2 Fiawo
16 Le Peka, Remaliya vi, ƒe ƒe wuiadrelia me la, Ahaz,+ Yuda-fia Yotam vi, zu fia. 2 Ahaz xɔ ƒe blaeve esime wòzu fia, eye wòɖu fia ƒe wuiade le Yerusalem. Mewɔ nu si le dzɔdzɔe le Yehowa eƒe Mawu la ŋkume abe tɔgbuia David ene o.+ 3 Ke boŋ eto Israel-fiawo ƒe ʋe me,+ eye wòna eya ŋutɔ via gɔ̃ hã to dzo me+ le dukɔ siwo Yehowa nya le Israel-viwo ŋgɔ la ƒe ŋunyɔnuwo nu.+ 4 Azɔ hã esa vɔ hedo dzudzɔ edziedzi le nuxeƒewo+ kple togbɛwo dzi kpakple ati damawo katã te.+
5 Ɣemaɣie Siria-fia Rezin kple Israel-fia Peka, Remaliya vi, ho aʋa ɖe Yerusalem ŋu,+ eye woɖe to ɖe Ahaz, ke womete ŋu xɔ du la o. 6 Ɣemaɣi Siria-fia Rezin gbugbɔ xɔ Elat+ na Edom, eye wònya Yudatɔwo ɖa le Elat. Eye Edomtɔwo va Elat hetsi afi ma va se ɖe egbe sia. 7 Eye Ahaz dɔ amewo ɖo ɖe Asiria-fia Tiglat-Pileser+ be: “Wò dɔla kple viwò menye. Va ɖem tso Siria-fia kple Israel-fia, siwo tso ɖe ŋunye la, si me.” 8 Eye Ahaz tsɔ klosalo kple sika siwo le Yehowa ƒe aƒe la me kple esiwo le fia ƒe aƒe* ƒe kesinɔnudzraɖoƒe tsɔ wɔ zãnu+ ɖo ɖe Asiria-fia. 9 Ale Asiria-fia ɖo toe, eye Asiria-fia ho yi Damasko hexɔe, eɖe aboyo emenɔlawo yi Kir,+ eye wòwu Rezin.+
10 Eye Fia Ahaz yi Damasko be yeaɖado go Asiria-fia Tiglat-Pileser. Esi Fia Ahaz kpɔ vɔsamlekpui si le Damasko la, eɖo vɔsamlekpui la ƒe nɔnɔme kple eƒe tata, le ale si wowɔe nu pɛpɛpɛ la, ɖe nunɔla Uriya.+ 11 Eye nunɔla Uriya+ ɖi vɔsamlekpui+ la pɛpɛpɛ abe ale si Fia Ahaz ɖoe ɖa tso Damasko ene. Nunɔla Uriya wu enu hafi Fia Ahaz gbɔ tso Damasko. 12 Esi fia la gbɔ tso Damasko eye wòkpɔ vɔsamlekpuia la, ete ɖe vɔsamlekpui la ŋu hesa vɔ le edzi.+ 13 Eye wòtsɔ eƒe numevɔsa kple eƒe nuɖuvɔsa do dzudzɔ ɖe vɔsamlekpui ma dzi; azɔ hã ekɔ eƒe nunovɔsa ɖe edzi eye wòhlẽ eƒe ŋutifafavɔsawo ƒe ʋu ɖe vɔsamlekpui la dzi. 14 Emegbe eɖe akɔblivɔsamlekpui+ si le Yehowa ŋkume le aƒea ŋgɔ, le eƒe vɔsamlekpui la kple Yehowa ƒe xɔ la dome la ɖa, eye wòtsɔe da ɖe eƒe vɔsamlekpui la ƒe dziehe. 15 Eye Fia Ahaz de se na nunɔla Uriya+ be: “Tsɔ ŋdinumevɔsa la do dzudzɔ le vɔsamlekpui gã+ la dzi, eye nàsa fiẽnuɖuvɔ+ kple fia la ƒe numevɔ kple eƒe nuɖuvɔ kple dukɔ la me tɔwo katã ƒe numevɔ kple woƒe nuɖuvɔ kpakple woƒe nunovɔwo le edzi. Eye nàhlẽ numevɔsa ƒe ʋu la katã kple vɔsa bubuawo ƒe ʋu la katã hã ɖe edzi. Ke akɔblivɔsamlekpuia ya la, mabu eŋuti kpɔ be nu kae mawɔ kplii hã.” 16 Eye nunɔla Uriya wɔ nu sia nu pɛpɛpɛ abe ale si Fia Ahaz de se ene.+
17 Azɔ hã, Fia Ahaz gbã kekeawo+ ƒe ga gbadzɛ siwo wotsɔ xe axawo dzi la kakɛkakɛe, eye wòɖe zeawo ɖa le wo dzi,+ eye wòɖe gazɔ gã la le akɔblinyitsu+ siwo dzi wònɔ la dzi da ɖe kpe siwo woɖo ɖe anyigba la dzi.+ 18 Eye wòɖe akpata si wozãna le Sabat dzi, si wotu ɖe aƒe la me kple fia ƒe toƒe si le gota la ɖa le Yehowa ƒe xɔ la ŋu le Asiria-fia ta.
19 Ke Ahaz ŋutinya susɔeawo kple nu siwo wòwɔ la, woŋlɔ wo ɖe Yuda-fiawo ƒe ŋutinyagbalẽ me.+ 20 Wotsɔ Ahaz mlɔ tɔgbuiawo gbɔ, woɖii ɖe tɔgbuiawo gbɔ le David Ƒe Du la me, eye via Hizkiya*+ zu fia ɖe eteƒe.