Nyaɖeɖefia

11 Eye wotsɔ aɖa aɖe si le abe atizɔti*+ ene la de asi nam hegblɔ be: “Tso nàdzidze Mawu ƒe gbedoxɔa ƒe kɔkɔeƒe la kple vɔsamlekpui la kpakple ame siwo dea ta agu le eme la. 2 Gake ɖe xɔxɔnu si le gbedoxɔa ƒe kɔkɔeƒe la godo ya le eme, mègadzidzee o, elabena wotsɔe na dukɔwo, eye woafanya du kɔkɔe+ la ɣleti blaene vɔ eve.+ 3 Eye mana nye ɖasefo eveawo nanɔ akpanya me agblɔ nya ɖi ŋkeke akpe ɖeka alafa eve blaade.” 4 Ame siawoe amiti+ eveawo kple akaɖiti+ eveawo le tsitre ɖi na, eye wole tsitre ɖe anyigba ƒe Aƒetɔ la ŋkume.+

5 Ne ame aɖe di be yeawɔ nu vevi wo la, dzo dona tso woƒe nu me fiãa woƒe futɔwo. Ne ame aɖe adi be yeawɔ nu vevi wo la, woawu eya hã nenema ke. 6 Ŋusẽ le ame siawo si be woatu dziƒo nu,+ ale be tsi nagadza+ le ŋkeke siwo me wole nya gblɔm ɖi la me o, ŋusẽ le wo si hã be woatrɔ tsiwo woazu ʋu,+ eye woahe fuwɔame ɖe sia ɖe ƒomevi ava anyigba la dzi zi gbɔ zi geɖe ale si wolɔ̃.

7 Ne wowu woƒe ɖaseɖiɖi la nu la, lã wɔadã si do tso aʋli me la awɔ aʋa kpli wo, eye wòaɖu wo dzi ahawu wo.+ 8 Woƒe kukuawo anɔ du gã, si woyɔ le lododo me be Sodom kple Egipte, afi si wohe woƒe Aƒetɔ hã ɖe ati ŋu le la, ƒe mɔdodo gã la dzi. 9 Eye ame ƒomeviwo, towo kple gbegbɔgblɔwo kple dukɔwo me tɔwo akpɔ woƒe kukuawo ŋkeke etɔ̃ kple afã,+ eye womaɖe mɔ be woaɖi wo o. 10 Eye anyigbadzinɔlawo kpɔ dzidzɔ hetso aseye le woƒe kua ŋuti, eye woɖo nunana ɖe wo nɔewo, elabena nyagblɔɖila eve siawo wɔ fu wo ŋutɔ.

11 Le ŋkeke etɔ̃ kple afã la megbe la, agbegbɔgbɔ tso Mawu gbɔ ge ɖe wo me,+ eye wotso ɖe woƒe afɔwo dzi, ale vɔvɔ̃ gã aɖe ɖo ame siwo kpɔ wo la. 12 Eye wose gbe gã aɖe tso dziƒo wògblɔ na wo be: “Miva afii.” Eye wole alilikpo me yi dziƒo, eye woƒe futɔwo kpɔ wo. 13 Le gaƒoƒo ma me la, anyigba ʋuʋu sesĩe ŋutɔ, eye du la ƒe akpa ewolia mu; eye anyigbaʋuʋu la wu ame akpe adre, eye vɔvɔ̃ ɖo ame susɔeawo, eye wotsɔ ŋutikɔkɔe na dziƒo Mawu la.

14 Fuwɔame+ evelia nu va yi. Kpɔ ɖa! Fuwɔame etɔ̃lia gbɔna kaba.

15 Azɔ mawudɔla adrelia ku eƒe kpẽ la.+ Eye gbe gãwo ɖi le dziƒo le gbɔgblɔm be: “Xexemefiaɖuƒe la trɔ zu mía Aƒetɔ+ kple eƒe Kristo+ la ƒe Fiaɖuƒe, eye aɖu fia tso mavɔ me yi mavɔ me.”+

16 Eye ametsitsi blaeve vɔ ene+ siwo bɔbɔ nɔ woƒe fiazikpuiwo dzi le Mawu ŋkume la tsyɔ mo anyi, eye wode ta agu na Mawu, 17 le gbɔgblɔm be: “Míeda akpe na wò, Yehowa* Mawu, Ŋusẽkatãtɔ, ame si li,+ eye wònɔ anyi, elabena èxɔ wò ŋusẽ gã la, eye nèdze fiaɖuɖu gɔme.+ 18 Ke dukɔwo do dɔmedzoe, eye wò ŋutɔ nèɖe wò dziku ɖe go, eye ɣeyiɣi ɖoɖi la de be woadrɔ̃ ʋɔnu ame kukuwo, eye nàɖo eteƒe+ na wò kluvi nyagblɔɖilawo+ kple ame kɔkɔewo kpakple ame siwo vɔ̃a wò ŋkɔ la, ame tsɛwo kple ame ŋkutawo siaa, eye nàtsrɔ̃ ame siwo le anyigba la gblẽm.”+

19 Eye woʋu Mawu ƒe gbedoxɔ ƒe kɔkɔeƒe si le dziƒo la, eye wokpɔ eƒe nubablaɖaka la le eƒe gbedoxɔ ƒe kɔkɔeƒe la.+ Eye dzi ke dzo, gbeɖiɖiwo ɖi, dzi ɖe gbe, anyigba ʋuʋu, eye kpetsi gã aɖe dza.