2 Mose

10 Eye Yehowa gblɔ na Mose be: “Yi Farao gbɔ, elabena nyee ɖe mɔ eya ŋutɔ kple eƒe subɔviwo ƒe dzi me sẽ,+ bena mawɔ dzesi siawo le eŋkume,+ 2 ne nàgblɔ nu siwo gbegbe metu kple Egipte kple dzesi siwo mewɔ le wo dome la na viwòwo kple tɔgbuiyɔviwòwo;+ eye miadze sii be nyee nye Yehowa.”

3 Eya ta Mose kple Aron yi Farao gbɔ ɖagblɔ nɛ be: “Ale Yehowa, Hebritɔwo ƒe Mawu la, gblɔe nye esi: ‘Va se ɖe ɣekaɣie nàgbe ɖokuiwò bɔbɔ ɖe tenye?+ Ðe asi le nye dukɔ ŋu woayi aɖasubɔm. 4 Elabena ne ègbe be yemaɖe asi le nye dukɔ la ŋu o la, ekema makplɔ ʋetsuviwo ava wò anyigba dzi etsɔ. 5 Woatsyɔ anyigba la dzi ale gbegbe be anyigba la magadze o. Woaɖu nu siwo susɔ, siwo kpetsi la gblẽ ɖi na mi kple miaƒe ati siwo katã le totom le gbe me la keŋkeŋ.+ 6 Eye woayɔ wò xɔwo, wò subɔviwo ƒe xɔwo kple Egiptetɔwo katã ƒe xɔwo me ale gbegbe be, anye nu si tɔgbi womekpɔ kpɔ tso esime mia fofowo kple mia tɔgbuiwo nɔ anyi va se ɖe egbe o.’”+ Eye wòtrɔ dzo le Farao gbɔ.

7 Emegbe Farao ƒe subɔviwo gblɔ nɛ be: “Va se ɖe ɣekaɣie ŋutsu sia anye afɔku* na mí? Ðe asi le ameawo ŋu woayi aɖasubɔ Yehowa woƒe Mawu la. Mèkpɔe be Egipte dome gblẽ keŋ oa?” 8 Eya ta wogbugbɔ yɔ Mose kple Aron va Farao gbɔ, eye wògblɔ na wo be: “Miheyi ɖasubɔ Yehowa mia Mawu la. Gake ame kawoe le yiyi ge?” 9 Mose ɖo eŋu be: “Mía kple míaƒe ɖekakpuiwo, ɖetugbuiwo, míaƒe ame tsitsiwo, mía viŋutsuwo kple mía vinyɔnuwo, míaƒe alẽwo kple míaƒe nyiwo+ míayi, elabena míeyina ŋkekenyui ɖu ge na Yehowa.”+ 10 Eɖo eŋu na wo be: “Ne meɖe asi le mia kple mia viwo ŋu miedzo la, ke Yehowa li kpli mi vavã!+ Edze ƒãa be tame vɔ̃e mieɖo. 11 Kpao! Miaƒe ŋutsuwo ɖeɖe koe ayi aɖasubɔ Yehowa, elabena emae miebia.” Eye wonya wo ɖa le Farao ŋkume.

12 Eye Yehowa gblɔ na Mose be: “Do wò asi ɖe Egipte-nyigba la dzi ne ʋetsuviwo nado ava Egipte-nyigba blibo la dzi ne woaɖu anyigba la dzi nu miemie siwo katã kpetsi la gblẽ ɖi la keŋkeŋ.” 13 Enumake Mose do eƒe atikplɔ la ɖe Egipte-nyigba la dzi, eye Yehowa na ɣedzeƒeya ƒo ɖe anyigba la dzi ŋkeke blibo la kple zã blibo la katã. Esi ŋu ke la, ɣedzeƒeya la lɔ ʋetsuviawo vɛ. 14 Ʋetsuviawo va ƒo ɖe Egipte-nyigba blibo la katã dzi, eye wodze ɖe Egipte-nyigba la ƒe afi sia afi taŋtaŋ.+ Menɔ bɔbɔe kura o;+ ʋetsuviwo meva alea gbegbe kpɔ o, eye wo tɔgbi aɖeke magava akpɔ o. 15 Wotsyɔ anyigba blibo la katã dzi, eye anyigba la dzi do viviti; woɖu anyigba la dzi nu miemiewo katã kple atikutsetse siwo katã kpetsi la gblẽ ɖi; aŋgba mumu aɖeke megasusɔ ɖe atiwo dzi o, eye ɖeke megasusɔ ɖe nu miemie siwo le gbe me le Egipte-nyigba bliboa dzi la dzi o.

16 Enumake Farao na woyɔ Mose kple Aron vɛ, eye wògblɔ na wo be: “Mewɔ nu vɔ̃ ɖe Yehowa mia Mawu la kple mia ŋu. 17 Eya ta meɖe kuku, mitsɔ nye nu vɔ̃ kem zi mamlɛtɔ sia ko, eye miɖe kuku na Yehowa mia Mawu la be wòaɖe fuwɔame vɔ̃ɖi sia ɖa le dzinye.” 18 Ale wòdzo* le Farao gbɔ yi ɖaɖe kuku na Yehowa.+ 19 Eye Yehowa na ya la trɔ zu ɣetoɖoƒeya sesẽ aɖe helɔ ʋetsuviawo dzoe yi ɖakɔ ɖe Ƒudzĩ la me. Ʋetsuvi ɖeka pɛ hã mekpɔtɔ ɖe Egipte-nyigba blibo la ƒe afi aɖeke o. 20 Ke Yehowa ɖe mɔ Farao gasẽ dzi me,+ eye meɖe asi le Israel-viwo ŋu o.

21 Eye Yehowa gblɔ na Mose be: “Do wò asi ɖe dziƒo, ne viviti nado ɖe Egipte-nyigba la dzi, viviti la ado ale gbegbe be woate ŋu ali asi eŋu.” 22 Enumake Mose do eƒe asi ɖe dziƒo, eye viviti tsiɖitsiɖi do ɖe Egipte-nyigba blibo la katã dzi ŋkeke etɔ̃ sɔŋ.+ 23 Ame aɖeke mete ŋu kpɔ nɔvia o, eye wo dometɔ aɖeke medzo le enɔƒe o ŋkeke etɔ̃ sɔŋ; ke kekeli le Israel-viwo katã ya ƒe nɔƒewo.+ 24 Emegbe Farao yɔ Mose gblɔ be: “Miheyi ɖasubɔ Yehowa.+ Negbe miaƒe alẽwo kple miaƒe nyiwo koe atsi anyi. Miate ŋu akplɔ mia viwo gɔ̃ hã ayii.” 25 Ke Mose gblɔ be: “Wò ŋutɔe ana lã siwo míatsɔ asa vɔ kple esiwo míatsɔ asa numevɔ la mí, eye míatsɔ wo asa vɔ na Yehowa mía Mawu.+ 26 Míaƒe lãhawo hã ayi kpli mí. Míalɔ̃ be lã* ɖeka teti natsi anyi o, elabena woƒe ɖe tsɔ ge míala asubɔ Yehowa mía Mawu la, eye míenya wo dometɔ siwo míatsɔ asubɔ Yehowa haɖe o, va se ɖe esime míeɖo afi ma hafi.” 27 Eya ta Yehowa ɖe mɔ Farao ƒe dzi me sẽ, eye melɔ̃ be yeaɖe asi le wo ŋu o.+ 28 Farao gblɔ nɛ be: “Bu le nye ŋkuta! Kpɔ ɖokuiwò dzi nyuie be màgakpɔ nye mo azɔ o, elabena gbe si gbe nàkpɔ nye mo la, ku kee nàku.” 29 Mose ɖo eŋu be: “Yoo, nyemagakpɔ wò mo azɔ o, abe ale si nègblɔ ene.”