Ezekiel

34 Yehowa ƒe gbe gava nam be: 2 “Amegbetɔvi, gblɔ nya ɖi ɖe Israel ƒe lãkplɔviwo ŋu. Gblɔ nya ɖi, eye nàgblɔ na lãkplɔviawo be, ‘Ale Aƒetɔ Dziɖulagã Yehowa gblɔe nye esi: “Baba na Israel ƒe lãkplɔviwo,+ ame siwo nyia woawo ŋutɔwo ɖokui! Ðe menye lãhawoe wòle be lãkplɔviwo nanyi oa?+ 3 Mieɖua lãwo ƒe ami, eye mietsɔa lãfuawo wɔa awu dona, miewua lã damiawo,+ evɔ mienyia alẽhaa ya o.+ 4 Miedo ŋusẽ esiwo gbɔdzɔ alo yɔ dɔ esiwo ƒe lãme gblẽ o, miebla abi na esiwo ŋe la alo kplɔ esiwo tra mɔ la gbɔe loo alo di esiwo bu la o;+ ke boŋ mietsɔ dzizizi kple ŋutasesẽ ɖu wo dzi.+ 5 Eya ta woka hlẽ, elabena kplɔla mele wo nu o;+ woka hlẽ hezu nuɖuɖu na gbemelã ɖe sia ɖe. 6 Nye alẽwo le tsaglãla tsam le towo kple togbɛ kɔkɔ ɖe sia ɖe dzi; woka nye alẽwo hlẽ ɖe anyigba blibo la dzi, eye ame aɖeke mebiaa wo ta se alo dia wo yome mɔ o.

7 “‘“Eya ta mi lãkplɔviwo, mise Yehowa ƒe nya: 8 ‘“Zi ale si mele agbe la,” Aƒetɔ Dziɖulagã Yehowa ye gblɔe, “esi nye alẽwo zu nuléle, eye wozu nuɖuɖu na gbemelãwo katã, elabena kplɔla aɖeke meli o, eye nye lãkplɔviwo medi nye alẽawo o, ke boŋ wole woawo ŋutɔwo ɖokui nyim hegbe nye alẽawo nyinyi ta la,”’ 9 eya ta mi lãkplɔviwo, mise Yehowa ƒe nya. 10 Ale Aƒetɔ Dziɖulagã Yehowa gblɔe nye esi: ‘Metso ɖe lãkplɔviwo ŋu, eye mabia nye alẽwo ŋuti kɔnta wo, mana woadzudzɔ nye alẽawo kpɔkplɔ,+ eye lãkplɔviwo maganyi woawo ŋutɔwo ɖokui azɔ o. Maɖe nye alẽwo le nu me na wo, eye womaganye nuɖuɖu na wo azɔ o.’”

11 “‘Elabena ale Aƒetɔ Dziɖulagã Yehowa gblɔe nye esi: “Kpɔ ɖa, nye ŋutɔ madi nye alẽwo, eye malé be na wo.+ 12 Malé be na nye alẽwo abe ale si lãkplɔvi léa be na eƒe alẽ siwo ka hlẽ siwo ŋu wòke ɖo la ene.+ Makplɔ wo tso teƒe siwo katã woka hlẽ ɖo le alilikpo kple blukɔ dogbe la.+ 13 Makplɔ wo tso dukɔwo dome, eye maƒo wo nu ƒu tso anyigbawo dzi, makplɔ wo ava wo denyigba dzi, eye manyi wo le Israel towo dzi+ le tɔʋuwo to kple afi siwo katã nye wo nɔƒewo le anyigba la dzi. 14 Manyi wo le lãnyiƒe damawo, eye Israel to kɔkɔwo dzie woaɖu gbe le.+ Afi mae woatsyɔ akɔ ɖo le gbeɖuƒe nyuitɔwo,+ eye woaɖu nu le lãnyiƒe damawo le Israel towo dzi.”

15 “‘“Nye ŋutɔ manyi nye alẽawo,+ eye nye ŋutɔ mana woatsyɔ akɔ ɖi,”+ Aƒetɔ Dziɖulagã Yehowa ye gblɔe. 16 “Madi esiwo bu la,+ makplɔ esiwo tra mɔ agbɔe, mabla abi na esiwo nu vevi wɔ, eye mado ŋusẽ esiwo gbɔdzɔ, ke matsrɔ̃ esiwo da ami kple esiwo ƒe lãme sẽ la; madrɔ̃ ʋɔnu wo, eye mahe to si sɔ la na wo.”

17 “‘Ke mi nye alẽwo, ale Aƒetɔ Dziɖulagã Yehowa gblɔe nye esi: “Kpɔ ɖa, madrɔ̃ ʋɔnu le alẽ kple alẽ dome, le agbowo kple gbɔ̃tsuwo dome.+ 18 Ðe mesɔ gbɔ na mi be mieɖu gbe le lãnyiƒe nyuitɔwo oa? Hafi mienya avuzi le miaƒe lãnyiƒe mamlɛawo dzia? Eye esi mieno tsi zɔzrɔ̃e vɔ la, ɖe wòle be miagatsɔ afɔ ablu mamlɛa? 19 Lãnyiƒe si mietsɔ afɔ fanya lae miebe nye alẽwo naɖu gbe lea, eye tsi si mietsɔ afɔ blu lae miebe woanoa?”

20 “‘Eya ta ale Aƒetɔ Dziɖulagã Yehowa gblɔ na woe nye esi: “Kpɔ ɖa, nye ŋutɔ madrɔ̃ ʋɔnu le alẽ dami kple alẽ ɖiku dome, 21 elabena mietsɔa axadame kple abɔgba tutua lã kudɔeawo katã, eye mietua dzo wo va se ɖe esime mienya wo de gbe. 22 Maxɔ na nye alẽwo, eye womaganye nuléle na mi azɔ o;+ eye madrɔ̃ ʋɔnu le alẽ kple alẽ dome. 23 Maɖo kplɔla ɖeka wo nu,+ si nye nye subɔla David,+ ne wòanyi wo. Eyae anyi wo, eye wòazu wo kplɔla.+ 24 Nye Yehowa, manye woƒe Mawu,+ eye nye subɔla David anye amegã le wo dome.+ Nye, Yehowa, ye ƒo nu.

25 “‘“Mabla ŋutifafa ƒe nu kpli wo,+ eye maɖe lã wɔadãwo ɖa le anyigba la dzi,+ ale be woanɔ dedie le gbegbe, eye woatsi avewo me adɔ.+ 26 Mayra woawo kple nye togbɛ ƒe nutowo siaa,+ eye mana tsi nadza ɖe edzaɣi. Madudu yayra akɔ ɖi abe tsidzadza ene.+ 27 Gbemetiwo atse ku, anyigba awɔ nu,+ eye woanɔ dedie le anyigba la dzi. Eye ne meŋe woƒe kɔkutiwo,+ eye meɖe wo le ame siwo wɔ wo kluviwoe si me la, ekema woadze sii be, nyee nye Yehowa. 28 Womaganye nuléle na dukɔwo azɔ o; anyigbadzilã wɔadãwo mavuvu wo o, woanɔ anyi bɔkɔɔ, eye ame aɖeke mado voɖi na wo o.+

29 “‘“Mana anyigba la namie nu na wo atsɔ ade ŋkɔ wo ŋu, womagaku le anyigba la dzi le dɔwuame ta azɔ o,+ eye dukɔwo magado vlo wo azɔ o.+ 30 ‘Eye woadze sii be nye Yehowa, woƒe Mawu la, meli kpli wo, eye woawo, Israel ƒe aƒe lae nye nye dukɔ,’+ Aƒetɔ Dziɖulagã Yehowa ye gblɔe.”’

31 “‘Ke mi nye alẽwo,+ alẽ siwo meléa be na, amegbetɔwoe mienye, eye nyee nye mia Mawu,’ Aƒetɔ Dziɖulagã Yehowa ye gblɔe.”