Yeremiya
29 Esiae nye agbalẽ si nyagblɔɖila Yeremiya ŋlɔ le Yerusalem ɖo ɖe aboyomeawo ƒe ametsitsi susɔeawo, nunɔlawo, nyagblɔɖilawo kple dukɔ blibo la, ame siwo Nebukadnezar ɖe aboyoe tso Yerusalem yi Babilon la me nyawo. 2 Esia va eme le esi woɖe aboyo Fia Yekoniya+ kple nyɔnufia*+ la, fiaŋumewo, Yuda kple Yerusalem ƒe amegãwo, aɖaŋudɔwɔlawo kple gbedewo* dzoe le Yerusalem megbe.+ 3 Etsɔ agbalẽ la de Elasa, Safan+ vi kple Gemariya, Hilkiya vi, ame siwo Yuda-fia Zedekiya+ dɔ ɖe Babilon-fia Nebukadnezar gbɔ le Babilon la si. Emenyawoe nye esi:
4 “Ale aʋakɔwo ƒe Yehowa, Israel ƒe Mawu la, gblɔ na aboyomeawo katã, ame siwo wòna woɖe aboyoe tso Yerusalem yi Babilon lae nye esi, 5 ‘Mitso aƒe mianɔ wo me. Mitso abɔ miaɖu wo me kutsetse. 6 Miɖe srɔ̃, eye midzi ŋutsuviwo kple nyɔnuviwo; miɖe srɔ̃ na mia viŋutsuwo, eye mitsɔ mia vinyɔnuwo na woaɖe, ne woadzi ŋutsuviwo kple nyɔnuviwo. Midzi ɖe edzi le afi ma, eye migazu ʋɛ o. 7 Midi ŋutifafa na du si me mena woɖe aboyo mi yii la hã, eye mido gbe ɖa na Yehowa ɖe eta, elabena ne ŋutifafa le dua me la, ekema miawo ŋutɔwo hã mianɔ ŋutifafa me.+ 8 Elabena ale aʋakɔwo ƒe Yehowa, Israel ƒe Mawu la, gblɔe nye esi: “Migana miaƒe nyagblɔɖila kple miaƒe afakala siwo le mia dome nable mi o,+ eye migaɖo to woƒe drɔ̃e siwo kum wole la o. 9 Elabena ‘alakpanya gblɔm wole ɖi na mi le nye ŋkɔ me. Menye nyee dɔ wo o,’+ Yehowa ye gblɔe.”’”
10 “Elabena ale Yehowa gblɔe nye esi, ‘Ne ƒe blaadre la de le Babilon la, ekema matrɔ susu ɖe mia ŋu,+ eye mawɔ ŋugbe si medo na mi la dzi ahakplɔ mi agbɔe ava teƒe sia.’+
11 “Yehowa be, ‘Elabena menya tame si meɖo ɖe mia ŋu la nyuie, ŋutifafa ƒe tamee, ke menye vɔ̃ tɔ o,+ ne mana mɔkpɔkpɔ mi eye etsɔme nanyo na mi.+ 12 Miayɔm, miava do gbe ɖa nam, eye maɖo to mi.’+
13 “‘Miadim, eye miake ɖe ŋunye,+ elabena miadim tso dzi blibo me.+ 14 Mana miake ɖe ŋunye,’+ Yehowa ye gblɔe. ‘Maƒo miaƒe aboyomewo nu ƒu tso dukɔwo katã me kple teƒe siwo katã meka mi hlẽ ɖo la,’+ Yehowa ye gblɔe. ‘Eye makplɔ mi ava teƒe si mena woɖe aboyo mi tsoe la.’+
15 “Ke miegblɔ be, ‘Yehowa ɖo nyagblɔɖilawo na mí le Babilon.’
16 “Elabena ale Yehowa gblɔ na fia si le David ƒe fiazikpui dzi+ kple dukɔ blibo si le du sia me, mia nɔvi siwo meyi aboyo me kpli mi o, lae nye esi, 17 ‘Ale aʋakɔwo ƒe Yehowa gblɔe nye esi: “Kpɔ ɖa, maɖo yi, dɔwuame kple dɔvɔ̃*+ ɖe wo ŋu, eye mawɔ wo abe gbotsetse vóvo* siwo mele ɖuɖu me o la ene.”’+
18 “‘Matsɔ yi,+ dɔwuame kple dɔvɔ̃ ati wo yome, eye mana woazu ŋɔdzinu na anyigbadzifiaɖuƒewo katã,+ woazu ɖiŋudonu, nu wɔmoyaa, nu si ŋu woalia aku ɖo+ kple vlodonu le dukɔ siwo katã gbɔ manya wo aɖo ɖo la dome,+ 19 elabena womeɖo to nye nya siwo mede nye subɔla nyagblɔɖilawo si ɖo ɖe wo enuenu* la o,’+ Yehowa ye gblɔe.
“‘Ke miegbe toɖoɖo,’+ Yehowa ye gblɔe.
20 “Eya ta mi aboyomeawo katã, mi ame siwo menya tso Yerusalem ɖo ɖe Babilon, mise Yehowa ƒe nya. 21 Ale aʋakɔwo ƒe Yehowa, Israel ƒe Mawu la, gblɔ ɖe Ahab, Kolaya vi kple Zedekiya, Maaseya vi, ame siwo le alakpanya gblɔm ɖi na mi le nye ŋkɔ me+ la ŋue nye esi, ‘Kpɔ ɖa, matsɔ wo ade asi na Babilon-fia Nebukadnezar,* eye wòawu wo le mia ŋkume. 22 Woatsɔ nu si dzɔ ɖe wo dzi la ado ɖiŋui le Yuda ƒe aboyomewo katã dome le Babilon be: “Yehowa newɔ wò abe Zedekiya kple Ahab, ame siwo Babilon-fia mè le dzo me la ene!” 23 elabena wowɔ ŋukpenanu le Israel,+ wole ahasi wɔm kple wo haviwo srɔ̃wo, eye wole alakpanya gblɔm le nye ŋkɔ me, evɔ nyemeɖo esia na wo o.+
“‘“Nye la, menyae, eye menye ɖasefo,”+ Yehowa ye gblɔe.’”
24 “Eye nàgblɔ na Semaya+ si tso Nehelam be, 25 ‘Ale aʋakɔwo ƒe Yehowa, Israel ƒe Mawu la, gblɔe nye esi: “Èɖo agbalẽwo ɖe dukɔ blibo si le Yerusalem kple nunɔla Zefaniya,+ Maaseya vi, kpakple nunɔlawo katã le wò ŋkɔ me be, 26 ‘Yehowa tsɔ wò ɖo nunɔlae ɖe nunɔla Yehoyada teƒe, be nàzu dzikpɔla le Yehowa ƒe aƒe la me ɖe ame sia ame si ƒe tagbɔ gblẽ, eye wòle nu wɔm abe nyagblɔɖila ene la nu, nàbɔ pãe ahade ga kɔ kple asi nɛ.+ 27 Ke nu ka tae mèka mo na Yeremiya si tso Anatot,+ ame si le nu wɔm abe nyagblɔɖila ene le mia dome o?+ 28 Elabena eɖo du ɖe mí le Babilon gɔ̃ hã be: “Eteƒe adidi! Mitso aƒe mianɔ wo me. Mitso abɔ miaɖu wo me kutsetse,+ . . .”’”’”
29 Esi nunɔla Zefaniya+ xlẽ agbalẽ sia ɖe nyagblɔɖila Yeremiya ƒe to me la, 30 Yehowa ƒe gbe va na Yeremiya be: 31 “Ðo ame ɖe aboyomeawo katã be, ‘Ale Yehowa gblɔ le Semaya si tso Nehelam ŋue nye esi: “Esi Semaya gblɔ nya ɖi na mi, evɔ menye nyee dɔe o, eye wòdi be yeana miaɖo ŋu ɖe alakpanyawo ŋu+ ta la, 32 ale Yehowa gblɔe nye esi, ‘Kpɔ ɖa, matrɔ ɖe Semaya si tso Nehelam kple eƒe dzidzimeviwo ŋu. Eƒe ame aɖeke makpɔtɔ ɖe dukɔ sia dome o; eye makpɔ nyui si wɔ ge mala na nye dukɔ la teƒe o, elabena ede aglãdzedze ɖe Yehowa ŋu ƒe dzi ƒo,’ Yehowa ye gblɔe.’”’”