Niponda eno̱ no̱ngo̱ bedomsedi ba lakise̱ to̱ ke̱m, nje Yehova a mombweano̱ ye nde nga mubole̱ bobe a ta a bia ná nje a tano̱ a bola ye bobe. Yesu a teleye̱ nika ná bwē o Lukas 12:47, 48. Moto a no̱ngi te̱ bedomsedi ba bola nje ye bobe, nde ke̱ a bi ná Yehova a si to̱ndi nje eno̱ bola, ke̱ a boli nde bobe bonde̱ne̱. Yehova e ná a no̱ngo̱ bedomsedi ná a si malakise̱ nu moto. (Marko 3:29; Yohane 9:41) Mo̱ je te̱ nde ná di lakisabe̱ e? E! Ońolana Yehova a mombwea pe̱ nga mubole̱ bobe ate̱le̱ na mbale̱. Jate̱le̱ nik’e mapula nde kwala ná “moto a matukwa jo̱nge̱le̱ lao, eboled’ao, to̱ nje a tano̱ a pula bola.” Nik’e mapula pe̱ kwala ná moto a mombwe̱, a mabwa pe̱ ndutu ninde̱ne̱ ońola mambo ma bobe a bolino̱, to̱ ma bwam a tano̱ angame̱n bola. Moto ńate̱le̱ a si mabwa ndutu buka te̱ ońola mambo ma bobe a bolino̱, a mabwa pe̱ ndutu ońolana mulatako mao na Yehova mu timbi bo̱bo̱, na mo̱ a bola bobe. w22.06 5-6 § 15-17

Basingedi basu ba macamane̱ mpoṅ na mambo ma si te̱nge̱n jombwea bonasango bena Yehova a mabolane̱no̱ o die̱le̱ bebokedi bao. (Mye. 31:14) Bonasango bō̱ ba damabe̱le̱, ba numabe̱ pe̱ njo̱m ná be nde bato b’ebwan. Kriste̱n a ebwe’a mbu yaboso i ta o mulemlem ma bete̱medi ponda ńamuloloma Paulo a numabe̱no̱ njo̱m ni si te̱nge̱n, a damabe̱le̱ pe̱. Bō̱ ba ta ba pawe̱ na Paulo ke̱ e o beboa o Roma. (2 Tim. 1:8, 15; 2:8, 9) Dutea te̱ ne̱ni Paulo a sengino̱. A lembe̱ mitakisan jita, a le̱ke̱ye̱ na kwedi bwanga ońol’abu. (Bebolo 20:18-21; 2 Kor. 1:8) Di si be̱ ka ba bonasango bena ba caki Paulo. Di s’angame̱n so̱ ńaka ná bato bena Satan a mawasano̱ takise̱ tobotobo be nde bonasango bena ba madie̱le̱. A mapula nde ná ba si be̱ pe̱ Yehova jemea. (1 Pet. 5:8) Benga sue̱le̱ bonasango, o tingame̱ pe̱ na babo̱ na mulema mwe̱se̱.—2 Tim. 1:16-18. w22.11 16-17 § 8-11

Yen ebe nu mubole̱ bobe ńate̱le̱ ńena nu ta nu paname̱ o mbasanedi ma Yesu obiana a mawo̱ a ta nde mot’a Bonayuda. Bonayuda ba ta nde bowe̱ Loba diwo̱, nde basibi ba ta bowe̱ maloba jita. (Bbu. 20:2, 3; 1 Kor. 8:5, 6) Nu mubole̱ bobe a be̱ te̱ nusibi, ke̱ myuedi mi baisabe̱ o text a bon buńa ba we̱nge̱ mi wusa nde be̱ ná: “O si mabwa maloba bo̱ngo̱?” O sumo te̱ nika, Yesu a lomabe̱ pe̱ nde, seto̱ ońola basibi, nde ońola “mido̱ngi mi pimbedi ma ndabo a Israel mo̱me̱ne̱.” (Mat. 15:24) Loba a ta pe̱ a bīse̱ Bonaisrael ná a me̱nde̱ pumbwe̱le̱ bawedi. Nu mubole̱ bobe ńate̱le̱ a ta a bia nika, byala bao be ta pe̱ nde be pula kwala ná Yehova a me̱nde̱ pumbwe̱le̱ Yesu o die̱le̱ Janea la Loba. E me̱ne̱ne̱ ná a ta a pite̱ ná Loba a me̱nde̱ pe̱ pumbwe̱le̱ mo̱. Yete̱na nu mubole̱ bobe ńate̱le̱ a ta nde mot’a Bonayuda, ke̱ a ta so̱ a bia myango ma Adam na Eva. A ta so̱ a dube̱ yen ebe ná paradisi Yesu a tano̱ a kwalea o Lukas 23:43 e me̱nde̱ nde be̱ mōnda ma mpesa o wase wan.—Bbot. 2:15. w22.12 8-9 § 2-3