2 Fiawo
21 Manase+ xɔ ƒe wuieve esime wòzu fia, eye wòɖu fia ƒe blaatɔ̃ vɔ atɔ̃ le Yerusalem.+ Dadaa ŋkɔe nye Hefziba. 2 Ewɔ nu si nye vɔ̃ le Yehowa ŋkume, edze dukɔ siwo Yehowa nya le Israel-viwo ŋgɔ+ la ƒe ŋunyɔnuwo yome.+ 3 Egbugbɔ nuxeƒe siwo dome fofoa Hizkiya gblẽ la tu,+ eɖi vɔsamlekpuiwo na Baal, eye wòwɔ Asera,*+ abe ale si tututu Israel-fia Ahab wɔ ene.+ Eye wòde ta agu na dziƒonuwo* katã hesubɔ wo.+ 4 Eɖi vɔsamlekpuiwo ɖe Yehowa ƒe aƒe,+ si ŋu Yehowa gblɔ le be, “Matsɔ nye ŋkɔ aɖo Yerusalem” la hã me.+ 5 Eɖi vɔsamlekpuiwo na dziƒonuwo katã,+ le Yehowa ƒe aƒe la ƒe xɔxɔnu eveawo.+ 6 Ena eya ŋutɔ viawo to dzo me; ewɔ akunya hebia nu ta se,+ eye wòɖo ŋɔliyɔlawo kple nukalawo.+ Ewɔ nu vɔ̃ɖi geɖe le Yehowa ŋkume tsɔ do dziku nɛ.
7 Etsɔ Asera*+ ƒe legba si wòwɔ la da ɖe aƒe la me, aƒe si ŋu Yehowa gblɔ le na David kple via Salomo be: “Aƒe sia me kple Yerusalem, si metia le Israel-toawo katã dome, ye matsɔ nye ŋkɔ aɖo tegbee.+ 8 Eye nyemagana Israel ƒe afɔ natsa tsaglãla le anyigba si metsɔ na wo tɔgbuiwo la dzi gbeɖe o,+ ne wonya wɔ nu siwo katã ƒe se mede na wo,+ Se siwo katã nye subɔla Mose de na wo la dzi pɛpɛpɛ ko.” 9 Ke womeɖo to o, eye Manase ble wo wowɔ nu vɔ̃ɖi wu dukɔ siwo Yehowa tsrɔ̃ ɖa le Israel-viwo ŋgɔ.+
10 Yehowa to eƒe subɔla nyagblɔɖilawo dzi+ gblɔ na wo enuenu be: 11 “Yuda-fia Manase wɔ ŋunyɔnu siawo katã; ewɔ nu wòvɔ̃ɖi wu nu siwo katã Amoritɔ+ siwo do ŋgɔ nɛ la wɔ,+ eye wòto eƒe legba nyɔŋuwo* dzi na Yuda wɔ nu vɔ̃. 12 Eya ta ale Yehowa, Israel ƒe Mawu la, gblɔe nye esi: ‘Kpɔ ɖa, mehe vɔ̃ gbɔna Yerusalem+ kple Yuda dzi, eye ame sia ame si asee la ƒe towo kple eve me aɖi yeŋ.+ 13 Mada dzidzeka+ si woda ɖe Samaria+ ŋu kple sɔsɔmedzidzenu* si wozã ɖe Ahab ƒe aƒe ŋu,+ la ɖe Yerusalem ŋu, matutu Yerusalem abe ale si wotutua agba me tsɔ bua anyi ene.+ 14 Magbe nu le nye domenyinu ƒe susɔea gbɔ+ ahatsɔ wo ade asi na woƒe futɔwo, eye woazu aboyonu kple nuhaha na woƒe futɔwo katã,+ 15 elabena wowɔ nu si nye vɔ̃ le ŋkunyeme, eye wole dziku dom nam tso gbe si gbe wo tɔgbuiwo dzo le Egipte va se ɖe egbe sia.’”+
16 Manase kɔ ʋu maɖifɔ geɖe ŋutɔ hã ɖi, wòyɔ Yerusalem tso eƒe go ɖeka me va se ɖe go kemɛ me+ hekpe ɖe eƒe nu vɔ̃ si wòtsɔ he Yuda de nu vɔ̃ me ale be wowɔ nu si nye vɔ̃ le Yehowa ŋkume la ŋuti. 17 Ke Manase ŋutinya susɔeawo kple nu siwo katã wòwɔ kpakple eƒe nu vɔ̃ si wòwɔ la, woŋlɔ wo ɖe Yuda-fiawo ƒe ŋutinyagbalẽ me. 18 Eye wotsɔ Manase mlɔ tɔgbuiawo gbɔ, woɖii ɖe eƒe aƒe ƒe abɔ la me, le Uza+ ƒe abɔ la me; eye via Amon zu fia ɖe eteƒe.
19 Amon+ xɔ ƒe blaeve vɔ eve esime wòzu fia, eye wòɖu fia ƒe eve le Yerusalem.+ Dadaa ŋkɔe nye Mesulemet, Haruz si tso Yotba ƒe vinyɔnu. 20 Ewɔ nu si nye vɔ̃ le Yehowa ŋkume abe ale si tututu fofoa Manase wɔ ene.+ 21 Eto mɔ si fofoa to la pɛpɛpɛ, eye wòsubɔ legba nyɔŋu siwo fofoa subɔ la hede ta agu na wo.+ 22 Ale wògblẽ Yehowa, tɔgbuiawo ƒe Mawu la ɖi, eye meto Yehowa ƒe mɔ o.+ 23 Mlɔeba Amon ƒe dɔlawo ɖo nugbe ɖe eŋu, eye wowu fia la le eya ŋutɔ ƒe me. 24 Gake dukɔ la me tɔwo wu ame siwo katã ɖo nugbe ɖe Fia Amon ŋu, eye wotsɔ via Yosiya ɖo fiae ɖe eteƒe.+ 25 Ke Amon ŋutinya susɔeawo kple nu siwo wòwɔ la, woŋlɔ wo ɖe Yuda-fiawo ƒe ŋutinyagbalẽ me. 26 Eye woɖii ɖe eƒe yɔdo me le Uza+ ƒe abɔ la me, eye via Yosiya+ zu fia ɖe eteƒe.