Yeremiya
13 Ale Yehowa gblɔ namee nye esi: “Yi nàɖaƒle aklalalidziblanu nàtsɔ abla ali dzi, ke mègadee tsi me o.” 2 Ale meyi ɖaƒle alidziblanu la abe ale si Yehowa gblɔe ene hetsɔ bla ali dzi. 3 Eye Yehowa ƒe gbe gava nam zi evelia be: 4 “Tsɔ alidziblanu si nèƒle si le ali na wò la nàyi Frat-tɔsisi la nu, eye nàɣlae ɖe agado me le afi ma.” 5 Ale meyi ɖaɣlae ɖe Frat nu, abe ale si Yehowa de se nam ene.
6 Ke le ŋkeke geɖe megbe la, Yehowa gblɔ nam be: “Tso nàyi Frat nu, eye nàtsɔ alidziblanu si mede se na wò be nàɣla ɖe afi ma la vɛ.” 7 Ale meyi Frat nu ɖaku alidziblanu la le teƒe si meɣlae ɖo, eye kpɔ ɖa, alidziblanu la nyunyɔ; meganyo na naneke o.
8 Eye Yehowa ƒe gbe va nam be: 9 “Ale Yehowa gblɔe nye esi, ‘Alea kee magblẽ Yuda ƒe dada kple Yerusalem ƒe dada vivivo la mee.+ 10 Dukɔ vɔ̃ɖi sia si gbe toɖoɖo nye nyawo,+ eye wole zɔzɔm le woƒe dzimesesẽ nu+ hedze mawu bubuwo yome, eye wosubɔ wo hede ta agu na wo la, hã azu abe alidziblanu sia si meganyo na naneke o la ene.’ 11 Yehowa be, ‘Elabena ale si ko ame tsɔa alidziblanu blaa ali dzii la, nenemae mebla Israel ƒe aƒe blibo la kple Yuda ƒe aƒe blibo la ɖe ɖokuinye ŋu ne woazu dukɔ,+ ŋkɔ,+ kafukafu kple atsyɔ̃ nam. Ke womeɖo tom o.’+
12 “Eye nàgblɔ nya sia hã na wo be, ‘Ale Yehowa, Israel ƒe Mawu la, gblɔe nye esi: “Miku wain ɖe ze gã ɖe sia ɖe me wòayɔ.”’ Ke woaɖo eŋu na wò be, ‘Ðe míenya be ele be woaku wain ɖe ze gã ɖe sia ɖe me wòayɔ oa?’ 13 Ekema nàgblɔ na wo be, ‘Ale Yehowa gblɔe nye esi: “Kpɔ ɖa, matsɔ ahamumu ayɔ anyigba sia dzi nɔlawo katã,+ fia siwo bɔbɔ nɔ David ƒe fiazikpui dzi, nunɔlawo, nyagblɔɖilawo kple Yerusalem nɔlawo katã fũu.”’ 14 Yehowa be: “Maxlã wo ɖe wo nɔewo, fofowo kple viwo siaa.+ Nye dɔme matrɔ ɖe wo ŋu o, nyemase veve ɖe wo nu o, eye nyemakpɔ nublanui na wo agbe wo tsɔtsrɔ̃ o.”+
15 Misee, eye miƒu to anyi.
Miganɔ mia ɖokuiwo dom ɖe dzi o, elabena Yehowa ye ƒo nu.
16 Mitsɔ ŋutikɔkɔe na Yehowa mia Mawu la
Hafi wòava na viviti nado,
Hafi miaƒe afɔwo nava nɔ nu klim le towo dzi le anyinutsyɔɣi.
17 Ke ne miegbe esese la,
Ekema mafa* avi le ɣaɣlaƒe le miaƒe dada ta.
18 Gblɔ na fia la kple nyɔnufia*+ la be, ‘Mibɔbɔ nɔ teƒe si bɔbɔ ɖe anyi wu
Elabena miaƒe atsyɔ̃fiakuku la age le ta na mi.’
19 Wotu anyieheduwo ƒe agbowo,* ale be ame aɖeke meʋua wo o.
Woɖe aboyo Yuda blibo la, woɖe aboyoe keŋkeŋ.+
20 Fɔ mo dzi nàkpɔ ame siwo tso dziehe gbɔna ɖa.+
Afi kae lãha si wotsɔ na wò, wò alẽha nyo la le?+
21 Nya kae nàgblɔ ne wò tohehe la
Tso xɔlɔ̃ vevi siwo nèdze tso gɔmedzedzea me ke gbɔ?+
Ðe màse veve abe nyɔnu si le ku lém ene oa?+
22 Eye ne ègblɔ le wò dzi me be, ‘Nu ka tae nu siawo dzɔ ɖe dzinye ɖo?’+ la,
Nyae be wò vodada gbogboawo tae woklo avɔ le ŋuwò,+
Eye wò afɔkpodzi se veve vevie ɖo.
23 Ðe Kustɔ* ate ŋu atrɔ eƒe ŋutigbalẽa, alo ɖe lãklẽ ate ŋu atrɔ eƒe agbalẽ ŋɔtaŋɔta la?+
Ne woate ŋui la, ekema mi, ame siwo wofia nu vɔ̃ɖi wɔwɔ la,
Miawo hã miate ŋu awɔ nu nyui.
24 Eya ta maka mi ahlẽ abe tsro si gbegbeya lɔ ɖe nu ene.+
25 Yehowa be: “Esiae nye tɔwò gome si medzidze na wò,
26 Eya ta maklo avɔ le ŋuwò akɔ ɖe mo na wò,
Eye woakpɔ wò ŋukpeƒe,+
27 Wò ahasiwɔwɔ,+ wò gbetete le fieŋufieŋu ta,
Wò gbolowɔwɔ nyɔŋu* la hã adze.
Mekpɔ wò ŋunyɔnuawo+
Le togbɛwo dzi kple gbe me siaa.
Oo Yerusalem, baba na wò!
Va se ɖe ɣekaɣie ŋuwò agbe kɔkɔ?”+