2. ¿Chuqui miʼ subeñonla jiñi Biblia tiʼ tojlel Jehová?

Jiñi Biblia miʼ yʌl chaʼan anquese an cabʌl dios juntiquil jach jiñi i sujm bʌ, jiñʌch Jehová. ¿Chucoch? Come jiñʌch jiñi Cʼax ñuc bʌ tiʼ pejtelel Pañimil (pejcan Salmo 83:​18, TNM). Jiñʌch «jiñi Mach bʌ añic i pʼisol i pʼʌtʌlel», ili yom i yʌl, chaʼan an i pʼʌtʌlel chaʼan miʼ mel pejtelel chuqui yom. Cheʼ jaʼel, jiñʌch tsaʼ bʌ i mele (pʌtʌ) pejtelel chuqui an ti panchan yicʼot ila ti Lum (Apocalipsis 4:​8, 11). Cheʼ jaʼel, Jehová an jach cʼʌlʌl ti wajali i maʼañic i jilibal (Salmo 90:2).

Jehová jiñʌch tsaʼ bʌ i meleyonla (pʌtʌyonla), jin chaʼan jin jach yom mi lac chʼujutesan (Apocalipsis 4:​11). Ili yom i yʌl chaʼan cojach Jehová yom mi laj cʼuxbin yicʼot mi lac chʼujutesan, i mach yomic mi laj cʼʌn imagen tac (pejcan Isaías 42:8).

Yom mi lac chʼujutesan Jehová ti sʌc yicʼot cheʼ bajcheʼ miʼ mulan (Romanos 12:1). Ili yom i yʌl chaʼan yom mi lac jacʼ muʼ bʌ i subeñonla chaʼan bajcheʼ yom mi lac chumtʌl. Jumpʼejl ejemplo, jiñi muʼ bʌ i cʼuxbiñob Jehová miʼ qʼuelob ti ñuc yicʼot miʼ jacʼob muʼ bʌ i yʌl chaʼan bʌ jiñi ñujpuñel. Cheʼ jaʼel, maʼañic miʼ melob muʼ tac bʌ mejlel i ticʼlañob bajcheʼ jiñi droga, i ñucʼol cigarro yicʼot jiñi cʌlʌx jap lembal.a