Poingkuro’d Mongolu’d Tusin

Koinsanai dati momoguno’d tusin montok gunoon do sampaganakan. (Boros Dot Aralom 30:8) Tu tusin nopo nga ‘iso o pongintirung.’ (Gomponuduk 7:12) Sobaagi’d mikoruhang, okon ko asanang dot mongolu’d tusin, nga kada pologoso iti’d sumiliu’d kobolingkangan do pisasawaan dokoyu. (Iposus 4:32) Misasawo nopo nga sopitumboyo om misokodung do soira’d monontu’d momoguno’d tusin.

1 MONORISID DO WONSOIYON

NUNU KA’D BIBLE: “Om ondung haro o songulun dot id pogialatan dokoyu dot orohian do mamaal do walai dot akawas, om atantu’ no dot intobon mantad po dau o tusin do pomongo di walai do waalon dau ko’ amu’.” (Lukas 14:28) Piuhupai noh dokoyu’d momusorou poingkuro kou’d mamakai tusin. (Amos 3:3) Tontuon noh nunu o bolion om i’t kabagal dot tusin nu. (Boros Dot Aralom 31:16) Kitusin ko pia nga okon i ko komoyon dot onuon ngai nu i’t kosionuan nu. Kada pongutang. Bolion nopo i’t aanu’d tusin nu.—Boros Dot Aralom 21:5; 22:7.

NUNU WONSOIYON:

• Pibarasai noh dokoyu i’t noolu’d tusin id kopupuson do tulan

• Ondung osompitan kou’d tusin, sorisido noh i wonsoiyon nu poingkuro’d popokuri’d kosukup-sukupan. Pogonsok noh id walai om kada akan id labus

2 KIPOMUSARAHAN DIT OTULID OM KOSUDONG

NUNU KA’D BIBLE: ‘Wonsoiyo noh dot okon nopo ko’ id toguang do Yohuwah, nga’ id toguang nogi’ do tulun.’ (2 Korintus 8:21) Wonsoiyo noh i’t otulid kumaa koruhang nu om kada polisoko piro i gaji nu om piro kosukup-sukupan nu.

Pibarasai noh dokoyu soira’d maganu kootuson dit oponting pasal dot kousin-usinan dokoyu. (Boros Dot Aralom 13:10) Pibarasan pasal kousin-usinan dokoyu nopo nga kaanu’d potilombus dit kolumaagan do pisasawaan dokoyu. Kada toisaai gaji nu.—1 Timotius 5:8.

NUNU WONSOIYON:

• Potobilango noh tusin dit piniokunan dokoyu

• Kada andado gisom dot kotoguang kou’d kobolingkangan pasal do kousinan