Ðikeke mele eme o be wò hã èlɔ̃ Yehowa eye nèdi be yeasubɔ nɔviawo. Ne nenemae la, ke aleke nàwɔ be didia nanɔ mewò? Anyo be nàbu dzidzɔ si gbegbe nàkpɔ ne ètsɔ ɖokuiwò na hesubɔ nɔviawo ŋu. Yesu gblɔ be: “Dzidzɔ geɖe le nunana me wu nuxɔxɔ.” (Dɔw. 20:35) Gɔmeɖose sia nue Yesu nɔ agbe ɖo. Ekpɔ dzidzɔ esi wòwɔ nu siwo aɖe vi na amewo. Bu ale si Yesu wɔ esia ƒe kpɔɖeŋu aɖe si dze le Marko 6:​31-34 ŋu kpɔ. Ɣemaɣia, ɖeɖi te Yesu kple eƒe apostoloawo ŋu. Eya ta woɖo ta teƒe tsoabo aɖe be yewoava ɖi ɖe eme. Gake ameha aɖe tre afi ma ɖoɖo na wo. Wodi be Yesu nafia nu geɖe yewo. Yesu ate ŋu agbe hafi, elabena le nyateƒe mea Yesu kple eƒe apostolowo “[mekpɔ] vovo aɖu nu teti hã o.” Alo Yesu ate ŋu agblɔ nya ɖeka eve aɖewo na wo ko ado mɔ wo woadzo. Gake esi wòlɔ̃ ameawo vevie ta, ede asi ‘nufiafia me wo’ ʋuu va se ɖe “ɣetrɔ me.”—Marko 6:35. w24.11 16 ¶9-10

Dzilawo mikpe ɖe mia viwo ŋu be woadi mɔnu siwo dzi woato aƒo nu tso Biblia ŋu na amewo. (Rom. 10:10) Dzilawo ate ŋu atsɔ Biblia me nyateƒea gbɔgblɔ na amewo asɔ kple ale si amewo srɔ̃a haƒonuwo ƒoƒo. Le gɔmedzedzea mea, amea asrɔ̃ gbeɖiɖi siwo ƒoƒo le bɔbɔe. Ne ɣeyiɣiawo va le yiyim la, haƒoƒoa anɔ bɔbɔe nɛ. Nenema kee nàte ŋu akpe ɖe viwò sɔhɛ ŋu be wòazã mɔnu siwo le bɔbɔe ne ele eƒe dzixɔsewo me ɖem. Le kpɔɖeŋu me, viwòa ate ŋu abia eƒe sukuhati aɖe be, ‘Ènya be zi geɖea, nu gbagbewo ŋue mɔ̃ɖaŋu ŋuti nunyalawo léa ŋku ɖo tsɔ wɔa wo tɔa? Na matsɔ video nyui aɖe afia wò.’ Ðevia ate ŋu aɖe video siwo nye, Ðe Wowɔea? dometɔ ɖeka nɛ. Eyome wòagblɔ be, ‘Ne míekafua dzɔdzɔmeŋutinunyalawo ɖe nu si wowɔ ta la, ke ame si wɔ esi dzi wokpɔ hafi wɔ wo tɔ ya ɖe?’ Ne ɖevia zã mɔnu sia la, aʋã eƒe sukuhatia wòadi be yeagasrɔ̃ nu geɖe tso Yehowa ŋu. w24.12 19 ¶17-18

Yehowa wɔ ɖoɖo be Yesu natsɔ eƒe agbe axe fe ɖe mía ta atsɔ aɖe mí tso nu vɔ̃ kple ku si me. Gake aleke wòanya wɔ be ame deblibo ɖeka ƒe vɔsa nalé avu ɖe ame miliɔn geɖewo ƒe nu vɔ̃wo ta? Apostolo Paulo ɖe eme ale: “Ale si ko ame ɖeka [Adam] ƒe tomaɖomaɖo na ame geɖewo zu nu vɔ̃ wɔlawoe la, nenema kee to ame ɖeka [Yesu] ƒe toɖoɖo me hã woana ame geɖewo nazu ame dzɔdzɔewo.” (Rom. 5:19; 1 Tim. 2:6) Ne míagblɔe le mɔ bubu nu la, ame deblibo ɖeka ƒe tomaɖomaɖoe wɔe be míeva zu kluvi na nu vɔ̃ kple ku. Eya ta ame deblibo ɖeka ƒe toɖoɖo dzie woato aɖe mí tso nu vɔ̃ kple ku si me. Menye ɖeko Yehowa aɖe mɔ Adam ƒe dzidzimevi siwo nye toɖolawo nanɔ agbe tegbee ko evɔ oa? Ðewohĩ míasusu be esia anye mɔ nyui aɖe si dzi woato akpɔ kuxia gbɔ hafi. Gake esia manye nu dzɔdzɔe le Yehowa ŋkume o, elabe adze abe ke ɖe Yehowa ŋe aɖaba ƒu Adam ƒe nu vɔ̃a dzi eye viawo hã menyi nu vɔ̃ aɖeke kura dome o ene. w25.01 21 ¶3-4