Yeremiya

44 Yehowa ƒe gbe si va na Yeremiya hena Yudatɔ siwo katã le Egipte-nyigba dzi,+ ame siwo le Migdol,+ Tahpanhes,+ Nof*+ kple Patros-nyigba+ dzi lae nye esi: 2 “Ale aʋakɔwo ƒe Yehowa, Israel ƒe Mawu la, gblɔe nye esi, ‘Miawo ŋutɔwo miekpɔ vɔ̃ siwo katã mehe va Yerusalem+ kple Yuda duwo katã dzi, wozu aƒedo egbe sia, eye ame aɖeke mele wo me o.+ 3 Nu vɔ̃ɖi siwo wowɔ tsɔ do dziku nam, esi woyi ɖasa vɔ+ na mawu bubu siwo woawo loo alo miawo kple mia tɔgbuiwo mienya o, eye wosubɔ wo la tae.+ 4 Meɖo nye subɔla nyagblɔɖilawo katã ɖe mi enuenu* gblɔ be: “Meɖe kuku, miganɔ ŋunyɔnu sia, si melé fui la wɔm o.”+ 5 Ke womeɖo to loo alo ƒu to anyi, ne woatrɔ tso woƒe nu vɔ̃ɖi wɔwɔ me, ale be woagasa vɔ na mawu bubuwo azɔ o.+ 6 Ale metrɔ nye dɔmedzoe kple nye dziku kɔ ɖi, eye wòbi le Yuda duwo kple Yerusalem kpɔdomeewo, eye wozu aƒedo kple gbegbe, abe ale si wole egbe sia ene.’+

7 “Eya ta ale aʋakɔwo ƒe Yehowa, Israel ƒe Mawu la, gblɔe nye esi, ‘Nu ka tae miahe vɔ̃ gã sia ava mia ɖokuiwo* dzi, ale be ŋutsu kple nyɔnu, ɖevi kple vidzĩ siaa natsrɔ̃ le mia dome le Yuda, eye ame aɖeke magasusɔ na mi o? 8 Nu ka tae miatsɔ miaƒe asinudɔwɔwɔwo ado dziku nam, esi miesa vɔ na mawu bubuwo le Egipte-nyigba si dzi mieyi be miaɖanɔ la dzi? Miatsrɔ̃, eye miazu ɖiŋudonu kple vlodonu le anyigbadzidukɔwo katã dome.+ 9 Ðe mieŋlɔ mia tɔgbuiwo ƒe nu vɔ̃ɖi, Yuda-fiawo kple wo srɔ̃wo ƒe nu vɔ̃ɖi,+ miawo ŋutɔwo kple mia srɔ̃wo ƒe nu vɔ̃ɖi,+ siwo miewɔ le Yuda-nyigba dzi kple Yerusalem kpɔdomeewo la bea? 10 Va se ɖe egbe sia la, miebɔbɔ mia ɖokui o,* ŋɔ medzi mi o,+ eye miezɔ ɖe nye se kple nye ɖoɖo siwo metsɔ na mia kple mia tɔgbuiwo la dzi o.’+

11 “Eya ta ale aʋakɔwo ƒe Yehowa, Israel ƒe Mawu la, gblɔe nye esi, ‘Kpɔ ɖa, meɖoe be mahe vɔ̃ ava mia dzi, ne matsrɔ̃ Yuda blibo la ɖa. 12 Mana Yuda ƒe ame susɔe siwo ɖoe kplikpaa be yewoayi Egipte-nyigba dzi aɖanɔ afi ma la katã natsrɔ̃ le Egipte-nyigba dzi.+ Woatsi yi nu, eye dɔwuame ana wo nu nayi, tso ɖeviwo dzi va se ɖe tsitsiawo dzi, woaku ɖe yi kple dɔwuame si me. Woazu fiƒode, ŋɔdzinu, ɖiŋudonu kple vlodonu.+ 13 Matsɔ yi, dɔwuame kple dɔvɔ̃* ahe to na Egipte-nyigba dzi nɔlawo, abe ale si mehe to na Yerusalem ene.+ 14 Yuda ƒe ame susɔe siwo yi be yewoaɖanɔ Egipte-nyigba dzi la dometɔ aɖeke masi alo atsi agbe atrɔ ava Yuda-nyigba dzi o. Adzro wo* be yewoatrɔ ayi aɖanɔ afi ma, gake womate ŋui o, negbe aʋasila ʋɛ aɖewo ko.’”

15 Eye ŋutsu siwo katã nyae be yewo srɔ̃wo saa vɔ na mawu bubuwo kple wo srɔ̃ siwo katã le tsitre ɖe afi ma siwo nye ameha gã aɖe kpakple dukɔ blibo si le Egipte-nyigba dzi+ le Patros+ la, ɖo eŋu na Yeremiya be: 16 “Míele to ɖo ge nya si nègblɔ na mí le Yehowa ƒe ŋkɔ me la o. 17 Ke boŋ míawɔ nya sia nya si do tso míaƒe nu me la dzi, ne míasa vɔ na Dziƒofianyɔnu* la, eye míaƒo aha ɖi nɛ,+ abe ale si míawo ŋutɔwo kple mía tɔgbuiwo, míaƒe fiawo kple míaƒe amegãwo wɔ le Yuda duwo me kple Yerusalem kpɔdomeewo, esime míeɖua abolo ɖia ƒo, eye eme nyona na mí, eye vɔ̃ aɖeke medzɔna ɖe mía dzi o la ene. 18 Tso esime míedzudzɔ vɔsasa na Dziƒofianyɔnu* la, eye míegaƒoa aha ɖi nɛ o la, nu sia nu ƒe hiã tu mí, eye yi kple dɔwuame tsrɔ̃ mí keŋ.”

19 Eye nyɔnuawo gblɔ kpee be: “Esi míesa vɔwo na Dziƒofianyɔnu* la heƒo aha ɖi nɛ la, mía srɔ̃wo megbee mietona wɔa vɔsabolo vivi siwo míewɔna ɖe eƒe nɔnɔme me heƒoa aha ɖi nɛa?”

20 Eye Yeremiya gblɔ na dukɔ blibo la, ŋutsuawo, wo srɔ̃awo kple ame siwo katã le nya ŋu ɖom nɛ la be: 21 “Vɔ siwo miawo ŋutɔwo, mia tɔgbuiwo, miaƒe fiawo, miaƒe amegãwo kple dukɔ la me tɔwo sa le Yuda duwo me kple Yerusalem+ kpɔdomeewo la dzie Yehowa ɖo ŋkui, eye wòva dzi me nɛ! 22 Mlɔeba etsɔtsɔ ti Yehowa, le miaƒe nuwɔna vɔ̃ɖiawo kple ŋunyɔnu siwo miewɔ la ta; eya tae miaƒe anyigba la zu gbegbe, ŋɔdzinu kple ɖiŋudonu, eye ame aɖeke mele edzi o, abe ale si wòle egbe sia ene.+ 23 Esi miesa vɔ siawo, eye miewɔ nu vɔ̃ ɖe Yehowa ŋu, mieɖo to Yehowa ƒe gbe o, eye miezɔ le eƒe se kple ɖoɖowo kpakple ŋkuɖodzinyawo nu o la, esia tae vɔ̃ sia dzɔ ɖe mia dzi ɖo, abe ale si wòle egbe sia ene.”+

24 Yeremiya gagblɔ na dukɔ blibo la kple nyɔnuawo katã be: “Mi Yudatɔ siwo katã le Egipte-nyigba dzi, mise Yehowa ƒe nya. 25 Ale aʋakɔwo ƒe Yehowa, Israel ƒe Mawu la, gblɔe nye esi: ‘Nu si mia kple mia srɔ̃nyɔnuawo mieke nu gblɔ lae mietsɔ miaƒe asiwo wɔ, elabena miegblɔ be: “Míawɔ adzɔgbe si míeɖe be míasa vɔ na Dziƒofianyɔnu* la, eye míaƒo aha ɖi nɛ la dzi godoo.”+ Mi nyɔnu siawo miele miaƒe adzɔgbeɖeɖeawo dzi wɔ ge kokoko.’

26 “Eya ta mi Yudatɔ siwo katã le Egipte-nyigba dzi, mise Yehowa ƒe nya, ‘Yehowa be: “Kpɔ ɖa, metà nye ŋkɔ gã la be Yudatɔ+ aɖeke magayɔ nye ŋkɔ aka atam le Egipte-nyigba blibo la katã dzi azɔ agblɔ be, ‘Zi ale si Aƒetɔ Dziɖulagã Yehowa le agbe!’+ o. 27 Kpɔ ɖa, nye ŋku le wo ŋu hena vɔ̃wɔwɔ, eye menye na nyuiwɔwɔ o;+ yi kple dɔwuame ana Yudatɔ siwo katã le Egipte-nyigba dzi la nu nayi va se ɖe esime woatsrɔ̃ avɔ.+ 28 Ame ʋɛ aɖewo koe asi le yi nu atrɔ tso Egipte-nyigba dzi agbɔ va Yuda-nyigba dzi.+ Eye Yuda ƒe ame susɔe siwo katã yi Egipte-nyigba dzi be yewoaɖanɔ afi ma la adze si ame si ƒe nyawo va eme, be tɔnyee loo alo woawo tɔe hã!”’”

29 “Yehowa be, ‘Esiae anye dzesi na mi be mahe to na mi le teƒe sia, ne miadze sii be vɔ̃ si megblɔ ɖe mia ŋu la ava eme godoo. 30 Ale Yehowa gblɔe nye esi: “Kpɔ ɖa, matsɔ Egipte-fia Farao Hofra ade asi na eƒe futɔwo kple ame siwo le didim be yeaɖe eƒe agbe* ɖa la si, abe ale si ko metsɔ Yuda-fia Zedekiya de asi na eƒe futɔ kple ame si le didim be yeaɖe eƒe agbe* ɖa, si nye Babilon-fia Nebukadnezar* la ene.”’”+