2 Fiawo
3 Yehoram,+ Ahab vi, zu fia ɖe Israel dzi le Samaria le Yuda-fia Yehosafat ƒe ƒe wuienyilia me, eye wòɖu fia ƒe wuieve. 2 Ewɔ nu si nye vɔ̃ le Yehowa ŋkume, ɖeko mede fofoa alo dadaa tɔ nu o, elabena eɖe Baal ƒe sɔti si fofoa ɖi la ɖa.+ 3 Ke elé ɖe Yeroboam, Nebat vi, ƒe nu vɔ̃ siwo wòtsɔ he Israel de nu vɔ̃ me+ la ŋu. Meɖe asi le wo ŋu o.
4 Moab-fia Mesa nye alẽnyila, eye wòxea adzɔ si nye alẽ akpe alafa ɖeka kple agbo akpe alafa ɖeka siwo womeko fu na o la na Israel-fia. 5 Esi Ahab nya ku ko la,+ Moab-fia dze aglã ɖe Israel-fia ŋu.+ 6 Eya ta Fia Yehoram ho tso Samaria ɣemaɣi, eye wòƒo Israel ƒe aʋakɔ blibo la nu ƒu. 7 Azɔ hã, edɔ ame ɖo ɖe Yuda-fia Yehosafat gbɔ be: “Moab-fia dze aglã ɖe ŋunye. Àho aʋa kplim ɖe Moab ŋua?” Eɖo eŋu be: “Mayi.+ Nye kpli wò la, ame ɖekae míenye; nye dukɔ la, wò dukɔe; nye sɔwo la, wò sɔwoe.”+ 8 Eye Yehosafat gabia be: “Mɔ kae míato ayi?” Eɖo eŋu be: “Míato Edom gbedzi mɔ.”
9 Ale Israel-fia kple Yuda-fia kpakple Edom-fia+ ho yi. Esi wozɔ mɔ gɔdɔ̃ɔ ŋkeke adre la, tsi aɖeke meli na aʋakɔ la kple aƒemelã siwo le wo ŋu la o. 10 Eye Israel-fia gblɔ be: “Ewɔ nublanui ŋutɔ be Yehowa yɔ fia etɔ̃ siawo be yeatsɔ wo ade asi na Moab!” 11 Ke Yehosafat bia be: “Ðe Yehowa ƒe nyagblɔɖila aɖeke mele afi sia ne míabia gbe Yehowa to edzi oa?”+ Eye Israel-fia ƒe dɔlawo dometɔ ɖeka ɖo eŋu be: “Elisa,+ Safat vi, si dea tsi asi na Eliya,*+ le afi sia.” 12 Eye Yehosafat gblɔ be: “Yehowa ƒe gbe le esi.” Eya ta Israel-fia kple Yehosafat kpakple Edom-fia yi egbɔ.
13 Eye Elisa gblɔ na Israel-fia be: “Nya kae le nye kpli wò dome?+ Yi fofowò ƒe nyagblɔɖilawo kple dawò ƒe nyagblɔɖilawo gbɔ.”+ Ke Israel-fia la gblɔ nɛ be: “Gbeɖe, elabena ɖe Yehowa yɔ fia etɔ̃ siawo be yeatsɔ wo ade asi na Moab.” 14 Elisa gblɔ be: “Zi ale si aʋakɔwo ƒe Yehowa, ame si mesubɔna,* le agbe la, ne menye Yuda-fia Yehosafat+ ƒe ŋkumee mesi ɖa o la, anye ne nyemanyè kɔ akpɔ wò gɔ̃ hã o.+ 15 Azɔ mikplɔ kasaŋkuƒola*+ aɖe vɛ nam.” Esi kasaŋkuƒola la te saŋkua ƒoƒo ko la, Yehowa ƒe asi va Elisa dzi.+ 16 Eye wògblɔ be, “Ale Yehowa gblɔe nye esi: ‘Miɖe ʋewo ɖe tɔʋu sia me keŋ; 17 elabena ale Yehowa gblɔe nye esi: “Miele yaƒoƒo alo tsidzadza aɖeke kpɔ ge o; ke tsi ayɔ tɔʋu sia me fũu,+ eye miano eme tsi, miawo ŋutɔwo kple miaƒe nyihawo kpakple miaƒe lãha bubuwo.”’ 18 Gake nu tsɛ aɖe koe esia anye le Yehowa ŋkume,+ elabena atsɔ Moab hã ade asi na mi.+ 19 Miasi du sesẽwo katã+ kple du veviwo katã, mialã ati nyuiwo katã aƒu anyi, miaxe tsidzɔƒewo katã, eye miatsɔ kpe agblẽ anyigba nyuiwo katã.”+
20 Le ŋufɔke ƒe ŋdi, esi nuɖuvɔsaɣi+ ɖo la, kasia, tsi tso Edom lɔƒo va yɔ anyigba la dzi fũu.
21 Esi Moab blibo la se be fiawo ho va aʋa wɔ ge kpli yewo la, woƒo ŋutsu siwo katã ate ŋu ayi aʋa* la nu ƒu, eye wova tɔ ɖe liƒo la dzi. 22 Esi wofɔ ŋdi kanya la, ɣe klẽ ɖe tsi la dzi, eye Moabtɔ siwo le go kemɛ dzi la kpɔ tsi la wòbiã abe ʋu ene. 23 Eye wogblɔ be: “Ʋue! Fiaawo wu wo nɔewo kple yi. Eya ta Moab, yi ɖaha aboyonuwo!”+ 24 Esi wova Israel ƒe asaɖa la me la, Israel-viwo tso hede asi Moabtɔwo wuwu me, ale be wosi le wo nu.+ Wonya wo ɖe enu yi Moab, eye wonɔ Moabtɔwo wum nɔ yiyim. 25 Wogbã duawo, eye wo dometɔ ɖe sia ɖe fɔ kpe ƒu gbe ɖe anyigba nyuiwo katã dzi taŋtaŋ; woxe tsidzɔƒewo katã,+ wolã ati nyuiwo katã.+ Negbe Kir-Hareset+ ƒe kpegliwo koe susɔ eye akafodalawo va ɖe to ɖe dua hegbãe ƒu anyi.
26 Esi Moab-fia kpɔ be aʋa la mekpa ye o la, eɖe ŋutsu alafa adre siwo ta yi la kpe ɖe eɖokui ŋu be yeato futɔawo dome asi ayi Edom-fia+ gbɔ; ke womete ŋui o. 27 Eya ta elé eƒe ŋgɔgbeviŋutsu si aɖu fia ɖe eyome la tsɔ sa numevɔe+ ɖe glia dzi. Eye dukɔa do dɔmedzoe ɖe Israel ŋu vevie, ale woho dzo le egbɔ hetrɔ yi woƒe anyigba dzi.