1 Korintotɔwo
12 Ke le gbɔgbɔmenunanawo ŋu la,+ nɔviwo, nyemedi be wòanɔ manyamanya na mi o. 2 Mienyae be esime mienye dukɔwo me tɔwo* la, woflu mi kplɔ mi trae yi legba maƒonuwo gbɔ,+ eye mienɔa wo yome yia afi sia afi. 3 Eya ta medi be mianyae be, ame aɖeke meƒoa nu to Mawu ƒe gbɔgbɔ dzi gblɔna be, “Yesu nye fiƒodeme!” o, eye ame aɖeke mate ŋu agblɔ be, “Yesu nye Aƒetɔ!” o, negbe to gbɔgbɔ kɔkɔe dzi ko.+
4 Ke nunana vovovowoe li, gake gbɔgbɔ ɖeka ma ke koe;+ 5 eye subɔsubɔdɔ vovovowoe li,+ gake Aƒetɔ ɖeka ma ke koe; 6 eye dɔ vovovowoe li, gake Mawu ɖeka ma kee wɔa dɔawo katã to amewo katã dzi.+ 7 Ke gbɔgbɔ la dzena wokpɔna le ame sia ame me hena taɖodzinu si ŋu viɖe le.+ 8 Elabena woto gbɔgbɔ la dzi na ale si woaƒo nu nunyatɔe la ame aɖe, eye woto gbɔgbɔ ma ke dzi na nuƒoƒo ŋuti sidzedze ame bubu, 9 woto gbɔgbɔ ma ke dzi na xɔse+ ame bubu, eye woto gbɔgbɔ ɖeka ma ke dzi na dɔdada+ ƒe nunana ame bubu, 10 eye wona ŋusẽdɔwo wɔwɔ+ ame bubu hã, wona nyagbɔgblɔɖi ame bubu, wona nya siwo tso gbɔgbɔ me la gɔme sese+ ame bubu, wona gbe bubuwo dodo+ ame bubu, eye wona gbewo gɔme ɖeɖe+ ame bubu. 11 Ke gbɔgbɔ ɖeka ma kee wɔa dɔ siawo katã, eye wòmaa wo na ame sia ame ale si wòlɔ̃.
12 Ale si ko ametia nye nu ɖeka gake ŋutinu geɖewo le eŋu, eye ameti ma ƒe ŋutinuwo sɔ gbɔ gake woƒo ƒu wɔ ameti ɖeka la,+ nenema kee Kristo la hã le. 13 Elabena gbɔgbɔ ɖeka me woto nyrɔ mí katã ɖe ŋutilã ɖeka me, míeɖanye Yudatɔwo alo Helatɔwo o, míeɖanye kluviwo alo ablɔɖemewo o, eye wona mí katã míeno gbɔgbɔ ɖeka.
14 Le nyateƒe me la, ametia menye ŋutinu ɖeka o, ke boŋ ŋutinu geɖewoe.+ 15 Ne afɔ agblɔ be, “Esi nyemenye asi o ta la, nyemenye ametia ƒe akpa aɖeke o” la, ema mewɔe be meganye ametia ƒe akpa aɖeke o. 16 Eye ne to agblɔ be, “Esi nyemenye ŋku o ta la, nyemenye ametia ƒe akpa aɖeke o” la, ema mewɔe be meganye ametia ƒe akpa aɖeke o. 17 Ne ameti blibo la katã nye ŋku ɖe, ekema afi kae nusese anɔ? Ne wo katã nye nusese ɖe, ekema afi kae nuʋeʋẽse anɔ? 18 Ke Mawu ɖo ŋutinuawo dometɔ ɖe sia ɖe wo teƒe le ametia ŋu abe ale si wòdi ene.
19 Ne wo katã nye ŋutinu ɖeka ɖe, ekema afi kae ametia anɔ? 20 Ke azɔ wonye ŋutinu geɖewo, gake ameti ɖeka. 21 Ŋku mate ŋu agblɔ na asi be, “Nyemehiã wò o”; eye ta hã mate ŋu agblɔ na afɔwo be, “Nyemehiã mi o.” 22 Ke boŋ ametia ƒe ŋutinu siwo dze abe ɖe wogbɔdzɔ wu ene la hiã vevie, 23 eye ametia ƒe akpa siwo míesusuna be bubu boo aɖeke mele wo ŋu o la, woawo ŋue míedea bubui wu,+ ale ŋutinu siwo menya kpɔ o la ŋue míetrɔa asi le nyuie wu, 24 evɔ ŋutinu siwo nya kpɔ la mehiã naneke o. Gake Mawu fɔ ametia ƒe ŋutinuwo kpe, eye wòna bubu geɖe akpa siwo hiã bubu la, 25 ale be mama aɖeke naganɔ ametia me o, ke boŋ ŋutinuawo nalé be na wo nɔewo sɔsɔe.+ 26 Eye ne ŋutinu ɖeka le fu kpem la, ŋutinu bubuawo katã kpea fu kplii;+ alo ne wodo ŋutinu ɖeka ɖe dzi la, ŋutinu bubuawo katã kpɔa dzidzɔ kplii.+
27 Ke miawoe nye Kristo ƒe ŋutilã,+ eye mia dometɔ ɖe sia ɖe nye ŋutinuawo dometɔ aɖe.+ 28 Eye Mawu de dɔ asi na ame vovovowo le hamea me: gbã la, apostolowo;+ evelia nyagblɔɖilawo;+ etɔ̃lia nufialawo;+ emegbe ŋusẽdɔwɔwɔwo;+ dɔdada ƒe nunana;+ kpekpeɖeŋunadɔwo; mɔfiafiaŋutetewo;+ gbe bubuwo dodo.+ 29 Amewo katãe nye apostolowoa? Amewo katãe nye nyagblɔɖilawoa? Amewo katãe nye nufialawoa? Amewo katãe wɔa ŋusẽdɔwoa? 30 Amewo katã sie dɔdada ƒe nunanawo lea? Amewo katãe ƒoa nu le gbegbɔgblɔ bubuwo mea? + Amewo katãe nye nyagɔmeɖelawoa?*+ 31 Ke miyi edzi mianɔ nunana siwo lolo wu la dim vevie.+ Ke azɔ mafia mɔ aɖe si de ŋgɔ wu la mi.+