ˈˈMaandhoowayi, Avlidhö 25
Zoova ˗dhɔ yö n ˗kë, ˈyö sü ꞊dhɛ ˗yö n ˗wo ˗man, ˈö ˈman˗ ˗dhɛ ö ˗wɩ n ˗gɔ.—Ps. 116:1.
Zoova ꞊mɔɔn˗ ˗bha ˈö kwa ˗takun ˈkwa bɔ kwa ˗bha ˈwɔn ˈˈgbɩɩ˗ ˗nu ˈgü, ˈö ˈkwa˗ ˗dhɔkë zuʋ̈gblüdhi ˈka. ˈKwa bhɛɛˈˈ ˗Zlan ˗dhɛ ˈwɔn ˈbha ˈö kwa zuʋ̈ˈˈ ˈˈklʋʋbhɔ ˗ni ˈgü ˗a ˗wɔn ˈgü, ˗a ˈbha ˗ya kë pë ˗blɛɛsü ˈö dho ˗a nu kwa ˗dhɛ ˈyö ˗tɔ ꞊faan, kö ˈkwa ˗mɔn ˗a bun ˗sü ˗bha. ꞊Ya kë ꞊dhɛ kwa ˗bha ˈwɔn ˈˈgbɩɩ˗ ˈö ˈˈdhʋ̈ ˈyaa ɲën ˗ni ˈgü ꞊dhɛ ˗kɔ ˈkwa˗ ˈˈpiʋ̈ ˗a ˈka ˗a ˈdhö, ˗kwa bhɛɛˈˈ Zoova ˗dhɛ ˗kplawo kö ˗yö ꞊faan nu kwa ˗dhɛ ˈkwa˗ bun. Yö ꞊dede ˈnën pö ˈkwa˗ kë ˈˈdhʋ̈. Izai ˗ya ˗pö: «ˈKwa ˗dho kwa ꞊kwaa Zoova ˗zü toŋtoŋdhö ˈö ö ˈˈtɛɛpa.» (Is. 62:7) ˗A ˗gɛn ˈnën ˗tɔ ˗mën? ˗A ˗gɛn ˈnën ˗tɔ ꞊dhɛ kwa dua ˗mü ˈkwa bhɛɛˈˈ Zoova ˗dhɛ ˈˈtʋ̈ŋ ꞊gban ˈka, kö ˗yö kë ꞊dhɛ ˗fɛɛ ˗ya ˗a ˗bha ˗sü ˈdhö. Izai ˗wo ˈö bhë ˗yö kwa ˗zo ˗bo ˈwɔnzuan ˈö Yesu ˗ya sü ˈö ˗gban bhɛɛsü ˗bha ˈö Dhukö 11:8-10, 13 ˈgü bhë, ˗a ˈka. Yesu ˗yö kwa ꞊faanmën kö ˈkwa ˗zuu ˈˈslʋ̈ʋ̈slʋ̈ ‹˗dhɛ ˗a ˗gɔ ˗kplawo.› Kwa ꞊mɔɔn˗ ˗bha ˈpö ˈkwa ꞊bhɛɛ Zoova ˗dhɛ kö ˗yö ˈˈdhiʋ̈sü kwa ˈka ˈkwa ˗da ˈwɔn ˗së ˗nu ˗ʒian ˗ta. w22.11 8 § 1; 9-10 § 6-7.
ˈˈMaandhooyi, Avlidhö 26
Mɛ ˈˈpɛpɛ ˈwo ˈdhang bho˗ ˗wɔn ˈˈdhiʋ̈ ˗wo ˗dho saanˈˈ ˈsü ꞊dedewo ˈˈkpʋngtaadhɛ ya˗ ˈgü, ˈyö ˈwo gun ˗na ˗da [˗Zlan] ˗bha ˗gblüdëdhɛkëdhɛ ˈgü.—Këw. 14:22.
Kwaa kwa ˗bha ˈkɔdhigümɛn ˗nu kwa ꞊mɔɔn˗ ˗bha ˈkwa kwa ˗de ꞊baa ˈˈklʋʋbhɔdhe nu ˗gɔ ˈˈtʋ̈ŋ ˈö yö ˗a ˈgü. ˈKwa ˈdho kwa ˗zota ˈwɔn ˈˈgbɩɩ˗ ˈˈpɛpɛ ˈwo ꞊mɔɔn˗ ˗bha ˗wo nu kwa ˗ta, ˗an ˈgü. Pë ˈkwa dho ˗a kë ꞊ʒiaan ˈyö ˗tɔ ˈˈtɔŋdëdhɛ ˈö kwaa Zoova kwa ꞊zinŋgü bhë, ˗a ˗gɛn ˗gban ˗sü kö ˈkwa kwa ˗bha ˈnën ˗nu ˗takun kö ˗wa kë ˈˈdhʋ̈. ˈˈTʋ̈ŋ ˗nu ˈö zuʋ̈dhiʋ̈tɛ ˗nu ˗wa kë ˗a ˈka kwa ˗bha, ˗kwa kwa zuʋ̈ˈˈ ˈˈpʋ ˗Zlan ˗dhɛ. (Ps. 62:7, 8) ˈPë ˗kë kwa dua ˈdhö ˗mü kö ˈkwa kwa ˗zo yö Zoova ˗dhɛ kwaa kwa ˗bha ˈkɔdhigümɛn ˗nu ˗kwaa ˈˈdoodɔ. ˈWɔn ˈˈgbɩɩ˗ ˗nu ˈwo ˗kë ꞊dhɛ ˈˈsɛ ˗bha ꞊ziisü ɛɛnˈˈ ˈˈyi ˗bha pa ˗sü ˗nu ˈdhö bhë ˈkwa ˗an ˈto ˈˈdhiʋ̈ ˈkwa kwa ˗de baaˈˈ, ˗yö ˗dho kwa ˗bha ˈnën ˗nu ˗takun ˈö ˗an ˈgü ˗kë ˈˈgbɩɩ˗, ˈwo wo zuʋ̈ˈˈ ˗kë ˗saa. Zuʋ̈waannusü ˈö go ˗Zlan ˈˈpiʋ̈ ˗yö ꞊mɔɔn˗ ˗bha ˈö kwa ˗takpa. (Fdh. 4:6, 7) Zoova ˗bɔ ˗a ˗ta ˈö ˈwɔn ˈˈgbɩɩ˗ ˈwo ˗kë ꞊dhɛ ˈˈsɛ ˗bha ꞊ziisü ɛɛnˈˈ ˈˈyi ˗bha pa ˗sü ˗nu, ɛɛnˈˈ ˈˈyua ˗nu waa ˈˈklʋʋbhɔdhe ˗nu ˈdhö bhë ˗wa kë kwa ˈka ꞊dɛɛ, kwa zuʋ̈ˈˈ ˈyaa ˈˈkaankwöö. Mɛn ˗bɔ ˈpö mɛn zii ˗nu ˈwo yö ˈˈgbɩɩ˗ ꞊dede kë ˗ni ˈgü ˗an ˗ta ˈö kwa ꞊faanmën. ꞊Bhlëë ˈkpii˗ ˈö ˗kë mɛn ˈˈwɛɛ ˗nu ˗takun ˗sü ˈka bhë, ˗ya ˗ya ˈpö mɛn ˈˈpɛpɛ kwa ˗bha. ˈˈTʋ̈ŋ ˈö yö ˗a ˈgü ˈdhɛ ˗kë ꞊dhɛ ˗yadeflëëgüsü ˗yö kwa ˗gɔ, kwa ꞊mɔɔn˗ ˗bha ˈkwa kwa ˗de ꞊baa ˈwɔn ˈˈgbɩɩ˗ ˈwo ˗dho nu kwa ˗ta dhiʋ̈ˈˈ ˈö˗ do ˗kë «ˈˈklʋʋbhɔdhe ˈkpii˗» ˈka bhë, ˗an ˗bha.—Matt. 24:21. w22.12 27 § 17-18.
ˈˈSɩyi, Avlidhö 27
ˈMii nu ˈmɛ ˈwo˗ pö wo ˗dɩ ˗dhɛ ꞊dhɛ pö ˈaa wo ˗bha wo ˗zë ˗a ˗nu ˗dhɛ ˗dhɛ ˈgü, a ˗nu kö ˈa ˈwɔnyaakëmɛ ˗nu ꞊në˗ ˗nu ˗dhɛ.—Mat. 9:13.
Kwa dua ˗mü ˈkwa pë ˈˈpɛpɛ kë kö kwa zuʋ̈ˈˈ ˈya ˗dho za dɔ kwa ˗bha ˈwɔn yaa ˗nu ˈö ˈkwa ˗an ˗kë ˈˈdhiʋ̈ ˗be ˗an ˗wɔn ˈgü. ˗Yö ˈˈdhʋ̈ ꞊dhɛ ˈkwa dua ˈyaa ˗mü ˈkwa zë ˗gɔtadhɔpë ˈˈsaa˗ ˗dhɛ kö ˈkwa «ˈwɔn yaa kë kwa ˗de ˈˈɲaan.» (Ebl. 10:26-31) ˈˈKɛɛ ˗yö ꞊mɔɔn- ˗bha ˈö ga kwa ˈgü ꞊dhɛ ˈwɔn yaa ˈkwa˗ ˗kë bhë ˗ya ˈmën kwa ˈka, ˈkwa ˗takundhe ˗dhɛ Zoova waa mɛn zii ˗nu ˗gɔ, ˈkwa kwa ˈˈtakɔ ˗nu bho ˈˈgblʋʋ, Zoova ˗dho kwa ˗bhawɔn ˈto ö zuʋˈˈ ꞊gban ˈka. (Is. 55:7; Këw. 3:19) ˗Gɔtadhɔpë ꞊mɔɔn- ˗bha ˈö kwa ˗bha ˈwɔn yaa ꞊gban ˈˈpɛpɛ ˗takpa. ˗Tosɛta ˈö dho kë ꞊bhɔɔ ˈˈsɛ ˗ta, ˗a ˗san ˈti ˗dho yö kwa ˈgü toŋtoŋdhö. Mɛn ˗nu ˈö ˗kë ˗an ˈˈpiʋ̈ sü dho kwa zuʋ̈ˈˈ ꞊nii ˗da, kwa ˗dho ˗kpan ˗an ˗bha ˈˈtʋ̈ŋ ˈsaadhö ˈka. ˗Ya ˈgo mü, yö ˗së ˗dho kë kwa ˗gɔ. ˗A ˗dhɛ ˈö ˗së ˈzü ˈyö ˗tɔ ˗dhɛkpaɔyi ˈˈpɛpɛ ˈka, kwa Dë ˈö dhaŋ˗ ˈgü bhë kwa ˗bha ˗a dɔ ˗sü ˗dho ˗dadhiʋ̈, ˈö kwa zuʋ̈ˈˈ ˈˈgblü ˗yö dhi pë ˗nu ˈö ˗an nu kwa ˗dhɛ ˗an ˗wɔn ˈgü. ˈWɔn ꞊va ꞊dede ˈnën ˈkwa dho ˗an draanˈˈ ˗Zlan waa ö ˗dapë ˗nu ˗bha. w22.12 13 § 17, 19.