Ezekiel

20 Le ƒe adrelia ƒe ɣleti atɔ̃lia ƒe ŋkeke ewolia dzi la, Israel ƒe ametsitsi aɖewo va bɔbɔ nɔ ŋkunyeme be yewoabia gbe Yehowa. 2 Eye Yehowa ƒe gbe va nam be: 3 “Amegbetɔvi, ƒo nu kple Israel ƒe ametsitsiawo eye nàgblɔ na wo be, ‘Ale Aƒetɔ Dziɖulagã Yehowa gblɔe nye esi: “Ðe mieva gbe bia gema? ‘Zi ale si mele agbe la, nyemaɖo miaƒe nyawo ŋu na mi o,’+ Aƒetɔ Dziɖulagã Yehowa ye gblɔe.”’

4 “Amegbetɔvi, èle klalo adrɔ̃ ʋɔnu woa? Èle klalo adrɔ̃ ʋɔnu woa? Na woanya ŋunyɔnu siwo wo tɔgbuiwo wɔ.+ 5 Gblɔ na wo be, ‘Ale Aƒetɔ Dziɖulagã Yehowa gblɔe nye esi: “Gbe si gbe metia Israel la,+ meka atam* hã na Yakob ƒe aƒe la ƒe dzidzimeviwo, eye meɖe ɖokuinye fia wo le Egipte-nyigba dzi.+ Meka atam na wo be, ‘Nyee nye Yehowa mia Mawu.’ 6 Gbe ma gbe meka atam be, makplɔ wo adzoe le Egipte-nyigba dzi ayi anyigba aɖe si medi da ɖi* na wo la dzi, afi si notsi kple anyitsi le sisim le.+ Enye anyigba si nya kpɔ* wu anyigbawo katã. 7 Eye megblɔ na wo be: ‘Mia dometɔ ɖe sia ɖe netsɔ ŋunyɔnu siwo le eƒe ŋkuta la ƒu gbe; migatsɔ Egipte ƒe legba nyɔŋuwo* gblẽ kɔ ɖo na mia ɖokuiwo o.+ Nyee nye Yehowa mia Mawu.’+

8 “‘“Gake wodze aglã ɖe ŋunye, eye wogbe toɖoɖom. Wometsɔ ŋunyɔnu siwo le woƒe ŋkuta la ƒu gbe o, eye womegbe nu le Egipte ƒe legba nyɔŋuawo gbɔ o.+ Eya ta meɖoe be matrɔ nye dɔmedzoe akɔ ɖe wo dzi, ne maɖe nye dziku blibo la ɖe wo ŋu le Egipte-nyigba dzi. 9 Ke melé ɖokuinye le nye ŋkɔ la ta, ne woagaƒo ɖii le dukɔ siwo dome wole la ŋkume o.+ Elabena meɖe ɖokuinye fia wo* le dukɔ siawo ŋkume esime mekplɔ wo* tso Egipte-nyigba dzi.+ 10 Ale mekplɔ wo tso Egipte-nyigba dzi va gbea dzi.+

11 “‘“Mena nye sewo wo, eye mena wonya nye ʋɔnudrɔ̃ɖoɖowo,+ ale be ame si wɔa wo dzi la nanɔ agbe.+ 12 Metsɔ nye sabatwo hã na wo+ be wòanye dzesi le nye kpli wo dome,+ ne woadze sii be, nye Yehowae kɔ wo ŋu.

13 “‘“Ke Israel ƒe aƒe la dze aglã ɖe ŋunye le gbea dzi.+ Womezɔ ɖe nye ɖoɖowo nu o, eye wogbe nye afiatsotso, siwo dzi ne ame wɔ ɖo la, wòanɔ agbe la. Wogblẽ kɔ ɖo na nye sabatwo hã keŋ. Eya ta meɖoe be matrɔ nye dɔmedzoe aƒo ɖe wo dzi le gbea dzi ahatsrɔ̃ wo ɖa keŋkeŋ.+ 14 Nye ŋkɔ la ta mewɔe ɖo, ne woagaƒo ɖii le dukɔ siwo ŋkume mekplɔ wo* dzoe le la ŋkume o.+ 15 Eye meka atam hã na wo le gbea dzi be, nyemakplɔ wo ava anyigba si mebe matsɔ ana wo,+ si dzi notsi kple anyitsi le sisim le,+ anyigba si nya kpɔ* wu anyigbawo katã, la dzi o, 16 elabena wogbe nye afiatsotsowo, womezɔ le nye ɖoɖowo nu o, eye wogblẽ kɔ ɖo na nye sabatwo, elabena woƒe dzi dze woƒe legba nyɔŋuwo yome.+

17 “‘“Ke woƒe nu wɔ nublanui nam,* eye nyemetsrɔ̃ wo o; nyemeɖe wo ɖa keŋkeŋ le gbea dzi o. 18 Eye megblɔ na wo viwo le gbea dzi be,+ ‘Migazɔ le mia tɔgbuiwo ƒe ɖoɖowo nu o,+ migalé woƒe sewo me ɖe asi o, eye migatsɔ woƒe legba nyɔŋuwo gblẽ kɔ ɖo na mia ɖokuiwo o. 19 Nyee nye Yehowa mia Mawu. Mizɔ le nye ɖoɖowo nu, eye milé nye afiatsotsowo me ɖe asi, eye miwɔ wo dzi.+ 20 Mikɔ nye sabatwo ŋu+ ne woanye dzesi le nye kpli mi dome, ne miadze sii be, nyee nye Yehowa mia Mawu.’+

21 “‘“Ke wo viwo dze aglã ɖe ŋunye.+ Womezɔ le nye ɖoɖowo nu o, eye womelé nye afiatsotsowo me ɖe asi hewɔ wo dzi o, evɔ wònye ne ame wɔ wo dzi la, anɔ agbe hafi. Wogblẽ kɔ ɖo na nye sabatwo. Eya ta meɖoe be matrɔ nye dɔmedzoe aƒo ɖe wo dzi, ne maɖe nye dziku bliboa ɖe wo ŋu le gbea dzi.+ 22 Ke melé ɖokuinye+ le nye ŋkɔ la ta,+ ne woagaƒo ɖii le dukɔ siwo ŋkume mekplɔ wo* dzoe le la ŋkume o. 23 Azɔ hã, meka atam na wo le gbea dzi be, makaka wo ɖe dukɔwo dome, eye maka wo ahlẽ ɖe anyigbawo dzi,+ 24 elabena womewɔ nye afiatsotsowo dzi o, wogbe nye ɖoɖowo,+ wogblẽ kɔ ɖo na nye sabatwo, eye wodze* wo tɔgbuiwo ƒe legba nyɔŋuwo yome.+ 25 Meɖe mɔ hã wodze ɖoɖo gbegblẽwo kple se siwo mate ŋu ana agbe wo o la yome.+ 26 Mena wotsɔ woƒe vɔsanuwo gblẽ kɔ ɖo na wo ɖokuiwo, esime wona woƒe ŋgɔgbeviwo katã to dzo me,+ ale be matu nu kpli wo, ne woadze sii be, nyee nye Yehowa.”’

27 “Eya ta amegbetɔvi, ƒo nu kple Israel ƒe aƒe la eye nàgblɔ na wo be, ‘Ale Aƒetɔ Dziɖulagã Yehowa gblɔe nye esi: “Mia tɔgbuiwo gblɔ busunya ɖe ŋunye esi womewɔ nuteƒe nam o. 28 Mekplɔ wo va anyigba si meka atam be matsɔ ana wo la dzi.+ Esi wokpɔ togbɛ kɔkɔwo kple ati dodowo katã la,+ wotsɔ woƒe vɔsanuwo kple nunana kudzinamewo sa vɔe. Wodo dzudzɔ ʋeʋĩwo* heƒo woƒe nunovɔsawo ɖi le afi ma. 29 Eya ta mebia wo be, ‘Nu ka koŋue nuxeƒe si mieyina la nye na mi? (Wogayɔnɛ be Nuxeƒe va se ɖe egbe sia.)’”’+

30 “Azɔ gblɔ na Israel ƒe aƒe la be, ‘Ale Aƒetɔ Dziɖulagã Yehowa gblɔe nye esi: “Ðe miedze mia tɔgbuiwo ƒe legba nyɔŋuwo yome hewɔ gbɔgbɔmehasi kpli wo tsɔ le kɔ gblẽm ɖo na mia ɖokuiwo abe ale si mia tɔgbuiwo wɔe enea?+ 31 Ðe miekpɔtɔ le vɔ sam na miaƒe legba nyɔŋuawo katã, eye mietɔ dzo mia viwo tsɔ le kɔ gblẽm ɖo na mia ɖokuiwo va se ɖe egbe sia?+ Ekema ɖe maɖo miaƒe nyawo ŋu na mia, Oo Israel ƒe aƒe?”’+

“Aƒetɔ Dziɖulagã Yehowa be, ‘Zi ale si mele agbe la, nyemaɖo miaƒe nya ŋu na mi o.+ 32 Nu si le tame na mi esime miegblɔ be: “Mina míanɔ abe dukɔwo ene, abe anyigba bubu dzi ƒomeawo ene, ne míade ta agu na* ati kple kpe”+ la mava eme gbeɖe o.’”

33 “Aƒetɔ Dziɖulagã Yehowa be, ‘Zi ale si mele agbe la, asi sesẽ kple alɔ si medo ɖa kpakple dɔmedzoe si metrɔ ƒo ɖi ye matsɔ aɖu fia ɖe mia dzi.+ 34 Matsɔ asi sesẽ kple alɔ si medo ɖa kpakple dɔmedzoe si metrɔ ƒo ɖi la akplɔ mi tso dukɔwo dome, eye maƒo mia nu ƒu tso anyigba siwo dzi miekaka ɖo la dzi.+ 35 Makplɔ mi ayi dukɔwo ƒe gbedzi, eye madrɔ̃ ʋɔnu mi le afi ma ŋkume kple ŋkume.’+

36 “Aƒetɔ Dziɖulagã Yehowa be, ‘Ale si ko medrɔ̃ ʋɔnu mia tɔgbuiwo le Egipte gbedzi la, nenemae madrɔ̃ ʋɔnu miawo hã. 37 Mana miato lãkplɔti+ te ava yi, eye makplɔ mi ade nubabla ƒe se te.* 38 Gake maɖe ame dzeaglãwo kple ame siwo da vo ɖe ŋunye la ɖa le mia dome.+ Makplɔ wo tso anyigba si dzi wonye amedzrowo le la dzi, ke womava Israel-nyigba dzi o;+ ne miadze sii be, nyee nye Yehowa.’

39 “Oo Israel ƒe aƒe, ale Aƒetɔ Dziɖulagã Yehowa gblɔe nye esi: ‘Mia dometɔ ɖe sia ɖe neyi ɖasubɔ eƒe legba nyɔŋuwo ko.+ Ke emegbe ne mieɖo tom o la, miagate ŋu atsɔ miaƒe vɔsanuwo kple miaƒe legba nyɔŋuwo aƒo ɖi nye ŋkɔ kɔkɔe la azɔ o.’+

40 “‘Elabena nye to kɔkɔe, Israel ƒe to kɔkɔ la,+ dzie Israel ƒe aƒe blibo la asubɔm le, le anyigba la dzi,’+ Aƒetɔ Dziɖulagã Yehowa ye gblɔe. ‘Miaƒe nu adze ŋunye le afi ma, eye mabia miaƒe nudzɔdzɔwo kple miaƒe vɔsanu gbãtɔ, siwo anye miaƒe nu kɔkɔewo katã la, le afi ma.+ 41 Miaƒe nu adze ŋunye le miaƒe dzudzɔ ʋeʋĩ* la ta, ne mekplɔ mi tso dukɔwo dome, eye meƒo mia nu ƒu tso anyigba siwo dzi mieka hlẽ ɖo la dzi,+ eye makɔ ɖokuinye ŋu le mia dome le dukɔwo ŋkume.’+

42 “‘Eye miadze sii be, nyee nye Yehowa+ ne mekplɔ mi va Israel-nyigba,+ anyigba si meka atam be matsɔ ana mia tɔgbuiwo la dzi. 43 Miaɖo ŋku miaƒe zɔzɔme kple miaƒe nuwɔna siwo katã mietsɔ gblẽ kɔ ɖo na mia ɖokuiwo la dzi+ le afi ma, eye mianyɔ ŋu na mia ɖokuiwo* le nu vɔ̃ɖi siwo katã miewɔ la ta.+ 44 Ekema Israel ƒe aƒe, miadze sii be nyee nye Yehowa, ne mewɔ nu ɖe mia ŋu le nye ŋkɔ la ta,+ ke menye le miaƒe zɔzɔme vɔ̃ɖiwo alo miaƒe nuwɔna gbegblẽawo ta o,’ Aƒetɔ Dziɖulagã Yehowa ye gblɔe.”

45 Eye Yehowa ƒe gbe gava nam be: 46 “Amegbetɔvi, trɔ mo ɖo ɖe anyiehe gome, eye nàgblɔ nya ɖe anyiehe ŋu, eye nàgblɔ nya ɖi ɖe anyiehenyigba ƒe ave la ŋuti. 47 Gblɔ na anyieheve la be, ‘Se Yehowa ƒe nya. Ale Aƒetɔ Dziɖulagã Yehowa gblɔe nye esi: “Kpɔ ɖa, mele dzo do ge ɖe ŋuwò,+ eye wòafiã ati mumuwo katã kple ati ƒuƒuwo katã le mewò. Womatsi dzo si le bibim la o,+ eye mowo katã afiã tso anyiehe va se ɖe dziehe. 48 Ŋutilãwo* katã akpɔe be nye, Yehowa, ye tɔ dzoe, eye womate ŋu atsii o.”’”+

49 Eye megblɔ be: “Ao, Aƒetɔ Dziɖulagã Yehowa! Wole gbɔgblɔm le ŋunye be: ‘Menye adzo ko wòtona oa?’”