1 Korintotɔwo

15 Ke nɔviwo, mele ŋku ɖom nya nyui si megblɔ na mi,+ si hã miexɔ helé eme ɖe asi sesĩe la dzi na mi. 2 Miakpɔ ɖeɖe hã ne mielé nya nyui si megblɔ na mi la me ɖe asi sesĩe ko, negbe ɖe mieva zu xɔsetɔwo dzodzro.

3 Elabena nu gbãtɔ siwo metsɔ de asi na mi lae nye nu siwo nye hã mexɔ, be Kristo ku ɖe míaƒe nu vɔ̃wo ta le Ŋɔŋlɔawo nu;+ 4 eye woɖii,+ ɛ̃, wofɔe ɖe tsitre+ le ŋkeke etɔ̃a gbe+ le Ŋɔŋlɔawo nu;+ 5 eye eɖe eɖokui fia Kefas,*+ emegbe la, Ame Wuieveawo.+ 6 Le ema megbe la, eɖe eɖokui fia nɔvi siwo wu alafa atɔ̃ zi ɖeka,+ ame siwo dometɔ akpa gãtɔ kpɔtɔ le mía dome, ke wo dometɔ aɖewo hã dɔ alɔ̃ le ku me. 7 Emegbe eɖe eɖokui fia Yakobo,+ eyome eɖe eɖokui fia apostoloawo katã.+ 8 Ke mlɔeba eɖe eɖokui fia nye hã,+ abe ame si ƒe ŋkeke mede hafi wodzii o ene.

9 Nyee nye suetɔ le apostoloawo dome, eye nyemedze woayɔ be apostolo o, elabena meti Mawu ƒe hame la yome.+ 10 Ke le Mawu ƒe amenuveve me la, mezu nu si menye egbea. Eye amenuveve si wòɖe fiam la mezu dzodzro o, ke boŋ medze agbagba geɖe wu wo katã; ke hã menye nyee o, ke boŋ Mawu ƒe amenuveve si li kplim lae. 11 Gake eɖanye nyee o, eɖanye woawoe o, nu siae míeɖea gbeƒãe, eye nu siae na mieva xɔe se.

12 Ke ne wole gbeƒã ɖem be wofɔ Kristo ɖe tsitre tso ame kukuwo dome la,+ aleke wɔ mia dometɔ aɖewo le gbɔgblɔm be ame kukuwo ƒe tsitretsitsi aɖeke meli o? 13 Ne vavãe ame kukuwo ƒe tsitretsitsi aɖeke meli o la, ekema womefɔ Kristo ɖe tsitre o. 14 Ke ne womefɔ Kristo ɖe tsitre o la, ekema míaƒe gbeƒãɖeɖe la nye dzodzro nyateƒe, eye miaƒe xɔse hã nye dzodzro. 15 Azɔ hã, woakpɔ mí be míenye aʋatsoɖasefowo ɖe Mawu ŋu+ elabena míeɖia ɖase tsia tsitre ɖe Mawu ŋuti be efɔ Kristo la ɖe tsitre,+ evɔ ne vavãe womefɔa ame kukuwo ɖe tsitre o la, ekema mefɔe ɖe tsitre hafi o. 16 Elabena ne womafɔ ame kukuwo ɖe tsitre o la, ekema womefɔ Kristo hã ɖe tsitre o. 17 Eye ne womefɔ Kristo ɖe tsitre o la, ekema viɖe aɖeke mele miaƒe xɔse la ŋu o; miegakpɔtɔ le miaƒe nu vɔ̃wo me.+ 18 Ekema ame siwo dɔ alɔ̃ le ku me le Kristo me hã tsrɔ̃.+ 19 Ne agbe sia ɖeɖe ko mee míekpɔ mɔ na Kristo le la, ekema míaƒe nue wɔ nublanui wu.

20 Gake azɔ wofɔ Kristo ɖe tsitre tso ame kukuwo dome, eye wònye ame siwo dɔ alɔ̃ le ku me la ƒe kutsetse gbãtɔ.+ 21 Elabena esi wònye ame dzie ku to va ta la,+ ame kukuwo ƒe tsitretsitsi la hã to ame dzi va.+ 22 Elabena ale si ko amewo katã kuna le Adam me la,+ nenema kee woagbɔ agbe wo katã hã le Kristo me.+ 23 Ke ame sia ame le eƒe ɖoɖo nu: Kristoe nye kutsetse gbãtɔ,+ emegbe la, ame siwo nye Kristo la tɔ le eƒe anyinɔɣi+ la. 24 Azɔ nuwuwu la ava, esime wòatsɔ Fiaɖuƒe la ade asi na eƒe Mawu, si nye Fofoa, ne eɖe dziɖuɖu katã kple amegãnyenye katã kpakple ŋusẽ katã ɖa vɔ.+ 25 Elabena ele be wòaɖu fia va se ɖe esime Mawu natsɔ futɔwo katã ade eƒe afɔ te.+ 26 Futɔ mamlɛtɔ si woaɖe ɖa lae nye ku.+ 27 Elabena Mawu “tsɔ nuwo katã de eƒe afɔ te.”+ Ke esi wògblɔ be ‘wotsɔ nuwo katã de ete’+ la, edze ƒãa be Ame si tsɔ nuwo katã de ete ya mele eme o.+ 28 Ke ne wotsɔ nuwo katã de ete vɔ la, ekema Vi la ŋutɔ hã atsɔ eɖokui ade Ame si tsɔ nuwo katã de ete la te,+ ale be Mawu nanye nuwo katã na ame sia ame.+

29 Ne menye nenema o la, nu kae ame siwo nyrɔm wole yi ɖe ku me la awɔ?+ Ne womafɔ ame kukuwo ɖe tsitre kura o ɖe, ekema nu ka tae wole wo nyrɔm kple taɖodzinu ma? 30 Nu ka tae míawo hã míeɖoa afɔku me ɣesiaɣi ɖo?+ 31 Medzea ŋgɔ ku gbe sia gbe. Nɔviwo, aseye si metsona le mia ta le mía Aƒetɔ Kristo Yesu me lae metsɔ le kpe ɖom nya sia dzi. 32 Ne mewɔ avu kple lã wɔadãwo le Efeso+ abe ame bubuwo ene ɖe, viɖe kae wònye nam? Ne womafɔ ame kukuwo ɖe tsitre o la, ekema “mina míaɖu nu, eye míano nu, elabena etsɔ míele kuku ge.”+ 33 Migana woaflu mi o. Hadede vɔ̃wo gblẽa nɔnɔme nyuiwo.+ 34 Minyɔ le mia ɖokui me ne miawɔ nu si le dzɔdzɔe, eye miganɔ nu vɔ̃ wɔm o, elabena ame aɖewo medze si Mawu o. Mele egblɔm ale be ŋu nakpe mi.

35 Ke ame aɖe agblɔ be: “Aleke woafɔ ame kukuwo ɖe tsitre? Ɛ̃, ŋutilã ka ƒomevie woatsɔ adoe?”+ 36 Wò, ame masenugɔme! Nu si nèƒãna la megbɔa agbe o, negbe ɖe wòku gbã. 37 Eye nu si nèƒãna la, menye ati si amie tso eme lae nèƒãna o, ke boŋ nuku gbɔlo ko, ate ŋu anye lu alo nuku bubu ɖe sia ɖe; 38 ke Mawu naa nɔnɔmee ale si wòlɔ̃, eye wònaa nukuawo ŋutɔ ƒe nɔnɔme wo dometɔ ɖe sia ɖe. 39 Menye ŋutilãwo katãe nye ŋutilã ɖeka ƒomevi o, ke boŋ amegbetɔwo tɔ li, lãfɔnewo ƒe ŋutilã li, xewo ƒe ŋutilã li eye tɔmelãwo tɔ hã li. 40 Dziƒoŋutilãwo li,+ eye anyigbadziŋutilãwo hã li;+ ke dziƒoŋutilãwo ƒe ŋutikɔkɔe le vovo, eye anyigbadziŋutilãwo hã tɔ le vovo. 41 Ɣe ƒe ŋutikɔkɔe le vovo, ɣleti ƒe ŋutikɔkɔe le vovo,+ eye ɣletiviwo ƒe ŋutikɔkɔe hã le vovo; le nyateƒe me la, ɣletivi ɖe sia ɖe ƒe ŋutikɔkɔe to vovo na nɔvia tɔ.

42 Nenema kee ame kukuwo ƒe tsitretsitsi hã le. Woƒãnɛ* le gbegblẽ me; wofɔnɛ ɖe tsitre le magblemagblẽ me.+ 43 Woƒãnɛ le bubumanɔameŋu me; wofɔnɛ ɖe tsitre le ŋutikɔkɔe me.+ Woƒãnɛ le gbɔdzɔgbɔdzɔ me; wofɔnɛ ɖe tsitre le ŋusẽ me.+ 44 Woƒãa ŋutilã si míekpɔna; wofɔnɛ ɖe tsitre wònyea gbɔgbɔŋutilã. Ne ŋutilã si míekpɔna li la, ekema gbɔgbɔŋutilã hã li. 45 Woŋlɔ ɖi be: “Ame gbãtɔ Adam zu ame* gbagbe.”+ Adam mamlɛtɔ zu gbɔgbɔ+ si naa agbe. 46 Gake menye gbɔgbɔmetɔe gbãtɔ nye o. Ŋutilãmetɔe gbãtɔ nye, eye emegbe gbɔgbɔmetɔ la. 47 Ame gbãtɔ la tso anyigba me, eye anyi wotsɔ mèe;+ ame evelia ya tso dziƒo.+ 48 Ame siwo wowɔ kple anyi la le ko abe ame si wotsɔ anyi mè la ene; eye ame siwo le dziƒo la le ko abe ame si tso dziƒo va la ene.+ 49 Eye ale si ko ame si wotsɔ anyi mè la ƒe nɔnɔme le mía si la,+ nenema kee ame si tso dziƒo va la ƒe nɔnɔme hã anɔ mía si.+

50 Ke nɔviwo, esia gblɔm mele be, ŋutilã kple ʋu mate ŋu anyi Mawu Fiaɖuƒe la dome o, eye gbegblẽ mate ŋu anyi magblemagblẽ dome o. 51 Kpɔ ɖa! Mele nya ɣaɣla kɔkɔe aɖe gblɔm na mi: Menye mí katãe adɔ alɔ̃ le ku me o, ke boŋ woatrɔ mí katã míaƒe nɔnɔme+ 52 enumake, le aɖabaƒoƒo ɖeka me, le kpẽkuku mamlɛa me. Elabena kpẽ la aɖi,+ eye woafɔ ame kukuwo ɖe tsitre magblemagblẽe, eye woatrɔ míaƒe nɔnɔme. 53 Elabena ele be nu sia, si gblẽna la, nadó magblemagblẽ,+ eye nu sia, si kuna la, nadó makumaku.+ 54 Ke ne nu sia si gblẽna la dó magblemagblẽ, eye nu sia si kuna la dó makumaku la, ekema nya si woŋlɔ ɖi la ava eme be: “Womi ku tegbee.”+ 55 “Ku, wò dziɖuɖu ɖe? Ku, afi kae wò ti si nètsɔ le ame tém la le?”+ 56 Ti si hea ku vanɛ lae nye nu vɔ̃,+ eye nu vɔ̃ ƒe ŋusẽe nye Se la.*+ 57 Ke woada akpe na Mawu be ena dziɖuɖu mí to mía Aƒetɔ Yesu Kristo dzi!+

58 Eya ta nɔvinye lɔlɔ̃tɔwo, minɔ te sesĩe,+ maʋamaʋã, eye miwɔ geɖe+ le Aƒetɔ la ƒe dɔ la me ɣesiaɣi, elabena mienyae be miaƒe agbagbadzedze le Aƒetɔ la me menye dzodzro o.+