4 Mose
12 Ke Miriam kple Aron de asi nuƒoƒo me le Mose ŋu le Kus nyɔnu si wòɖe la ta.+ 2 Eye wogblɔ be: “Mose ɖeɖe dzi koe Yehowa ƒoa nu toea? Alo ɖe meƒoa nu toa míawo hã dzi oa?”+ Yehowa nɔ nya siawo sem.+ 3 Ke Mose nye ame si fa wu*+ ame siwo katã le anyigba dzi.
4 Enumake Yehowa gblɔ na Mose, Aron kple Miriam be: “Mi ame etɔ̃a mido go miayi takpegbadɔ la nu.” Eye wo ame etɔ̃a woyi. 5 Eye Yehowa ɖi va le alilikpo dodo+ me, eye wòtɔ ɖe takpegbadɔa nu yɔ Aron kple Miriam. Eye wo ame evea wote yi ŋgɔ. 6 Eye wògblɔ be: “Meɖe kuku, mise nye nyawo. Ne ame aɖe nye Yehowa ƒe nyagblɔɖila le mia dome la, ŋutega mee meɖea ɖokuinye fianɛ le,+ eye drɔ̃e mee meƒoa nu kplii le.+ 7 Ke menye aleae mewɔna na nye subɔla Mose ya o! Metsɔ nye aƒe blibo la de esi.*+ 8 Meƒoa nu kplii ŋkume kple ŋkume+ eme kɔna eye nyemetoa adzo nɛ o; ekpɔa Yehowa ƒe nɔnɔme. Ekema nu ka ta mievɔ̃ o, eye mieƒo nu le nye subɔla Mose ŋu?”
9 Ale Yehowa do dɔmedzoe ɖe wo ŋu eye wòtrɔ dzo le wo gbɔ. 10 Eye alilikpo la ho tso agbadɔ la tame, eye kpɔ ɖa, anyidɔ* ƒo ɖe Miriam ŋu eye eŋuti katã fu kpii abe sno ene!+ Esi Aron trɔ ɖe Miriam ŋu la, kpɔ ɖa, anyidɔ ƒo ɖe eŋu.+ 11 Enumake Aron gblɔ na Mose be: “Taflatsɛ, nye aƒetɔ! Meɖe kuku, mègabu nu vɔ̃ sia na mí o. Míewɔ bometsinu. 12 Meɖe kuku, mègana wòanɔ abe ame si ku ene, abe ame si ƒe ŋutilã ƒe akpa aɖe nyi hafi do tso dadaa ƒe dɔ me ene o!” 13 Eye Mose ƒo koko na Yehowa be: “Oo Mawu, meɖe kuku, da gbe le eŋu dzro! Meɖe kuku!”+
14 Yehowa gblɔ na Mose be: “Ne ɖe fofoa ɖe ta ɖe mo nɛ la, ɖe manye ŋukpe nɛ ŋkeke adre oa? Eya ta na woaɖee ɖe aga wòanɔ asaɖa la godo ŋkeke adre,+ eye emegbe woagaxɔe.” 15 Ale woɖe Miriam ɖe aga yi asaɖa la godo ŋkeke adre,+ eye dukɔ la meho o, va se ɖe esime wogaxɔ Miriam hafi. 16 Emegbe dukɔ la ho tso Hazerot,+ eye wova ƒu asaɖa anyi ɖe Paran gbedzi.+