Yuda

1 Yuda, Yesu Kristo ƒe kluvi, ame si nye Yakobo+ nɔvi, le esia ŋlɔm ɖo ɖe ame siwo woyɔ,+ siwo Mawu Fofo la lɔ̃, eye wòkpɔ wo ta na Yesu Kristo:+

2 Nublanuikpɔkpɔ kple ŋutifafa kpakple lɔlɔ̃ nadzi ɖe edzi na mi.

3 Lɔlɔ̃tɔwo, togbɔ be menɔ agbagba dzem vevie be maŋlɔ xɔxɔ si mí katã míakpɔ ŋu nya ɖo ɖe mi hã la,+ mekpɔe be ehiã be maŋlɔ agbalẽ na mi atsɔ axlɔ̃ nu mi be miaʋli sesĩe hena xɔse+ si wotsɔ na ame kɔkɔewo zi ɖeka ɖe ɣeyiɣiawo katã nu la boŋ. 4 Susu si tae nye be, ame aɖewo va tra ɖe mia dome dzaa, ame siwo Ŋɔŋlɔawo ɖo ɖi hena ʋɔnudɔdrɔ̃ sia ɣeyiɣi didi aɖee nye esia; wonye ame mavɔ̃mawuwo, ame siwo trɔa mía Mawu ƒe amenuveve la wòzua mɔɖeɖe ɖe ŋukpenanuwɔwɔ dzimesesẽtɔe*+ ŋu, eye womewɔa nuteƒe na míaƒe Aƒetɔ ɖeka kolia, si nye Yesu Kristo, ame si tɔ míenye la o.+

5 Togbɔ be mienya nu siawo katã nyuie hã la, medi be magaɖo ŋku edzi na mi be Yehowa* ɖe dukɔ aɖe tso Egipte-nyigba dzi,+ gake emegbe etsrɔ̃ ame siwo meɖe xɔse fia o la.+ 6 Eye mawudɔla siwo menɔ afi si woda wo ɖo le gɔmedzedzea me o, ke boŋ wogblẽ woawo ŋutɔwo ƒe nɔƒe ɖi la,+ ede kɔsɔkɔsɔ mavɔwo wo, eye wòdzra wo ɖo ɖe viviti tsiɖitsiɖi me hena ŋkeke gã la ƒe ʋɔnudɔdrɔ̃.+ 7 Nenema kee Sodom kple Gomora kpakple du siwo ƒo xlã wo hã ƒo wo ɖokuiwo ɖe gbɔdɔdɔ manɔsenu* me wògbɔ eme, eye wodze ŋutilã ƒe nudzodzro si mele dzɔdzɔme nu o la yome;+ wotsɔ wo wɔ nuxlɔ̃amekpɔɖeŋu na mí, esi wotsɔ dzo mavɔ he to na woe.+

8 Ke hã, ame siawo hã kua drɔ̃e, woƒoa ɖi ŋutilã la, wodoa vlo ŋusẽ si ɖua wo dzi la, eye woƒoa nu gbegblẽ tso ŋutikɔkɔemewo ŋu.+ 9 Ke esi nya ɖo mawudɔla gãtɔ+ Mikael+ kple Abosam dome, eye wòle nya hem kplii le Mose ƒe kukua+ ŋu la, mete kpɔ be yeagblɔ nya vlo aɖeke atsɔ abu fɔe o,+ ke boŋ egblɔ be: “Yehowa* neka mo na wò.”+ 10 Gake ame siawo le nu gbegblẽ ƒom le nu siwo katã gɔme womese ŋutɔŋutɔ o la ŋu.+ Ke le nu siwo katã gɔme wose le dzɔdzɔme nu abe lã manyanuwo ene me la,+ woyi edzi le nu gblẽm le wo ɖokuiwo ŋu.

11 Baba na wo, elabena woto Kain+ ƒe ʋe me, eye woƒu du dze Bileam+ ƒe mɔ vɔ̃ɖi la dzi hena fetu, eye wotsrɔ̃ le Kora+ ƒe nuƒoƒo aglãdzedzetɔe+ la me! 12 Ame siawoe nye agakpe siwo ɣla ɖe tɔ gɔme, siwo le nu ɖum kpli mi le miaƒe lɔlɔ̃kplɔ̃ɖoɖowo me,+ alẽkplɔla siwo nyia wo ɖokuiwo vɔvɔ̃manɔmee;+ alilikpo siwo me tsi mele o, siwo ya lɔna yina gbɔnae;+ ati siwo li va se ɖe kele ƒe nuwuwu, gake wometsea ku o, woku zi eve,* eye woho wo; 13 wonye ƒutsotsoe dzeagbo siwo kplɔa woawo ŋutɔwo ƒe ŋukpenanuwo ƒe futukpɔ va kɔna ɖe gota;+ ɣletivi siwo mezɔna ɖe ɖoɖo aɖeke nu o, siwo wodzra viviti tsiɖitsiɖi ɖo ɖi na tegbee.+

14 Ɛ̃, Enok,+ ame si nye adrelia tso Adam dzi, hã gblɔ nya ɖi tso wo ŋu, esi wògblɔ be: “Kpɔ ɖa! Yehowa* va kple eƒe ame kɔkɔe akpeakpewo,+ 15 be yeadrɔ̃ ʋɔnu wo katã,+ eye yeabu fɔ ame mavɔ̃mawuwo katã le woƒe mawumavɔmavɔ̃nu siwo wowɔ le mawumavɔmavɔ̃ me, kple nya baɖa siwo katã nu vɔ̃ wɔla mavɔ̃mawuwo gblɔ tso eŋu la ta.”+

16 Ame siawo nye liʋiliʋĩlĩlawo,+ ame siwo toa nyatoƒoe le esi nu medzea wo ŋu o ta, ame siwo zɔna le woawo ŋutɔwo ƒe nudzodzrowo nu,+ wotsɔa woƒe nu ƒoa adegbe gãwo, eye wodoa vivi ɖe amewo ŋu le woawo ŋutɔwo ƒe viɖe kpɔkpɔ ta.+

17 Ke miawo la, lɔlɔ̃tɔwo, miɖo ŋku nya siwo mía Aƒetɔ Yesu Kristo ƒe apostolowo gblɔ do ŋgɔ la dzi, 18 ale si wonɔ gbɔgblɔm na mi be: “Le ɣeyiɣi mamlɛa me la, fewuɖulawo ava, ame siwo ati woawo ŋutɔwo ƒe mawumavɔmavɔ̃ ƒe nudzodzrowo yome.”+ 19 Ame siawoe dea mama amewo me,+ ame siwo le abe lãwo ene,* siwo mebua gbɔgbɔmenuwo* ŋu o. 20 Ke miawo la, lɔlɔ̃tɔwo, mitu mia ɖokuiwo ɖo ɖe miaƒe xɔse kɔkɔetɔ la dzi, mido gbe ɖa le gbɔgbɔ kɔkɔe me,+ 21 eye minɔ Mawu ƒe lɔlɔ̃ la me ɖaa,+ esi miele mía Aƒetɔ Yesu Kristo ƒe nublanuikpɔkpɔ lalam hena agbe mavɔ kpɔkpɔ.+ 22 Azɔ hã, miyi edzi mianɔ nublanui kpɔm+ na ame siwo me ɖikekewo le;+ 23 mihe wo do goe tso dzo la me ne miaxɔ wo ɖe agbe.+ Ke miyi edzi miakpɔ nublanui na ame bubuwo, eye miwɔ esia kple vɔvɔ̃, eye milé fu woƒe awu si ŋutilã la ƒo ɖii la gɔ̃ hã.+

24 Ke ame si ate ŋu adzɔ mia ŋu be miagakli nu o, eye wòana mianɔ te anye mokakamanɔŋutɔwo+ le eƒe ŋutikɔkɔe la ŋkume le dzidzɔ gã me, 25 Mawu ɖeka kolia, si nye mía Xɔla to Yesu Kristo, mía Aƒetɔ dzi la, tɔ nanye ŋutikɔkɔe, gãnyenye, ŋusẽ kple dziɖuɖu tso ɣeyiɣi mavɔmavɔ siwo va yi kple fifia, heyi ɖe mavɔmavɔ me. Amen.