Ehiã be woade dzi ƒo na Yesu ƒe nusrɔ̃lawo. Nu ka tae? Wo dometɔ aɖewo gblẽ aƒewo, ƒomewo kple dɔwɔɖuiwo ɖi dze Yesu yome yi afi sia afi. (Mat. 19:27) Amewo doa vlo wo dometɔ aɖewo hã, le esi wova zu Yesu ƒe nusrɔ̃lawo ta. (Yoh. 9:22) Wolɔ̃ faa to esiawo katã me le esi woxɔe se be Yesue nye Mesia si ƒe ŋugbe Mawu do ta. (Mat. 16:16) Eya ta esi wowu Yesu la, mɔkpɔkpɔ bu ɖe wo eye woƒe dzi gbã vevie. Ðikeke mele eme o be Yesu nyae be menye xɔsee mele yeƒe nusrɔ̃lawo si o tae wolé blanui ɖo o, ke boŋ yeƒe kua ye gbã dzi na wo. Eya ta ete dzidede ƒo na wo tso gbe si gbe wofɔe ɖe tsitre. Le kpɔɖeŋu me, eɖe eɖokui fia Maria Magdalatɔ la esime wònɔ avi fam le yɔdoa to. (Yoh. 20:​11, 16) Eɖe eɖokui fia eƒe nusrɔ̃la eve siwo yina Emaus, si nye kɔƒe aɖe me. Eye wòɖe eɖokui fia apostolo Petro hã. w24.10 13 ¶5-6

Dzilawo mikpe ɖe mia viwo ŋu be woate ŋu aɖe nu si tae woxɔe se be Wɔla aɖe li la me na amewo. Àte ŋu adzro nyati vovovo siwo le jw.org siwo nye “Sɔhɛwo Biana Be—Ðe Xexea Dzɔ Le Eɖokui Sia?” me kple viwòa. Eyome na viwòa natia numeɖeɖe si wòkpɔ be yeate ŋu azã atsɔ akpe ɖe amewo ŋu woase egɔme be Wɔla aɖe li. De dzi ƒo nɛ be wòazã numeɖeɖe bɔbɔewo atsɔ ade ŋugble kple ame siwo lɔ̃ faa be yewoaɖo dze kplii. Le kpɔɖeŋu me eƒe sukuhati aɖe ate ŋu agblɔ be: “Nye ya nu siwo mekpɔna ko dzie mexɔna sena, Mawu ya nyemekpɔe kpɔ o.” Ne ame aɖe gblɔ nya ma tɔgbia, viwòa ate ŋu awɔ kpɔɖeŋu sia nɛ be: “Tsɔe be èyi ɖe ave dodo aɖe me afi si ame aɖeke mele o eye kaka nàkpɔa, vudo nyui aɖee nye ema, woɖo kpe ɖe eme eye tsikunu hã le edzi. Nu kae ava susu me na wò? Ðe nàgblɔ be ame aɖee ɖe vudoa loo alo ɖeko wòdzɔ le eɖokui sia? Ne ame aɖee ɖe vudo ma la, ke ɖe màlɔ̃ ɖe edzi be ame aɖee wɔ anyigba sia kple nu gbagbe vovovo siwo le edzi oa?” w24.12 18 ¶16

Mí katã míehiã aɖaŋuɖoɖo be míatso nya me nyuie. Hamemetsitsiwo kple nɔvi kpɔnuteƒe bubu siwo le hamea me la ate ŋu aɖo aɖaŋu na mí. Ne wotsi wu mí sãsãsã hã la, mele be míasusui be woƒe aɖaŋuɖoɖowo mate ŋu aɖe vi na mí egbea o. Yehowa di be míasrɔ̃ nu tso nɔvi tsitsiwo gbɔ. Wokpɔ nu teƒe eye gɔmesese kple nunya geɖe hã su wo si elabe wotsi wu mí. Le blema la, Yehowa to ame tsitsi wɔnuteƒewo dzi de dzi ƒo na eƒe amewo hefia mɔ wo. Ame siawo dometɔ aɖewoe nye Mose, David kple apostolo Yohanes. Wonɔ agbe le ɣeyiɣi vovovowo me eye nu siwo me woto hã to vovo. Esi wòsusɔ vie woaku la, woɖo aɖaŋu nyuiwo na megbeviwo. Ame tsitsi wɔnuteƒe siawo dometɔ ɖe sia ɖe te gbe ɖe edzi be ele vevie be míaɖo to Mawu. Míeɖanye ɖeviwo alo ame tsitsiwo o, aɖaŋuɖoɖo mawo ate ŋu aɖe vi na mí.—Rom. 15:4; 2 Tim. 3:16. w24.11 8 ¶1-2