Ezekiel
12 Yehowa ƒe gbe gava nam be: 2 “Amegbetɔvi, ƒome dzeaglã mee nèle. Ŋku li na wo be woakpɔ nu, gake womekpɔa nu o, eye to li na wo be woase nu, gake womesea nu o,+ elabena ƒome dzeaglã wonye.+ 3 Amegbetɔvi, do aboyomeyigba na ɖokuiwò. Eye le ŋkeke me la, ʋu nàyi aboyo me le wo ŋkume. Ʋu le aƒewò me le wo ŋkume nàyi aboyo me le teƒe bubu. Ðewohĩ woade dzesii, togbɔ be ƒome dzeaglãe wonye hã. 4 Tsɔ aboyomeyigba si nèdo la do goe le wo ŋkume le ŋkeke me, eye le fiẽ me la, dzo le wo ŋkume abe ame si woɖe aboyoe ene.+
5 “Ŋɔ gli le wo ŋkume, eye nàtsɔ wò nuwo ato eme ado ɖe egodo.+ 6 Kɔ wò nuawo ɖe abɔta le wo ŋkume, eye nàkɔe dzoe ne viviti do. Tsyɔ nu ŋkume, be màgakpɔ anyigba la o, elabena metsɔ wò ɖo dzesi na Israel ƒe aƒe la.”+
7 Eye mewɔ abe ale si tututu wode se nam ene. Mekɔ nye agba si le abe aboyomeyigba ene la doe le ŋkeke me, eye metsɔ asi ŋɔ gli la le fiẽ me. Eye esi viviti do la, mekɔ nye nuwo ɖo abɔta doe le wo ŋkume.
8 Yehowa ƒe gbe gava nam le ŋdi me be: 9 “Amegbetɔvi, ɖe Israel ƒe aƒe, si nye ƒome dzeaglã la, mebia wò be, ‘Nu ka wɔm nèle?’ hã oa? 10 Gblɔ na wo be: ‘Ale Aƒetɔ Dziɖulagã Yehowa gblɔe nye esi: “Nya sia ku ɖe amegã+ si le Yerusalem kple Israel ƒe aƒe blibo la me tɔ siwo le dua me la ŋu.”’
11 “Gblɔ be: ‘Dzesie menye na mi.+ Ale si tututu mewɔ la, nenemae woawɔ woe. Woakplɔ wo adzoe, woaɖe aboyo wo.+ 12 Amegã si le wo dome la atsɔ eƒe nuwo ɖe abɔta adzo ne viviti do. Aŋɔ gli ahatsɔ eƒe nuawo ato eme adoe.+ Atsyɔ nu ŋkume be wòagakpɔ anyigba la o.’ 13 Mada nye ɖɔ atsyɔ edzi, eye nye ɖɔ aɖee.+ Eye makplɔe ayi Babilon, ayi Kaldeatɔwo ƒe anyigba dzi, ke makpɔe o; afi mae wòaku ɖo.+ 14 Maka ame siwo katã le eŋu, eƒe kpeɖeŋutɔwo kple eƒe aʋakɔwo, ahlẽ ɖe goawo katã me;+ eye maɖe yi le aku me anɔ wo yome.+ 15 Eye ne menya wo ɖo ɖe dukɔwo dome, eye meka wo hlẽ ɖe anyigbawo dzi la, woadze sii be, nyee nye Yehowa. 16 Ke mana ame ʋɛ aɖewo nasusɔ le wo dome tso yi, dɔwuame kple dɔvɔ̃ si me, ale be woagblɔ woƒe ŋunyɔnuwɔwɔwo katã le dukɔ siwo me woayi la dome; ne woadze sii be, nyee nye Yehowa.”
17 Eye Yehowa ƒe gbe gava nam be: 18 “Amegbetɔvi, nɔ ƒoƒom kpakpakpa ne èle wò abolo ɖum, eye nɔ dzodzom nyanyanya le dzimaɖeɖi me ne èle tsi nom.+ 19 Gblɔ na anyigba la dzi tɔwo be: ‘Ale Aƒetɔ Dziɖulagã Yehowa gblɔ na Yerusalem nɔla siwo le Israel-nyigba dzi lae nye esi: “Woaɖu woƒe abolo le dzimaɖeɖi me, eye woano woƒe tsi le ŋɔdzi me, elabena woƒe anyigba blibo la azu gbegbe+ keŋkeŋ le edzinɔlawo katã ƒe ŋutasesẽ ta.+ 20 Du siwo me amewo le la azu aƒedo, eye anyigba la azu gbegbe sɔŋ;+ ne miadze sii be, nyee nye Yehowa.”’”+
21 Yehowa ƒe gbe gava nam be: 22 “Amegbetɔvi, lo ka ƒomevie nye esia dom miele le Israel-nyigba la dzi be, ‘Ŋkekewo va yi, ke hã ŋutega aɖeke meva eme o’?+ 23 Eya ta gblɔ na wo be, ‘Ale Aƒetɔ Dziɖulagã Yehowa gblɔe nye esi: “Mana nya sia nu natso, eye womagado lo sia le Israel azɔ o.”’ Ke boŋ gblɔ na wo be, ‘Ŋkekeawo tu aƒe,+ eye ŋutegawo katã ava eme.’ 24 Elabena aʋatsoŋutega alo alakpafakaka maganɔ Israel ƒe aƒe la me azɔ o.+ 25 ‘“Elabena nye Yehowa maƒo nu. Nya sia nya si magblɔ la ava eme, eye magahe ɖe megbe o.+ Oo ƒome dzeaglã, magblɔ nya le wò ŋkekeawo me+ eye mawɔ edzi,” Aƒetɔ Dziɖulagã Yehowa ye gblɔe.’”
26 Yehowa ƒe gbe gava nam be: 27 “Amegbetɔvi, nya si gblɔm Israel-viwo* lee nye esi, ‘Ɣeyiɣi didi aɖe megbee ŋutega si kpɔm wòle la ava eme, eye nya si gblɔm wòle ɖi la ava eme le etsɔme ʋĩi.’+ 28 Eya ta gblɔ na wo be, ‘Ale Aƒetɔ Dziɖulagã Yehowa gblɔe nye esi: “‘Nye nya aɖeke mahe ɖe megbe o. Nya sia nya si magblɔ la, ava eme,’ Aƒetɔ Dziɖulagã Yehowa ye gblɔe.”’”