1 Mose
39 Ke wokplɔ Yosef yi Egipte,+ eye Egiptetɔ Potifar,+ si nye Farao ŋu mewo dometɔ ɖeka, kple fiaŋudzɔlawo ƒe amegã la ƒlee le Ismaeltɔ+ siwo kplɔe va afi ma la si. 2 Ke Yehowa nɔ kple Yosef.+ Eye esia na wòkpɔ dzidzedze, eye wotsɔe ɖo eƒe aƒetɔ si nye Egiptetɔ la ƒe aƒe nu. 3 Eye eƒe aƒetɔ kpɔe be Yehowa li kplii, eye be Yehowa nana nu sia nu si wòwɔna la dzea edzi nɛ.
4 Eye wòkpɔa ŋudzedze ɖe Yosef ŋu eye wòna wòzu eƒe subɔvi. Eye wòɖoe eƒe aƒe la nu hetsɔ eƒe nuwo katã dzi kpɔkpɔ de esi. 5 Tso esime wòtsɔe ɖo eƒe aƒea nu, eye wòtsɔ eƒe nuwo katã dzi kpɔkpɔ de esi la, Yehowa nɔ Egiptetɔ la ƒe aƒe la yram le Yosef ta, eye Yehowa ƒe yayra nɔ eƒe nu siwo katã le aƒea me kple gbedzi la dzi.+ 6 Mlɔeba etsɔ eƒe nuwo katã de Yosef si; eye megatsia dzi ɖe nu siwo le esi la ŋu kura o, negbe eƒe nuɖuɖu ko. Gawu la, Yosef va nya kpɔ hedze ɖeka ale gbegbe.
7 Ke le nu siawo megbe la, Yosef ƒe aƒetɔ srɔ̃ va nɔa ahiãmo ɖom nɛ hegblɔna nɛ be: “Va mlɔ gbɔnye.” 8 Ke egbe, eye wògblɔ na eƒe aƒetɔ srɔ̃ la be: “Kpɔ ɖa, nye aƒetɔ megatsia dzi ɖe nu siwo le gbɔnye le aƒea me ŋu o, eye wòtsɔ eƒe nuwo katã de asi nam. 9 Ame aɖeke menye gã wum le aƒe sia me o, eye mete nanekem o, negbe wò ko, elabena srɔ̃ae nènye. Aleke gɔ̃ mawɔ vɔ̃ gã sia gbegbe ahawɔ nu vɔ̃ ɖe Mawu ŋu?”+
10 Eye wònɔa nya sia gblɔm na Yosef ŋkeke sia ŋkeke, ke melɔ̃ be yeamlɔ egbɔ alo anɔ egbɔ o. 11 Gake gbe ɖeka, esi wòyi aƒea me be yeawɔ yeƒe dɔwo la, aƒea me subɔvi aɖeke menɔ aƒea me o. 12 Eye nyɔnua lé eƒe awu gblɔ be: “Va mlɔ gbɔnye!” Ke egblẽ eƒe awu la ɖe esi me hesi do go. 13 Ke esi wòkpɔ be egblẽ eƒe awua ɖe ye si me hesi do go la, 14 edo ɣli yɔ eƒemetɔwo gblɔ na wo be: “Kpɔ ɖa! Ekplɔ Hebri ŋutsu sia va mía gbɔ be wòava ɖi gbɔ mí. Eva gbɔnye be yeamlɔ gbɔnye, ke mede asi ɣlidodo me sesĩe. 15 Esi wònya kpɔ be mete ɣlidodo sesĩe ko la, egblẽ eƒe awu la ɖe gbɔnye hesi do go.” 16 Emegbe etsɔ awu la da ɖe eɖokui gbɔ va se ɖe esime Yosef ƒe aƒetɔ gbɔ va aƒea me.
17 Eye wògblɔ nya mawo ke nɛ be: “Hebri subɔvi si nèkplɔ vɛ na mí la, va be yeaɖi gbɔm. 18 Gake esi menya do ɣli sesĩe ko la, egblẽ eƒe awu la ɖe gbɔnye hesi do go.” 19 Esi eƒe aƒetɔa se srɔ̃a ƒe nya siwo wògblɔ nɛ be, “Ale kple ale wò subɔvia wɔ ɖe ŋunye” ko la, dzi kui vevie. 20 Eye Yosef ƒe aƒetɔ lée de gaxɔ me, le afi si fia ƒe gamenɔlawo nɔna, eye wònɔ afi ma le gaxɔa me.+
21 Ke Yehowa nɔ kple Yosef, eye wònyoa dɔme nɛ hevea enu, eye wòna gaxɔdzikpɔlawo ƒe amegã la hã ve enu.+ 22 Ale gaxɔdzikpɔlawo ƒe amegã la tsɔ gamenɔla siwo katã le gaxɔa me la de asi na Yosef, eye nu sia nu si wowɔna le afi ma la, eyae nana wowɔa wo.+ 23 Gaxɔdzikpɔlawo ƒe amegã la megatsia dzi ɖe nu siwo le Yosef ƒe dzikpɔkpɔ te la dometɔ aɖeke ŋu o, elabena Yehowa nɔ kple Yosef, eye nu sia nu si wòwɔna la, Yehowa nana wòdzea edzi.+