An be kibaro diiman fɔ kuun minw kosɔn, u bɛɛ la kɔrɔtaninba ye ko an be Jehova Ala kanu ani a tɔgɔ senuman koo ka di an ye. Waajuli baara be sababu di an ma k’an ka Ala kanulen tando. Mɛlɛkɛw jamakuluba ye min fɔ, an sɔnnin be o ma. U ko: “An Matigi ni an ka Ala, i ka kan ni nɔɔrɔ ni bonya ani sebaaya ye.” Dalilu barikaman minw b’a yira ko Jehova lo ye ‘fɛn bɛɛ dan’ ani ko an be niin na ale lo barika la, n’an b’o yira mɔgɔw la, an be nɔɔrɔ ni bonya la Jehova kan. Ka kɛɲɛ n’an ka koow cogoya ye, n’an b’an ka wagati, an fanga ani an bololafɛnw ta ka waajuli baara kɛ bɛrɛbɛrɛ, an b’a yira o fɛ ko Jehova ka kan n’an ka sebagaya ye (Mat. 6:33; Luka 13:24; Kɔlɔs. 3:23). Kuma kuntaga surun na, a ka di an ye ka kuma an ka Ala kanulen koo la. A ka di an ye fana k’a tɔgɔ kofɔ mɔgɔw ye ani k’u dɛmɛ k’a faamu Ala sugu min lo. w24.05 17 § 11

Kabi sisan, Jehova be hɛɛrɛ di an ma ani an wasanin lo. A bena ɲɛnamaya banbali fana di an ma sini ma. An be se k’an jigi la Jehova kan sabu an lanin b’a la ko a b’a fɛ ani see b’a ye k’an duga. O kama, an be to k’an seko bɛɛ kɛ a ka baara la i ko a sagokɛlaw y’a kɛ cogo min na galen. Timote y’o lo kɛ saan kɛmɛkulu fɔlɔ la (Eburuw 6:10-12). A y’a jigi la Ala ɲɛnaman kan (1 Tim. 4:10). O lo kama, a y’a jija kosɔbɛ ka baara kɛ Jehova ye ani ka tɔɔw mako ɲɛ. A ye mun lo kɛ do? Ciden Pol y’a jija ko a k’a ka mɔgɔw kalancogo fisaya waajuli la ani kafo kɔnɔ. A y’a jija fana ko a ka kɛ ɲɛyirali ɲuman ye a kerecɛnɲɔgɔnw fɛ, denmisɛnw fara mɔgɔkɔrɔbaw kan. Ani a ye baara gwɛlɛ dɔw kalifa Timote ma. Misali la, minw mako tun be ladili barikamanw na, a ko Timote k’o di u ma, nga a k’o kɛ ni kanuya ye (1 Tim. 4:11-16; 2 Tim. 4:1-5). Timote tun lanin b’a la ko Jehova bena a duga a ka jijaliw kosɔn.—Ɔrɔm. 2:6, 7. w24.06 22-23 § 10-11

Tuma caaman na, Jehova tɛmɛna a ka kiraw fɛ k’a ka jama lasɔmi ani k’a kolo. Misali la, a tɛmɛna Zeremi fɛ k’a fɔ ko: “Isirayɛli mara mɔgɔ tilenbaliw, sɔn ne ma . . . Ne tena n ɲaa sisi aw ma tugu, bari, ne ye makaritigi ye . . . Ne diminin tena to kudayi. Aw ka sɔn aw filiyɔrɔ ma: Aw murutira ne Masaba aw ka Ala ma.” (Zer. 3:12, 13). Jehova tɛmɛna kira Zowɛli fɛ k’a fɔ ko: “Aw ye kɔsegi ne ma sɔbɛ la.” (Zowɛli 2:12, 13). A y’a kɛ Ezayi y’a fɔ ko: “Aw k’aw yɛrɛ saniya. Aw k’aw ka kɛwalijuguw tunu ka bɔ n ɲakɔrɔ! Aw ka kojugu dabila.” (Ezayi 1:16-19). Ani a tɛmɛna Ezekiyɛli fɛ k’a ka jama ɲininga ko: “Aw be miiri ko mɔgɔjugu ka saya ka di ne ye wa? . . . N’a yɛlɛmana k’a ka sirajuguw bila ka to nii na, o le ka di ne ye . . . Tiɲɛ na, mɔgɔ si ka saya man di ne ye fewu! Aw ka kojugukɛ dabila ka to nii na!” (Ezek. 18:23, 32). Ni mɔgɔw nimisara u ka jurumuw na, o ka di Jehova ye kosɔbɛ sabu a b’a fɛ u ka to niin na fɔɔ abada! w24.08 9 § 5-6