Yeremiya
33 Eye Yehowa ƒe gbe va na Yeremiya zi evelia, esime wosikae ɖe Dzɔlawo ƒe Xɔxɔnu+ la be: 2 “Ale Yehowa, anyigba Wɔla, Yehowa, Ame si mèe heɖo egɔme anyi sesĩe; eya, ame si ŋkɔe nye Yehowa la, gblɔe nye esi, 3 ‘Yɔm, ekema matɔ na wò, eye magblɔ nu gã siwo gɔme womate ŋu ase o, eye mènya o la, na wò.’”+
4 “Elabena ale Yehowa, Israel ƒe Mawu la, gblɔ ɖe du sia me xɔwo kple Yuda-fiawo ƒe xɔ siwo wogbã ƒu anyi, le kpoƒuƒuawo kple yi ta,+ 5 kple ame siwo va be yewoawɔ aʋa kple Kaldeatɔwo, eye woatsɔ woawo ŋutɔwo, ame siwo mewu le nye dziku kple nye dɔmedzoe me la, ƒe kukuawo ayɔ teƒe siawo, wo, ame siwo ƒe nu vɔ̃ɖi wɔwɔ ta meɣla nye ŋkume ɖe du sia ɖo la, ŋue nye esi: 6 ‘Kpɔ ɖa, mana woahaya, eye woƒe lãme nasẽ;+ mada gbe le wo ŋu, eye mana ŋutifafa kple nyateƒe wo fũu.+ 7 Makplɔ Yuda ƒe aboyomeawo kple Israel ƒe aboyomeawo agbɔe,+ eye maɖo wo te abe tsã ene.+ 8 Makɔ wo ŋu tso nu vɔ̃ siwo katã wowɔ ɖe ŋunye ƒe fɔɖiɖi me,+ eye matsɔ nu vɔ̃ siwo wowɔ ɖe ŋunye kple woƒe dzidadawo katã ƒe fɔɖiɖi ake wo.+ 9 Azu dzidzɔŋkɔ, kafukafu kple atsyɔ̃ nam le anyigbadzidukɔ siwo katã ase nyui siwo katã wɔm mele na wo ŋu nya la dome.+ Ŋɔdzi alé wo, eye woadzo nyanyanya+ le nyui siwo katã mawɔ nɛ kple ŋutifafa si manae la ta.’”+
10 “Ale Yehowa gblɔe nye esi: ‘Teƒe sia si ŋu miegblɔ le be, ezu aƒedo, eye amegbetɔ kple lãwo megale afi ma o, Yuda duwo kple Yerusalem kpɔdomeewo tsi ƒuƒlu, eye amegbetɔ kple lã aɖeke megale eme o la, woagase 11 aseyetsotso kple dzidzɔɣli,+ ŋugbetɔsrɔ̃ ƒe gbe kple ŋugbetɔ ƒe gbe, eye woase amewo ƒe gbe woanɔ gbɔgblɔm be: “Mikafu aʋakɔwo ƒe Yehowa, elabena Yehowa nyo;+ eƒe lɔlɔ̃ si nu metsina o la li tegbee!”’+
“‘Woatsɔ akpedanunana ava Yehowa ƒe aƒe la me+ abe tsã ene, elabena makplɔ anyigba la ƒe aboyomeawo agbɔe,’ Yehowa ye gblɔe.”
12 “Ale aʋakɔwo ƒe Yehowa gblɔe nye esi: ‘Lãnyiƒe aganɔ teƒe zuaƒedo sia, si amegbetɔ alo lãwo megale o kple eƒe duwo katã me na lãkplɔviwo, eye woana woƒe lãhawo nagbɔ ɖe eme le afi ma.’+
13 “‘Alẽhawo agato wo xlẽlawo ƒe asi te ava yi le tonuto la ƒe duwo me, le balimeduwo me, le anyieheduwo me, le Benyamin-nyigba dzi, le Yerusalem nutowo me+ kple Yuda duwo me,’+ Yehowa ye gblɔe.”
14 “Yehowa be: ‘Kpɔ ɖa! Ŋkekewo li gbɔna, esime mawɔ ŋugbe nyui si medo ɖe Israel ƒe aƒe kple Yuda ƒe aƒe ŋu la dzi.+ 15 Le ŋkeke mawo me le ɣemaɣi la, mana atilɔ* dzɔdzɔe nadze na David,+ adrɔ̃ ʋɔnu dzɔdzɔe, eye wòawɔ nu dzɔdzɔe le anyigba la dzi.+ 16 Le ŋkeke mawo me la, woaɖe Yuda,+ eye Yerusalem anɔ anyi dedie.+ Ŋkɔ si woayɔ nɛ ye nye: Yehowae Nye Míaƒe Dzɔdzɔenyenye.’”+
17 “Elabena ale Yehowa gblɔe nye esi: ‘David ƒe dzidzimevi si abɔbɔ nɔ Israel ƒe aƒe ƒe fiazikpui dzi la nu matso o,+ 18 eye ame si asa numevɔ, atsɔ nuɖuvɔsa ado dzudzɔe, eye wòasa vɔ bubuwo ɣesiaɣi la, nu matso le nunɔla siwo nye Lewi viwo dome le ŋkunyeme o.’”
19 Eye Yehowa ƒe gbe gava na Yeremiya be: 20 “Ale Yehowa gblɔe nye esi, ‘Ne miate ŋu atu nye nubabla le ŋkeke kple zã ŋu, ale be ŋkeke kple zã magava le woƒe ɣeyiɣi dzi o la,+ 21 ema ko hafi woate ŋu atu nu, si mebla kple nye subɔla David,+ ale be eƒe dzidzimevi aɖeke manɔ anyi si anɔ eƒe fiazikpui dzi aɖu fia o;+ eye woate ŋu atu nye nu, si mebla kple nye subɔla Lewi vi siwo nye nunɔlawo hã.+ 22 Ale si ko dziƒonuwo mele xexlẽ me o, eye ƒutake mele dzidze me o la, nenemae mana nye subɔla David ƒe dzidzimeviwo kple Lewi vi siwo le subɔsubɔdɔ wɔm nam la hã nadzi ɖe edzii.’”
23 Eye Yehowa ƒe gbe gava na Yeremiya be: 24 “Mède dzesi nya si gblɔm dukɔ sia me tɔwo le be, ‘Ƒome eve siwo Yehowa tia la, egale wo gbe ge’ oa? Womedea bubu nye dukɔ la ŋu o, eye womegabunɛ be enye dukɔ o.
25 “Ale Yehowa gblɔe nye esi: ‘Ale si meɖo nye nubabla anyi ɖe ŋkeke kple zã ŋu,+ eye mewɔ sewo* na dziƒo kple anyigba la,+ 26 nenemae nyemagbe Yakob kple nye subɔla David ƒe dzidzimeviwo hã akpɔ o, eye nyemado kpo dziɖulawo ɖeɖe tso eƒe dzidzimeviwo me aɖo Abraham, Isak kple Yakob ƒe dzidzimeviwo nu o. Elabena maƒo woƒe aboyomeawo nu ƒu,+ eye makpɔ nublanui na wo.’”+