Efesotɔwo
6 Mi ɖeviwo, miɖo to mia dzilawo+ le Aƒetɔ la me, elabena esia le eteƒe. 2 “Bu fofowò kple dawò,”+ esia nye sedede gbãtɔ si ŋu ŋugbedodo kpe ɖo: 3 “Ne eme nanyo na wò,* eye nànɔ anyigba la dzi eteƒe nadidi.” 4 Mi fofowo, miganɔ dziku dom na mia viwo o,+ ke boŋ miyi edzi mianɔ wo hem le Yehowa*+ ƒe amehehe+ kple nuxɔxlɔ̃* me.
5 Kluviwo, mikɔ dzi me miaɖo to amegbetɔ siwo nye miaƒe aƒetɔwo+ le vɔvɔ̃ kple dzodzo nyanyanya me, abe ale si miawɔ na Kristo la ene, 6 menye le ameŋkumenuwɔwɔ me be miadze ame ŋu ko o,+ ke boŋ abe Kristo ƒe kluvi siwo wɔa Mawu ƒe lɔlɔ̃nu tso luʋɔ* blibo me ene.+ 7 Miwɔ miaƒe kluvidɔ la kple lɔlɔ̃nu faa abe Yehowa* ye miele ewɔm na ene,+ ke menye na amewo o, 8 elabena mienyae be nu nyui sia nu nyui si ame wɔna la, eya kee wòaxɔ tso Yehowa* gbɔ,+ eɖanye kluvi alo ablɔɖeme o. 9 Eye mi aƒetɔwo hã, miyi edzi mianɔ nu wɔm ɖe wo ŋu nenema ke, eye midzudzɔ ŋɔdzidodo na wo, elabena mienyae be mia kpli wo siaa ƒe Aƒetɔ le dziƒo,+ eye ameŋkumekpɔkpɔ aɖeke mele egbɔ o.
10 Mlɔeba la, miyi edzi miasẽ ŋu ɖe edzi+ le Aƒetɔ la kple eƒe ŋusẽ triakɔ la me. 11 Mido aʋawɔnu blibo+ si tso Mawu gbɔ la, be miate ŋu anɔ te sesĩe ɖe Abosam ƒe aɖaŋu vɔ̃wo* nu; 12 elabena míele kame tem,+ menye kple ʋu kpakple ŋutilã o, ke boŋ mía kple dziɖuɖuwo, ŋusẽwo, xexe doviviti sia me dziɖulawo kple gbɔgbɔmeŋusẽ vɔ̃ɖi+ siwo le dziƒonutowo me lae le kame tem. 13 Le esia ta mido aʋawɔnu blibo si tso Mawu gbɔ la,+ ne miate ŋu anɔ te le ŋkeke vɔ̃ la dzi, eye ne miewu nuwo katã nu vɔ la, mianɔ tsitre sesĩe.
14 Eya ta minɔ tsitre sesĩe, eye mitsɔ nyateƒe ƒe alidziblanu la bla miaƒe aliwo dzi,+ eye mido dzɔdzɔenyenye ƒe akɔtakpoxɔnu la,+ 15 eye mitsɔ dzadzraɖo ɖe ŋutifafa nya nyuia gbɔgblɔ ŋu do ɖe miaƒe afɔwo.+ 16 Gawu la, milé xɔse ƒe akpoxɔnu gã,+ si miatsɔ atsi vɔ̃ɖitɔ la ƒe aŋutrɔ bibiawo katã nu la ɖe asi.+ 17 Miɖɔ xɔxɔ ƒe gakuku la,+ eye mitsɔ gbɔgbɔ la ƒe yi, si nye Mawu ƒe nya la, ɖe asi,+ 18 eye minɔ gbedodoɖa ɖe sia ɖe ƒomevi+ kple kokoƒoƒo dzi ɣeawokatãɣi le gbɔgbɔ me.+ Eya ŋuti minɔ ŋudzɔ ɣeawokatãɣi ne mianɔ kokoƒoƒo dzi ɖe ame kɔkɔewo katã ta. 19 Mido gbe ɖa ɖe nye hã tanye, be ne meke nu la, mate ŋu aƒo nu faa dzideƒotɔe, ale be mana woanya nya nyui la ƒe nya ɣaɣla kɔkɔe la,+ 20 nya nyui si ƒe amedɔdɔ+ menye hele kɔsɔkɔsɔwo me ɖo, ne dzi naɖo ƒonye maƒo nu tso eŋu abe ale si dze ene.
21 Ke be miawo hã mianya ale si nɔnɔmeawo le le gbɔnye, kple ale si mele la, nɔvi lɔlɔ̃tɔ Tikiko,+ si nye subɔla nuteƒewɔla le Aƒetɔ la me la, ana mianya nuwo katã.+ 22 Mele edɔm ɖe mia gbɔ le susu sia tututu ta, be mianya ale si míele ne wòafa akɔ na mi.
23 Ŋutifafa kple lɔlɔ̃, si ŋu xɔse kpe ɖo la, natso Mawu Fofo la kple Aƒetɔ Yesu Kristo gbɔ na nɔviawo. 24 Amenuveve nanɔ kple ame siwo katã si lɔlɔ̃ si nu metsina o le na mía Aƒetɔ Yesu Kristo la.