Ka ˗bha ˈnën ˗nu ˗wa dho ꞊klaŋplöö, ˗wo ˗dho ˗a yö ꞊dhɛ pë ꞊vadhɛ ˗nu ˗wo ˗bhɔ wo ˈkwëë˗ ˗dapë ˗nu ˈgü. ˗A ˗wɔnzuan ˈnën ˗tɔ ˈˈdhü ˗nu ˈgü, pë ꞊va ˗nu ˗wo ˗bhɔ wo ˈkwëë˗. ˈˈDhü ꞊kpëŋ ˗gbe ˗nu ˗wo ˗ya ˗a ˗bha, ˈö˗ ˗kɔ ˈnën ˗nu ˗wo ˗ya ˗a ˗gbe ˗nu ˗bha ˈpö. ˗A kë ˗kɔ ˈö bhë ˗wa ˗dhɛ Flakötadhö. Kwa Frakötadhö ˗yö ˗dapë ꞊vadhɛ ˈgü. De ˈö pë ˗së ˗nu ˈwö ˈˈdhʋ̈ ˗an ˗da? Ka bha ˈnën ˗nu ˗wa wo ˗zota pë ˗nu ˈwo bhë ˗an ˈgü, ꞊waa˗ yö ꞊dhɛ Zoova ˈnën ˗an ˗da ˗yö ˗dho ˗an ˗bha ˗zoyö pë ˗da ˗su ˗dhɛ ˗sü ˗gɛn ˗gban. Ka ˗bha ˈnën ˗yö ˈˈgla ˗ni ˈgü ka ꞊mɔɔn˗ ˗bha ˈka dhɛɛˈˈ kpɔ ˗a ˗gɔ, ˈka˗ pö: «꞊Ya kë ꞊dhɛ ˗Zlan ˈnën kwa ˗da, ˈpë dho kwa zuʋ̈ˈˈ ˈˈgblü dhi ˈyaa ꞊mɔɔn˗ ˗bha kö ˗ya dɔ ˗ee?» Ka ꞊mɔɔn˗ ˗bha ˈka˗ pö ˗a ˗dhɛ ꞊dhɛ pë nu ˈwo dho kwa zuʋ̈ˈˈ ˈˈgblü dhi ˗wo Biblö ˈgü. w24.12 16 § 8.

Zoova ˗yö ˗bɔ bɔmɛn Pɔdhö ˗ta ˈö ˈsëëdhɛ bɔ Kodhɛŋtömɛn ˗nu ˗dhɛ ˈö˗ pö ˗wo mɛn ˈö bhë ˗a bho ˗zlanwokɔdhigümɛn ˗nu ˈˈpiʋ̈. (1 Ko. 5:13) Kletiɛn ˗dhɛ ˗nu ˈwo to, ˗wo ˗dho ˗a ˗mɛn ˈsü ˗kɔ ˗kë ꞊dhɛ? Pɔdhö ˗ya ˗pö ˗an ˗dhɛ ꞊dhɛ ˗wo ‹ˈˈkan ˗a ˗bha.› ˗A ˗gɛn ˈnën ˗tɔ ˗mën? Pɔdhö ˗ya ˈgü ˗pʋ ˈö˗ pö: «Kɛng˗ ˗nu ˈka ˈdho ka ˗kɔ ˗zian ˗da ˈtɛa˗ do ˈgü.» (1 Ko. 5:11) Kwaa mɛn ˈbha ˈkwa ˗bhöpë ˗bhö kwa ˈkwëë˗, kwa ꞊mɔɔn˗ ˗bha ˈkwa˗ ˗ta ˈˈdoodɔ pinŋdhö. Pɔdhö ˗ya ˗zɔn ˈˈpuu ˈka ꞊dhɛ ˗zlanwokɔdhigümɛn ˗nu dua ˈyaa ˗mü kö ˗wo ꞊niidadhe kë gɔndë ˈö bhë ˗a ˈˈpiʋ̈, kë ˈˈdhʋ̈ kö ˈya ˗dho ˗an ˗blü ˈwɔnyaakësü ˗bha. (1 Ko. 5:​5-7) ˗A ˗kë ˈˈdhʋ̈ ˗sü ˗ya ˗mɛn ˗takun ˈö˗ yö ꞊dhɛ ˈya ˈwɔn yaa kë Zoova ˈka, ˈö ˈlëë˗ ˗yö dɔ ˗a ˗bha ˈö go ö ˗bha ꞊sɔnŋ yaa ˈgü. w24.08 15 § 4-5.

Izraɛdhö ˗sɛ ˈgü ꞊kwɛŋzü, mɛn ˗bhawɔn ˈto ˈˈsaa˗ ˈkpii˗ ˗dhɛkpaɔyi ˗kun do ˗kwɛ ˗bha. Yi ˈö bhë ˗a ˈka ˈnën ˈˈsaabhomɛn ˈkpii˗ ˗yö wü ˈˈsaa˗ ˗nu bho ˈˈsɛgümɛn ˗nu ˗bha ˈka. ˈKö ˗kë ˈˈdhʋ̈, ˈˈsaa˗ ˗bho wü ˈka ˗sü ˈyaa ꞊mɔɔn˗ ˗bha kö ˗yö mɛnbhɩɩdhe ˗nu ˗bha ˈwɔn yaa ˗nu bho ˗an ˗bha ˈpapadhö, ˈyö sü ꞊dhɛ wü ˗nu ꞊bhlëë ˗yö ˈˈtɩtɩ mɛnbhɩɩdhe ˗nu ˗bha. ˈˈKɛɛ Izraɛdhömɛn ˗nu ˗wa ˈˈsaa˗ bho ˗kplawo ꞊dhɛ ˗kɔ ˈö Zoova ˗ya pö˗ ˈka ˗a ˈdhö, ˗yö ˗wɩ ˗an ˗bha ˈwɔn yaa ˗nu ˗bhawɔn ˈto ˗sü ˗bha. (Ebl. 10:​1-4) ˈˈSaa˗ ˗nu ˈö Izraɛdhömɛn ˗nu kun ˗an bho ˗ni ˈgü bhë, ˗wo ˗an ˗takun ˈö ˈwo˗ yö ꞊dhɛ ˈwɔnyaakëmɛn ˗nu ˗mü wo ˈka. ˈKö ˗kë ˈˈdhʋ̈, pë ˈbha ˈö dho mɛn ˗nu ˗bha ˈwɔn yaa ˗nu ˗bhawɔn ˈto ˗toëpö ˈka ˗yö ˗kun Zoova ˗zo ˈˈpiʋ̈. ˗Ya ˗kë ˈö˗ Gbö dhɔɔbhaasü ‹˗yö ö ˗dɩ nu ˗gɛnɲan ˈka doseng kö ˗yö ˈbɔn bho mɛ ˈgbɛ ꞊dede ˗bha.› (Ebl. 9:28) Yesu ˗yö ö ˗bha «˗tosɛta ˗nu mɛn ꞊va ꞊dede ˗gɔtadhɔpë ˈka.»—Mat. 20:28. w25.02 4 § 9-10.