2 Eye Yehowa ƒe dɔla ɖe eɖokui fiae le dzoƒaɖe me le ŋuve aɖe me.+ Esi wòlé ŋku ɖe eŋu la, ekpɔ be ŋuve la le bibim, gake mele fiafiãm o. 3 Eye Mose gblɔ be: “Mayi aɖakpɔ nu wɔnuku sia, ne makpɔ nu si tae ŋuve la mele fiafiãm o.” 4 Esi Yehowa kpɔ be ete va be yeakpɔe ɖa la, Mawu yɔe tso ŋuve la me be: “Mose! Mose!” Eye wòtɔ be: “Nyee nye esi!” 5 Egblɔ nɛ be: “Mègate va afi sia o. Ðe wò afɔkpawo, elabena teƒe si nèle tsitre ɖo la, anyigba kɔkɔe wònye.”

6 Eye wògagblɔ be: “Nyee nye fofowò ƒe Mawu, Abraham ƒe Mawu,+ Isak ƒe Mawu+ kple Yakob ƒe Mawu.”+ Enumake Mose ɣla eƒe ŋkume, elabena ele vɔvɔ̃m na Mawu vavã la kpɔkpɔ. 7 Yehowa gagblɔ be: “Mekpɔ nye dukɔ si le Egipte la ƒe fukpekpe la keŋ, eye mese ɣli si dom wole le ame siwo zia wo dzi be woawɔ dɔ la ta; menya fu siwo kpem wole la nyuie.+ 8 Eya ta maɖi ayi aɖaɖe wo tso Egiptetɔwo si me,+ eye makplɔ wo adzoe le anyigba ma dzi ayi anyigba nyui si keke la dzi, anyigba si dzi notsi kple anyitsi le sisim le,+ si nye Kanaantɔwo, Hititɔwo, Amoritɔwo, Perizitɔwo, Hivitɔwo kple Yebusitɔwo ƒe anyigba.+ 9 Kpɔ ɖa! Israel-viwo ƒe ɣlidodo la va ɖo gbɔnye, eye mekpɔ ale si gbegbe Egiptetɔwo te wo ɖe anyi vevie la hã.+ 10 Eya ta va madɔ wò ɖe Farao gbɔ, ne nàkplɔ nye dukɔ Israel-viwo adzoe le Egipte.”+