21 Ke mɔnu aɖe va ʋu na Herodia gbe ɖeka, esi Herodes ɖo kplɔ̃ le eƒe dzigbeŋkeke+ dzi na eƒe amegãwo kple aʋafiagãwo kpakple Galilea ame ŋkutawo le fiẽ aɖe.+ 22 Herodia vinyɔnuvi va ɖu ɣe wòdze Herodes kple ame siwo le kplɔ̃ ŋu kplii la ŋu. Fia la gblɔ na nyɔnuvia be: “Bia nu sia nu si nèdi lam, eye mana wò.” 23 Ɛ̃, eka atam nɛ be: “Nu sia nu si nàbiam la, mana wò, va se ɖe nye fiaɖuƒea ƒe afã ke hã dzi.” 24 Eya ta edo go yi ɖabia dadaa be: “Nu kae mabia?” Eɖo eŋu nɛ be: “Yohanes Amenyrɔɖetsimela ƒe ta.” 25 Enumake eɖe abla va fia la gbɔ hebia nu si wòdi, gblɔ be: “Medi be nàtsɔ Yohanes Amenyrɔɖetsimela ƒe ta de agba me nam fifi laa.”+ 26 Togbɔ be nya sia te ɖe fia la dzi vevie hã la, medi be yeagbe enana o, le atam siwo wòka kple ame kpekpeawo* ta. 27 Eya ta fia la dɔ eŋusrafo ɖeka ɖa enumake heɖe gbe nɛ be wòatsɔ Yohanes ƒe ta avɛ. Eyi ɖatso ta le enu le gaxɔa me, 28 eye wòtsɔ ta la de agba me vɛ hetsɔe na nyɔnuvia, eye nyɔnuvia tsɔe yi na dadaa. 29 Esi eƒe nusrɔ̃lawo see la, wova tsɔ eƒe kukua yi ɖaɖi ɖe yɔdo* me.