2 Samuel
7 Esi fia la le eya ŋutɔ ƒe aƒe* me,+ eye Yehowa na gbɔdzɔe tso eƒe futɔwo katã si me godoo va kpe la, 2 fia la gblɔ na nyagblɔɖila Natan+ be: “Kpɔ ɖa, mele sedertixɔ+ me, ke Mawu vavã la ƒe Aɖaka ya le avɔgbadɔ me.”+ 3 Natan gblɔ na fia la be: “Nu sia nu si le dzi me na wò la, heyi nàwɔe, elabena Yehowa li kpli wò.”+
4 Le zã ma ke me la, Yehowa ƒe gbe va na Natan be: 5 “Yi ɖagblɔ na nye subɔla David be, ‘Ale Yehowa gblɔe nye esi: “Wòe atu xɔ nam manɔ emea?+ 6 Elabena tso gbe si gbe mekplɔ Israel-viwo tso Egipte la, nyemenɔ xɔ aɖeke me kpɔ va se ɖe egbe sia o,+ ke boŋ menɔa agbadɔ kple avɔgbadɔ me tso teƒe yi teƒe.+ 7 Ɣeyiɣi siwo katã menɔ zɔzɔm kple Israel-viwo la, ɖe megblɔ na Israel-toawo me tɔ aɖe, si meɖo be wòakplɔ nye dukɔ Israel la zi ɖeka kpɔ be, ‘Nu ka tae mietu sedertixɔ nam oa?’”’ 8 Eya ta ale nàgblɔ na nye subɔla David ye nye esi: ‘Ale aʋakɔwo ƒe Yehowa gblɔe nye esi: “Nye ŋutɔe kplɔ wò tso lãnyiƒe le lãhawo yome,+ be nàzu kplɔla ɖe nye dukɔ Israel nu.+ 9 Manɔ kpli wò le afi sia afi si nàyi,+ matsrɔ̃ wò futɔwo katã ɖa le ŋgɔwò;+ eye mana wò ŋkɔ nanyɔ,+ abe ame ŋkuta siwo le anyigba dzi la ƒe ŋkɔ ene. 10 Mana nɔƒe nye dukɔ Israel eye mana woali ke, woanɔ afi ma, eye womagaɖe fu na wo azɔ o; eye ame vɔ̃ɖiwo magate wo ɖe anyi abe ale si wònɔ,+ 11 tso gbe si gbe meɖo ʋɔnudrɔ̃lawo+ nye dukɔ Israel nu ene o. Mana gbɔdzɔe wo tso woƒe futɔwo katã si me.+
“‘“Azɔ hã, Yehowa gagblɔ na wò be, Yehowa atso aƒe na wò.*+ 12 Ne wò ŋkekewo de+ eye wotsɔ wò mlɔ tɔgbuiwòwo gbɔ la, ekema maɖo wò dzidzimevi si ava ɖe yowòme, si anye wò ŋutɔ viwò,* eye mana eƒe fiaɖuƒe nali ke.+ 13 Eyae atu xɔ na nye ŋkɔ,+ eye mali ke eƒe fiaɖuƒe ƒe fiazikpui tegbee.+ 14 Mazu fofoa, eye eya azu vinye.+ Ne eda vo la, matsɔ amegbetɔ ƒe ati agbe nya nɛ, eye maƒoe, abe ale si woƒoa Amegbetɔviwo* ene.+ 15 Ke nyemaɖe nye amenuveve ɖa le edzi abe ale si meɖee ɖa le Saul,+ ame si meɖe ɖa le ŋkuwòme la, dzi ene o. 16 Wò aƒe kple wò fiaɖuƒe anɔ te sesĩe le ŋkuwòme tegbee; wò fiazikpui ali ke tegbee.”’”+
17 Natan gblɔ nya siawo katã kple ŋutega blibo la katã me nyawo na David.+
18 Ale Fia David va bɔbɔ nɔ Yehowa ŋkume hegblɔ be: “Oo Aƒetɔ Dziɖulagã Yehowa, ame kae menye? Eye nu kae nye aƒe nye, be nèkplɔm va ɖo afi sia ke?+ 19 Oo Aƒetɔ Dziɖulagã Yehowa, esia mesɔ gbɔ na wò o, eye nègale nu ƒom le wò subɔla ƒe aƒe ŋu le nu si ava dzɔ le etsɔme ʋĩi hã ŋu; Oo Aƒetɔ Dziɖulagã Yehowa, esia nye mɔfiame* na amegbetɔwo katã. 20 Oo Aƒetɔ Dziɖulagã Yehowa, nya kae nye, wò subɔla David magagblɔ na wò, esi nènyam nyuie?+ 21 Èwɔ nu gã siawo katã le wò nya la kple wò dzimedidi ta, eye nèɖe wo fia wò subɔla.+ 22 Oo Aƒetɔ Dziɖulagã Yehowa, esia tae nètri akɔ ɖo.+ Ame aɖeke mede nuwò o,+ eye Mawu bubu aɖeke meli kpe ɖe ŋuwò o;+ nu siwo míese kple to ɖo kpe esia dzi. 23 Dukɔ kae le anyigba dzi si le abe wò dukɔ Israel ene?+ Mawu yi ɖaɖe wo wozu eƒe dukɔ,+ eye wòwɔ nu gãwo kple nu dziŋɔwo na wo+ tsɔ de ŋkɔ eɖokui ŋu.+ Ènya dukɔwo kple woƒe mawuwo ɖa le wò dukɔ si nèɖe tso Egipte na ɖokuiwò la ta. 24 Èli ke wò dukɔ Israel na ɖokuiwò be wòanye wò dukɔ tegbee;+ eye wò ŋutɔ nèzu woƒe Mawu, Oo Yehowa.+
25 “Eya ta Oo Yehowa Mawu, wɔ ŋugbe si nèdo le wò subɔla kple eƒe aƒe ŋu la dzi tegbee, eye wɔ abe ale si tututu nèdo ŋugbee ene.+ 26 Eye wò ŋkɔ nede dzi tegbee,+ ne dukɔwo nagblɔ be: ‘Aʋakɔwo ƒe Yehowa ye nye Mawu le Israel nu,’ eye na wò subɔla David ƒe aƒe nali ke le ŋkuwòme.+ 27 Elabena wò, aʋakɔwo ƒe Yehowa, Israel ƒe Mawu, èɖe nu sia fia wò subɔla gblɔ be, ‘Matso aƒe* na wò.’+ Esia tae dzi ɖo wò subɔla ƒo wòle gbe sia dom ɖa na wò ɖo. 28 Azɔ Oo Aƒetɔ Dziɖulagã Yehowa, wòe nye Mawu vavã la, eye wò nyawo nye nyateƒe,+ eye nèdo nu nyui sia ŋugbe na wò subɔla. 29 Eya ta nedze ŋuwò nàyra wò subɔla ƒe aƒe la, be wòanɔ anyi le ŋkuwòme ɖaa;+ elabena Oo Aƒetɔ Dziɖulagã Yehowa, wò ŋutɔe do ŋugbe, eye wò yayra nana yayra nanɔ wò subɔla ƒe aƒe la dzi tegbee.”+