¿Jaytiquil mi caj i majlelob ti panchan?

Jiñi Biblia miʼ yʌl chaʼan 144 mil lac piʼʌlob mi caj i majlelob ti panchan (Apocalipsis 7:4). Jiñi apóstol Juan tsiʼ qʼuele tiʼ ñajal chaʼan jiñi «Tiñʌmeʼ [Jesucristo cheʼ bʌ chaʼ tejchemix] waʼal yaʼ ti wits Sión, i yaʼañob jaʼel jiñi 144 mil» (Apocalipsis 14:1-3; Juan 1:29; 1 Pedro 1:19). Jiñi wits Sión, yom i yʌl jiñi ñuc bʌ eʼtel aqʼuebiloʼ bʌ ti Dios jiñi Jesús yicʼot jiñi 144 mil muʼ bʌ caj i chaʼleñob yumʌntel ti panchan (Salmo 2:6; Hebreos 12:22).

Jiñi «pʌybiloʼ bʌ» yicʼot «yajcʌbiloʼ bʌ» chaʼan miʼ chaʼleñob yumʌntel yicʼot Cristo yaʼ tiʼ Yumʌntel Dios cʌmbilob jaʼel bajcheʼ alʌ junmojt tiñʌmeʼ (Apocalipsis 17:14; Lucas 12:32). Ili miʼ pʌs chaʼan jiñi yajcʌbiloʼ bʌ mach wen oñobic bajcheʼ jiñi yambʌ i tiñʌmeʼ Jesús (Juan 10:16).

An muʼ bʌ i yʌlob: Jiñi número 144 mil muʼ bʌ i yʌjlel ti Apocalipsis woli jach i cʼʌjñel bajcheʼ lajiya.

I sujmlel: Anquese añʌch número muʼ bʌ i cʼʌjñel ti lajiya ti ili libro, añʌch mach bʌ lajiyajic. Jumpʼejl ejemplo jiñʌch muʼ bʌ i yʌl Apocalipsis 21:14, baqui miʼ taj ti tʼan «i cʼabaʼ jiñi 12 i yapóstolob jiñi Tiñʌmeʼ». Laʼ laj qʼuel yan tac bʌ muʼ bʌ i pʌsbeñonla chaʼan jiñi número 144 mil mach lajiyajic.

Apocalipsis 7:4 miʼ yʌl «jaytiquilob jiñi añoʼ bʌ i chaʼan jiñi sello [yom bʌ i yʌl, jiñi samoʼ bʌ ti panchan]: 144 mil», i cheʼ jaʼel miʼ taj ti tʼan «yonlel lac piʼʌlob maʼañic bʌ miʼ mejlel i tsic mi juntiquilic wiñic». Ili «yonlel lac piʼʌlob» miʼ tajob i coltʌntel jaʼel (Apocalipsis 7:9, 10). Cheʼ lajiya tʼañic jach jiñi número 144 mil i yom jach i yʌl cabʌl lac piʼʌlob, maʼañic i sujmlel cheʼ muʼto i chaʼ ajlel jiñi yambʌ junmojt.a

Cheʼ jaʼel, miʼ yʌl chaʼan jiñi 144 mil «tsaʼ mʌjñiyob loqʼuel ti pañimil bajcheʼ ñaxam bʌ i wut pʌcʼʌbʌl» (Apocalipsis 14:4). Jiñi tʼan «ñaxam bʌ i wut pʌcʼʌbʌl» miʼ pʌs chaʼan ili alʌ junmojt loqʼuemob ti yambʌ junmojt ñumen cabʌloʼ bʌ. Ili miʼ pʌs chaʼan añʌch yajcʌbiloʼ bʌ chaʼan miʼ majlelob ti yumʌntel yicʼot Cristo ti panchan i mi caj i melob i yeʼtel tiʼ tojlel yonlel quixtañujob muʼ bʌ caj i chumtʌlob ila ti Pañimil (Apocalipsis 5:10).