Yosua

14 Ke esiae nye domenyinu si Israel-viwo xɔ le Kanaan-nyigba dzi, si nunɔla Eleazar kple Yosua, Nun vi, kpakple Israel-viwo ƒe tatɔ siwo le wo fofowo ƒe aƒekɔwo nu la na wo.+ 2 Wodzidze nu+ hafi mae na to asieke kple afã la, abe ale si ko Yehowa de se to Mose dzi ene.+ 3 Elabena Mose na domenyinu to eve kple afã kemɛawo ɖe Yordan+ ƒe go kemɛ* dzi, ke mena domenyinu Lewi viwo le wo dome o.+ 4 Elabena wobu Yosef ƒe dzidzimeviwo to eve,+ woawoe nye Manase kple Efrayim;+ eye womena gome Lewi viwo le anyigba la dzi o, negbe du+ siwo me woanɔ kple wo ŋu lãnyiƒewo hena woƒe lãwo nyinyi kple woƒe nunɔamesiwo ko.+ 5 Israel-viwo ma anyigba la abe ale si tututu Yehowa de se na Mose ene.

6 Azɔ Yuda viwo va Yosua gbɔ le Gilgal,+ eye Kaleb,+ Yefune vi, si nye Kenizitɔ la, gblɔ nɛ be: “Ènya nya si Yehowa gblɔ+ na Mawu vavã la ƒe ame Mose+ le nye kpli wò ŋu le Kades-Barnea+ la nyuie. 7 Mexɔ ƒe blaene esime Yehowa ƒe subɔla Mose dɔm tso Kades-Barnea be mayi aɖatsa ŋku le anyigba la dzi,+ eye meva gblɔ nu siwo mekpɔ la tututu nɛ.+ 8 Togbɔ be nɔvinye siwo yi kplim la ɖe dzi le dukɔ la ƒo* hã la, nye ya medze Yehowa nye Mawu yome kple dzi blibo.+ 9 Mose ka atam gbe ma gbe gblɔ be: ‘Anyigba si dzi nèɖo afɔe la, azu wò kple viwòwo ƒe domenyinu ɖaa, elabena èdze Yehowa nye Mawu la yome kple dzi blibo.’+ 10 Azɔ Yehowa na mekpɔtɔ le agbe,+ abe ale si tututu wòdo ŋugbee+ ene, ƒe blaene vɔ atɔ̃e nye esia tso esime Yehowa do ŋugbe sia na Mose esime Israel zɔ gbea dzi,+ mekpɔtɔ le agbe, eye mexɔ ƒe blaenyi vɔ atɔ̃. 11 Gake ŋusẽ gale ŋunye egbea abe ale si wònɔ gbe si gbe Mose dɔm ene. Ŋusẽ gakpɔtɔ le ŋunye egbea mate ŋu awɔ aʋa kple nu bubuwo abe ɣemaɣi ene. 12 Eya ta tsɔ tonuto si ŋugbe Yehowa do gbe ma gbe la nam. Togbɔ be èsee gbe ma gbe be Anakitɔ+ siwo le du gã sesẽwo+ me la le afi ma hã la, Yehowa anɔ kplim godoo,*+ eye manya wo ɖa,* abe ale si tututu Yehowa do ŋugbee ene.”+

13 Ale Yosua yrae, eye wòtsɔ Hebron na Kaleb, Yefune vi la, be wòanye eƒe domenyinu.+ 14 Esia tae Hebron zu Kaleb, Yefune vi, si nye Kenizitɔ la tɔ eye wònye eƒe domenyinu va se ɖe egbe, elabena edze Yehowa, Israel ƒe Mawu la, yome kple dzi blibo.+ 15 Tsã la, woyɔa Hebron be Kiriat-Arba,+ (Arba siae nye ame si xɔ ŋkɔ wu le Anakitɔwo dome). Eye anyigba la kpɔ gbɔdzɔe tso aʋawɔwɔ me.+