Ezekiel
28 Yehowa ƒe gbe gava nam be: 2 “Amegbetɔvi, gblɔ na Tiro kplɔla be, ‘Ale Aƒetɔ Dziɖulagã Yehowa gblɔe nye esi:
“Esi wò dzi de asi dada me,+ eye nèle gbɔgblɔm be, ‘Nye la, mawu menye.
Mebɔbɔ nɔ mawu ƒe zikpui dzi le atsiaƒu titina,’+
Ke amegbetɔ dzro ko nènye, menye mawu o,
Togbɔ be èbu le wò dzi me be mawue yenye hã.
3 Kpɔ ɖa! Ènya nu wu Daniel.+
Nya aɖeke mele ɣaɣla ɖe wò o.
4 Wò nunya kple wò nugɔmesesee nètsɔ ƒo kesinɔnuwo nu ƒu na ɖokuiwò,
Eye nèyi edzi le sika kple klosalo dem wò nudzraɖoƒewo.+
5 Èkpɔ kesinɔnuwo kpaŋkpaŋ le esi nèbi ɖe asitsatsa me ta,+
Eye wò dzi de asi dada me le wò kesinɔnuwo ta.”’
6 “‘Eya ta ale Aƒetɔ Dziɖulagã Yehowa gblɔe nye esi:
“Esi nèbu le wò dzi me be yenye mawu ta la,
7 Eya ta kpɔ ɖa, makplɔ ame siwo sẽa ŋuta wu le dukɔwo dome ava ƒu wò,+
Woaɖe woƒe yi ɖe nu dzeani siwo katã nèto wò nunya dzi kpɔ la dzi,
Eye woagblẽ kɔ ɖo na wò atsyɔ̃ gã la.+
9 Ðe nàgate ŋu agblɔ be, ‘Nye la, mawu menye’ le wuwòla ŋkumea?
Amegbetɔ dzro koe nàkpɔtɔ anye le ame siwo aɖi gbɔ wò la si me, ke menye mawu o.”’
10 “Aƒetɔ Dziɖulagã Yehowa be, ‘Àku abe aʋamatsomatsotɔ ene le amedzrowo si me,’
Elabena nyee gblɔe.”
11 Eye Yehowa ƒe gbe gava nam be: 12 “Amegbetɔvi, dzi konyifaha de Tiro-fia nàgblɔ nɛ be, ‘Ale Aƒetɔ Dziɖulagã Yehowa gblɔe nye esi:
13 Mawu ƒe abɔ Eden mee nènɔ.
Wotsɔ kpe xɔasi ɖe sia ɖe ɖo atsyɔ̃ na wò
—Rubi, topaz kple yaspis; krisolit, oniks kple yasifi; safir, nofek+ kple emerald;
Sika wotsɔ ɖo to na wo.
Esiawoe wotsɔ do atsyã na wò le gbe si gbe wowɔ wò.
14 Meɖo wò nènye kerubi si wosi ami na, si tsyɔ nuwo dzi.
Mawu ƒe to kɔkɔe la dzie nènɔ,+ eye dzokpewo domee nèzɔna.
15 Fɔɖiɖi menɔ wò zɔzɔme ŋu o tso gbe si gbe wowɔ wò,
Va se ɖe esime wokpɔ nu madzɔmadzɔ le mewò.+
Eya ta manya wò ɖa le Mawu ƒe to la dzi, elabena ŋuwò mekɔ o, eye matsrɔ̃ wò+ ɖa le dzokpewo dome,
Oo, wò kerubi si tsyɔ nuwo dzi.
17 Wò dzi de asi dada me le wò nyonyo ta.+
Ègblẽ wò nunya dome le wò atsyɔ̃ gã la ta.+
Matsɔ wò aƒu gbe ɖe anyigba.+
Mana nàzu nukpɔkpɔ na fiawo.
18 To wò nu vɔ̃ geɖewo kple wò asitsatsa si me nuteƒewɔwɔ mele o me la, ègblẽ kɔ ɖo na wò kɔkɔeƒewo.
Eya ta mana dzo nado tso mewò ne wòafiã wò.+
Eye mana nàzu dzofi le anyigba dzi le eteƒekpɔlawo katã ŋkume.
19 Ame siwo katã dze si wò le dukɔwo dome la ƒe nu aku ɖe ŋuwò.+
Nuwò ayi ŋɔdzitɔe zi ɖeka kpoyi,
Eye màganɔ anyi akpɔ o.”’”+
20 Eye Yehowa ƒe gbe gava nam be: 21 “Amegbetɔvi, trɔ nàdze ŋgɔ Sidon+ nàgblɔ nya ɖi ɖe eŋu. 22 Eye nàgblɔ be, ‘Ale Aƒetɔ Dziɖulagã Yehowa gblɔe nye esi:
“Oo Sidon, kpɔ ɖa, metso ɖe ŋuwò, eye woadom ɖe dzi le mewò;
Ne medrɔ̃ ʋɔnu wò hekɔ ɖokuinye ŋu le mewò la, ekema amewo adze sii be, nyee nye Yehowa.
23 Maɖo dɔvɔ̃ ɖe eme, eye ʋu asi le eƒe kpɔdomeewo.
Amewo atsi yi nu le eme, woatsi yi si tso goawo katã me va ɖe eŋu la nu;
Eye woadze sii be, nyee nye Yehowa.+
24 “‘“Ekema ŋù tɔame kple aŋɔka wɔnuveviame maganɔe aƒo xlã Israel ƒe aƒe la azɔ o,+ ɛ̃, ame siwo le vlo dom wo la maganɔe azɔ o; ne amewo nadze sii be, nyee nye Aƒetɔ Dziɖulagã Yehowa.”’
25 “‘Ale Aƒetɔ Dziɖulagã Yehowa gblɔe nye esi: “Ne meƒo Israel ƒe aƒe la nu ƒu tso dukɔ siwo dome woka wo hlẽ ɖo me la,+ ekema makɔ ɖokuinye ŋu le wo dome le dukɔwo ŋkume.+ Eye woanɔ woƒe anyigba,+ si metsɔ na nye subɔla Yakob la dzi.+ 26 Woanɔ dedie le edzi,+ woatu xɔwo ahade waingblewo,+ eye ne medrɔ̃ ʋɔnu ame siwo katã ƒo xlã wo siwo do vlo wo la,+ ekema woanɔ anyi aɖe dzi ɖi; ne woadze sii be, nyee nye Yehowa, woƒe Mawu.”’”