Dɔwɔwɔwo

9 Ke Saul galé ŋɔdzidodo kple amewuwu ƒe gbɔgbɔtsixe ɖe ƒo kokoko ɖe Aƒetɔ la ƒe nusrɔ̃lawo+ ŋu, eye wòyi nunɔlagã la gbɔ, 2 eye wòbia be wòana agbalẽwo ye yeatsɔ ayi ƒuƒoƒe siwo le Damasko, ale be yeabla ame sia ame si yeakpɔ, si le Aƒetɔ la ƒe Mɔ La+ dzi la, ava Yerusalem, eɖanye ŋutsu alo nyɔnu o.

3 Ke esi wòle mɔa dzi yina eye wògogo Damasko la, kasia kekeli aɖe klẽ tso dziƒo ƒo xlãe,+ 4 ale wòdze anyi, eye wòse gbe aɖe gblɔ nɛ be: “Saul, Saul, nu ka ŋuti nèle yonyeme tim?” 5 Ebia be: “Wò, ame kae, Aƒetɔ?” Egblɔ be: “Nyee nye Yesu,+ ame si yome tim nèle la.+ 6 Azɔ tso nàge ɖe dua me, eye woagblɔ nu si nàwɔ la na wò.” 7 Ke ame siwo le mɔa zɔm kplii la ƒe nu ku, le nyateƒe me la, wonɔ gbeɖiɖi aɖe sem, gake womenɔ ame aɖeke kpɔm o.+ 8 Ke Saul fɔ le anyigba; togbɔ be eƒe ŋkuwo le ʋuʋu hã la, mele naneke kpɔm o. Eya ta wolé eƒe alɔnu kplɔe yi Damasko. 9 Ŋkeke etɔ̃ sɔŋ mekpɔ nu o,+ meɖu nu o, eye meno naneke hã o.

10 Nusrɔ̃la aɖe le Damasko, si ŋkɔe nye Anania,+ eye Aƒetɔ la yɔe le ŋutega me be: “Anania!” Eɖo eŋu be: “Nyee nye esi, Aƒetɔ.” 11 Aƒetɔ la gblɔ nɛ be: “Tso nàyi mɔ si woyɔna be Dzɔdzɔe la dzi, nàyi Yuda ƒe aƒe me, eye nàbia ŋutsu aɖe si ŋkɔe nye Saul tso Tarso+ la ta. Kpɔ ɖa, ele gbe dom ɖa, 12 eye meɖe ŋutega fiae wòkpɔ ŋutsu aɖe si ŋkɔe nye Anania wòva da eƒe asiwo ɖe edzi, be wòagakpɔ nu.”+ 13 Ke Anania ɖo eŋu be: “Aƒetɔ, mese nya tso ame geɖewo nu le ame sia ŋuti, ale si wòwɔ vɔ̃ geɖewo ɖe wò ame kɔkɔewo ŋu le Yerusalem. 14 Eye le afi sia hã exɔ ŋusẽ tso nunɔlawo ƒe tatɔwo gbɔ, be yealé* ame siwo katã yɔa wò ŋkɔ la.”+ 15 Ke Aƒetɔ la gblɔ nɛ be: “Heyi, elabena ŋutsu sia nye dɔwɔnu tiatia aɖe nam,+ be wòatsɔ nye ŋkɔ la ayi na dukɔwo+ kple fiawo+ kpakple Israel-viwo. 16 Elabena mafia ale si gbegbe wòle be wòakpe fu le nye ŋkɔ ta lae.”+

17 Ale Anania dze mɔ yi aƒea me, eye wòda eƒe asiwo ɖe edzi gblɔ be: “Nɔvi Saul, Aƒetɔ Yesu, ame si ɖe eɖokui fia wò le mɔ si nèto gbɔna la dzie dɔm ɖa be nàgakpɔ nu, eye gbɔgbɔ kɔkɔe nayɔ wò fũu.”+ 18 Enumake nanewo ge tso eƒe ŋkuwo dzi abe tsro ene, eye wògakpɔ nu. Ale wòtso, eye wonyrɔe; 19 eɖu nu eye ŋusẽ ɖo eŋu.

Enɔ nusrɔ̃lawo gbɔ le Damasko ŋkeke aɖewo,+ 20 eye wòyi ƒuƒoƒewo enumake nɔ gbeƒã ɖem tso Yesu ŋu be, ame siae nye Mawu ƒe Vi la. 21 Ke ame siwo katã nɔ eƒe nyawo sem la ƒe mo wɔ yaa, eye wogblɔ be: “Alo menye ame siae wɔ fu geɖe ame siwo yɔa ŋkɔ sia le Yerusalem oa?+ Ðe meva afi sia hã le susu ma ke ta, be yealé wo* akplɔ wo ayi na nunɔlawo ƒe tatɔwo oa?”+ 22 Ke ŋusẽ geɖe nɔ Saul ŋu ɖom, eye wònaa kpeɖodzi siwo me kɔ eye susu le wo me be ame siae nye Kristo la,+ ale Yudatɔ siwo nɔ Damasko la ƒe nu ku.

23 Le ŋkeke geɖe megbe la, Yudatɔwo ɖo nugbe be yewoawui.+ 24 Gake Saul va nya nugbe si woɖo ɖe eŋu la. Wonɔ agboawo hã nu dzɔm nyuie zã kple keli, be yewoabu mo nɛ. 25 Eya ta le zã me la, eƒe nusrɔ̃lawo kɔe de kusi me, tsɔe to do aɖe si le glia ŋu la nu heɖiɖii ɖe anyigba.+

26 Esi wòva ɖo Yerusalem la,+ edze agbagba be yeawɔ ɖeka kple nusrɔ̃laawo, gake wo katã wonɔ vɔvɔ̃m nɛ, elabena womexɔe se be nusrɔ̃lae wònye o. 27 Eya ta Barnaba+ kpe ɖe eŋu eye wòkplɔe yi apostoloawo gbɔ hegblɔ ale si Aƒetɔ la ɖe eɖokui fiae le mɔa dzi+ eye wòƒo nu nɛ, kple ale si wòyi ɖaƒo nu vɔvɔ̃manɔmee le Yesu ƒe ŋkɔ me le Damasko la na wo tsitotsito.+ 28 Ale wònɔ wo gbɔ le Yerusalem, eye wòyina gbɔna faa heƒoa nu kple kakaɖedzi le Aƒetɔ la ƒe ŋkɔ me. 29 Eƒoa nu kple Yudatɔ siwo doa Helagbe hedzroa nya me kpli wo, ke woawo di mɔnu le eŋu be yewoawui.+ 30 Esi nɔviawo kpɔ esia dze sii la, wokplɔe yi Kaisarea, eye woɖoe ɖe Tarso.+

31 Azɔ hame si le Yudea blibo la kple Galilea kpakple Samaria+ la ƒe tome fa, eye wodo ŋusẽ wo, eye wonɔ dzidzim ɖe edzi le esi woyi edzi zɔ le Yehowa* vɔvɔ̃ me eye gbɔgbɔ kɔkɔe+ na akɔfafa wo ta.

32 Ke esi Petro zɔ mɔ to nutoa katã me la, eva ame kɔkɔe siwo le Lida la hã gbɔ.+ 33 Ekpɔ ŋutsu aɖe le afi ma, si ŋkɔe nye Ainea, ame si le lãmetutudɔ lém eye wòtsi aba dzi ƒe enyi sɔŋ. 34 Petro gblɔ nɛ be: “Ainea, Yesu Kristo da gbe le ŋuwò.+ Tso nàɖo wò aba.”+ Eye wòtso enumake. 35 Esi ame siwo katã le Lida kple Saron Tagba la kpɔe la, woxɔ Aƒetɔ la dzi se.

36 Ke nusrɔ̃la aɖe le Yopa, eŋkɔe nye Tabita, si woyɔna le Helagbe me be “Dorkas.”* Ewɔa dɔ nyui geɖewo eye wònaa nu amewo dɔmenyotɔe. 37 Ke edze dɔ le ŋkeke mawo me, eye wòku. Eya ta wole tsi nɛ eye wokɔe mlɔ dziƒoxɔ aɖe me. 38 Lida medidi tso Yopa gbɔ o, eya ta esi nusrɔ̃lawo se be Petro le du sia me la, wodɔ ame eve ɖo ɖe egbɔ kple kukuɖeɖe be: “Va mía gbɔ, mègahe ɖe megbe o.” 39 Ale Petro tso heyi kpli wo. Esi wòɖo la, wokplɔe yi dziƒoxɔa me; eye ahosiwo katã va egbɔ nɔ avi fam eye wotsɔ awu kple awu ʋlaya* geɖe siwo Dorkas tɔ na wo esime wònɔ wo gbɔ la le fiafiam. 40 Ke Petro na ame sia ame do go,+ eye wòdze klo do gbe ɖa. Eye wòtrɔ ɖe ame kukua ŋu gblɔ be: “Tabita, tsi tsitre!” Ale wòʋu ŋku, eye esi wòkpɔ Petro la, efɔ bɔbɔ nɔ anyi.+ 41 Ale wòlé eƒe alɔnu wòtso, eye wòyɔ ame kɔkɔeawo kple ahosiawo vɛ, eye wòkplɔe de asi na wo agbagbee.+ 42 Nya sia kaka ɖe Yopa blibo la katã, eye ame geɖewo va xɔ Aƒetɔ la dzi se.+ 43 Petro nɔ Yopa ŋkeke ʋɛ aɖewo le lãgbalẽŋudɔwɔla aɖe si ŋkɔe nye Simon gbɔ.+