2 Fiawo

17 Le Yuda-fia Ahaz ƒe ƒe wuievelia me la, Hosea,+ Ela vi, zu fia le Samaria ɖe Israel dzi; eɖu fia ƒe asieke. 2 Ewɔ nu si nye vɔ̃ le Yehowa ŋkume, ɖeko etɔ mede Israel-fia siwo do ŋgɔ nɛ la tɔ nu o. 3 Asiria-fia Salmaneser ho ɖe eŋu,+ eye Hosea zu eƒe subɔvi hexea adzɔ nɛ.+ 4 Ke Asiria-fia se be Hosea ɖo nugbe ɖe ye ŋu, elabena edɔ amewo ɖo ɖe Egipte-fia+ So gbɔ, eye metsɔ adzɔ vɛ na Asiria-fia abe ƒe siwo do ŋgɔ la ene o. Eya ta Asiria-fia lée tu, eye wònɔ babla le gaxɔ me.

5 Ale Asiria-fia ho ɖe Israel-nyigba blibo la ŋu, eye wòɖe to ɖe Samaria ƒe etɔ̃. 6 Le Hosea ƒe ƒe asiekelia me la, Asiria-fia xɔ Samaria.+ Eɖe aboyo Israel+ yi Asiria, eye wòna wonɔ Hala kple Habor le Gozan-tɔsisi+ la nu kple Mediatɔwo ƒe duwo me.+

7 Eva eme alea, elabena Israel-viwo wɔ nu vɔ̃ ɖe Yehowa woƒe Mawu, ame si kplɔ wo tso Egipte-nyigba dzi, tso Egipte-fia Farao ƒe asi me+ la ŋu. Wosubɔ* mawu bubuwo,+ 8 wozɔ le dukɔ siwo Yehowa nya le Israel-viwo ŋgɔ la ƒe sewo kple kɔnu siwo Israel-fiawo ɖo anyi la nu.

9 Israel-viwo ti nu siwo menyo le Yehowa woƒe Mawu la ŋkume o la yome. Wotu nuxeƒewo ɖe woƒe duwo katã me,+ tso dzɔlawo ƒe mɔ́ sesẽ la gbɔ va se ɖe keke du sesẽ la gbɔ ke.* 10 Wowɔ trɔ̃sɔtiwo kple Aserawo*+ ɖe togbɛ kɔkɔwo katã dzi kple ati damawo katã te;+ 11 eye wodoa dzudzɔ le nuxeƒewo katã, abe dukɔ siwo Yehowa nya le wo ŋgɔ ke ene.+ Wowɔ nu vɔ̃ɖiwo tsɔ do dziku na Yehowa.

12 Wosubɔ legba nyɔŋuwo,*+ legba siwo ŋu Yehowa gblɔ le na wo be: “Migawɔ nu sia o!”+ 13 Yehowa to eƒe nyagblɔɖilawo kple ŋutegakpɔlawo+ katã dzi xlɔ̃ nu Israel kple Yuda be: “Mitrɔ tso miaƒe mɔ vɔ̃wo dzi!+ Milé nye sededewo kple nye ɖoɖowo me ɖe asi, le se siwo katã mede na mia tɔgbuiwo, kple esiwo mede na mi to nye subɔla nyagblɔɖilawo dzi la nu.” 14 Gake womeɖo to o, ke boŋ wosẽ dzi me* abe wo tɔgbui siwo mexɔ Yehowa woƒe Mawu la dzi se o la ene.+ 15 Wogbe eƒe ɖoɖowo kple eƒe nu, si wòbla+ kple wo tɔgbuiwo kpakple eƒe ŋkuɖodzinya siwo wòtsɔ xlɔ̃ nu woe la,+ eye wodze legba dzodzrowo yome,+ ale woawo ŋutɔwo hã wozu ame ɖigbɔwo,+ wosrɔ̃ dukɔ siwo ƒo xlã wo, siwo ŋu Yehowa de se le na wo be, woagasrɔ̃ woƒe nuwɔnawo o la.+

16 Woɖe asi le Yehowa woƒe Mawu la ƒe sededewo katã ŋu, eye wowɔ galegbawo,* siwo nye nyivi eve,+ wowɔ Asera*+ eye wode ta agu na dziƒonuwo* katã+ hesubɔ Baal.+ 17 Azɔ hã, wona wo viŋutsuwo kple wo vinyɔnuwo to dzo me,+ woka afa,+ wobia nu ta se, eye wotsɔ nu si nye vɔ̃ le Yehowa ŋkume la wɔwɔ ɖo dɔe tsɔ do dziku nɛ.

18 Eya ta dzi ku Yehowa ɖe Israel ŋu vevie, ale be wòɖe wo ɖa le eƒe ŋkuta.+ Mekpɔtɔ wo dometɔ aɖeke ɖi o, negbe Yuda-to la ko.

19 Yuda gɔ̃ hã melé Yehowa woƒe Mawu la ƒe sededewo me ɖe asi o,+ ke boŋ wozɔ le kɔnu siwo Israel ɖo anyi la nu.+ 20 Ale Yehowa gbe Israel ƒe dzidzime blibo la katã, eye wòɖi gbɔ wo, eye wòtsɔ wo de asi na adzohawo, va se ɖe esime wòɖe wo ɖa le eƒe ŋkuta. 21 Edu Israel le David ƒe aƒe la si, eye wotsɔ Yeroboam, Nebat vi, ɖo fiae.+ Ke Yeroboam he Israel ɖa le Yehowa yome hena wowɔ nu vɔ̃ gã. 22 Eye Israel-viwo zɔ le Yeroboam ƒe nu vɔ̃ siwo katã wòwɔ la me.+ Womeɖe asi le wo ŋu o, 23 va se ɖe esime Yehowa ɖe Israel ɖa le eƒe ŋkuta, abe ale si tututu wògblɔ to eƒe subɔla nyagblɔɖilawo katã dzi ene.+ Ale woɖe aboyo Israel tso eya ŋutɔ ƒe anyigba dzi yi Asiria+ va se ɖe egbe sia.

24 Asiria-fia kplɔ amewo tso Babilon, Kuta, Ava, Hamat kple Sefarvayim,+ eye wòna wonɔ Samaria duwo me ɖe Israel-viwo teƒe; eye woxɔ Samaria henɔ eƒe duwo me. 25 Esime wova afi ma teti la, womevɔ̃* Yehowa o. Eya ta Yehowa dɔ dzatawo ɖe wo dome,+ eye wowu ameawo dometɔ aɖewo. 26 Eye woɖo du ɖe Asiria-fia be: “Dukɔ siwo nèɖe aboyoe, eye nèna wova le Samaria duwo me la menya anyigba la ƒe Mawu subɔsubɔ* o. Eya ta ele dzatawo dɔm ɖe wo dome, eye wole wo wum, le esi ame aɖeke menya anyigba la ƒe Mawu ƒe subɔsubɔ o ta.”

27 Eye Asiria-fia de se be: “Mina nunɔla siwo mieɖe aboyoe tso afi ma la dometɔ ɖeka nayi aɖanɔ afi ma, ne wòafia anyigba la ƒe Mawu ƒe subɔsubɔ wo.” 28 Eya ta nunɔla siwo woɖe aboyoe tso Samaria la dometɔ ɖeka yi ɖanɔ Betel,+ eye wòzu woƒe nufiala hefia ale si woavɔ̃* Yehowae la wo.+

29 Ke dukɔ ɖe sia ɖe wɔ eya ŋutɔ ƒe mawu,* eye wotsɔ wo da ɖe nuxeƒexɔ siwo Samariatɔwo tu la me; dukɔ ɖe sia ɖe wɔe ɖe du si me wole la me. 30 Babilontɔwo wɔ Sukot-Benot, Kuttɔwo wɔ Nergal, eye Hamattɔwo+ wɔ Asima, 31 eye Avitɔwo wɔ Nibhaz kple Tartak. Sefarvayimtɔwo tɔa dzo wo viwo na Adramelek kple Anamelek, siwo nye Sefarvayimtɔwo+ ƒe mawuwo. 32 Togbɔ be wovɔ̃a Yehowa hã la, wotsɔ ame sia ame ƒomevi ɖo nuxeƒewo ƒe nunɔlawoe, eye wozu nunɔlawo le nuxeƒexɔwo me na wo.+ 33 Wovɔ̃ Yehowa, gake wogasubɔa woawo ŋutɔwo ƒe mawuwo, le dukɔ siwo dome woɖe aboyo wo tsoe la ƒe subɔsubɔ* nu.+

34 Va se ɖe egbegbe la, wogawɔa nu ɖe woƒe subɔsubɔ* tsãtɔawo nu. Wo dometɔ aɖeke mesubɔa* Yehowa o, eye wo dometɔ aɖeke mewɔa nu ɖe eƒe ɖoɖowo kple eƒe ʋɔnudrɔ̃ɖoɖowo kple eƒe mɔfiame kpakple Se si Yehowa de na Yakob, ame si wòtrɔ ŋkɔ na be Israel+ ƒe viwo la nu o. 35 Esime Yehowa bla nu kpli wo la,+ ede se na wo be: “Migavɔ̃ mawu bubuwo o, eye migade ta agu na wo, asubɔ wo alo asa vɔ na wo o.+ 36 Ke Yehowa, ame si tsɔ ŋusẽ gã kple abɔ si wodo ɖa+ kplɔ mi tso Egipte-nyigba dzi la, Eyae miavɔ̃,+ eyae miade ta agu na, eye eyae miasa vɔ na. 37 Milé eƒe ɖoɖowo kple ʋɔnudrɔ̃ɖoɖowo kple Se la kpakple mɔfiame si wòŋlɔ ɖi na mi la+ me ɖe asi pɛpɛpɛ ɣesiaɣi, eye migavɔ̃ mawu bubuwo o. 38 Migaŋlɔ nu, si mebla kpli mi la be o,+ eye migavɔ̃ mawu bubuwo o. 39 Ke boŋ mivɔ̃ Yehowa mia Mawu la, elabena eyae aɖe mi tso miaƒe futɔwo katã si me.”

40 Ke womeɖo to o, ke boŋ wowɔ nu ɖe woƒe subɔsubɔ* tsãtɔ la nu.+ 41 Ale dukɔ siawo vɔ̃ Yehowa,+ gake wosubɔ woawo ŋutɔwo ƒe legbawo. Ale si tututu wo tɔgbuiwo wɔ la, nenema wɔm wo viwo kple wo tɔgbuiyɔviwo siaa le va se ɖe egbe sia.