Старейшинӑсем пире хӳтӗлес тесе тата пухушӑн тӑрӑшас тесе Библири сӑмахсемпе вӗрентсе тӑраҫҫӗ. Пухури йӗркене пӑсакан тӑвансене Павел мӗнле канашсем панине пӑхса тухар. Вӑл ҫырнӑ: «Хӑшӗ-пӗрисем... хӑйсем пур ӗҫе те пуҫне чикеҫҫӗ». Паллах ӗнтӗ, старейшинӑсем вӗсене асӑрхаттарса каланӑ, лешӗсем вара вӗсен канашӗсене йышӑнман. Ҫавӑн пек тӑвансем ҫине пухура ыттисен мӗнле пӑхмалла пулнӑ? Павел ҫапла хушнӑ: «Эсир ӑна астуса тӑрӑр та, ӑна вӑтантармашкӑн, унпа ан хутшӑнӑр». Ҫав вӑхӑтрах вӑл ҫапла та каланӑ: «Ӑна тӑшман вырӑнне ан хурӑр» (2 Фес. 3:11—15). Паян христиансенчен хӑшӗ те пулин хӑй тӗрӗс мар тунине пӗлсех ҫавна тума пӑрахмасть пулсан тата ытти тӑвансем ҫине япӑх витӗм кӳрет пулсан (калӑпӑр, Иеговӑна ӗненмен хӗрпе е каччӑпа ҫӳреме пуҫласан), старейшинӑсем пухӑва асӑрхаттарас тесе доклад тума пултараҫҫӗ (1 Кор. 7:39). Ҫавнашкал доклад илтсен эсир хӑвӑра мӗнле тытатӑр? Ҫак докладра кам пирки каланине ӑнлантӑр пулсан, йӗркене пӑсакан тӑванпа сахалтарах хутшӑнма тӑрӑшатӑр-и? Ҫапла тусан эсир ҫав тӑвана вӑл хӑйне тӗрӗс мар тытнине тата Иеговӑна кӳрентернине ӑнланса илме пулӑшма пултаратӑр, вара вӑл, тен, улшӑнма та пултарӗ. w16.11 2:13

Пирӗн эрӑри 33 ҫулта Аллӑмӗш кун уявӗнче иудейсемпе прозелитсем пинӗ-пинӗпе христиан тӗнне йышӑннӑ тата вӗсем ҫине святой сывлӑш аннӑ. Вара вӗсем «суйласа илнӗ йӑх, Патша священникӗсем, сӑваплӑ халӑх, Турӑ Хӑй валли илнӗ ҫынсем» пулса тӑнӑ (1 Петр 2:9, 10). Апостолсем христиан пухӑвӗнче мӗн пулса иртнине тимлӗн асӑрхаса тӑнӑ. Анчах та каярахпа, уйрӑмах вӗсем вилсен, «хӑйсем хыҫҫӑн илсе каясшӑн урӑх майлӑ калаҫакан ҫынсем» тухнӑ. (2 Фес. 2:6—8). Вӗсенчен нумайӑшӗ надзирательсем пулса пухура яваплӑ вырӑн йышӑннӑ (каярахпа вӗсем епископсем пулса тӑнӑ). Ҫапла майпа, Иисус хӑйӗн вӗренекенӗсене «эсир ӗнтӗ пурсӑр та тӑвансем пулатӑр» тенӗ пулсан та, майӗпен тӗнре пуҫлӑхсем пулса кая пуҫланӑ (Матф. 23:8). Аристотельпе Платонӑн философи вӗрентӗвӗсене килӗштернӗрен ятлӑ-сумлӑ ҫынсем Турӑ Сӑмахӗнчи чӑнлӑхсене суя тӗн вӗрентӗвӗсемпе улӑштарнӑ. w16.11 4:8

Христиансем пулса тӑриччен эпир час-часах ҫылӑх тунӑ, пирӗн ӗҫсем Турӑ умӗнче усал пулнине хӑш-пӗр чухне ӑнланман та. Эпир хамӑр ӳтӗмӗре «ирсӗрлӗхпе йӗркесӗрлӗхӗн чури тунӑ». Пирӗн пирки «ҫылӑх чурисем» пулнӑ теме пулать (Рим 6:19, 20). Анчах та Библири чӑнлӑха пӗлнӗ хыҫҫӑн эпир улшӑнтӑмӑр, хамӑр пурнӑҫа Турра халалласа шыва кӗтӗмӗр. Эпир «ҫылӑхран хӑтӑлса тӳрӗлӗх чури» пулса тӑтӑмӑр (Рим 6:17, 18). Хамӑрӑн ҫылӑхлӑ ӳт хыҫҫӑн кайсан эпир ҫылӑха хамӑрпа хуҫаланма паратпӑр. Ҫылӑха парӑнатпӑр-и е ҫук пирӗнтен хамӑртан килет. Ҫавӑнпа та хамӑртан ыйтмалла: манӑн чӗре ӑҫталла туртӑнать? Ҫылӑхлӑ ӳт вӑйлӑ илӗртнӗрен тата пуҫра таса мар шухӑшсем явӑннӑран ҫылӑх тӑвас патнех ҫитместӗп-и? Турӑ хӑйӗн пысӑк ырӑлӑхне кӑтартса пире каҫарнӑшӑн эпир мӗн таран пархатарлӑ пулни ҫак ыйтусен хуравӗсенчен курӑнӗ. w16.12 1:11, 12