1 Korintotɔwo

5 Nyateƒee, míese be mia dometɔ aɖewo ƒo wo ɖokui ɖe gbɔdɔdɔ manɔsenu*+ me, eye gbɔdɔdɔ manɔsenu* sia tɔgbi mele dukɔwo kura gɔ̃ hã dome o, be ŋutsu aɖe xɔ fofoa srɔ̃.+ 2 Ðe esia nye dada na mia? Ðe mele be miaxa nu boŋ,+ ale be woaɖe ŋutsu si wɔ nu sia la ɖa le mia dome oa?+ 3 Togbɔ be nyemele mia dome le ŋutilã me o hã la, mele mia dome le gbɔgbɔ me, eye medrɔ̃ ʋɔnu ame si wɔ nu sia xoxo abe ɖe mele mia dome ene. 4 Ne miekpe ta le mía Aƒetɔ Yesu ƒe ŋkɔ me, eye mele mia dome le gbɔgbɔ me, eye mía Aƒetɔ Yesu ƒe ŋusẽ hã li kpli mi la, 5 miatsɔ ame sia ade asi na Satana,+ ne miatsi ŋusẽkpɔɖeamedzi gbegblẽ ma nu,* ale be miakpɔ hamea ƒe gbɔgbɔ ta le Aƒetɔ la ƒe ŋkeke la dzi.+

6 Nu si ŋu miele adegbe ƒom le la menyo o. Ðe mienyae be amɔwɔʋãnu vi aɖee nana amɔwɔ blibo la katã ʋãna oa?+ 7 Miɖe amɔwɔ ʋaʋã xoxo la ɖa, ne miazu amɔwɔ yeye, be nu ʋaʋã aɖeke naganɔ mia dome o. Elabena le nyateƒe me la, wotsɔ Kristo, míaƒe Ŋutitotolẽvi+ la sa vɔe.+ 8 Eya ta mina míanɔ ŋkekenyui la ɖum,+ menye kple amɔwɔ ʋaʋã xoxo o, eye menye kple vɔ̃ɖinyenye alo nu vɔ̃ ƒe amɔwɔ ʋaʋã hã o, ke boŋ kple amɔwɔ maʋamaʋã bolo si nye nu dzɔdzɔe wɔwɔ kple nyateƒetoto.

9 Meŋlɔe na mi le nye agbalẽ la me be miadzudzɔ hadede kple ame siwo ƒoa wo ɖokui ɖe gbɔdɔdɔ manɔsenu* me; 10 nyemele gbɔgblɔm be miadzudzɔ hadede kura kple ame siwo le xexe sia me+ siwo ƒoa wo ɖokui ɖe gbɔdɔdɔ manɔsenu* me alo nye ŋuklẽlawo alo adzodalawo alo trɔ̃subɔlawo o. Ne nenemae la, ke ɖeko miadzo le xexea me.+ 11 Ke azɔ mele eŋlɔm na mi be, miadzudzɔ hadede+ kple ame si woyɔna be nɔvi, evɔ wòƒoa eɖokui ɖe gbɔdɔdɔ manɔsenu* me alo nye ŋuklẽla+ alo trɔ̃subɔla alo amedzula alo ahamula+ alo adzodala,+ eye migaɖu nu gɔ̃ hã kple nenem me sia o. 12 Elabena nya kae le mía kple ame siwo le egodo la dome be madrɔ̃ ʋɔnu wo? Ðe menye ame siwo le eme lae miedrɔ̃a ʋɔnui, 13 eye Mawu drɔ̃a ʋɔnu ame siwo le egodo la oa?+ “Miɖe ame vɔ̃ɖi la ɖa le miawo ŋutɔwo mia dome.”+