Marko

14 Azɔ esusɔ ŋkeke eve ne Ŋutitoto+ kple Amɔwɔ Maʋamaʋã Bolo Ŋkekenyuia+ naɖo.+ Eye nunɔlawo ƒe tatɔwo kple agbalẽfialawo le mɔnu dim be yewoato ayemɔ aɖe dzi alé Yesu awu;+ 2 elabena wogblɔ be: “Menye le ŋkekenyuia ɖuɣi o; ɖewohĩ zi ava tɔ le dukɔ la me.”

3 Esi wòle nuɖuƒe le Simon anyidɔléla* ƒe me le Betania la, nyɔnu aɖe va do kple alabastrogoe si me ami ʋeʋĩ aɖe, si nye nardomi akuakua, si xɔ asi ŋutɔ la le. Eŋe alabastrogoe la ƒe kɔme eye wòtrɔ ami la kɔ ɖe Yesu ƒe tame.+ 4 Eye ameawo dometɔ aɖewo do dɔmedzoe gblɔ le wo nɔewo dome be: “Nu ka tae wogblẽ ami ʋeʋĩ sia dome ale? 5 Elabena woate ŋu adzra ami ʋeʋĩ sia wòawu denario* alafa etɔ̃ eye woatsɔ ga la ana ame dahewo ɖe!” Wodo dɔmedzoe ɖe nyɔnua ŋu vevie.* 6 Ke Yesu gblɔ be: “Miɖe asi le eŋu. Nu ka tae miele fu ɖem nɛ? Dɔ nyui aɖee wòwɔ nam.+ 7 Elabena ame dahewo le mia gbɔ ɖaa,+ eye miate ŋu anyo dɔme na wo ɣesiaɣi si mielɔ̃, ke nye ya nyemanɔ mia gbɔ ɖaa o.+ 8 Ewɔ nu si wòate ŋui; edo ŋgɔ si ami ʋeʋĩ na nye ŋutilã hena ɖiɖi.+ 9 Vavã mele egblɔm na mi be, afi sia afi si woaɖe gbeƒã nya nyui la le le xexe bliboa me+ la, woagblɔ nu si nyɔnu sia wɔ la hã atsɔ aɖo ŋku edzii.”+

10 Eye Yuda Iskariot, si nye Ame Wuieveawo dometɔ ɖeka, yi nunɔlawo ƒe tatɔwo gbɔ be yeade Yesu asi na wo.+ 11 Esi wose nyaa la, dzi dzɔ wo ŋutɔ, eye wodo ŋugbe be yewoana klosalogae.+ Eya ta enɔ mɔnu dim be yeadee asi.

12 Ke le Amɔwɔ Maʋamaʋã Bolo Ŋkekenyui+ la ƒe ŋkeke gbãtɔ, si dzi wotsɔa ŋutitotolãa+ saa vɔe le dzi la, eƒe nusrɔ̃lawo biae be: “Afi kae nèdi be míadzra ɖo na wò be nàɖu ŋutitotoa le?”+ 13 Ale wòdɔ eƒe nusrɔ̃la eve gblɔ na wo be: “Miyi ɖe dua me, eye ŋutsu aɖe si tsɔ tsize la ado go mi. Midze eyome,+ 14 eye aƒe si me wòage ɖo la, migblɔ na aƒea tɔ be, ‘Nufiala be: “Afi kae amedzroxɔ si me nye kple nye nusrɔ̃lawo míaɖu ŋutitotoa le la le?”’ 15 Afia xɔ gã aɖe si le dziƒoxɔ dzi, si me woɖo nuwo ɖo xoxo la mi. Midzra afi ma ɖo na nua ɖuɖu.” 16 Eya ta nusrɔ̃laawo do go yi dua me, eye wokpɔe abe ale si tututu wògblɔe na wo ene; eye wodzra ɖo ɖe Ŋutitotoŋkekenyui la ŋu.

17 Esi fiẽsi ɖo la, eya kple Ame Wuieveawo+ va afi ma. 18 Eye esi wole nu ɖum le kplɔ̃ ŋu la, Yesu gblɔ be: “Vavã mele egblɔm na mi be, mi ame siwo le nu ɖum kplim la dometɔ ɖeka adem asi.”+ 19 Wode asi nuxaxa me hele ebiam ɖekaɖeka be: “Menye nyee o ɖe?” 20 Egblɔ na wo be: “Mi Ame Wuieveawo dometɔ ɖeka si le asi dem agba ɖeka me kplim ye.+ 21 Elabena Amegbetɔvi la le kuku ge abe ale si woŋlɔe ɖi le eŋuti ene, gake baba na ame ma, si ade Amegbetɔvi la asi!+ Ne ɖe womegaxa ame ma dzi o la, anye ne enyo nɛ wu.”+

22 Eye esi wole nua ɖum la, etsɔ abolo, yra ɖe edzi, ŋe eme, eye wòtsɔe na wo hegblɔ be: “Mixɔe; esia le tsitre ɖi na nye ŋutilã.”+ 23 Eye esi wòtsɔ kplu ɖe asi la, eda akpe ɖe eta, eye wòtsɔe na wo, eye wo katã wonoe le enu.+ 24 Eye wògblɔ na wo be: “Esia le tsitre ɖi na nye ʋu,+ si nye ‘nubabla+ ƒe ʋu,’ si woakɔ ɖe anyi le ame geɖewo ta.+ 25 Vavã mele egblɔm na mi be, nyemegale wain no ge akpɔ o va se ɖe ŋkeke ma dzi, esime mano wain yeye le Mawu Fiaɖuƒe la me.” 26 Mlɔeba esi wodzi kafukafuhawo vɔ la, wodo go yi Amito la dzi.+

27 Eye Yesu gblɔ na wo be: “Mi katã miagblẽm ɖi,* elabena woŋlɔe ɖi be: ‘Mada nu alẽkplɔla+ la, eye alẽawo aka hlẽ.’+ 28 Ke ne wofɔm ɖe tsitre la, madze mia ŋgɔ ayi Galilea.”+ 29 Ke Petro gblɔ nɛ be: “Ne ame susɔeawo katã gblẽ wò ɖi* hã la, nye ya nyemagblẽ wò ɖi o.”+ 30 Eya ta Yesu gblɔ nɛ be: “Vavã mele egblɔm na wò be: Le zã sia tututu me la, hafi koklo naku atɔ zi eve la, àgbe nu le gbɔnye zi gbɔ zi etɔ̃.”+ 31 Ke Petro gate gbe ɖe edzi vevie wu be: “Ne ahiã be maku kpli wò hã la, nyemagbe nu le gbɔwò akpɔ o.” Ame susɔeawo hã gblɔ nenema ke.+

32 Azɔ wova ɖo teƒe si woyɔna be Getsemane, eye wògblɔ na eƒe nusrɔ̃lawo be: “Minɔ anyi ɖe afi sia ne mayi aɖado gbe ɖa.”+ 33 Ekplɔ Petro, Yakobo kple Yohanes ɖe ŋuti,+ ede asi nuxaxa me vevie* eye wòtsi dzi ŋutɔ. 34 Egblɔ na wo be: “Mele nu xam* ale gbegbe+ be ɖeko wòle abe ɖe mele kukum ene. Minɔ afi sia, eye minɔ ŋudzɔ.”+ 35 Esi wòzɔ yi ŋgɔ vie la, edze klo tsyɔ mo anyi hede asi gbedodoɖa me be, ne anya wɔ la, gaƒoƒo la nato ye ŋu ayi. 36 Eye wògblɔ be: “Abba,* Fofo,+ ètea ŋu wɔa nuwo katã; na kplu sia nato ŋunye. Gake menye nu si medi o, ke boŋ nu si nèdi.”+ 37 Etrɔ va kpɔ wo wole alɔ̃ dɔm, eye wògblɔ na Petro be: “Simon, alɔ̃ dɔm nèlea? Màte ŋu anɔ ŋudzɔ gaƒoƒo ɖeka oa?+ 38 Minɔ ŋudzɔ, eye minɔ gbedodoɖa dzi be miagadze tetekpɔ me o.+ Nyateƒee, gbɔgbɔ la le lɔlɔ̃m, gake ŋutilãa ya gbɔdzɔ.”+ 39 Eye wògadzo yi ɖado gbe ɖa hegblɔ nya mawo ke.+ 40 Egatrɔ va, eye wòkpɔ wo wole alɔ̃ dɔm, elabena alɔ̃ bla ŋku na wo, eya ta womenya nya si woagblɔ atsɔ aɖo eŋu nɛ o. 41 Egava zi etɔ̃lia eye wògblɔ na wo be: “Ɣeyiɣi sia mee mianɔ alɔ̃ dɔm ahanɔ ɖiɖim ɖe emea? Esɔ gbɔ! Gaƒoƒo la de!+ Kpɔ ɖa! Wotsɔ Amegbetɔvi la de asi na nu vɔ̃ wɔlawo. 42 Mitso, mina míadzo. Kpɔ ɖa! Ame si dem asi la gogo.”+

43 Esi wògale nuƒoƒo dzi la, kasia Yuda, si nye Ame Wuieveawo dometɔ ɖeka la va do, eye ameha aɖe si lé yiwo kple kpowo ɖe asi la tso nunɔlawo ƒe tatɔwo, agbalẽfialawo kple dumegãwo gbɔ kplɔe ɖo.+ 44 Ke ame si dee asi la ɖo dzesi ɖi na wo be: “Ame si magbugbɔ nu na la, eyae; milée, mikplɔe yii eye miaƒe ŋku nanɔ eŋu.” 45 Eye Yuda zɔ tẽe te ɖe eŋu hegblɔ be: “Rabi!” eye wògbugbɔ nu nɛ. 46 Ameawo dze edzi eye wolée. 47 Ke ame siwo le tsitre ɖe afi ma la dometɔ ɖeka ɖe eƒe yi heda nunɔlagã ƒe kluvi eye wòkpa to nɛ.+ 48 Ke Yesu gblɔ na wo be: “Yiwo kple kpowoe mietsɔ va be yewoalém abe adzodala enea?+ 49 Menɔa mia gbɔ le gbedoxɔa me gbe sia gbe nɔa nu fiam,+ gake mielém kpɔ o. Ke edzɔ alea be Ŋɔŋlɔawo nava eme.”+

50 Eye eƒe nusrɔ̃lawo katã gblẽe ɖi hesi dzo.+ 51 Gake ɖekakpui aɖe si do aklalawu ko la kplɔe ɖo, eye ameawo di be yewoalée, 52 ke egblẽ eƒe aklalawua ɖi hesi amamae.*

53 Azɔ wokplɔ Yesu yi nunɔlagã+ la gbɔ, eye nunɔlawo ƒe tatɔwo kple dumegãwo kpakple agbalẽfialawo katã va ɖi anyi.+ 54 Ke Petro le eyome le adzɔge ʋĩi heva keke nunɔlagã la ƒe aƒea me ke; eye wònɔ anyi ɖe subɔviawo gbɔ le dzo ƒum.+ 55 Ɣemaɣi la, nunɔlawo ƒe tatɔwo kple Sanhedrin blibo la le ame siwo aɖi ɖase si woatsɔ atso Yesu nu la dim, ne woawui, gake womekpɔ ɖeke o.+ 56 Le nyateƒe me la, ame geɖewo le aʋatsoɖase ɖim le eŋuti,+ gake wo dometɔ aɖeke ƒe ɖaseɖiɖi mesɔ kple nɔvia tɔ o. 57 Ame bubu aɖewo hã tsi tsitre hele aʋatsoɖase ɖim le eŋu be: 58 “Míesee wògblɔ be, ‘Magbã gbedoxɔ sia si wotsɔ asi wɔe la, eye le ŋkeke etɔ̃ me la, matu bubu si wometsɔ asi wɔe o.’”+ 59 Gake le nya sia gɔ̃ hã me la, woƒe ɖaseɖiɖiwo mesɔ kple wo nɔewo tɔ o.

60 Mlɔeba nunɔlagã la tso ɖe tsitrenu le wo dome hebia Yesu be: “Mèle nya aɖeke gblɔ ge atsɔ aɖo eŋu oa? Nya kawoe nye esi ame siawo tsɔ le nuwo tsomee?”+ 61 Ke ezi kpi, eye meɖo nya aɖeke ŋu o.+ Eye nunɔlagã la gabiae be: “Wòe nye Yayratɔ la ƒe Vi Kristo laa?” 62 Yesu ɖo eŋu be: “Nyee; eye miakpɔ Amegbetɔvi la+ wòabɔbɔ nɔ Ŋusẽtɔ la ƒe ɖusime+ eye wòanɔ dziƒolilikpowo dzi gbɔna.”+ 63 Ale nunɔlagã la dze eƒe awuwo hegblɔ be: “Ðe ɖasefo bubuwo gahiã mía?+ 64 Miese busunya la. Nya kae le mia si?”* Wo katã wobu fɔe be edze ku.+ 65 Eye ame aɖewo de asi taɖeɖe me ɖe eŋu,+ ɖewo hã tsyɔ nu mo nɛ eye wotu kɔe gblɔ nɛ be: “Ne nyagblɔɖilae nènye la, ekema gblɔ ame si ƒo wò la na mí!” Eye esi ʋɔnudrɔ̃ƒea ƒe dzɔlawo ƒo tome nɛ vɔ la, wokplɔe yii.+

66 Ke esi Petro le aƒea ƒe xɔxɔnu le gɔmea la, nunɔlagã la ƒe dɔlanyɔnuwo dometɔ ɖeka va afi ma.+ 67 Esi wòkpɔ Petro wòle dzo ƒum la, ekpɔ eƒe ŋkume dũu hegblɔ be: “Wò hã ènɔ Yesu Nazaretetɔ sia ŋu.” 68 Ke esẽ nu gblɔ be: “Nyemenyae o, eye nyemese nya si gblɔm nèle hã gɔme o,” eye wòdo go yi mɔnu* le xexe. 69 Esi dɔlanyɔnu la kpɔe le afi ma la, egade asi gbɔgblɔ me na ame siwo le tsitre ɖe afi ma la be: “Wo dometɔ ɖekae nye esia.” 70 Egasẽ nu. Emegbe la, ame siwo le tsitre ɖe afi ma hã gblɔ na Petro be: “Nyateƒee, wo dometɔ ɖekae nènye, elabena Galileatɔ hãe nènye.” 71 Ke ede asi fiƒodenyawo gbɔgblɔ me heka atam ƒu edzi be: “Nyemenya ame sia si ŋuti miele nu ƒom le la o!” 72 Kasia koklo ku atɔ zi evelia,+ eye Petro ɖo ŋku nya si Yesu gblɔ nɛ la dzi be: “Hafi koklo naku atɔ zi eve la, àgbe nu le gbɔnye zi etɔ̃.”+ Eye eƒe dzi gbã, wòwó avi.