. Tsaʼ chojqui jubel jini colem ajin. Jiñʌch jini oñiyix bʌ lucum, am bʌ chaʼchajp i cʼabaʼ, xiba yicʼot Satanás. Jiñʌch muʼ bʌ i lotin pejtel winicob ti pañimil. Tsaʼ chojqui jubel ti lum yicʼot pejtelel i yángelob» (Apocalipsis 12:7-9).

Yaʼ ti panchan añʌch ujtem wocol jaʼel. Cheʼ tiʼ cajibal ili pañimil, juntiquil ángel tsiʼ mulaj chaʼan miʼ chʼujutesʌntel, tsiʼ contraji Jehová i tsaʼ sujti ti Satanás, yom bʌ i yʌl «xContra». Ti wiʼil, an yambʌ ángelob tsaʼ bʌ i contrajiyob Dios i tsaʼ cʼotiyob ti cʌjñel bajcheʼ xibajob. Jiñi xibajob miʼ wen contrajiñob Dios i an i yʌcʼʌyob chaʼan jiñi quixtañujob miʼ ñusʌbeñob i tʼan Jehová.

Satanás yicʼot jiñi xibajob wen jontolob. Miʼ tsʼaʼleñob quixtañu i jiñʌch tiʼ cajob cheʼ cabʌl ilaya wocol ila ti Pañimil. Jumpʼejl ejemplo, Satanás tsiʼ luʼ tsʌnsʌbe i wacax Job yicʼot i yaj eʼtelob. Cheʼ jiñi, tsiʼ choco tilel «sutujt icʼ» chaʼan miʼ bujchel jiñi otot baqui añob jiñi 10 i yalobilob Job, i yaʼʌch tsaʼ laj chʌmiyob (sajtiyob). Ti wiʼil, «tsiʼ yʌqʼue i cʼamʌjel Job. Tsaʼ pasi tsoy tiʼ cotol, tiʼ xinjol cʼʌlʌl tiʼ mal i yoc» (Job 1:7-19; 2:7).

Pero jiñi Diablo muqʼuix caj i jisʌntel. Cʼʌlʌl cheʼ tsaʼ chojqui tilel ila ti Lum, yujil chaʼan lʌcʼʌlix i yorajlel chaʼan miʼ jisʌntel (Apocalipsis 12:12). Albilix chuqui mi caj i tumbentel, i jiñi miʼ yʌqʼueñonla lac tijicñʌyel.

Jesús tsaʼ subenti: «Tsaʼ mʌñʌyon lojon ti a chʼichʼel chaʼan mic ñop lojon Dios. Loqʼuemon lojon ti jujunchajp winicob, yicʼot tiʼ pejtelel tʼan tac, yicʼot tiʼ pejtelel tejclum tac. Tsaʼ wotsayon lojon ti rey yicʼot ti motomaj tiʼ tojlel Dios. Mi caj c chaʼlen lojon yumʌl ti pañimil» (Apocalipsis 5:9, 10).

An yambʌ quixtañujob muʼ bʌ caj i chaʼ tejchelob chaʼan miʼ majlelob ti panchan, cheʼ bajcheʼ tsaʼ ujti tiʼ tojlel Jesucristo. Tsiʼ sube i apóstolob: «Mic majlel c chajpʌbeñetla laʼ wajñib. [...,] chaʼ talon c pʌyetla majlel baʼ añon, chaʼan yaʼ baʼ añon, yaʼ añetla jaʼel» (Juan 14:2, 3).

Jiñi muʼ bʌ caj i majlelob ti panchan chaʼañʌch miʼ chaʼleñob eʼtel yicʼot Jesucristo chaʼan miʼ yumañob ili Pañimil i mi caj i yʌcʼob cabʌl bendición. Jiñʌch jiñi Yumʌntel tsaʼ bʌ i yʌlʌ Jesús chaʼan yom miʼ tajob ti tʼan jiñi xcʌntʼañob i chaʼan cheʼ bʌ tsiʼ yʌlʌ: «C Tat lojon añet bʌ ti panchan, laʼ chʼujutesʌntic a cʼabaʼ. Laʼ tilic a yumʌntel. Laʼ mejlic chuqui a wom ti pañimil cheʼ bajcheʼ ti panchan» (Mateo 6:9, 10).

Jiñi apóstol Juan tiʼ tsʼijbu: «Tsa cubi cʼam bʌ tʼan tsaʼ bʌ loqʼui ti panchan. Tsiʼ yʌlʌ: Awilan, wʌʼix an i chumlib Dios yicʼot winicob xʼixicob. Mi caj i chumtʌl yicʼotob, [...] mi caj i sujcubeñob i yaʼlel i wut. Maʼanix majch miʼ caj ti chʌmel. Maʼanix ucʼtaya mi uqʼuel mi wocol tiʼ pejtelel ora. Come tsaʼix ñumi jini ñaxan tac bʌ» (Apocalipsis 21:3, 4).

Tsaʼ bʌ i taja i qʼuel tiʼ ñajal jiñi apóstol Juan jiñʌch muʼ bʌ caj i yujtel ti talto bʌ qʼuin cheʼ bʌ jiñi i Yumʌntel Dios, baqui ochem Jesús yicʼot muʼ bʌ i majlelob ti panchan, miʼ jisʌben i pʼʌtʌlel jiñi Diablo yicʼot miʼ sujtesan ti paraíso ili Lum. Mi caj i jisʌntel tiʼ pejtelel muʼ bʌ i yʌqʼueñonla la quilan wocol. Jiñi chʌmel mi caj i junyajlel jilel.

Pero ¿chuqui mi caj i yujtel tiʼ tojlel jiñi yonlel quixtañu chʌmeñobix bʌ maʼañic bʌ mi caj i majlelob ti panchan? Mi caj i chaʼ chʼojyelob yicʼot mi caj i chumtʌlob wʌʼ ti Pañimil cheʼ sujtemix ti Paraíso (Lucas 23:43).