Marko
2 Le ŋkeke aɖewo megbe la, Yesu gayi Kapernaum, eye amewo se be ele aƒe me.+ 2 Eye ame geɖewo va ƒo ƒu ale gbegbe be teƒe aɖeke megali o, mɔ mele ʋɔtrua nu teti hã o, eye wòde asi nya nyui la gbɔgblɔ me na wo.+ 3 Eye ŋutsu ene kɔ lãmetututɔ aɖe gbɔna egbɔ.+ 4 Ke womete ŋu kɔe va ɖo Yesu gbɔ o le ameha la ta, eya ta wofo xɔ si me Yesu le la tame, eye esi woŋɔe vɔ la, woɖiɖi aba si dzi lãmetututɔa mlɔ la ɖe anyi. 5 Esi Yesu kpɔ woƒe xɔse+ la, egblɔ na lãmetututɔa be: “Vinye, wotsɔ wò nu vɔ̃wo ke wò.”+ 6 Ke agbalẽfialawo dometɔ aɖewo nɔ anyi ɖe afi ma, eye wole susum le woƒe dzi me be:+ 7 “Nu ka tae ame sia le nu ƒom ale? Ele busunya gblɔm. Ame kae ate ŋu atsɔ nu vɔ̃wo ake, ne menye Mawu ɖeka ko oa?”+ 8 Ke Yesu dze sii enumake be wole susum le wo ɖokuiwo me alea, eya ta ebia wo be: “Nu ka tae miele nu siawo susum le miaƒe dzi me?+ 9 Kae bɔbɔ wu, be woagblɔ na lãmetututɔ la be, ‘Wotsɔ wò nu vɔ̃wo ke’ loo, alo be woagblɔ be, ‘Tso nàtsɔ wò aba, eye nàzɔ’? 10 Ke be miadze sii be ŋusẽ le Amegbetɔvi+ la si be wòatsɔ nu vɔ̃wo ake le anyigba dzi la, . . .”+ egblɔ na lãmetututɔa be: 11 “Mele egblɔm na wò be: Tso nàtsɔ wò aba eye nàyi aƒewò me.” 12 Ale wòtso, eye wòtsɔ eƒe aba enumake hezɔ do go le wo katã ŋkume. Ale wo katã ƒe nu ku, eye wokafu Mawu gblɔ be: “Míekpɔ nu sia tɔgbi kpɔ o.”+
13 Egado go yi ƒuta, eye ameha la katã va egbɔ, eye wòte nufiafia wo. 14 Esi wòva yina la, ekpɔ Lewi, Alfeo vi, wòbɔbɔ nɔ adzɔxɔƒe, eye wògblɔ nɛ be: “Dze yonyeme.” Eye wòtso dze eyome.+ 15 Emegbe esime Yesu kple eƒe nusrɔ̃lawo le nuɖukplɔ̃ ŋu le Lewi ƒe me la, adzɔxɔlawo kple nu vɔ̃ wɔla gbogbo aɖewo va nɔ kplɔ̃a ŋu kpli wo, elabena wo dometɔ geɖe dze eyome.+ 16 Ke esi Farisitɔwo dometɔ siwo nye agbalẽfialawo kpɔ be ele nu ɖum kple nu vɔ̃ wɔlawo kpakple adzɔxɔlawo la, wobia eƒe nusrɔ̃lawo be: “Adzɔxɔlawo kple nu vɔ̃ wɔlawo hãe wòɖua nu kplia?” 17 Esi Yesu see la, egblɔ na wo be: “Ame siwo le lãmesẽ me la mehiã gbedala o, negbe ame siwo le dɔ lém ko. Menye ame dzɔdzɔewo yɔ gee meva o, ke boŋ nu vɔ̃ wɔlawoe.”+
18 Yohanes ƒe nusrɔ̃lawo kple Farisitɔwo tsia nu dɔna. Eya ta wova biae be: “Nu ka tae Yohanes ƒe nusrɔ̃lawo kple Farisitɔwo ƒe nusrɔ̃lawo tsia nu dɔna, evɔ wò nusrɔ̃lawo ya metsia nu dɔna o?”+ 19 Yesu ɖo eŋu na wo be: “Ðe ŋugbetɔsrɔ̃+ la xɔlɔ̃wo atsi nu adɔ esime ŋugbetɔsrɔ̃ la le wo gbɔa? Zi ale si ŋugbetɔsrɔ̃ la le wo gbɔ la, mehiã be woatsi nu adɔ o. 20 Ke ŋkekewo li gbɔna, esime woakplɔ ŋugbetɔsrɔ̃ la adzoe le wo gbɔ,+ ekema woatsi nu adɔ le ŋkeke ma dzi. 21 Ame aɖeke metsɔa avɔ yeye ƒe nuɖeɖi kaa awudziwui xoxo o. Ne ewɔe nenema la, avɔ yeyea aho ɖa le xoxoa ŋu, eye vuvua alolo wu tsãtɔ.+ 22 Eye ame aɖeke mekɔa wain yeye ɖe lãgbalẽgolo xoxowo me o. Ne ewɔe nenema la, ekema wain la awó lãgbalẽgoloawo, eye wain la kple lãgbalẽgoloawo siaa dome agblẽ. Ke boŋ wokɔa wain yeye ɖe lãgbalẽgolo yeyewo me.”
23 Le Sabat aɖe dzi la, Yesu zɔ to lugblewo me va yina, eye esi wole yiyim la, eƒe nusrɔ̃lawo de asi luawo ŋeŋe me.+ 24 Eya ta Farisitɔwo biae be: “Kpɔ ɖa, nu ka tae wole nu si mele se nu o la wɔm le Sabat dzi?” 25 Ke eɖo eŋu na wo be: “Ðe miexlẽ nu si David wɔ esime nuɖuɖu hiãe, eye dɔ wu eya kple eŋutimewo la kpɔ oa?+ 26 Ale si David ge ɖe Mawu ƒe aƒe la me eye wòɖu ŋkumeɖobolo siwo ŋu se meɖe mɔ ɖo na ame aɖeke be wòaɖu o, negbe nunɔlawo ko,+ eye wòna ɖe eŋutimewo hã abe ale si woŋlɔe ɖe nunɔlawo ƒe tatɔ Abiatar+ ŋuti nuŋlɔɖia me ene oa?” 27 Eye wògagblɔ na wo be: “Amegbetɔ tae woɖo Sabat la anyi ɖo,+ ke menye Sabat tae wowɔ amegbetɔ ɖo o. 28 Eya ta Amegbetɔvi la nye Sabat la gɔ̃ hã ƒe Aƒetɔ.”+