Hosea
1 Yehowa ƒe gbe va na Hosea,* Beeri vi, le Uziya,+ Yotam,+ Ahaz+ kple Hizkiya,+ siwo nye Yuda-fiawo,+ kple Yeroboam,+ Yoas vi,+ si nye Israel-fia ŋɔli. 2 Esi Yehowa dze nuƒoƒo gɔme to Hosea dzi la, Yehowa gblɔ na Hosea be: “Heyi nàɖe gbolo, eye wòadzi ahasiviwo na wò, elabena anyigba la wɔ ahasi hetrɔ ɖa le Yehowa yome.”+
3 Eya ta eyi ɖaɖe Diblayim vinyɔnu Gomer, eye wòfɔ fu dzi ŋutsuvi nɛ.
4 Eye Yehowa gblɔ nɛ be: “Tsɔ ŋkɔ nɛ be Yezreel,* elabena esusɔ vie ko mabia akɔnta Yehu ƒe aƒe+ la ɖe Yezreel ƒe ʋu si wòkɔ ɖi la ta, eye mana Israel ƒe aƒe la ƒe fiaɖuɖu nu natso.+ 5 Ava eme gbe ma gbe be, maŋe Israel ƒe dati le Yezreel Bali me.”
6 Eye wògafɔ fu dzi nyɔnuvi. Eye Mawu gblɔ nɛ be: “Tsɔ ŋkɔ nɛ be Lo-Ruhama,* elabena nyemagakpɔ nublanui+ na Israel ƒe aƒe la azɔ o, manya wo ɖa godoo.+ 7 Ke makpɔ nublanui na Yuda ƒe aƒe la,+ eye nye Yehowa, woƒe Mawu, maxɔ na wo;+ menye dati alo yi alo aʋawɔwɔ, sɔ alo sɔdolawo dzie mato axɔ na wo o.”+
8 Esi wòtso no na Lo-Ruhama la, egafɔ fu, eye wòdzi ŋutsuvi. 9 Eye Mawu gblɔ be: “Tsɔ ŋkɔ nɛ be Lo-Ami,* elabena menye nye dukɔe mienye o, eye nye hã nyemanye mia Mawu o.
10 “Israel-viwo ƒe xexlẽme anɔ abe ƒutake, si womate ŋu adzidze alo axlẽ o ene.+ Eye afi si wogblɔ na wo le be, ‘Menye nye dukɔe mienye o’+ la, woagblɔ na wo le afi ma be, ‘Mawu gbagbe la ƒe viwo mienye.’+ 11 Woaƒo Yuda viwo kple Israel-viwo nu ƒu ɖekae,+ eye woaɖo tatɔ ɖeka na wo ɖokui aho tso anyigba la dzi, elabena Yezreel ƒe ŋkeke la anye ŋkeke gã aɖe.+