1 Samuel

20 Eye David si tso Nayot le Rama va Yonatan gbɔ hebiae be: “Nu kae mewɔ?+ Vo kae meda, eye nu vɔ̃ kae mewɔ ɖe fofowò ŋu, hafi wòle didim be yeaɖe nye agbe* ɖa?” 2 Yonatan ɖo eŋu nɛ be: “Nede megbe xaa!+ Mèle kuku ge o. Kpɔ ɖa! Fofonye mawɔ nu gã alo nu sue aɖeke, ne megblɔe nam o. Nu ka ŋuti fofonye aɣla nu sia ɖem? Nu sia madzɔ o.” 3 Ke David gaka atam gblɔ be: “Fofowò nyae nyuie be, mèlɔ̃a nu le gbɔnye o,+ eya ta agblɔ be: ‘Mele be Yonatan nanya naneke tso eŋu ne wòavee o.’ Ke zi ale si Yehowa le agbe, eye wò hã èle agbe la,* nye kple ku dome megadidi o!”+

4 Yonatan gagblɔ na David be: “Nu sia nu si nàgblɔ* la, mawɔe na wò.” 5 Eye David gblɔ na Yonatan be: “Kpɔ ɖa! Etsɔe nye dzinu yeye,+ eye wòle nam godoo be mabɔbɔ nɔ anyi aɖu nu kple fia la; do mɔm madzo aɖaɣla ɖokuinye ɖe gbe me, va se ɖe ŋkeke etɔ̃lia ƒe fiẽ. 6 Ne fofowò de dzesii be nyemeli o la, ekema gblɔ be: ‘David bia mɔ le gbɔnye be yeaƒu du ayi yewo de Betlehem,+ elabena ƒome blibo la le ƒevɔ sa ge le afi ma.’+ 7 Ne egblɔ be: ‘Enyo!’ la, ekema wò dɔla ŋu fa. Ke ne edo dziku la, ekema nyae be eɖo tame vɔ̃ ɖe ŋunye. 8 Eya ta ve wò dɔla nu,+ elabena wò kple wò dɔla mieɖo Yehowa ƒe nubabla me.+ Ke ne meda vo la,+ ekema wò ŋutɔ wum. Nu ka ŋuti nàkplɔm ayi na fofowò?”

9 Yonatan ɖo eŋu nɛ be: “Nede megbe xaa be mawɔ nu ma tɔgbi ɖe ŋuwò! Ne menyae be fofonye ɖo tame vɔ̃ ɖe ŋuwò la, ɖe nyemagblɔe na wò oa?”+ 10 Eye David bia Yonatan be: “Ne fofowò da gbe ɖe gbɔwò ɖe, ame kae agblɔe nam?” 11 Yonatan gblɔ na David be: “Wò ya va míayi gbe me.” Ale wo kple eve la woyi gbe me. 12 Eye Yonatan gblɔ na David be: “Yehowa, Israel ƒe Mawu la, nanye ɖasefo, be etsɔ ɣealewoɣi, alo ŋkeke etɔ̃a gbe la, mate fofonye ƒe nu me ase. Ne susu nyui le esi ɖe David ŋu la, ekema ɖe nyemadɔ ame ɖe wò woava gblɔe na wò oa? 13 Ke ne fofonye di be yeawɔ vɔ̃ wò, gake nyemeva gblɔe na wò o hedo mɔ wò le ŋutifafa me o la, ekema Yehowa nefia Yonatan, eye wòagafiae ɖe edzi. Yehowa nenɔ kpli wò+ abe ale si wònɔ kple fofonye ene.+ 14 Eye ne megale agbe la, ɖe màɖe Yehowa ƒe amenuveve afiam, eye ne meku hã màɖee afiam oa?+ 15 Eye wò amenuveve la nu megatso le aƒenye me o tegbee,+ ne Yehowa ɖe David ƒe futɔwo katã ɖa le anyigba dzi gɔ̃ hã.” 16 Eya ta Yonatan bla nu kple David ƒe aƒe gblɔ be, “Yehowa abia akɔnta tso David ƒe futɔwo si.” 17 Ale Yonatan gana David ka atam nɛ ɖe lɔlɔ̃ si wòtsɔ lɔ̃e la dzi, elabena elɔ̃e abe ale si wòlɔ̃ eya ŋutɔ ɖokui ene.*+

18 Eye Yonatan gblɔ nɛ be: “Etsɔe nye dzinu yeye,+ eye woade dzesii be mèli o, elabena wò zikpui atsi ƒuƒlu. 19 Woagade dzesi wò anyimanɔmanɔ la wu le ŋkeke etɔ̃a gbe, eya ta yi afi si nèbe ɖo tsã* la, eye nànɔ kpe sia xa. 20 Mada aŋutrɔ etɔ̃ ɖo ɖe kpea xa, abe nanee medzidze da ene. 21 Ne medɔ subɔvi aɖe ɖa la, magblɔ be: ‘Yi ɖadi aŋutrɔawo.’ Ne megblɔ na subɔvia be: ‘Kpɔ ɖa! Aŋutrɔawo le axawò afii, fɔ wo’ la, ekema va, elabena zi ale si Yehowa le agbe la, efia be ŋuwò fa, vɔ̃ aɖeke madzɔ ɖe dziwò o. 22 Ke ne megblɔ na ɖekakpui la be: ‘Kpɔ ɖa! Aŋutrɔawo le ŋgɔwò ɖaa’ la, ekema dzo, elabena Yehowa do mɔ wò. 23 Ke nya siwo nye kpli wò míegblɔ+ la, Yehowa nenɔ nye kpli wò dome tegbee.”+

24 Eye David ɣla eɖokui ɖe gbea me. Esi dzinu yeye ɖo la, fia la bɔbɔ nɔ eƒe zikpui dzi be yeaɖu nu.+ 25 Fia la bɔbɔ nɔ teƒe si wònɔna edziedzi le glia ŋu. Yonatan dze ŋgɔe, eye Abner+ bɔbɔ nɔ Saul xa, ke David ƒe nɔƒe ya tsi ƒuƒlu. 26 Saul megblɔ nya aɖeke gbe ma gbe o, elabena ebu be: ‘Nanee dzɔ, ale be eŋu mekɔ o.+ Ɛ̃, anye eŋutie mekɔ o.’ 27 Eye le ŋkeke evea gbe, si nye ŋkeke si kplɔ dzinu yeyea ɖo dzi la, David ƒe nɔƒe la gatsi ƒuƒlu kokoko. Eye Saul bia via Yonatan be: “Nu ka tae Isai+ vi la meva nua ɖuƒe etsɔ kple egbe siaa o?” 28 Yonatan ɖo eŋu na Saul be: “David ɖe kuku nam be maɖe mɔ na ye yeayi Betlehem.+ 29 Eye wògblɔ be: ‘Meɖe kuku, na mayi, elabena míaƒe ƒomea le vɔ sa ge le dua me, eye nɔvinyee ɖo du ɖem. Eya ta ne ève nunye la, ekema meɖe kuku, na maƒu du ayi aɖakpɔ nɔvinyewo ɖa.’ Esia tae meva fia ƒe kplɔ̃ ŋu o ɖo.” 30 Ale Saul do dɔmedzoe ɖe Yonatan ŋu vevie gblɔ nɛ be: “Wò nyɔnu dzeaglã ƒe vi, menyae nyuie be, ètia Isai vi la be nàtsɔ ado ŋukpe ɖokuiwò, eye nàdo ŋukpe dawò.* 31 Elabena ŋkeke ale si Isai vi la le agbe le anyigba dzi la, wò ŋutɔ kple wò fianyenye la miali ke o.+ Eya ta dɔ, ne woaɖakplɔe vɛ nam, elabena edze na ku.”*+

32 Ke Yonatan bia fofoa Saul be: “Nu ka tae woawui ɖo?+ Nu kae wòwɔ?” 33 Enumake Saul da akplɔ be yeatɔe,+ eye Yonatan dze sii be ye fofo ɖoe kplikpaa be yeawu David.+ 34 Enumake dzi ku Yonatan vevie wòtso le kplɔ̃a ŋu, eye meɖu abolo le dzinu yeye ƒe ŋkeke evelia dzi o, elabena David ƒe nya la te ɖe edzi,+ eye eya ŋutɔ fofoa do ŋukpee.

35 Esi ŋu ke la, Yonatan dze mɔ yi gbe me le teƒe si eya kple David woɖo ɖi be yewoakpe le, eye ɖekakpui dzaa aɖe si nye eƒe subɔvi la nɔ eŋu.+ 36 Eye wògblɔ na eƒe subɔvi la be: “Meɖe kuku, ƒu du yi ɖadi aŋutrɔ siwo da ge mala.” Subɔvi la ƒu du yi, eye Yonatan da aŋutrɔ la to eta. 37 Esi subɔvia ɖo afi si aŋutrɔ si Yonatan da la dze la, Yonatan do ɣli ɖe subɔvi la yome gblɔ be: “Alo menye aŋutrɔ lae nye ema ɖaa le ŋgɔwò oa?” 38 Eye Yonatan gado ɣli ake ɖe subɔvia yome be: “Ðe abla! Netsɔ! Mègatɔ o!” Eye Yonatan ƒe subɔvi la yi ɖafɔ aŋutrɔawo heva eƒe aƒetɔ gbɔ. 39 Ke subɔvia menya nu si le edzi yim o; negbe Yonatan kple David koe nya. 40 Emegbe Yonatan tsɔ eƒe aʋawɔnuawo na eƒe subɔvi la gblɔ nɛ be: “Tsɔ wo yi dua me.”

41 Esi subɔvia dzo la, David do go tso afi ma lɔƒo, le anyiehe gome. Eye wòdze klo tsyɔ mo anyi zi etɔ̃, eye wogbugbɔ nu na wo nɔewo hefa avi ɖe wo nɔewo dzi, ke David ƒe avifafa nu sẽ wu. 42 Eye Yonatan gblɔ na David be: “Heyi le ŋutifafa me, elabena mí ame evea míeka atam+ le Yehowa ƒe ŋkɔ me be: ‘Yehowa nenɔ nye kpli wò dome, eye wòanɔ nye dzidzimeviwo kple wò dzidzimeviwo dome tegbee.’”+

Ale David tso dze mɔ, eye Yonatan hã yi dua me.