1 Korintotɔwo

1 Paulo, ame si woyɔ be wòanye Kristo Yesu ƒe apostolo+ le Mawu ƒe lɔlɔ̃nu me, kple mía nɔviŋutsu Sostene, 2 le esia ŋlɔm na Mawu ƒe hame si le Korinto,+ mi ame siwo ŋu wokɔ le Kristo Yesu+ me, ame siwo woyɔ be miava nye ame kɔkɔewo, kple ame siwo katã le mía Aƒetɔ Yesu Kristo,+ si nye woƒe Aƒetɔ kple míawo hã míaƒe Aƒetɔ la, ƒe ŋkɔ yɔm le afi sia afi:

3 Amenuveve kple ŋutifafa si tso Mawu, mía Fofo, kple Aƒetɔ Yesu Kristo gbɔ la, woana mi.

4 Medaa akpe na nye Mawu ɣesiaɣi ɖe mia ta le Mawu ƒe amenuveve si wòna mi le Kristo Yesu me la ta; 5 elabena miezu kesinɔtɔwo le nu sia nu me le eya amea me, le nuƒoƒo ƒe ŋutete katã kple sidzedze+ katã me, 6 abe ale si ko Kristo+ la ŋuti ɖaseɖiɖi ƒo ke ɖe to sesĩe ɖe mia me ene, 7 ale be nunana aɖeke meli si mesu mia si o, esime miele mía Aƒetɔ Yesu Kristo+ ƒe ɖeɖefia la lalam vevie. 8 Ana miali ke sesĩe hã va se ɖe nuwuwu, ale be woagakpɔ nutsotso aɖeke le mia ŋu o, le mía Aƒetɔ Yesu Kristo ƒe ŋkeke la dzi.+ 9 Nuteƒewɔlae Mawu nye,+ eye eyae yɔ mi vɛ be mianye hadɔwɔlawo* kple Via, si nye mía Aƒetɔ Yesu Kristo.

10 Ke mele nu xlɔ̃m mi, nɔviwo, le mía Aƒetɔ Yesu Kristo ƒe ŋkɔ me be, mi katã miaƒe nu nasɔ, eye mama naganɔ mia dome o,+ ke boŋ miawɔ ɖeka bliboe le susu kple nuŋububu ɖeka ma ke me.+ 11 Elabena nɔvinyewo, Kloe ƒe aƒemetɔ aɖewo na menya be nyahehe le mia dome. 12 Nu si mewɔnɛ ye nye be, mia dometɔ aɖewo le gbɔgblɔm be: “Paulo tɔe menye,” ɖewo be “Nye ya Apolo tɔe menye,”+ bubuwo be “Nye ya Kefas* tɔe menye,” eye ɖewo hã be “Nye ya Kristo tɔe menye.” 13 Ðe Kristo la me ma? Menye Paulo ye wohe ɖe ati ŋu ɖe mia ta o ɖe? Alo Paulo ƒe ŋkɔ mee wonyrɔ mi ɖoa? 14 Medaa akpe na Mawu be nyemena nyɔnyrɔ mia dometɔ aɖeke o, negbe Krispo+ kple Gayo+ ko, 15 ne ame aɖeke nagagblɔ be nye ŋkɔ mee wonyrɔ mi ɖo o. 16 Ahã! Mena nyɔnyrɔ Stefana ƒe aƒemetɔwo hã.+ Ke nyemeɖo ŋku edzi ne megana nyɔnyrɔ ame bubu aɖe hã o. 17 Elabena Kristo medɔm be manɔ amewo nyrɔm o, ke boŋ be magblɔ nya nyui la;+ menye kple agbalẽnyalagãwo ƒe nuƒoƒo o,* ale be Kristo ƒe fuwɔameti* la nagazu dzodzro o.

18 Elabena fuwɔameti* la ŋuti nya nye bometsinya le ame siwo le tsɔtsrɔ̃m la gbɔ,+ ke enye Mawu ƒe ŋusẽ+ le mí ame siwo ɖem wole ya gbɔ. 19 Elabena woŋlɔ ɖi be: “Mana nunyalawo ƒe nunya nabu ɖe wo, eye matu asi tagbɔɖaɖɛtɔwo ƒe gɔmesese ɖa.”+ 20 Afi kae nunyala la le? Afi kae agbalẽfiala* la le? Afi kae nuɖoanyi* sia me glãkahela la le? Ðe Mawu mena xexe sia me nunya zu bometsitsi oa? 21 Elabena le Mawu ƒe nunya me la, esi xexea meto nunya+ si le esi dzi dze si Mawu+ o ta la, edze eŋu be yeato gbedeasi si wole gbeƒã ɖemee la ƒe bometsinyanyenye+ dzi aɖe ame siwo xɔa edzi sena la.

22 Yudatɔwo biaa dzesiwo,+ eye Helatɔwo hã dia nunya; 23 ke míawo ya, míeɖea gbeƒã Kristo si wohe ɖe ati ŋu la, si nye nuɖiaɖia na Yudatɔwo, eye wònye bometsitsi na dukɔwo.+ 24 Gake le ame siwo woyɔ, siwo nye Yudatɔwo kple Helatɔwo siaa gome la, Kristo nye Mawu ƒe ŋusẽ kple Mawu ƒe nunya si wòɖe fia.+ 25 Elabena Mawu ƒe nu si wobuna bometsinui la nyaa nu wu amegbetɔwo, eye Mawu ƒe nu si wobuna nu gbɔdzɔe la sẽa ŋu wu amegbetɔwo.+

26 Nɔviwo, mikpɔ mi ame siwo woyɔ la ɖa, be menye nunyalawo le ŋutilã+ nu* ye mia dometɔ geɖe nye o, menye ŋusẽtɔwoe mia dometɔ geɖe nye o, eye menye ƒome siwo ŋu bubu le* hã mee mia dometɔ geɖe dzɔ tso o,+ 27 ke boŋ Mawu tia nu siwo xexea buna bometsinuwoe, ne wòatsɔ ado ŋukpe nunyalawo; eye Mawu tia nu siwo xexea buna gbɔdzɔgbɔdzɔnuwoe, ne wòatsɔ ado ŋukpe nu siwo ŋu ŋusẽ le,+ 28 eye Mawu tia xexea me nu siwo mele ɖeke me o kple nu siwo wodoa vloe, nu siwo meɖi naneke o, ne wòatsɔ aɖi gbɔ nu siwo nye nane la,+ 29 ale be ame* aɖeke nagaƒo adegbe le Mawu ŋkume o. 30 Ke eya gbɔe wòtso be mia kple Kristo Yesu miewɔ ɖeka, ame si zu nunya si tso Mawu gbɔ na mí, eye wònye dzɔdzɔenyenye+ kple kɔkɔenyenye+ kpakple ɖeɖe to tafe+ dzi hã, 31 be wòanɔ abe ale si tututu woŋlɔe ɖii ene be: “Ame si ƒoa adegbe la, neƒo adegbe le Yehowa*+ me.”