1. ¿Chuqui miʼ coltañonla lac ñaʼtan jiñi profecía tac am bʌ ti Biblia?

¿CHUQUI mi caj i chaʼlen i tejclum Jehová ti talto bʌ qʼuin? Mejlʌch lac tajben i jacʼbal. Jiñi profecía tac am bʌ ti Biblia miʼ coltañonla lac ñaʼtan chuqui tsʼitaʼ jax mi caj i yujtel tac ti lac tojlel. An junchajp muʼ bʌ i subeñonla chuqui tac mi caj i melob (chaʼleñob) chaʼtiqui uxtiquil pʼʌtʌl bʌ yumʌlob ila ti pañimil (mulawil). Mi lac taj ti Daniel capítulo 11, i miʼ yʌl chaʼan chaʼtiquil reyob miʼ contrajiñob i bʌ: Jiñi rey ti norte yicʼot jiñi rey ti sur. Añix wen tsʼʌctiyem jiñi profecía, jin chaʼan miʼ mejlel lac ñop chaʼan jiñi yomto bʌ chaʼan miʼ tsʼʌctiyel ti jiñi profecía mi caj ti ujtel.

 2. Cheʼ bajcheʼ miʼ yʌl Génesis 3:15, Apocalipsis 11:7 yicʼot 12:17, ¿chuqui yom mi lac wen ñaʼtan cheʼ mi lac pejcan jiñi i profecía Daniel?

² Chaʼan miʼ cʼotel lac chʼʌmben i sujm jiñi profecía am bʌ ti capítulo 11 i chaʼan Daniel, yom mi lac ñaʼtan chaʼan jin jach miʼ taj ti tʼan jiñi yumʌlob yicʼot yumʌntel tac am bʌ i ticʼlayob jiñi i tejclum Jehová. Anquese jiñi i wiñicob Dios mach yonlelobic ila ti Lum, miʼ contrajintelob ti jiñi yumʌlob añoʼ bʌ tiʼ pejtelel pañimil. ¿Chucoch? Come jiñi yom bʌ Satanás yicʼot i pañimil jiñʌch cheʼ miʼ jisan jiñi muʼ bʌ i melbeñob i yeʼtel (troñel) Jehová yicʼot Jesús (pejcan Génesis 3:15; Apocalipsis 11:7; 12:17). I tsictesʌntel jiñi i profecía Daniel miʼ taj i bʌ yicʼot yambʌ profecía tac. Jin chaʼan, yom mi lac wen pejcan yambʌ texto tac am bʌ ti Biblia chaʼan mi lac ñumen chʼʌmben i sujm jiñi i profecía Daniel.

 3. ¿Chuqui mi caj laj qʼuel ti ili estudio yicʼot ti yambʌ?

³ Cheʼ bajcheʼ tsaʼix tsʼitaʼ ajli, ti ili estudio mi caj lac tsajin muʼ bʌ i yʌl Daniel 11:25-39. Mi caj laj cʼajtesan majqui tsaʼ ajñiyob bajcheʼ rey ti norte yicʼot rey ti sur ti 1870 cʼʌlʌl ti 1991, i mi caj laj qʼuel chucoch weñʌch cheʼ mi lac tʼox qʼuextan bajcheʼ mi lac chʼʌmben i sujm jiñi profecía. Ti jiñi yambʌ estudio, mi caj laj qʼuel Daniel 11:40-12:1 i mi caj lac tsictesan chuqui miʼ subeñonla jiñi profecía cheʼ bʌ tsaʼ tejchi jiñi jabil 1990 cʼʌlʌl cheʼ miʼ yujtel ti Armagedón. Cheʼ mi lac pejcan ili chaʼpʼejl estudio, yom mi laj qʼuel jiñi recuadro «Miʼ contrajiñob i bʌ jiñi rey ti norte yicʼot jiñi rey ti sur». Pero ñaxan yom mi lac ñaʼtan majquiyob jiñi chaʼtiquil reyob ti jiñi profecía.

 4. ¿Chuqui uxchajp miʼ yʌqʼueñonla lac ñaʼtan majqui jiñi rey ti sur yicʼot rey ti norte?

⁴ Ti ñaxan, miʼ subentelob «rey ti norte» yicʼot «rey ti sur» jiñi yumʌlob añoʼ bʌ tiʼ wenta jiñi lumal tac am bʌ ti norte yicʼot ti sur ti jiñi i tejclum Israel wajali. ¿Bajcheʼ la cujil? Come jiñi ángel tiʼ sube Daniel iliyi: «Tsaʼ tili c tsictesʌbeñet chuqui mi caj i yujtel tiʼ tojlel a piʼʌlob ti wiʼil bʌ ora. Jini muʼ bʌ caj c pʌsbeñet mi caj i yujtel ti yanto bʌ ora» (Dn. 10:14). Cʼʌlʌl cheʼ ti Pentecostés ti jiñi jabil 33, i tejclum Dios jinto jiñi israelitajob. Cheʼ jiñi, Jehová tsiʼ yʌlʌ chaʼan mi caj i yochelob tiʼ tejclum jiñi xucʼul bʌ xcʌntʼañob i chaʼan Jesús. Jin chaʼan, jiñi profecía ti jiñi capítulo 11 i chaʼan Daniel maʼañic miʼ ñoj tsʼʌctiyel tiʼ tojlel jiñi israelitajob ti wajali, cojach tiʼ tojlel jiñi xcʌntʼañob i chaʼan Cristo (Hch. 2:1-4; Ro. 9:6-8; Gá. 6:15, 16). Cheʼ jaʼel, cheʼ an ñumi majlel jiñi jab, añix qʼuextʌyem majquiyob jiñi rey ti norte yicʼot rey ti sur. Pero ili yumʌlob uxchajp chuqui am bʌ i lajal meleyob: Ñaxam bʌ, an i ticʼlʌbeyob i tejclum Jehová. I chaʼpʼejlel, jiñi an tac bʌ i melbeyob i tejclum Jehová, an i pʌsʌ chaʼan miʼ tsʼaʼleñob jiñi i sujm bʌ Dios. I yuxpʼejlel, ili reyob an cʼotem i contrajiñob i bʌ.

 5. ¿Am ba juntiquil rey ti norte yicʼot juntiquil rey ti sur cheʼ ti jabil 100 cʼʌlʌl tiʼ jilibal jabil 1870? Tsictesan.

⁵ Cheʼ ñumeñix jiñi jabil 100 cheʼ bʌ tilemix Cristo (t.C.), tsaʼ ochiyob mach bʌ i sujmic xñoptʼañob ti jiñi i sujm bʌ i congregación Dios, tsaʼ bʌ i yotsayob mach bʌ i sujmic cʌntesa tac yicʼot tsiʼ mucuyob jiñi i sujmlel i Tʼan Dios. Ti jimbʌ ora cʼʌlʌl tiʼ jilibal jiñi jabil 1870, maʼañic junmojt i wiñicob Dios wen chajpʌbil bʌ ila ti Pañimil. Jiñi mach bʌ i sujmic xñoptʼañob tsaʼ pʼojli bajcheʼ mach bʌ weñic pimel i maʼañic tsiʼ yʌcʼʌyob ti cʌñol majquiyob jiñi i sujm bʌ xñoptʼañob (Mt. 13:36-43). ¿Chucoch ñuc i cʼʌjñibal mi laj cʼajtesan iliyi? Come miʼ pʌs chaʼan mach jiñobic jiñi rey ti sur yicʼot jiñi rey ti norte jiñi yumʌlob o yumʌntel tac tsaʼ bʌ ajñiyob cheʼ ti jabil 101 cʼʌlʌl ti 1870. Ti jimbʌ ora maʼañic junmojt i wiñicob Dios chajpʌbiloʼ bʌ mejl bʌ i ticʼlañob.b Pero tsaʼ chaʼ caji ti cʌjñel jiñi rey ti norte yicʼot jiñi rey ti sur cheʼ ñumeñix jiñi jabil 1870. ¿Chucoch?

 6. ¿Baqui ora yicʼot bajcheʼ tsaʼ chaʼ caji ti ñaʼtʌntel baqui bʌ i tejclum Dios?

⁶ Dios tsaʼ caji i chajpan i tejclum cheʼ ti 1870. Ti jimbʌ jab, Charles Russell yicʼot i piʼʌlob tsiʼ techeʼ i tempañob i bʌ chaʼan miʼ pejcañob jiñi Biblia. Cheʼ bajcheʼ tsaʼ wʌn ajli, ili junmojt tsaʼ sujtiyob ti jiñi xsuboñel muʼ bʌ caj i jam jiñi bij cheʼ bʌ muʼto caj i waʼchocontel i Yumʌntel Dios (Mal. 3:1). Tsaʼix chaʼ caji ti ñaʼtʌntel baqui bʌ jiñi i tejclum Dios. Ti jimbʌ ora, ¿am ba jumpʼejl pʼʌtʌl bʌ yumʌntel mejl bʌ i ticʼlan i wiñicob Jehová? Laʼ laj qʼuel.

 7. ¿Majqui jiñi rey ti sur cʼʌlʌl cheʼ tsʌts woliʼ yujtel jiñi Primera Guerra Mundial?

⁷ Cheʼ ti 1870, Gran Bretaña an i soldadojob wen pʼʌtʌloʼ bʌ yicʼot tsaʼ cʼoti ti ajñel bajcheʼ wen pʼʌtʌl bʌ yumʌl. Daniel tsiʼ yʌlʌ chaʼan ili yumʌl lajal bajcheʼ alʌ xulub tsaʼ bʌ i mʌlbe (jotbe) uxtsʼijt yambʌ xulub: Jiñi Francia, España yicʼot Países Bajos (Dn. 7:7, 8). Gran Bretaña tsaʼ ajñi bajcheʼ jiñi rey ti sur cʼʌlʌl cheʼ tsʌts woliʼ yujtel jiñi Primera Guerra Mundial. Ti jimbʌ ora, jiñi Estados Unidos de América jiñʌch tsaʼ bʌ ajñi bajcheʼ jiñi wen am bʌ i taqʼuin yicʼot tsaʼ caji i tem i tʼan yicʼot Gran Bretaña.

 8. ¿Majqui jiñi rey ti sur cʼʌlʌl tsaʼ caji jiñi cojix bʌ qʼuin tac?

⁸ Cheʼ ti Primera Guerra Mundial, Estados Unidos yicʼot Gran Bretaña tsaʼ tem ajñiyob i tsiʼ tempayob pʼʌtʌl bʌ i soldadojob. Cheʼ jiñi, jiñi Gran Bretaña yicʼot Estados Unidos tsaʼ sujti ti jumpʼejl pʼʌtʌl bʌ yumʌntel. I cheʼ bajcheʼ tsiʼ yʌlʌ Daniel, ili rey tsiʼ tempa «cabʌl soldadojob» (Dn. 11:25). Cʼʌlʌl ti ili cojix bʌ qʼuin tac, Gran Bretaña yicʼot Estados Unidos jiñʌch jiñi rey ti sur.c Pero ¿majqui jiñi rey ti norte?

 9. a) ¿Baqui ora tsaʼ chaʼ cʼoti ti cʌjñel jiñi rey ti norte? b) ¿Bajcheʼ tsaʼ tsʼʌctiyi muʼ bʌ i yʌl Daniel 11:25?

⁹ Ti 1871, cheʼ bʌ ñumeñix jumpʼejl jab jiñi hermano Russell yicʼot i piʼʌlob tsiʼ techeʼ i tempañob i bʌ chaʼan miʼ pejcañob jiñi Biblia, tsaʼ chaʼ cʼoti ti cʌjñel majqui jiñi rey ti norte. ¿Majqui? Jiñʌch jiñi Alemania. Ti jiñi jabil, jiñi Otto von Bismarck tsiʼ yʌcʼʌ i coltaya chaʼan Alemania miʼ sujtel ti pʼʌtʌl bʌ tejclum. Jiñi rey Guillermo I de Prusia tsaʼ ochi bajcheʼ emperador i tsiʼ waʼchoco jiñi Bismarck chaʼan miʼ chʼʌm tiʼ wenta jiñi i yumʌntel.d Mach jalic tsaʼ ñumi, jiñi Alemania tsaʼ cʼoti ti ajñel bajcheʼ wen pʼʌtʌl bʌ tejclum tsaʼ bʌ ajñi tiʼ wenta jiñi país tac i chaʼan África yicʼot jiñi Pacífico, i tsaʼ caji i pʼaj jiñi i ñuclel Gran Bretaña (pejcan Daniel 11:25). Jiñi pʼʌtʌl bʌ tejclum Alemania tsiʼ tempa wen pʼʌtʌl bʌ soldadojob lʌcʼʌ lajal bajcheʼ i chaʼan Gran Bretaña. Tsiʼ cʼʌñʌ jiñi i pʼʌtʌlel chaʼan miʼ contrajin jiñi i contrajob cheʼ ti Primera Guerra Mundial.

10. ¿Bajcheʼ tsaʼ tsʼʌctiyi Daniel 11:25b, 26?

¹⁰ Ti wiʼil, Daniel tsiʼ yʌlʌ chuqui mi caj i yujtel tiʼ tojlel jiñi pʼʌtʌl bʌ yumʌl i chaʼan Alemania yicʼot i soldadojob. Miʼ yʌl chaʼan jiñi rey ti norte mi caj i jisʌntel. ¿Chucoch? Jiñi profecía miʼ yʌl: «Come mi caj i lotintel. Jini i piʼʌlob muʼ bʌ i tem chaʼleñob weʼel yicʼot, mi caj i tejchelob tiʼ contra» (Dn. 11:25b, 26a). Tiʼ yorajlel jiñi Daniel, jiñi muʼ bʌ i tem cʼuxob «weʼelʌl lajal bajcheʼ miʼ cʼux rey» yaʼ ochemob jiñi yumʌlob am bʌ tiʼ wenta jiñi rey (Dn. 1:5). ¿Majquiyob woli (choncol) i taj ti tʼan ili profecía? Jiñʌch jiñi pʼʌtʌl bʌ yumʌlob am bʌ i chaʼan Alemania muʼ bʌ i coltañob jiñi emperador, bajcheʼ jiñi i yum soldadojob. I jiñʌch tsaʼ bʌ i yʌcʼʌyob ti jilel jiñi pʼʌtʌl bʌ yumʌntel i chaʼan Alemania.e Jiñi profecía mach cojach tsiʼ yʌlʌ chaʼan mi caj i jisʌntel jiñi yumʌntel, tsiʼ yʌlʌ jaʼel chuqui mi caj i chaʼlen cheʼ bʌ miʼ contrajin jiñi rey ti sur. Tsiʼ yʌlʌ iliyi tiʼ tojlel jiñi rey ti norte: «I soldadojob mi caj i cʌyob. Cabʌlob mi caj i tsʌnsʌntelob» (Dn. 11:26b). Cheʼ bajcheʼ tsaʼ wʌn ajli, jiñi i soldadojob Alemania, cabʌl tsaʼ jisʌntiyob cheʼ ti Primera Guerra Mundial. Jiñi guerra tsaʼ bʌ ujti ti jimbʌ ora jiñʌch baqui tsaʼ tsʌnsʌnti yonlel wiñicob xʼixicob (quixtañujob).

11. Cheʼ bajcheʼ tsiʼ wʌn alʌ Daniel 11:27-30, ¿chuqui tsiʼ meleyob jiñi rey ti norte yicʼot jiñi rey ti sur?

¹¹ Chaʼan miʼ ñaʼtʌntel chuqui mi caj i mel jiñi rey ti norte yicʼot jiñi rey ti sur cheʼ bʌ maxto tejchemic jiñi Primera Guerra Mundial, Daniel 11:27, 28 miʼ yʌl: «Mi caj i lotiñob i bʌ cheʼ miʼ pejcañob i bʌ yaʼ ti mesa». Tsiʼ yʌlʌ jaʼel chaʼan jiñi rey ti norte mi caj i tempan «cabʌl i chubʌʼan». Jiñʌch tsaʼ bʌ cʼoti ti ujtel. Alemania yicʼot Gran Bretaña tsiʼ yʌlʌyob chaʼan yomob ñʌchʼtʌlel, pero lot jach come ti 1914 tsaʼ tejchi jiñi guerra. Cheʼ bʌ maxto cʼoti jiñi jabil, Alemania tsiʼ tempa cabʌl i chubʌʼan i jiñʌch i chaʼpʼejlel tejclum cabʌl bʌ i taqʼuin tiʼ pejtelel pañimil. Jin chaʼan, cheʼ bajcheʼ tsaʼ wʌn ajli ti Daniel 11:29 yicʼot tiʼ tejchibal jiñi versículo 30, Alemania tsiʼ contraji jiñi rey ti sur, pero tsaʼ mʌlbenti.

12. ¿Chuqui tsaʼ cʼoti i melob jiñi rey ti norte yicʼot jiñi rey ti sur cheʼ ti Primera Guerra Mundial?

¹² Cʼʌlʌl ti 1914, ili chaʼtiquil reyob tsiʼ ñumen contrajiyob i bʌ yicʼot tsiʼ contrajiyob i tejclum Dios. Jumpʼejl ejemplo, cheʼ ti Primera Guerra Mundial, jiñi yumʌl i chaʼan Alemania yicʼot Gran Bretaña tsiʼ contrajiyob i wiñicob Dios, mach bʌ añic tsiʼ jacʼʌyob majlel ti guerra. I tsaʼ tsʼʌctiyi jiñi profecía am bʌ ti Apocalipsis 11:7-10 cheʼ bʌ Estados Unidos tsiʼ yotsa ti cárcel jiñi añoʼ bʌ tiʼ wenta i qʼuelob jiñi subtʼan.

13. ¿Chuqui tsiʼ mele jiñi rey ti norte cheʼ ti jabil 1933 yicʼot cheʼ woliʼ jiñi Segunda Guerra Mundial?

¹³ Ti wiʼil, cheʼ ti jabil 1933 yicʼot cheʼ woliʼ yujtel jiñi Segunda Guerra Mundial, jiñi rey ti norte tsiʼ wen ticʼla jiñi i tejclum Dios. Cheʼ bʌ jiñi nazijob tsaʼ ochiyob tiʼ wenta jiñi Alemania, Hitler yicʼot jiñi woli (yʌquel) bʌ i coltañob tsiʼ mʌctayob jiñi lac subtʼan. Iliyob tiʼ tsʌnsayob yonlel i wiñicob Jehová yicʼot cabʌlob tsiʼ yotsayob yaʼ ti cárcel tac i chaʼañoʼ bʌ. I jiñi Daniel tsaʼʌch i wʌn alʌ. Tsiʼ yʌlʌ chaʼan jiñi rey ti norte mi caj i mel mach tac bʌ weñic ti «jiñi chʼujul bʌ ajñibʌl» yicʼot maʼañix mi caj i yʌcʼ chaʼan «miʼ chʌcʌ ajqʼuel jiñi pulbil bʌ majtañʌl», yom bʌ i yʌl, chaʼan mi caj i mʌctan i subol jiñi wen tʼan (Dn. 11:30b; 11:31a, TNM). Jiñi yumʌl, Hitler, tsaʼto i yʌlʌ chaʼan mi caj i jisan jiñi i tejclum Dios yaʼ ti Alemania.

14. ¿Majqui tsaʼ ochi bajcheʼ rey ti norte cheʼ ujtemix jiñi Segunda Guerra Mundial, i bajcheʼ la cujil?

¹⁴ Cheʼ tsaʼix ujti jiñi Segunda Guerra Mundial, jiñi Unión Soviética tsiʼ chilbe cabʌl i lum jiñi Alemania. Cheʼ bajcheʼ tsiʼ mele jiñi i yumʌntel nazijob, jiñi Unión Soviética yicʼot jiñi muʼ bʌ i coltañob tsiʼ wen contrajiyob jiñi muʼ bʌ i ñaxan acʼob tiʼ cuxtʌlel i chʼujutesʌntel jiñi i sujm bʌ Dios, i cheʼ bajcheʼ jiñi tsaʼ sujtiyob ti rey ti norte.

15. ¿Chuqui tsiʼ mele jiñi rey ti norte cheʼ bʌ tsaʼix ujti jiñi Segunda Guerra Mundial?

¹⁵ Cheʼ bʌ maxto wen jalic ujtem jiñi Segunda Guerra Mundial, jiñi tsijiʼ bʌ rey ti norte (jiñi Unión Soviética yicʼot muʼ bʌ i coltañob) tsiʼ contraji jiñi i tejclum Dios. Apocalipsis 12:15-17 miʼ lajin ili contrajintel bajcheʼ «colem jaʼ». Cheʼ bajcheʼ miʼ yʌl ili profecía, jiñi rey ti norte tsiʼ mʌcta jiñi subtʼan yicʼot tsiʼ choco loqʼuel tiʼ lumal yonlel i wiñicob Jehová. Ti ili cojix bʌ qʼuin tac, jiñi rey ti norte woliʼ chʌn contrajin jiñi i tejclum Dios, pero maʼañic baʼ ora an i mʌctayob jiñi woli bʌ i melob.f

16. ¿Bajcheʼ tiʼ tsʼʌctesa jiñi Unión Soviética muʼ bʌ i taj ti tʼan Daniel 11:37-39?

¹⁶ (Pejcan Daniel 11:37-39). Cheʼ bajcheʼ miʼ yʌl ili profecía, jiñi rey ti norte maʼañic tsiʼ pʼisi tiʼ wenta i Dios i tatob. ¿Bajcheʼ? Jiñi Unión Soviética tsiʼ ñopo i jisʌben i pʼʌtʌlel jiñi ñopbalʌl tac chaʼan miʼ mejlel i jisan. Jin chaʼan, ti 1918 jiñi yumʌl tsiʼ yʌcʼʌ i tʼan chaʼan yaʼ ti escuela tac miʼ cʌntesʌntel chaʼan maʼañic Dios. ¿I bajcheʼ tsiʼ yʌqʼue i ñuclel jini pʼʌtʌl bʌ tejclum tac tsaʼ bʌ i qʼueleyob bajcheʼ dios? Tsiʼ jisa cabʌl taqʼuin chaʼan miʼ ñumen pʼʌtʼesan jiñi i soldadojob yicʼot tsiʼ mele cabʌl bomba nuclear chaʼan ñumen pʼʌtʌl miʼ yajñel. Ti wiʼil, jiñi rey ti norte yicʼot jiñi rey ti sur tsiʼ tempayob cabʌl muʼ bʌ i mejlel i cʼʌñob ti guerra chaʼan miʼ tsʌnsañob yonlel quixtañu.

17. ¿Chuqui jiñi «biʼiltic jax bʌ yujil bʌ jisaya»?

¹⁷ Jiñi rey ti norte yicʼot jiñi rey ti sur an chuqui ñuc bʌ tsiʼ meleyob: «Mi caj i yʌcʼob jiñi biʼiltic jax bʌ yujil bʌ jisaya» (Dn. 11:31, TNM). Ili «biʼiltic jax bʌ» jiñʌch jiñi Organización de las Naciones Unidas.

18. ¿Chucoch miʼ yʌjlel chaʼan jiñi Naciones Unidas jiñʌch «jiñi biʼiltic jax bʌ yujil bʌ jisaya»?

¹⁸ Jiñi profecía miʼ yʌl chaʼan jiñi Organización de las Naciones Unidas jiñʌch jiñi «biʼiltic jax bʌ» come miʼ yʌcʼ i tʼan i mel cojach bʌ i Yumʌntel Dios miʼ mejlel i mel: Ñʌchʼtʌlel tiʼ pejtelel pañimil. I miʼ yʌl chaʼan ‹yujil jisaya› come jiñʌch mi caj i jisan pejtelel jiñi mach bʌ i sujmic ñopbalʌl (qʼuele jiñi recuadro «Miʼ contrajiñob i bʌ jiñi rey ti norte yicʼot jiñi rey ti sur»).

19, 20. a) ¿Chucoch weñʌch cheʼ mi laj cʌn pejtelel tsaʼ bʌ ujti laj qʼuel? b) ¿Chuqui ti cʼajtiya mi caj laj jacʼ ti yambʌ estudio?

¹⁹ Weñʌch cheʼ mi lac chaʼ cʼajtesan pejtelel iliyi come miʼ pʌs chaʼan jiñi i profecía Daniel chaʼan jiñi rey ti norte yicʼot jiñi rey ti sur tsaʼ tsʼʌctiyi cheʼ ti 1870 cʼʌlʌl ti 1991. Jin chaʼan, miʼ mejlel lac ñop chaʼan yomto bʌ miʼ yujtel miʼ yʌl jiñi profecía mucʼʌch caj i tsʼʌctiyel.

²⁰ Pero jiñi Unión Soviética tsaʼ jili ti 1991. Jin chaʼan, ¿majqui jiñi rey ti norte ti ili ora? Ti yambʌ estudio mi caj lac tajben i jacʼbal.

1, 2. ¿Chuqui mi caj laj qʼuel ti ili estudio?

ILI ora, wolix (choncolix) laj qʼuel chaʼan chumuloñixla tiʼ yujtibal jiñi cojix qʼuin tac i chaʼan bʌ ili pañimil (mulawil). Mach jalix yom chaʼan Jehová yicʼot Jesucristo miʼ jisañob pejtelel jiñi yumʌntel muʼ bʌ i contrajin i Yumʌntel Dios. Cheʼ bʌ muʼto caj i yujtel jiñi, jiñi rey ti norte yicʼot jiñi rey ti sur mi caj i bej contrajiñob i bʌ yicʼot mi caj i chʌn contrajiñob i tejclum Dios.

² Ti ili estudio, mi caj laj qʼuel jiñi profecía am bʌ ti Daniel 11:40-12:1. Mi caj laj cʌn majqui jiñi rey ti norte ili ora i chucoch miʼ mejlel lac ñop chaʼan Jehová mi caj i coltañonla, mach yʌlʌyic chuqui mi caj lac ñusan.

3, 4. ¿Majqui tsaʼ sujti bajcheʼ rey ti norte ili ora, i chucoch cheʼ mi la cʌl?

³ Cheʼ tsaʼ jili jiñi Unión Soviética ti 1991, jiñi i wiñicob Dios chumuloʼ bʌ ti jiñi lum tsaʼ jumucʼ ‹ñʌjchʼi i ticʼlʌntelob›, come tsiʼ jumucʼ tajayob i librejlel (Dn. 11:34). Jin chaʼan, libre tsaʼ mejliyob ti subtʼan, i mach jalic tsaʼ ñumi, tsaʼ pʼojli cabʌl xsubtʼañob ti jiñi país tac tsaʼ bʌ cʌn ajñi tiʼ wenta jiñi Unión Soviética. Pero cʼunteʼ cʼunteʼ jiñi Rusia yicʼot muʼ bʌ i coltañob, tsaʼ sujtiyob ti jiñi rey ti norte. Cheʼ bajcheʼ tsaʼ laj qʼuele ti jiñi yambʌ estudio, an uxchajp chuqui yom miʼ mel (chaʼlen) jumpʼejl yumʌntel chaʼan miʼ sujtel bajcheʼ rey ti norte o bajcheʼ rey ti sur: Ñaxam bʌ, yom miʼ ticʼlʌben i tejclum Dios. I chaʼpʼejlel, jiñi i melbal yom miʼ pʌs chaʼan i contrajʌch Dios yicʼot i wiñicob. I yuxpʼejlel, yom miʼ contrajin jiñi yambʌ yumʌl i contra bʌ.

⁴ Laʼ laj qʼuel chucoch miʼ mejlel la cʌl chaʼan Rusia yicʼot jiñi muʼ bʌ i coltañob jiñobʌch jiñi rey ti norte ili ora. Ñaxam bʌ, an i ticʼlayob i tejclum Dios come an i mʌctʌbeyob i subtʼan yicʼot an i contrajiyob yonlel hermanojob chumuloʼ bʌ ti jiñi tejclum tac añoʼ bʌ tiʼ wenta. I chaʼpʼejlel, miʼ pʌsob tiʼ melbal chaʼan miʼ tsʼaʼleñob Jehová yicʼot i tejclum. I yuxpʼejlel, an i contrajiyob jiñi rey ti sur, jiñi pʼʌtʌl bʌ yumʌntel i chaʼan Gran Bretaña yicʼot Estados Unidos. Laʼ laj qʼuel chuqui an i mele Rusia yicʼot jiñi muʼ bʌ coltañob chaʼan miʼ yochelob bajcheʼ rey ti norte.

 5. ¿Chuqui miʼ pʌsbeñonla Daniel 11:40-43, i chuqui miʼ yujtel cheʼ jiñi?

⁵ (Pejcan Daniel 11:40-43). Ti ili versículo tac chaʼan i profecía Daniel miʼ pʌsbeñonla pejtelel chaʼan jiñi cojix bʌ qʼuin tac. Ili texto miʼ yʌl chaʼan miʼ contrajiñob i bʌ jiñi rey ti norte yicʼot jiñi rey ti sur. Daniel tsiʼ yʌlʌ: «Ti wiʼil bʌ ora jini rey am bʌ ti sur mi caj i contrajin [...] jini rey ti norte» (Dn. 11:40).

 6. ¿Chuqui miʼ yʌqʼueñonla lac ñaʼtan chaʼan jiñi rey ti norte yicʼot jiñi rey ti sur woliʼ bej contrajiñob i bʌ?

⁶ Jiñi rey ti norte yicʼot jiñi rey ti sur woli (yʌquel) i bej contrajiñob i bʌ come yomob chaʼan añob tiʼ wenta pejtelel jiñi pañimil. Jumpʼejl ejemplo, laʼ lac ñaʼtan tsaʼ bʌ ujti cheʼ bʌ tsaʼix ñumi jiñi Segunda Guerra Mundial, cheʼ bʌ jiñi Unión Soviética yicʼot jiñi muʼ bʌ i coltañob tsaʼ caji i chʼʌmob cabʌl lumal tac i chaʼan bʌ Europa. Tiʼ caj jiñi, jiñi rey ti sur tsiʼ ñumen tempa cabʌl soldadojob yicʼot yambʌ yumʌlob, cʌmbil bʌ bajcheʼ OTAN. Ili chaʼtiquil reyob woliʼ cʼʌñob cabʌl taqʼuin chaʼan miʼ tempañob ñumen pʼʌtʌl bʌ i soldadojob. Cheʼ jaʼel, an i contrajiyob i bʌ cheʼ miʼ coltañob tejclum tac i contrajoʼ bʌ i bʌ jaʼel yaʼ ti África, Asia yicʼot América Latina. Maxto jalic, jiñi Rusia yicʼot jiñi muʼ bʌ i coltañob woliʼ sujtelob ti pʼʌtʌl bʌ yumʌl tiʼ pejtelel pañimil. Cheʼ jaʼel, an i cʼʌñʌ computadora tac chaʼan miʼ contrajin jiñi rey ti sur. Jiñi chaʼtiquil reyob an i lajal subeyob i bʌ chaʼan an i cʼʌñʌyob programa tac ti computadora chaʼan miʼ sʌtbeñob i bʌ taqʼuin yicʼot miʼ jembeñob i bʌ i yumʌntel. I cheʼ bajcheʼ tsiʼ yʌlʌ Daniel, jiñi rey ti norte woliʼ bej contrajin i tejclum Dios (Dn. 11:41).

 7. ¿Chuquiyes jiñi «wen utsʼat bʌ lum»?

⁷ Daniel 11:41 miʼ yʌl chaʼan jiñi rey ti norte mi caj i cʼaxel yaʼ ti «wen utsʼat bʌ lum». ¿Baqui bʌ jiñi lum? Ti wajali, miʼ yʌjlel chaʼan jiñi Israel jiñʌch «ñumen utsʼat bajcheʼ yan tac bʌ lum» (Ez. 20:6). Tiʼ sujm, wen utsʼat jiñi lum come yaʼʌch tsaʼ chʼujutesʌnti Jehová. Pero cheʼ ti Pentecostés ti jiñi jabil 33, jiñi «lum» mach yoque tejclumix. I mach jiñix come jiñi i wiñicob Jehová pujquemob tiʼ pejtelel pañimil. Jin chaʼan, jiñi «wen utsʼat bʌ lum» ili ora jiñʌch pejtelel muʼ bʌ i mel i tejclum Jehová, yaʼ bʌ ochem cheʼ miʼ chʼujutesañob yaʼ ti tempa bʌ tac yicʼot cheʼ mi loqʼuelob ti subtʼan.

 8. ¿Bajcheʼ tsaʼ ochi jiñi rey ti norte yaʼ ti «wen utsʼat bʌ lum»?

⁸ Ti ili cojix bʌ qʼuin tac jiñi rey ti norte mach junyajlic jach an ochem yaʼ ti «wen utsʼat bʌ lum». Jumpʼejl ejemplo, cheʼ bʌ jiñi rey ti norte jiñʌch jiñi nazijob cheʼ ti Segunda Guerra Mundial, tsaʼ ochi yaʼ ti «wen utsʼat bʌ lum» cheʼ bʌ tsiʼ ticʼla yicʼot tsiʼ tsʌnsa i wiñicob Dios. Cheʼ bʌ jiñi Unión Soviética tsaʼ ajñi bajcheʼ jiñi rey ti norte cheʼ ñumeñix jiñi Segunda Guerra Mundial, tsaʼ ochi ti jiñi lum cheʼ bʌ tsiʼ contraji jiñi muʼ bʌ i chʼujutesañob Jehová i tsiʼ chocoyob majlel ti yambʌ lum.

 9. ¿Bajcheʼ an ochi Rusia yicʼot jiñi muʼ bʌ i coltañob yaʼ ti «wen utsʼat bʌ lum» ti jiñi jab ñumen bʌ tilel?

⁹ Maxto wen jalic, Rusia yicʼot jiñi muʼ bʌ i coltañob an ochiyob yaʼ ti «wen utsʼat bʌ lum». ¿Bajcheʼ? Ti 2017, ili rey ti norte tsiʼ mʌcta lac subtʼan yicʼot tsiʼ yotsa ti cárcel chaʼtiqui uxtiquil hermanojob. Cheʼ jaʼel, maʼañix miʼ yʌcʼ chaʼan miʼ yochel ti jiñi país jiñi lac jun tac, junchajp jiñʌch jiñi Traducción del Nuevo Mundo. Tsiʼ chʼʌmʌ jiñi sucursal am bʌ ti Rusia, i Yotlel tempa bʌ tac yicʼot i Yotlel colem tempa bʌ tac. Jin chaʼan, ti 2018 jiñi Junmojt muʼ bʌ i pʌsob bij tsiʼ ñaʼtayob chaʼan jiñi Rusia yicʼot jiñi muʼ bʌ i coltañob jiñobʌch jiñi rey ti norte. Jiñi i wiñiconbʌla Jehová maʼañic mi laj contrajin mi juntiquilic yumʌl, mi jiñicto cheʼ miʼ wen ticʼlañonla. Cojach mi la jacʼ jiñi ticʼojel chaʼan yom mi lac mel «oración chaʼan yumʌlob yicʼot pejtel añoʼ bʌ i yeʼtel», ñumento cheʼ miʼ ñaʼtañob i mel muʼ bʌ i mejlel i mʌctan cheʼ libre mi chʼujutesʌntel Jehová (1 Ti. 2:1, 2).

10. Jiñi rey ti norte, ¿muʼ ba caj i mejlel i jisan jiñi rey ti sur?

¹⁰ Jiñi profecía muʼ bʌ lac taj ti Daniel 11:40-45 miʼ ñumen taj ti tʼan jiñi rey ti norte. ¿Muʼ ba i yʌcʼ ti ñaʼtʌntel chaʼan mi caj i jisan jiñi rey ti sur? Maʼañic. Jiñi rey ti sur muʼto caj i yajñel cheʼ bʌ Jehová yicʼot Jesús miʼ jisañob jiñi i yumʌntel wiñicob ti Armagedón (Ap. 19:20). ¿Bajcheʼ la cujil? Laʼ laj qʼuel chuqui miʼ yʌl jiñi profecía tac am bʌ ti Daniel yicʼot Apocalipsis.

11. ¿Chuqui miʼ pʌs jiñi profecía am bʌ ti Daniel 2:43-45? (Qʼuele jiñi dibujo am bʌ tiʼ tejchibal).

¹¹ (Pejcan Daniel 2:43-45). Jiñi Daniel miʼ taj ti tʼan colem estatua melbil bʌ ti cabʌl metal. Ti jujunchajp bajcheʼ melbil jiñi estatua jiñʌch i yumʌntel wiñicob am bʌ i ticʼlayob i tejclum Dios. Jiñi ocʌl melbil bʌ ti tsucu taqʼuin yicʼot ti ocʼol jiñʌch jiñi cojix bʌ yumʌntel: Jiñi Gran Bretaña yicʼot Estados Unidos. Jiñi profecía miʼ pʌs chaʼan ili pʼʌtʌl yumʌntel muʼto caj i bej ajñel cheʼ bʌ jiñi i Yumʌntel Dios miʼ jisan jiñi i yumʌntel wiñicob añoʼ bʌ ti ili pañimil.

12. ¿Chuqui yom i yʌl jiñi i sietejlel bʌ i jol jiñi jontol bʌ bʌteʼel, i chucoch ñuc i cʼʌjñibal cheʼ mi lac ñaʼtan?

¹² Jiñi apóstol Juan miʼ taj ti tʼan jaʼel pʼʌtʌl bʌ yumʌlob am bʌ i tʌcʼlayob jiñi i tejclum Jehová. Jiñi i profecía miʼ pʌs chaʼan lajalob bajcheʼ juncojt jontol bʌ bʌteʼel am bʌ siete i jol. Jiñi i sietejlel bʌ i jol jiñʌch jiñi Gran Bretaña yicʼot Estados Unidos. Ñuc i cʼʌjñibal mi lac ñaʼtan iliyi come maʼañix yambʌ i jol jiñi jontol bʌ bʌteʼel. Jiñi i sietejlel bʌ i jol wolito i chaʼlen yumʌntel cheʼ bʌ Cristo yicʼot i yángelob miʼ jisañob yicʼot i colobal jiñi jontol bʌ bʌteʼel (Ap. 13:1, 2; 17:13, 14).b

13, 14. ¿Majqui jiñi «Gog» i chuqui tajol mi caj i ñijcan chaʼan miʼ contrajin i tejclum Dios?

¹³ Jumpʼejl profecía am bʌ ti Ezequiel miʼ coltañonla lac ñaʼtan chuqui tajol miʼ mejlel ti ujtel cheʼ bʌ lʌcʼʌlix mi caj i jisʌntelob jiñi rey ti norte yicʼot jiñi rey ti sur. Mi lac taj laj qʼuel chaʼan jiñi profecía am bʌ ti Ezequiel 38:10-23; Daniel 2:43-45; 11:44-12:1 yicʼot Apocalipsis 16:13-16, 21 lajal chuqui miʼ taj ti tʼan. Mi cheʼʌchi, tajol mi caj i yujtel tac iliyi.

¹⁴ Cheʼ bʌ tsʼitaʼ ñumeñix ora i cajel jiñi ñuc bʌ wocol, jiñi «reyob tiʼ pejtelel pañimil» mi caj i tempañob junmojt tejclum tac (Ap. 16:13, 14; 19:19). Jiñi Biblia miʼ suben jiñi junmojt tejclum tac bajcheʼ «Gog» (Ez. 38:2). Ili junmojt mi caj i contrajin i tejclum Dios i mi caj i ñop i junyaj jisan. ¿Chuqui mi caj i ñijcañob chaʼan miʼ melob? Jiñi apóstol Juan tsiʼ qʼuele chaʼan ti jiñi bʌ ora mi caj i yajlel colem tuñijaʼ tac tiʼ tojlel i contrajob Dios. Ili colem tuñijaʼ tajol jiñʌch jiñi tsʌts bʌ tʼan tac muʼ bʌ caj i yʌlob i wiñicob Jehová. Tajol jiñʌch muʼ bʌ caj i ñijcan Gog chaʼan miʼ contrajin i tejclum Dios chaʼan yom i junyaj jisan (Ap. 16:21).

15, 16. a) ¿Chuqui tajol woliʼ taj ti tʼan Daniel 11:44, 45? b) ¿Chuqui mi caj i chaʼlen jiñi rey ti norte yicʼot jiñi Gog?

¹⁵ Tajol jiñi tsʌts bʌ tʼan tac muʼ bʌ caj i yʌlob i wiñicob Jehová yicʼot jiñi cojix bʌ i contrajintel i tejclum Dios jiñʌch muʼ bʌ i taj ti tʼan jaʼel Daniel 11:44, 45 (pejcan). Yaʼi, Daniel miʼ yʌl chaʼan jiñi rey ti norte «miʼ caj ti wen bʌqʼuen cheʼ miʼ yubin tʼan tilem bʌ tiʼ pasibal qʼuin yicʼot ti norte. Wen michʼ mi caj i majlel chaʼan miʼ jisañob tiʼ pejtelelob». Cheʼ miʼ yʌl jiñi tʼan «tiʼ pejtelelob» tajol jiñobʌch i wiñicob Jehová.c Tajol Daniel woliʼ tsictesan jiñi cojix bʌ i contrajintel i tejclum Dios.

¹⁶ Cheʼ bʌ jiñi rey ti norte yicʼot jiñi yambʌ yumʌlob miʼ tech i contrajiñob jiñi i wiñicob Dios, mi caj i michʼesan jiñi Mach bʌ añic i pʼisol i pʼʌtʌlel i cheʼ jiñi, mi caj i tejchel jiñi Armagedón (Ap. 16:14, 16). Ti jimbʌ ora, jiñi rey ti norte «mi caj i jilel. Maʼanic majch mi mejlel i coltan» (Dn. 11:45). Cheʼʌch mi caj i yujtelob jaʼel jiñi tejclum tac muʼ bʌ i subentelob ti Gog.

17. ¿Majqui jiñi Miguel, «jini ñuc bʌ ángel», muʼ bʌ i taj ti tʼan Daniel 12:1, i chuqui miʼ mel?

¹⁷ Jiñi yambʌ versículo tiʼ profecía Daniel miʼ ñumen tsictesan bajcheʼ mi caj i jisʌntel jiñi rey ti norte yicʼot jiñi muʼ bʌ i coltañob, i bajcheʼ mi caj laj coltʌntel (pejcan Daniel 12:1). ¿Chuqui yom i yʌl ili versículo? Miguel jiñʌch yambʌ i cʼabaʼ jiñi lac Rey, Cristo Jesús. An i ‹cʌnta› i tejclum Dios cʼʌlʌl ti 1914, cheʼ bʌ tsaʼ waʼchoconti i Yumʌntel yaʼ ti panchan. Ti talto bʌ qʼuin, «mi cajel i tsictiyel», yom i yʌl, mi caj i jisan i contrajob yaʼ ti Armagedón. Ili guerra jiñʌch i yujtibal muʼ bʌ i yʌl Daniel chaʼan jiñi «i yorajlel cabʌl wocol». Jiñi i profecía Juan muʼ bʌ lac taj ti Apocalipsis, miʼ taj ti tʼan chaʼan cheʼ miʼ tejchel Armagedón jiñix i yujtibal jiñi «ñuc bʌ wocol» (Ap. 6:2; 7:14).

18. ¿Chucoch miʼ mejlel lac ñop chaʼan Jehová mi caj i coltañonla?

¹⁸ Jiñi Daniel yicʼot Juan miʼ yʌlob chaʼan jiñi muʼ bʌ i melbeñob i yeʼtel Jehová yicʼot Jesús cuxul mi caj i cʌytʌlob ti jiñi ñuc bʌ wocol. Jin chaʼan, miʼ mejlel lac ñop chaʼan Jehová mi caj i coltañonla. Daniel miʼ yʌl chaʼan jiñi cuxul bʌ mi caj i cʌytʌlob mi caj i tsʼijbuntel ‹i cʼabaʼob tiʼ jun Dios› (Dn. 12:1). ¿Chuqui yom mi lac mel chaʼan miʼ tsʼijbuntel laj cʼabaʼ ti jiñi jun? Yom mi lac pʌs chaʼan an lac ñopoñel ti Jesús, i Tiñʌmeʼ Dios (Jn. 1:29). Yom mi la cʌcʼ lac bʌ ti Dios yicʼot mi lac chʼʌm jaʼ (1 P. 3:21). Cheʼ jaʼel, yom mi laj coltan i Yumʌntel Dios cheʼ mi lac chaʼlen wersa laj coltan yambʌlob i cʌñob Jehová.

19. ¿Chuqui yom mi lac mel ili ora, i chucoch?

¹⁹ Ili ora yomʌch mi lac pʼʌtʼesan lac ñopoñel ti Jehová yicʼot tiʼ yorganización. Yomʌch mi laj coltan i Yumʌntel Dios ili ora. Mi mucʼʌch lac mel, mi caj lac taj laj coltʌntel cheʼ bʌ jiñi i Yumʌntel Dios miʼ jisan jiñi rey ti norte yicʼot jiñi rey ti sur.

An profecía tac muʼ bʌ i yʌjlel ti ili recuadro muʼ bʌ i tsictesan chuqui tac miʼ lajal ujtel. Tiʼ pejtelel miʼ pʌs chaʼan chumuloñixla ti «cojix bʌ ora» (Dn. 12:4).

• 

  

  Texto tac: Ap. 11:7; 12:13; 12:17 (TNM); 13:1-8, 12.

  Profecía: Ili pañimil añix cabʌl jab ajñem tiʼ cʼʌb «jini jontol bʌ bʌteʼel». Ti jiñi cojix bʌ qʼuin tac, miʼ lowbentel i sietejlel bʌ i jol. Ti wiʼil, jiñi i jol miʼ lajmel i «pejtelel añoʼ bʌ ti pañimil» miʼ tsajcañob jiñi jontol bʌ bʌteʼel. Satanás miʼ cʼʌn ili jontol bʌ bʌteʼel chaʼan «miʼ contrajin i colobal i pʼolbal jiñi xʼixic».

  I tsʼʌctiyel: Cheʼ ñumeñix jiñi ñuc bʌ Butʼjaʼ, jiñi wiñicob tsiʼ techeyob yumʌntel i tsiʼ contrajiyob Jehová. Cheʼ ñumeñix cabʌl jab, ti jiñi Primera Guerra Mundial, jiñi Gran Bretaña mach wen pʼʌtʌlix tsaʼ cʌyle. Pero tsaʼ chaʼ pʼʌtʼa cheʼ tsiʼ teme i bʌ yicʼot Estados Unidos. Ti ili cojix bʌ qʼuin tac, Satanás miʼ cʼʌn jiñi yumʌlob chaʼan miʼ contrajin jiñi i wiñicob Dios.

• 

  Texto: Dn. 11:25-45.

  Profecía: Jiñi rey ti norte yicʼot jiñi rey ti sur miʼ contrajiñob i bʌ chaʼan miʼ qʼuelob majqui ñumen pʼʌtʌl.

  I tsʼʌctiyel: Alemania tsiʼ contraji jiñi Gran Bretaña yicʼot Estados Unidos. Cheʼ ti 1945 jiñi Unión Soviética yicʼot jiñi muʼ bʌ i coltañob tsaʼ sujtiyob bajcheʼ rey ti norte. Cheʼ ti 1991 tsaʼ jili jiñi Unión Soviética i, ti wiʼil, Rusia yicʼot jiñi muʼ bʌ i coltañob miʼ sujtelob bajcheʼ rey ti norte.

• 

  Texto tac: Is. 61:1; Mal. 3:1; Lc. 4:18.

  Profecía: Jehová tsiʼ choco tilel jiñi ‹xsuboñel› chaʼan miʼ jam jiñi bij cheʼ bʌ muʼto caj i waʼchocontel i Yumʌntel jiñi Mesías. Jiñi junmojt añoʼ bʌ bajcheʼ xsuboñel tsiʼ teche i subeñob «wen tʼan jini utsoʼ bʌ».

  I tsʼʌctiyel: Cʼʌlʌl ti 1870, Charles Russell yicʼot i piʼʌlob tiʼ tsajiyob jiñi Biblia chaʼan miʼ ñaʼtañob chuqui miʼ cʌntesañonla tiʼ sujm jiñi Biblia. Ti 1880, tsiʼ teche i yʌlob chaʼan ñuc i cʼʌjñibal cheʼ jiñi i wiñicob Dios miʼ chaʼleñob subtʼan. Tsiʼ pucuyob jun muʼ bʌ i yʌl: «Com lojon 1,000 xsubtʼañob» yicʼot «Yajcʌbiloʼ bʌ chaʼan miʼ chaʼleñob subtʼan».

• 

  Texto: Mt. 13:24-30, 36-43.

  Profecía: Juntiquil wiñic miʼ pʌcʼ trigo. Ti wiʼil, miʼ tilel jiñi i contra i miʼ pʌcʼ mach bʌ weñic jam, miʼ colel i miʼ mos jiñi trigo. Cheʼ tiʼ yorajlel cʼajbal, miʼ tʼoxtʌl jiñi trigo yicʼot mach bʌ weñic jam.

  I tsʼʌctiyel: Cʼʌlʌl ti 1870, tsaʼ caji ti ñumen cʌjñel majqui jiñi i sujm bʌ xñoptʼañob yicʼot jiñi mach bʌ i sujmobic. Cheʼ ti cojix bʌ qʼuin tac, miʼ tempʌntel jiñi i sujm bʌ xñoptʼañob i miʼ tʼoxtʌlob ti jiñi mach bʌ i sujmobic xñoptʼañob.

• 

  Texto: Dn. 2:31-33, 41-43.

  Profecía: I yoc jiñi estatua tʼox melbil ti tsucu taqʼuin yicʼot ti ocʼol, i tiʼ pejtelel i bʌcʼtal melbil ti cabʌl metal.

  I tsʼʌctiyel: Jiñi ocʼol jiñʌch jiñi quixtañujob añoʼ bʌ tiʼ cʼʌb jiñi Gran Bretaña yicʼot Estados Unidos muʼ bʌ i contrajiñob jiñi i yumʌlob. Jin chaʼan, jiñi yumʌlob mach mejlic i cʼʌñob jiñi i pʼʌtʌlel cheʼ bajcheʼ an i chaʼan jiñi tsucul taqʼuin.

• 

  

  Texto tac: Mt. 13:30; 24:14, 45; 28:19, 20.

  Profecía: «Jiñi trigo» miʼ tempʌntel i miʼ lojtel «tiʼ yotlel», i miʼ waʼchocontel «jini xucʼul bʌ xʼeʼtel am bʌ cabʌl i ñaʼtʌbal» chaʼan miʼ yʌqʼueñob i bʌl i ñʌcʼ «jini añoʼ bʌ tiʼ yotot». «Jini wen tʼan chaʼan i yumʌntel Dios», miʼ tejchel ti sujbel «tiʼ pejtelel pañimil».

  I tsʼʌctiyel: Ti 1919 jiñi xucʼul bʌ xʼeʼtel miʼ cʌylel tiʼ wenta jiñi i tejclum Dios. Cʼʌlʌl ti jimbʌ ora, jiñi xPejcaya bibliajob an i wen chaʼleñob wersa ti subtʼan. Ili ora, jiñi i testigojob Jehová miʼ chaʼleñob subtʼan ñumen ti 200 país yicʼot ti tejclum tac, i miʼ pucob jun tac loqʼuem bʌ ti Biblia ñumen ti 1,000 tʼan.

• 

  Texto tac: Dn. 12:11 (TNM); Ap. 13:11, 14, 15.

  Profecía: Jiñi jontol bʌ bʌteʼel am bʌ chaʼtsʼijt i xulub miʼ suben «jini chumuloʼ bʌ ti pañimil chaʼan miʼ melob i yejtal jini jontol bʌ bʌteʼel» i miʼ yʌqʼuen i cuxtʌlel.

  I tsʼʌctiyel: Jiñi Gran Bretaña yicʼot Estados Unidos miʼ yʌlob chaʼan miʼ waʼchocontel jiñi Sociedad de Naciones. Yambʌ país tac miʼ coltañob. Ti wiʼil, jiñi rey ti norte miʼ yochel ti jiñi Sociedad, pero cojach ti 1926 cʼʌlʌl ti 1933. Jiñi Sociedad de Naciones miʼ yʌqʼuentel i ñuclel cojach bʌ yom miʼ yʌqʼuentel jiñi i Yumʌntel Dios, cheʼʌch miʼ yujtel jaʼel tiʼ tojlel jiñi Naciones Unidas (ONU).

• 

  

  Texto tac: Dn. 8:23, 24.

  Profecía: Juntiquil rey wen chʼejl bʌ miʼ wen «chaʼlen jisaya».

  I tsʼʌctiyel: Jiñi Gran Bretaña yicʼot Estados Unidos an i wen acʼʌyob wocol. Jumpʼejl ejemplo, ti jiñi Segunda Guerra Mundial, Estados Unidos tsiʼ choco majlel chaʼpʼejl bomba atómica tiʼ tojlel jumpʼejl tejclum i contra bʌ jiñi temel am bʌ yicʼot.

• 

  Texto tac: Dn. 11:31 (TNM); Ap. 17:3, 7-11.

  Profecía: Jiñi «chʌctsʼeran bʌ bʌteʼel» am bʌ 10 i xulub miʼ letsel loqʼuel ti chʼen mach bʌ añix miʼ tajben i yebal, i jiñʌch i yochojlel bʌ rey. Jiñi libro i chaʼan Daniel miʼ yʌl chaʼan jiñi rey jiñʌch «jiñi biʼiltic jax bʌ yujil bʌ jisaya».

  I tsʼʌctiyel: Jiñi Sociedad de Naciones maʼañix i cʼʌjñibal tsaʼ ajñi cheʼ ti Segunda Guerra Mundial. Pero cheʼ ñumeñix jiñi guerra, tsaʼ waʼchoconti jiñi ONU. Jiñi ONU miʼ yʌqʼuentel i ñuclel cheʼ bajcheʼ tsaʼ aqʼuenti jiñi Sociedad de Naciones, jiñi ñuclel yom bʌ miʼ yʌqʼuentel jiñi i Yumʌntel Dios. Jiñi tejclum tac muʼ bʌ i coltan jiñi ONU mi caj i jisan jiñi ñopbalʌl tac.

• 

  

  Texto tac: 1 Ts. 5:3; Ap. 17:16.

  Profecía: Jiñi yumʌlob miʼ yʌlob chaʼan ñʌchʼʌlix pañimil yicʼot maʼañix chuqui bʌbʌqʼuen bʌ, ti wiʼil «jini lujuntsʼijt xulub» yicʼot «jini jontol bʌ bʌteʼel» miʼ jisañob jiñi tsʼiʼlel bʌ xʼixic. Ti wiʼil, jiñi yumʌlob mi caj i jisʌntelob.

  I tsʼʌctiyel: Jiñi yumʌlob miʼ yʌlob chaʼan ñʌchʼʌlix pañimil yicʼot maʼañix bʌbʌqʼuen bʌ. Ti wiʼil, jiñi yumʌlob muʼ bʌ i coltañob jiñi ONU miʼ jisañob jiñi mach bʌ i sujmic ñopbalʌl tac. Cheʼʌch mi caj i tejchel jiñi ñuc bʌ wocol, i mi caj i yujtel cheʼ miʼ jisʌntel ti Armagedón chuqui mach tac bʌ weñic tiʼ pejtelel pañimil.

• 

  Texto tac: Ez. 38:11, 14-17; Mt. 24:31.

  Profecía: Jiñi Gog miʼ contrajin jiñi i tejclum Dios. Ti wiʼil, jiñi ángelob miʼ tempañob «jini yajcʌbiloʼ bʌ».

  I tsʼʌctiyel: Yicʼot i coltaya yambʌ yumʌlob, jiñi rey ti norte miʼ contrajin jiñi i tejclum Dios. Cheʼ bʌ tsʼitaʼ ñumeñix ora i cajel ili contrajintel, mi caj i tempʌntelob yaʼ ti panchan i colobal jiñi yajcʌbiloʼ bʌ.

• 

  Texto tac: Ez. 38:18-23; Dn. 2:34, 35, 44, 45; Ap. 6:2; 16:14, 16; 17:14; 19:20.

  Profecía: Jiñi cʼʌchʌl bʌ ti jiñi «sʌsʌc [bʌ] caballo» miʼ mʌjlel i chaʼan cheʼ miʼ jisan jiñi Gog yicʼot i wiñicob. Miʼ chojquel ochel jiñi «jontol bʌ bʌteʼel» «tiʼ yajñib colem cʼajc» i miʼ bicʼti xujtʼel jiñi estatua.

  I tsʼʌctiyel: Jesús, jiñi rey tiʼ Yumʌntel Dios, miʼ loqʼuel i coltan i tejclum Jehová. Jiñi 144 mil yicʼot jiñi ángelob miʼ coltañob Jesús chaʼan miʼ jisañob jiñi junmojt tejclum. Cheʼ bajcheʼ jiñi, miʼ jilel i pañimil Satanás.